ዝበለጸ ረኺቦም

ብሚልዮናት ዚቝጸሩ ክርስትያናት፡ በዓል ልደት ንኸየብዕሉ ወሲኖም እዮም። ብዛዕባ እቲ ዝገበርዎ ውሳነ እንታይ እዩ ዚስምዖም፧ ሓደ ነገር ዝጐደሎም ኰይኑዶ ይስምዖም እዩ፧ ደቆምከ እተሓረሙ ዀይኑዶ ይስምዖም እዩ፧ ኣብ መላእ ዓለም ዚርከቡ ናይ የሆዋ መሰኻኽር ብዛዕባ እዚ እንታይ ከም ዚብሉ ርአ።

ንየሱስ ክርስቶስ ምዝካር፦ “ናይ የሆዋ ምስክር ቅድሚ ምዃነይ፡ ሳሕቲ እንተ ዘይኰይኑ፡ ናብ ቤተ ክርስትያን፡ ኣይከይድን እየ ነይረ። እንተ ኸይደ ኸኣ፡ ኣብ እዋን በዓል ልደት ወይ በዓል ትንሳኤ ጥራይ እየ ዝኸይድ ነይረ። ኰይኑ ግና፡ ሽዑ እውን እንተ ዀነ፡ ብዛዕባ የሱስ ክርስቶስ ኣይሓስብን እየ ነይረ። ኣብዚ እዋን እዚ በዓል ልደት ኣየብዕልን እየ፣ ኰይኑ ግና ኣብ ክርስትያናዊ ኣኼባታት ኣብ ሰሙን ክልተ ግዜ እእከብ እየ፡ ንኻልኦት ሰባት ከኣ መጽሓፍ ቅዱስ ብዛዕባ የሱስ እንታይ ከም ዚብል እምህሮም እየ።”—ኢቪ፡ ኣውስትራልያ።

ብምሃብ ዚርከብ ሓጐስ፦ “ሰባት ዘይተጸበኽዎ ውህበት ኪህቡኒ ኸለዉ ሕጕስ እየ ዝብል። ሃንደበት ዜሐጕስ ነገራት ኪግበረለይ ከሎ ደስ እዩ ዚብለኒ። ብዘይካዚ፡ ንሰባት ካርድታት ብምድላውን ስእልታት ብምስኣልን ውህበት ኪህቦም ከለኹ ብመጠኑ የሐጕሶም እዩ፣ ንዓይ እውን የሐጕሰኒ እዩ።”—ሩበን፡ ሰሜናዊ ኣይርላንድ።

ንጽጉማት ምሕጋዝ፦ “ንዝሓመሙ ሰባት ምግቢ ኸነዳልወሎም ከለና ባህ እዩ ዚብለና። ሓድሓደ ግዜ ንኸነሐጕሶም ኢልና፡ ዕንባባታት፡ ኬክ፡ ወይ ከኣ ንእሽቶ ህያብ ንማልኣሎም ኢና። ነዞም ሰባት እዚኦም ኣብ ዓመት ኣብ ዝዀነ ይኹን እዋን ክንበጽሖም ስለ እንኽእል የሐጕሰና እዩ።”—ኢመሊ፡ ኣውስትራልያ።

ምትእኽኻብ ቤተሰብ፦ “ቤተሰብና ምስ ተኣኻኸበት፡ ደቅና ንኣኮታቶምን ንሓወቦታቶምን ንሓትኖታቶምን ንኣሞታቶምን ንደቆምን፡ ከምኡውን ንኣቦሓጎታቶምን ንእኖሓጎታቶምን ይላለይዎም እዮም። ነዚ እንገብሮ ኣብ ፍሉይ እዋን በዓላት ብዘይምዃኑ፡ ውጥረት ኣይስምዓናን እዩ፡ ቤተሰብና ኸኣ ብፍቕሪ ተደሪኽና ኸም እንበጽሖም እዮም ዚፈልጡ።”—ዌንዲ፡ ደሴታት ከይማን።

ሰላም፦ “ኣብ እዋን በዓል ልደት ብዙሕ ዚዕየ ነገራት ስለ ዘሎ፡ መብዛሕትኦም ሰባት ብዛዕባ ሰላም ኣይሓስቡን እዮም። ሕጂ ግና ብዛዕባ እቲ መጽሓፍ ቅዱስ ንደቂ ሰብ እተመባጽዓሎም ነገራት ስለ እተመሃርኩ፡ ቅሳነት ረኺበ እየ። ደቀይ እውን ዜሐጕስ መጻኢ ኸም ዘለዎም ፈሊጠ እየ።”—ሳንድራ፡ ስጳኛ።