እቶም ደቀ መዛሙርቲ የሱስ ዝዀኑ

ኣብ ምድሪ ይነብሩ ኻብ ዝነበሩ ሰባት እቲ ዝበለጸ ኣገልጋሊ ኣምላኽ መን እዩ ምበልካ፧⁠— ልክዕ ኣለኻ: የሱስ ክርስቶስ እዩ። ንዕኡ ኽንመስሎ ንኽእልዶ ይመስለካ፧⁠— መጽሓፍ ቅዱስ ንዕኡ ንኽንስዕቦ ኣብነት ከም ዝገደፈልና ይነግረና። ደቀ መዛሙርቱ ንኽንከውን ከኣ ዓዲሙና እዩ።

ወደ መዝሙር የሱስ ኪበሃል ከሎስ እንታይ ማለት ምዃኑ ትፈልጥዶ፧⁠— ብዙሕ ነገራት ዝሓቘፈ እዩ። ብመጀመርታ ኻብኡ ኽንመሃር ኣሎና። እዚ ጥራይ ግን እኹል ኣይኰነን። ነቲ ዚብሎ ብሓቂ ኽንኣምነሉ ይግብኣና። እንተደኣ ኣሚንናሉ ድማ ኣብ ግብሪ ኸነውዕሎ ኢና።

ብዙሓት ሰባት ብየሱስ ንኣምን ኢና ይብሉ። ኵላቶም ናይ ሓቂ ደቀ መዛሙርቱዶ ይመስለካ፧⁠— መብዛሕትኦም ኣይኰኑን። ናብ ቤተ⁠-​ክርስትያን ይኸዱ ይዀኑ። ሓያሎ ኻባታቶም ግን ብዛዕባ እቲ የሱስ ዝመሃሮ ንኺፈልጡ ግዜ ኣይምድቡን እዮም። ብሓቂ እምበኣር: ደቀ መዛሙርቲ የሱስ ዚበሃሉ እቶም ኣብነቱ ዚስዕቡ ጥራይ እዮም።

ብዛዕባ እቶም የሱስ ኣብ ምድሪ ኸሎ ደቀ መዛሙርቱ ዝነበሩ ገለ ሰባት እስከ ንዘራረብ። ሓደ ኻብቶም ቀዳሞት ደቀ መዛሙርቱ ፊልጶስ እዩ። ፊልጶስ ነዚ ኣብ ትሕቲ ገረብ ኮፍ ኢሉ እትርእዮ ዘለኻ ዓርኩ ናትናኤል (በርተሎሜዎስ እውን ዚበሃል) ይረኽቦ። ናትናኤል ናብ የሱስ ምስ መጸ: የሱስ “እንሆ: ጕርሒ ዜብሉ ቕኑዕ እስራኤላዊ” በሎ። ናትናኤል በዚ ተገሪሙ “ኣበይ ትፈልጠኒ፧” ኢሉ ሓተቶ።

የሱስ ከኣ “ፊልጶስ ከይጸውዓካ: ኣብ ትሕቲ በለስ ከሎኻ ርእየካ” በሎ። የሱስ ንናትናኤል ኣበይ ከም ዝነበረ ፈልዩ ስለ ዝነገሮ: ናትናኤል “ንስኻ ወዲ ኣምላኽ ኢኻ: ንስኻ ንጉስ እስራኤል ኢኻ” ኢሉ መለሰሉ።​—⁠ዮሃንስ 1:49

ቀቅድሚ እታ ፊልጶስን ናትናኤልን ደቀ መዛሙርቲ የሱስ ዝዀኑላ መዓልቲ ኻልኦት እውን ደቀ መዛሙርቲ የሱስ ኰይኖም ነበሩ። እዚኣቶም ከኣ እንድርያስን ጴጥሮስ ሓዉን ከምኡውን ዮሃንስን ምናልባትውን ያእቆብ ሓዉን እዮም። (ዮሃንስ 1:35-51) ይኹን እምበር: ቍሩብ ጸኒሖም እዞም ሰባት እዚኣቶም ናብቲ ናይ ምግፋፍ ዕዮኦም ተመሊሶም እዮም። ሓደ መዓልቲ የሱስ ኣብ ገማግም ባሕሪ ኪኸይድ ከሎ: ጴጥሮስን እንድርያስን መርበቦም ኣብ ባሕሪ ኺድርብዩ ኸለዉ ረኣዮም እሞ: “ንዑ ስዐቡኒ” በሎም።

