እምነት ኣላትካዶ፧

ንየሆዋ ባህ ንምባል፡ እምነት ኪህልወና ኣለዎ። መጽሓፍ ቅዱስ ግና፡ “እምነት ናይ ኵሉ ሰብ ኣይኰነትን” ይብል እዩ። (2 ተሰሎንቄ 3:2) ሃዋርያ ጳውሎስ ኣብዛ ፍቕዲ እዚኣ፡ ብዛዕባ እቶም “ጐዳእትን እኩያትን” ዝዀኑ ሰጐጕቱ እዩ ዚዛረብ ነይሩ። እዚ ብዛዕባ እምነት እተዛረቦ ቓላት ግና፡ ብዛዕባ ኻልኦት እውን ኪብሃል ይከኣል እዩ። ገሊኦም ሰባት ነቲ ንህልውና ፈጣሪ ዚድግፍ ንጹር መርትዖ ኣይቅበልዎን እዮም። (ሮሜ 1:20) ገሊኦም ከኣ ዝለዓለ ሓይሊ ዘለዎ ኣካል ከም ዘሎ ዚኣምኑ እኳ እንተ ዀኑ፡ እዚ በይኑ ግና ንየሆዋ ባህ ኣየብሎን እዩ።

የሆዋ ኸም ዘሎን ንዚደልይዎ “ዓስቢ ኸም ዚህቦምን” ክንኣምን ኣሎና። (እብ. 11:6) እምነት ሓንቲ ኻብ መዳያት ፍረ መንፈስ ቅዱስ እያ። መንፈስ ቅዱስ ንምርካብ ከኣ፡ ንየሆዋ ብጸሎት ክንልምኖ ኣሎና። (ሉቃ. 11:9, 10, 13) ነቲ መንፈስ እቲ ኽንረኽበሉ እንኽእል ካልእ ኣገዳሲ መገዲ ድማ፡ ብድራኸ መንፈስ እተጻሕፈ ቓል ኣምላኽ ብምንባብ እዩ። ድሕሪኡ፡ ብዛዕባ እቲ ዘንበብናዮ ኽንሓስብን ነቲ እተምሃርናዮ ንምትግባር ዚከኣለና ኽንጽዕርን ኣሎና። ከምኡ እንተ ጌርና፡ መንፈስ የሆዋ ንህይወትና ኺጸልዎ እሞ ንየሆዋ ባህ ዜብል እምነት ከነማዕብል ኢና።