ጸሎት ብኸመይ እዩ ዚሕግዘካ፧

ፓሜላ ኸቢድ ሕማም ምስ ኣጋጠማ፡ ሕክምናዊ ደገፍ ክትረክብ ጽዒራ እያ። ይኹን እምበር፡ ነቲ ዘጋጠማ ዅነታት ክትጻወሮ፡ ሓይሊ ኺህባ ናብ ኣምላኽ ጸልያ እያ። እሞኸ፡ ጸሎት ሓጊዝዋ ድዩ፧

ፓሜላ ኸምዚ ብምባል ትገልጽ፦ “ንመንሽሮይ ሕክምና ኺግበረለይ ከሎ፡ ኣዝየ እየ ዝፈርህ ነይረ፡ ናብ የሆዋ ኣምላኽ ክጽሊ ኸለኹ ግና፡ ውሽጣዊ ህድኣትን ቅሳነትን ይስምዓኒ ነይሩ። ብዙሕ ቃንዛ እኳ እንተ ኣሎኒ፡ ጸሎት ኣወንታዊ ኣረኣእያ ኽሕዝ ሓጊዙኒ እዩ። ሰባት ከመይ ከም ዚስምዓኒ ኺሓትቱኒ ኸለዉ፡ ‘ደሓን ኣይኰንኩን፡ ግና ሕጕስቲ እየ’ እየ ዝብሎም።”

ንኣምላኽ ብጸሎት ክንቀርቦ ግና ከቢድ ሕማም ክሳዕ ዜጋጥመና ኽንጽበ ኣየድልየናን እዩ። ኵላትና ኸቢድን ቀሊልን ብድሆታት የጋጥመና እዩ። ክንዋጽኣሉ ኸኣ ሓገዝ ከም ዜድልየና ዀይኑ ይስምዓና እዩ። እሞኸ፡ ጸሎት ኪሕግዘና ይኽእል ድዩ፧

መጽሓፍ ቅዱስ፡ “ጾርካ ናብ የሆዋ ደርቢ፣ ንሱ ድማ ኪድግፈካ እዩ። ንጻድቕ ኪወድቕ ከቶ ኣይሓድጎን እዩ” ይብል። (መዝሙር 55:22) እዚ ሓሳብ እዚስ፡ ክንደይ ዜጸናንዕ ኰን እዩ! ስለዚ እምበኣር፡ ጸሎት ብኸመይ እዩ ኺሕግዘካ ዚኽእል፧ በቲ ግቡእ መገዲ ናብ ኣምላኽ ክትጽሊ ኸለኻ፡ ንብድሆታትካ ኽትዋጽኣሉ፡ ዜድሊ ደገፍ ኪህበካ እዩ። “ጸሎት ብኸመይ ከም ዚሕግዘካ” ዘርእስታ ሳጹን ርአ።

ጸሎት ብኸመይ ከም ዚሕግዘካ

ናይ ኣእምሮ ሰላም

“ልማኖኹም ብጸሎትን ብምህለላን ምስ ምስጋና ኣብ ኣምላኽ ይፈለጥ እምበር፡ ብዛዕባ ገለ እኳ ኣይትጨነቑ፣ እቲ ኻብ ኵሉ ሓሳብ ዚበልጽ ሰላም ኣምላኽ ድማ ንልብኹምን ንኣእምሮኹምን ብክርስቶስ የሱስ ኪሕልዎ እዩ።” (ፊልጲ 4:6, 7) ዜጨንቐካ ነገራት ንኣምላኽ ከተፍስሰሉ ኸለኻ፡ ክትሃድእን ንጭንቀትካ ብጥበብ ክትዋጽኣሉን ኪሕግዘካ እዩ።

ካብ ኣምላኽ ዚርከብ ጥበብ

“ሓደ ኻባኻትኩም ጥበብ እንተ ጐዲላቶ ኸኣ፡ ነቲ ኸይነቐፈ ንዅሉ ብልግሲ ዚህብ ኣምላኽ ይለምኖ፣ ኪውሃቦ እውን እዩ።” (ያእቆብ 1:5) ጸቕጢ ኼጋጥመና ኸሎ፡ ሓድሓደ ግዜ ነቲ እንገብሮ ውሳነታት እውን ይጸልዎ እዩ። ጥበብ ኪወሃበካ እንተ ጸሊኻ፡ ኣምላኽ ነቲ ኣብ ቃሉ ኣብ መጽሓፍ ቅዱስ ዚርከብ ጠቓሚ ዝዀነ ሓያሎ ስርዓታት ኬዘኻኽረካ ይኽእል እዩ።

ብርታዐን መጸናንዕን

“በቲ ሓይሊ ዚህበኒ ንዅሉ እኽእሎ እየ።” (ፊልጲ 4:13) የሆዋ ዅሉ ዚኽእል ኣምላኽ ስለ ዝዀነ፡ ንዜጋጥመካ ብድሆታት ክትዋጽኣሉ ወይ ከኣ ንዜጋጥመካ ፈተናታት ክትጻወሮ ዜኽእል ሓይሊ ኺህበካ ይኽእል እዩ። (ኢሳይያስ 40:29) መጽሓፍ ቅዱስ ንየሆዋ፡ “ኣምላኽ ኵሉ ምጽንናዕን” እዩ ዚብሎ። “ኣብ ኵሉ ጸበባና” ኸኣ ኬጸናንዓና ይኽእል እዩ።—2 ቈረንቶስ 1:3, 4።

እሞኸ ኽትጽሊ ዲኻ፧

የሆዋ ናብኡ ኽትጽሊ ኣይግድደካን እዩ። ካብ ፍቕሪ ተላዒሉ ግና ይዕድመካ እዩ። (ኤርምያስ 29:11, 12) እቲ ኣብ ዝሓለፈ እዋን ዝጸለኻዮ ጸሎት ከም ዘይተመልሰ ዀይኑ እንተ ተሰሚዑካኸ፧ ተስፋ ኣይትቝረጽ ወይ ኣይትተሓለል። ፈቃራት ወለዲ ንደቆም ዚሕግዝዎም፡ በቲ ደቆም ዚደልይዎ መገዲ ወይ ኣብቲ ደቆም ዚደልይዎ እዋን ከይከውን ይኽእል እዩ። ምናልባት ወለዲ ዝሓሸ ፍታሕ ኪህልዎም ይኽእል እዩ። ይኹን እምበር፡ በዚ ዀነ በቲ ፈቃራት ወለዲ ንደቆም ከም ዚሕግዝዎም እተረጋገጸ እዩ።

እቲ ኣዝዩ ፈቃር ኣቦ ዝዀነ የሆዋ ኣምላኽ እውን ኪሕግዘካ ይደሊ እዩ። ነቲ ኽሳዕ ሕጂ እተመያየጥናሉ ቕዱስ ጽሑፋዊ መምርሒ ብጥንቃቐ እንተ መርሚርካዮ፡ ብእተኻእለካ መጠን ከኣ እንተ ተግቢርካዮ፡ ኣምላኽ ብብሉጽ መገዲ ንጸሎትካ ኺምልሶ እዩ።—መዝሙር 34:15፣ ማቴዎስ 7:7-11።