የሱስ ቍሩብ ምስ ከደ: ንያእቆብን ንዮሃንስን ረኣዮም። ኣብ ጃልባ ምስ ኣቦኦም ኰይኖም መርበቦም ኬዕርዩ ኸለዉ ረኣዮም እሞ: ንዓታቶም እውን ኪስዕብዎ ነገሮም። ንስኻኸ የሱስ እንተ ዚጽውዓካ ነይሩ: እንታይ ምገበርካ ኔርካ፧ ብኡንብኡዶ ምስኡ ምኸድካ፧⁠— እዞም ሰባት እዚኣቶም ንየሱስ መን ምዃኑ ፈሊጦምዎ እዮም። ብኣምላኽ እተላእከ ምዃኑ ይፈልጡ ነይሮም እዮም። ስለዚ: ብኡንብኡ ነቲ ናይ ምግፋፍ ዕዮኦም ገዲፎም ሰዓብዎ።​—⁠ማቴዎስ 4:18-22

እዞም ሰባት እዚኣቶም ሰዓብቲ የሱስ ምስ ኰኑ: ድሕሪኡ ዅሉ ሳዕ ቅኑዕ ጥራይ ይገብሩ ነይሮም ማለት ድዩ፧⁠— ኣይፋሎምን። እዞም ሰባት እዚኣቶም መን ከም ዚዓቢ ንሓድሕዶም ይካትዑ ኸም ዝነበሩ ትዝክሮ ትኸውን ኢኻ። ይኹን እምበር: ንየሱስ ሰሚዖምዎ እዮም: ንኺልወጡ ድማ ፍቓደኛታት ነበሩ። ንሕናውን ንኽንልወጥ ፍቓደኛታት እንተደኣ ዄንና: ደቀ መዛሙርቲ የሱስ ክንከውን ንኽእል ኢና።

የሱስ ንዅሎም ዓይነት ሰባት ደቀ መዛሙርቱ ኪዀኑ ዓዲምዎም እዩ። ሓደ መዓልቲ ሓደ ሃብታም መራሒ ናብ የሱስ መጺኡ: ከመይ ገይሩ ናይ ዘለኣለም ህይወት ኪረክብ ከም ዚኽእል ሓተቶ። እቲ ሃብታም መራሒ ንዅሉ ትእዛዛት ኣምላኽ ካብ ቍልዕነቱ ኣትሒዙ ኸም ዚሕልዎ ምስ ገለጸሉ: የሱስ ‘ንዓ ስዓበኒ’ በሎ። ድሕሪኡ እንታይ ከም ዝገበረ ትፈልጥዶ፧⁠—

እቲ ሰብኣይ: ወደ መዝሙር የሱስ ምዃን: ሃብታም ካብ ምዃን ንላዕሊ ኣገዳሲ ጌርካ ኺርአ ኸም ዘለዎ ምስ ፈለጠ ኣዝዩ ጐሃየ። ካብ ኣምላኽ ንላዕሊ ነቲ ዝነበሮ ገንዘብ ስለ ዘፍቀረ ኸኣ: ወደ መዝሙር የሱስ ኪኸውን ኣይከኣለን።​—⁠ሉቃስ 18:18-25

