ጁኽ ዝሕብሩ ስሉስ ኵርናዕ ዝመለለይኦም

ኣብ ፈረንሳይ እትነብር ማውድ፡ ኣብ ሓደ ቤት ትምህርቲ ንስንኩላን ተምሃሮ እያ ትሕግዝ። ሓደ እዋን፡ ኣብ ሓደ ንሳ እትሰርሓሉ ኽፍሊ ዝነበሩ ተምሃሮ ብዛዕባ እቲ ብስርዓት ናዚ እተፈጸመ ጃምላዊ ቕትለትን መዳጐኒ ደምበታትን ይምሃሩ ነበሩ። እሱራት እቲ መዳጐኒ፡ እተፈላለየ ቕርጽን ሕብርን እተለጠፎ ዲቪዛ እዮም ዚኽደኑ ነይሮም። ቅርጽን ሕብርን እቲ ጨርቂ፡ እቲ ሰብ እተኣስረሉ ምኽንያት እዩ ዚሕብር ነይሩ።

እቲ መምህር፡ ናብቲ ገሊኦም እሱራት ተኸዲኖምዎ ዝነበሩ ዲቪዛ እተለገበ ጁኽ ዝሕብሩ ስሉስ ኵርናዕ እናኣመልከተ፡ “እዚኦም፡ ግብረ ሶዶማውያን ስለ ዝነበሩ እዮም መስለኒ” በለ። ድሕሪ ትምህርቲ፡ ማውድ ነቲ መምህር፡ ስርዓት ናዚ፡ ነቲ ጁኽ ዝሕብሩ ስሉስ ኵርናዕ ከም መለለዪ ናይ የሆዋ መሰኻኽር ይጥቀምሉ ኸም ዝነበሩ ገለጸትሉ።a ብዛዕባ እዚ ርእሰ ነገር እዚ ዚገልጽ፡ ገለ ጽሑፋት ሒዛትሉ ኸም እትመጽእ ነገረቶ። እቲ መምህር፡ ነቲ ሓሳብ ተቐቢሉ ንማውድ፡ እቲ ሓበሬታ ነቶም ተምሃሮ ኸተካፍሎም ሓቲትዋ።

ኣብ ካልእ ክፍለ ግዜ፡ ሓንቲ ኻልእ መምህር ብዛዕባ እቲ ኣርእስቲ ኽትምህር ከላ፡ እቶም እሱራት እተኸድንዎ እተፈላለየ ምልክታት ኣብ ሰሌዳ ተርእዮም ነይራ። እቲ ጁኽ ዝሕብሩ ስሉስ ኵርናዕ ንናይ የሆዋ መሰኻኽር ከም ዜመልክት ኣብቲ ሰሌዳ ብንጹር ተራእዩ እዩ። ድሕሪ ትምህርቲ፡ ማውድ ነታ መምህር ብዛዕባ እቲ ርእሰ ነገር ዚገልጽ ሓበሬታ ሃበታ። እታ መምህር ነዚ ሓበሬታ እዚ ተቐቢላ፡ ማውድ ነቶም ተምሃሮ ብዛዕባኡ ኽትገልጸሎም ዕድል ሃበታ።

ነታ ቐዳመይቲ ኽፍሊ፡ ናይ 15 ደቒቕ መግለጺ ንምሃብ ተዳልያ እኳ እንተ ነበረት፡ እቲ ግዜ ምስ ኣኸለ፡ “ምሉእ ሰዓት ክትዛረቢ ትኽእሊ ኢኺ” ተባሂሉ ተነግራ። መጀመርታ፡ ማውድ ብዛዕባ እቲ ስርዓት ናዚ ኣብ ልዕሊ ናይ የሆዋ መሰኻኽር ዘውረድዎ መስጐጕቲ ዚገልጽ ቪድዮ ኣርኣየቶም። እታ ቪድዮ፡ ስርዓት ናዚ 800 ቘልዑ ናይ የሆዋ መሰኻኽር ካብ ወለዶም ፈልዮም ወሲዶምዎም ኣብ ዚብል ትርኢት ምስ በጽሐት፡ ማውድ ነታ ቪድዮ ደው ኣቢላ፡ ካብኣቶም ናይ ሰለስተ ቘልዑ ተመክሮ ኣንበበትሎም። ማውድ ነቲ ቪድዮ ኣርእያ ምስ ወድአት፡ ገርሃርት ሽታይናኸር እተባህለ ወዲ 19 ዓመት ኦስትርያዊ ናይ የሆዋ ምስክር፡ ብ1940 ብናዚ ቀቕድሚ ምቕንጻሉ፡ ቍሩብ ሰዓታት ኣቐዲሙ ዝጸሓፎ ናይ ስንብታ ደብዳበ ብምንባብ እያ ደምዲማቶ።b

ማውድ ነታ ኻልአይቲ ኽፍሊ እውን ተመሳሳሊ መግለጺ ኣቕረበትሎም። ሳላ እቲ ማውድ ዘርኣየቶ ትብዓት፡ ክልቲኦም መምህራን ብዛዕባ ግዳያት መዳጐኒ ደንበታት ስርዓት ናዚ ኺምህሩ ኸለዉ ንናይ የሆዋ መሰኻኽር ከይጠቐስዎም ኣይሓልፉን እዮም።