ኣብ ኣገልግሎት ክእለትካ ኣመሓይሽ —ካልእ ቋንቋ ንዚዛረብ ሰብ መስክረሉ

ኣገዳሲ ዝዀነ ስለምንታይ እዩ፧ የሆዋ ብመንፈሳዊ ድሕነት እቶም “ኣብ ኵሉ ህዝቢ” ዘለዉ ሰባት ይግደስ እዩ። (ግብ. 10:34, 35) ስለዚ ድማ እዩ የሱስ፡ ብስራት መንግስቲ ኣምላኽ “ንምስክር ኵሎም ኣህዛብ ኣብ ኵላ ዓለም ኪስበኽ” ምዃኑ ዝሓበረ። (ማቴ. 24:14) ዘካርያስ፡ “ካብ ኵሉ ቛንቋታት ኣህዛብ” ዝዀኑ ሰባት ምላሽ ከም ዚህቡ ተንብዩ እዩ። (ዘካ. 8:23) ብመሰረት እቲ ሃዋርያ ዮሃንስ ዝረኣዮ ራእይ ከኣ፡ “ካብ ኵሎም ኣህዛብን ነገዳትን ህዝብታትን ቋንቋታትን” ዝዀኑ ሰባት እዮም ካብቲ ብርቱዕ ጸበባ ዚድሕኑ። (ራእ. 7:9, 13, 14) በዚ መሰረት እዚ፡ ኣብ ክልና ኻልእ ቋንቋ ዚዛረብ ሰብ እንተ ረኺብና፡ ክንምስክረሉ ኽንጽዕር ኣሎና።