ኣምላኽ፡ ዓለምለኻዊት መንግስቲ ኬቕውም ድዩ፧

1. ንደቂ ሰብ ዓለምለኻዊት መንግስቲ እተድልዮም ስለምንታይ እያ፧

ሎሚ፡ መብዛሕትኡ ጸገማት ደቂ ሰብ ዓለምለኻዊ ደረጃ ሒዙ ኣሎ። ኣብ ገሊአን ሃገራት፡ መብዛሕትኦም ሰባት ድኻታትን ጭቁናትን እዮም። ኣብ ገሊአን ከኣ፡ ብዙሓት ሰባት ካብቲ ዜድልዮም ንላዕሊ ኣለዎም። ዓለምለኻዊ ምምሕዳር ጥራይ እዩ ንጸጋታት ምድሪ ብማዕረ ኼከፋፍል ዚኽእል።—መክብብ 4:1፣ 8:9 ኣንብብ።

2. ዓለምለኻዊት መንግስቲ ንምምራሕ ኪእመን ዚኽእል መን እዩ፧

ንዓለም ብግቡእ ኪገዝእ ዚኽእል ሰብኣይ ወይ ሰበይቲ ስለ ዘየልቦ፡ ዓለምለኻዊ ገዛኢ ዚብልዎ ሓሳብ ብብዙሓት ዚፍቶ ኣይኰነን። ብዅሉ ተቐባልነት ኪረክብ ዚኽእል ሰብ የልቦን። ኣብ ርእሲ እዚ እውን፡ ስልጣን ምስ ሓዘ ዘይበላሾ ሰብ መን እዩ፧ ሓደ መላኺ ንዅሎም ደቂ ሰብ ኪገዝኦም ዚብል ሓሳብ ዜፍርህ እዩ።—ምሳሌ 29:2፣ ኤርምያስ 10:23 ኣንብብ።

የሆዋ ኣምላኽ ነቲ ወዱ ዝዀነ የሱስ፡ ንደቂ ሰብ ንዘለኣለም ኪገዝኦም ሓርይዎ ኣሎ። (ሉቃስ 1:32, 33) የሱስ ኣብ ምድሪ ይነብር ነይሩ እዩ። ኣብዚ ኣብ ዝነበረሉ እዋን ከኣ፡ ሕሙማት ኣሕውዩ፡ ትሑታት ምሂሩ፡ ምስ ቈልዑ እውን ግዜ ኣሕሊፉ እዩ። (ማርቆስ 1:40-42፣ 6:34፣ 10:13-16) ስለዚ፡ የሱስ ገዛኢ ንምዃን ዜኽእል ብቕዓት ኣለዎ።—ዮሃንስ 1:14 ኣንብብ።

3. ዓለምለኻዊት መንግስቲ ብሓቂዶ ኽትቀውም ትኽእል እያ፧

ኣምላኽ ንወዱ፡ ኣብ ሰማይ ኰይኑ ንምድሪ ኼመሓድራ ሸይምዎ ኣሎ። (ዳንኤል 7:13, 14) ከምቲ ሰብኣዊ ገዛኢ ኣብ ኵሉ ኸተማታት ብኣካል ኪህሉ ዘየድልዮ፡ የሱስ እውን ንደቂ ሰብ ንምግዛእ ብኣካል ኣብ ምድሪ ኺህሉ ኣየድልዮን እዩ።—ማቴዎስ 8:5-9, 13 ኣንብብ።

ኵሉ ሰብ ንየሱስ ከም ገዛኢ ኪቕበሎ ድዩ፧ ኣይፋልን። ጽቡቕ ዘበለ ዚፈትዉ ሰባት ጥራይ እዮም ዚቕበልዎ። የሆዋ ንምድሪ ኻብቶም ነቲ ንሱ ዝሸሞ ፈቃርን ጻድቕን ገዛኢ ዘይቅበሉ ሰባት ኬጽርያ እዩ።—ማቴዎስ 25:31-33, 46 ኣንብብ።

4. እቲ ገዛኢ ዓለም እንታይ ኪገብር እዩ፧

ከምቲ ጓሳ ንኣባጊዑ ዚእክበን፡ የሱስ ንትሑታት ሰባት ካብ ኵሎም ኣህዛብ ይእክቦምን ናይ ኣምላኽ መገዲ ፍቕሪ ይምህሮምን ኣሎ። (ዮሃንስ 10:16፣ 13:34) ከምዚኣቶም ዝኣመሰሉ ሰባት ንየሱስን ንንግስነቱን ኣጸቢቖም ይድግፉ እዮም። (መዝሙር 72:8፣ ማቴዎስ 4:19, 20) እሙናት ተገዛእቲ የሱስ፡ ንሱ ኸም ዝነገሰ፡ ኣብ ብዘላ ዓለም ብሓድነት ይሰብኩ ኣለዉ።—ማቴዎስ 24:14 ኣንብብ።

የሱስ ንደቂ ሰብ ካብ ብልሹዋት መንግስትታት ሓራ ንምግባር፡ ኣብ ቀረባ ግዜ ስጕምቲ ኺወስድ እዩ። ገሊኦም እሙናት ሰዓብቱ ምስኡ ኣብ ሰማይ ነገስታት ኰይኖም ኣብ ልዕሊ ምድሪ ኺገዝኡ ሓርይዎም ኣሎ። (ዳንኤል 2:44፣ 7:27) መንግስቲ የሱስ ንምድሪ ብፍልጠት የሆዋ ኽትመልኣን ከምታ ኣብ መጀመርታ ታሪኽ ደቂ ሰብ ዝጠፍአት ዓይነት ገነት ክትምስርትን እያ።—ኢሳይያስ 11:3, 9፣ ማቴዎስ 19:28 ኣንብብ።