የሱስ፡ ኵሉ ዚኽእል ኣምላኽ ድዩ፧

ልሙድ መልስታት፦

▪ “እወ፡ የሱስ፡ ኵሉ ዚኽእል ኣምላኽ እዩ።”

▪ “የሱስ ብስጋ እተገልጸ ኣምላኽ እዩ።”

የሱስ እንታይ በለ፧

▪ “ካባይ ኣቦይ ይዐቢ እዩ እሞ፡ እተፍቅሩኒ እንተ ትዀኑስ፡ ናብ ኣቦይ ብምኻደይ ምተሐጐስኩም ኔርኩም።” (ዮሃንስ 14:28) የሱስ፡ ንሱን ኣቦኡን ማዕረ ኸም ዘይኰኑ ገሊጹ እዩ።

▪ “ናብ ኣቦይን ኣቦኹምን ናብ ኣምላኸይን ኣምላኽኩምን እድይብ አሎኹ።” (ዮሃንስ 20:17) የሱስ፡ ንሱ ባዕሉ ኣምላኽ ከም ዝዀነ ኣይተዛረበን፣ የግዳስ፡ ኣምላኽ እተፈልየ ኣካል ከም ዝዀነ እዩ ገሊጹ።

▪ “እቲ ዝለአኸኒ ኣቦ ደኣ እንታይ ከም ዝብልን ዝዛረብን ትእዛዝ ሂቡኒ እምበር፡ ካብ ርእሰይ ኣይዛረብን እየ።” (ዮሃንስ 12:49) ትምህርትታት የሱስ ካብ ርእሱ ዝመንጨወ ዘይኰነስ፡ ካብ ኣቦኡ ዝመጸ እዩ።

የሱስ፡ ወዲ ኣምላኽ ከም ዝዀነ ደኣ እምበር፡ ኵሉ ዚኽእል ኣምላኽ ከም ዝዀነ ኣይተዛረበን። ንሱ ባዕሉ ኣምላኽ እንተ ዀይኑ፡ ኣብ ምድሪ ኸሎ ደኣ ናብ መን እዩ ዚጽሊ ነይሩ፧ (ማቴዎስ 14:23፣ 26:26-29) ንኻልእ ይዛረብ ከም ዘሎ ኣምሲሉ ኣይኰነን ዚዛረብ ነይሩ።

የሱስ፡ ክልተ ኻብቶም ደቀ መዛሙርቱ ኣብታ መንግስቱ እተፈልየ ቦታ ንኺህቦም ምስ ሓተትዎ፡ “ኣብ የማነ ጸጋመይ ምቕማጥ ግና ነቶም ኣቦይ ዘዳለወሎም እዩ እምበር፡ ኣነ ኣይኰንኩን ዝህቦ” በሎም። (ማቴዎስ 20:23) ነቲ ዝለመንዎ ኺህቦም ስልጣን ከም ዘይብሉ ኺዛረቦም ከሎ፡ ይሕሱ ድዩ ነይሩ፧ ኣይኰነን! ኣብ ክንዳኡስ፡ ከምዚ ዝኣመሰለ ውሳነ ንኺገብር ስልጣን ዘለዎ ኣምላኽ ጥራይ ምዃኑ ብትሕትና ሓቢሩ እዩ። ንሱ ዀነ መላእኽቲ ዘይፈልጥዎ፡ ኣቦኡ ጥራይ ግና ዚፈልጦ ነገራት ከም ዘሎ እውን ገሊጹ እዩ።—ማርቆስ 13:32።

የሱስ ኣብ ምድሪ ኸሎ ጥራይ ድዩ ኻብ ኣቦኡ ዚትሕት ነይሩ፧ ኣይፋሉን። ድሕሪ ሞቱን ትንሳኤኡን እውን ንኣምላኽ ከም ዚግዛእ፡ መጽሓፍ ቅዱስ ይገልጽ እዩ። ሃዋርያ ጳውሎስ፡ “ርእሲ ክርስቶስውን ኣምላኽ” ከም ዝዀነ የዘኻኽረና። (1 ቈረንቶስ 11:3) መጽሓፍ ቅዱስ ብዛዕባ መጻኢ ኺገልጽ ከሎ፡ “[ንክርስቶስ] ኵሉ ምስ ተገዝኦ ግና፡ ኣምላኽውን ኵሉ ኣብ ኵሉ ምእንቲ ኪኸውን፡ ሽዑ እቲ ወዲ ባዕሉ ነቲ ዅሉ ዘግዝኦ ኺግዛእ እዩ” ይብል።—1 ቈረንቶስ 15:28።

የሱስ፡ ኵሉ ዚኽእል ኣምላኽ ከም ዘይኰነ ንጹር እዩ። በዚ ምኽንያት እዚ ኸኣ እዩ ንኣቦኡ “ኣምላኸይ” ኢሉ ዝጸውዖ።—ራእይ 3:2, 12፣ 2 ቈረንቶስ 1:3, 4።a

[እግረ-ጽሑፍ]

[ኣብ ገጽ 14 ዘሎ ፍረ ሓሳብ]

የሱስ፡ ንሱ ዀነ መላእኽቲ ዘይፈልጥዎ፡ ኣቦኡ ጥራይ ግና ዚፈልጦ ነገራት ከም ዘሎ ገሊጹ እዩ