የሱስ ዳርጋ ንሓደ ዓመትን መንፈቕን ኣቢሉ ምስ ሰበኸ: ካብ ደቀ መዛሙርቱ ሃዋርያት ዚዀኑ 12 መረጸ። እቶም ሃዋርያት: የሱስ ንሓደ ፍሉይ ዕዮ ዝመዘዞም ሰብኡት እዮም ነይሮም። ስሞም ትፈልጦዶ፧⁠— ከነጽንዖ ንኽእል እንተደኣ ዄንና እስከ ንርአ። ነቲ ኣብዚ ዘሎ ስእሊ ረኣዮ እሞ: ስሞም ክትረቍሕ ወይ ክትጽውዕ እስከ ፈትን። ድሕርዚ ኸይረኣኻ ስሞም ክትረቍሕ ፈትን።

ደሓር ሓደ ኻብቶም 12 ሃዋርያት እከይ ኰነ። ንሱ ኸኣ ይሁዳ ኣስቆሮታዊ እዩ። ድሕርዚ ኻልእ ወደ መዝሙር ሃዋርያ ኪኸውን ተመርጸ። ስሙ ትፈልጦዶ፧⁠— ማትያስ ይበሃል። ድሕርዚ ጳውሎስን በርናባስን ሃዋርያት ኰኑ: ካብቶም 12 ግን ኣይነበሩን።​—⁠ግብሪ ሃዋርያት 1:23-26፣ 14:14

ከምቲ ኣብ ምዕራፍ 1 እዛ መጽሓፍ እዚኣ ዝረኣናዮ: የሱስ ንንኣሽቱ ቘልዑ ይግደሰሎም ነይሩ እዩ። ስለምንታይ እዩ ግን ዚግደሰሎም ነይሩ፧⁠— ንሳቶም እውን ደቀ መዛሙርቱ ኪዀኑ ኸም ዚኽእሉ ይፈልጥ ስለ ዝነበረ እዩ። መብዛሕትኡ ግዜ ቘልዑ: ንዓበይቲ ብዛዕባ እቲ ዓብዪ መምህር ኪሰምዑን ኪመሃሩን ድሌት ኬሕድረሎም ዚኽእል ሓሳባት የቕርቡ እዮም።

ሓያሎ ኣንስቲ እውን ደቀ መዛሙርቲ የሱስ ኰይነን እየን። ገሊኣተን ንኺሰብኽ ናብ ካልእ ከተማታት ኪኸይድ ከሎ: ምስኡ ሓቢረን ተጓዒዘን እየን። ማርያም መግደላዊት: ዮሃና: ሱሳና ኸምኡ እየን ገይረን። ምግቢ ብምድላውን ክዳውንቱ ብምሕጻብን ይሕግዛኦ ነይረን ኪዀና ይኽእላ እየን።​—⁠ሉቃስ 8:1-3

ወደ መዝሙር የሱስ ክትከውን ትደሊዶ፧⁠— ደቀ መዛሙርቱ ኢና ብምባል ጥራይ ደቀ መዛሙርቱ ኽንከውን ከም ዘይንኽእል እተመሃርናዮ ሓሳባት ኣይትረስዓዮ። ናብ ክርስትያናዊ ኣኼባታት ክንከይድ ከለና ጥራይ ዘይኰነስ: ኣብ ዝዀነ ይኹን ቦታ ደቀ መዛሙርቱ ምዃንና ብግብሪ ኸነርኢ ይግባእ። ደቀ መዛሙርቲ የሱስ ምዃንና ብግብሪ ኸነርኢ ዜድልየሉ ገለ ቦታታት ክትጠቅስ ምኸኣልካዶ፧⁠—

እወ: ኣብ ገዛ ብግብሪ ኸነርኢ ኣሎና። ካልእ ከኣ ኣብ ቤት ትምህርቲ እዩ። ኣነን ንስኻን ፈጺምና ኽንርስዖ ዘይብልና ነገር እምበኣር: ናይ ሓቂ ወደ መዝሙር የሱስ ንምዃን ኣብ ዝሃለና ንሃሉ ዅሉ ሳዕ ከምቲ ንሱ ዝገበሮ ኽንገብር ይግብኣና።