ዕዮና ብኸመይ እዩ ዚምወል፧

በብዓመቱ፡ ብኣማእታት ሚልዮናት ዚቝጸር መጽሓፍ ቅዱስን ኣብ መጽሓፍ ቅዱስ እተመስረተ ጽሑፋትን፡ ንሓትምን ንዝርግሕን ኢና። ኣብ ብዘላ ዓለም ድማ ኣብያተ ጽሕፈት ጨንፈርን ቤት ማሕተምን ንሃንጽ ኢና። ብዓሰርተታት ኣሽሓት ዚቝጸራ ጉባኤታት፡ ኣዳራሻት መንግስቲ ኣምላኽ ተባሂሉ ኣብ ዚጽዋዕ ሰሓቢ ቦታታት ኣምልኾ እየን ዚእከባ። እዚ ዅሉ ወጻኢታት ብኸመይ እዩ ዚምወል፧

ዕዮና ምሉእ ብምሉእ በቲ ብፍታው ዚግበር ወፈያታት እዩ ዚምወል። (2 ቈረንቶስ 9:7) ኣብ 1879፡ እታ ኻልአይቲ ሕታም እዛ መጽሔት፦ “‘ናይ ጽዮን ግምቢ ዘብዐኛ’ [ቀደም መጸውዒ እዛ መጽሔት ዝነበረ] ናይ የሆዋ ደገፍ ኣለዋ ኢልና ኢና እንኣምን፡ እቲ ጕዳይ ከምኡ ኽሳዕ ዝዀነ ኸኣ፡ ናይ ሰብ ረድኤት ኣይንልምንን ወይ እውን ኣይንሓትትን ኢና” ዚብል ሓሳባት ኣውጺኣ ነበረት። ሕጂ እውን እንተ ዀነ፡ ካብዚ ፖሊሲ እዚ ነቕ ኣይንብልን ኢና።

ወፈያታት፡ ወይ ብቐጥታ ናብ ሓደ ኻብ ኣብያተ ጽሕፈት ጨንፈርና ይለኣኽ ወይ ድማ ኣብ ነፍሲ ወከፍ ኣዳራሻት መንግስቲ ኣምላኽ ዚርከብ ውጽኢት ሳጹን ይኣቱ። ይኹን እምበር፡ ዕሽር ኣይንሓትትን፡ እናዞርና ገንዘብ ኣይንእክብን ወይ እውን ስለቲ እንህቦ ኣገልግሎትን ጽሑፋትን ገንዘብ ኣይነኽፍልን ኢና። ንኽንሰብኽ፡ ኣብ ጉባኤ ንኽንምህር፡ ወይ ከኣ ቦታታት ኣምልኾ ንኽንሃንጽ ኣይንኽፈልን ኢና። ምኽንያቱ፡ የሱስ “ብናጻ ተቐቢልኩም ኢኹም እሞ፡ ብናጻ ሃቡ” ኢሉ እዩ። (ማቴዎስ 10:8) ኵሎም እቶም ኣብ ኣብያተ ጽሕፈት ጨንፈርን ቀንዲ ቤት ጽሕፈትን ዜገልግሉ ይኹኑ ኣባላት ኣመሓዳሪ ኣካል ናይ የሆዋ መሰኻኽር፡ ብዘይ ክፍሊት እዮም ዚዓይዩ።

እቲ እተወፈየ ገንዘብ ኣብ ዕዮ ረድኤት እውን ይውዕል እዩ። ቀዳሞት ክርስትያናት ነቶም እተሸገሩ ንምሕጋዝ ብፍታው ወፈያታት ገይሮም እዮም። (ሮሜ 15:26) ንሕና እውን ብተመሳሳሊ፡ ነቶም ብሰንኪ ባህርያዊ ሓደጋታት እተጐድኡ፡ መንበሪ ኣባይቶምን ቦታታት ኣምልኾኦምን ብምህናጽ ከምኡ እውን ምግብን ክዳውንትን ሕክምናዊ ሓገዝን ብምሃብ ንሕግዞም ኢና።