የሱስ ንገበን መወዳእታ ኺገብረሉ እዩ

የሱስ፡ ገበንን ዘይፍትሓውነትን ዜስዕቦ ስቓይ ተመኪርዎ እዩ። ብሓሶት ተኸሲሱ፡ ብዘይ ሕጋዊ መገዲ ተወቒዑ፡ ምጕዳል ፍትሒ ኣጋጢምዎ፡ ብጌጋ ተፈሪዱ፡ ኣብ መወዳእታ ድማ ብዜሳቒ መገዲ ተቐቲሉ እዩ። ንጹህ እኳ እንተ ነበረ፡ ብወለንታን ብፍታውን “ህይወቱ ምእንቲ ብዙሓት በጃ” ሰዊኡ እዩ። (ማቴዎስ 20:28፣ ዮሃንስ 15:13) ከም ንጉስ መንግስቲ ኣምላኽ መጠን ከኣ ኣብ ቀረባ ግዜ ኣብ ምልእቲ ምድሪ ፍትሒ ኼስፍን፣ ንገበን እውን ሓንሳእን ንሓዋሩን ኬጥፍኦ እዩ።—ኢሳይያስ 42:3።

መጽሓፍ ቅዱስ፡ የሱስ ስጕምቲ ምስ ወሰደ፡ ዓለም ከመይ ከም እትመስል ይገልጽ፦

• “እኩያት ኣይኪህልዉን እዮም፣ ኣብቲ ዝነበሩሉ ኽትደልዮም ኢኻ፣ ኣብኡ እውን ኣይኪህልዉን እዮም። ዓቃላት ግና ንምድሪ ኺርስተይዋ እዮም፣ ብብዝሒ ሰላም ከኣ ኣዝዩ ደስ ኪብሎም እዩ።”—መዝሙር 37:10, 11።

ነቲ የሱስ ዝገበረልናን ነቲ ብሕጂ ዚገብረልናን ዘሎና ሞሳ ብኸመይ ነርኢ፧ ብዛዕባ እቲ ንሱ ዚሰብኮ ዝነበረ መልእኽቲ፡ ማለት ብዛዕባ “ብስራት መንግስቲ ኣምላኽ” ብዝያዳ ብምፍላጥ እዩ። (ሉቃስ 4:43) ከምኡ ንምግባር፡ ነታ “መንግስቲ ኣምላኽ እንታይ እያ፧” ዘርእስታ ዓንቀጽ ኣንብባ።