ትምህርቲ 02

መጽሓፍ ቅዱስ ተስፋ ይህብ

ብወረቐት ኣብ እተሓትመ

ኣብ ብዘላ ዓለም ዘለዉ ሰባት፡ ጓሂ፡ ጭንቀት፡ ካብኡ ሓሊፉ እውን ስቓይ ዜስዕብ ጸገማት የጓንፎም ኣሎ። ንስኻኸ ኸምኡ ኣጋጢሙካዶ ይፈልጥ፧ ምናልባት ብሰንኪ ሕማም ወይ ሞት እትፈትዎ ሰብካ መከራ ረኺብካ ትኸውን። በዚ ምኽንያት እዚ፡ ‘ህይወትና ኺመሓየሽ ድዩ፧’ ኢልካ ሓቲትካ ትኸውን። መጽሓፍ ቅዱስ ነዚ ሕቶ እዚ ዚኸውን፡ ዜጸናንዕ መልሲ ይህብ እዩ።

1. መጽሓፍ ቅዱስ ብኸመይ እዩ ተስፋ ዚህብ፧

መጽሓፍ ቅዱስ፡ ዓለም ብጸገማት መሊኣትሉ ዘላ ምኽንያት ጥራይ ኣይኰነን ዚገልጽ። የግዳስ፡ እዚ ጸገማት እዚ ግዜያዊ ኸም ዝዀነን ኣብ ቀረባ ግዜ ኸም ዚውገድን እውን የበስር እዩ። ኣብ መጽሓፍ ቅዱስ ዚርከብ ተስፋታት፡ “ብሩህ መጻእን ተስፋን” ኪህበካ ይኽእል እዩ። (ኤርምያስ 29:11, 12 ኣንብብ።) እዚ ተስፋታት እዚ ኸኣ ንጸገማትና ኽንጻወሮ፡ ኣወንታዊ ኣረኣእያ ኺህልወና፡ ከምኡ እውን ነባሪ ሓጐስ ክንረክብ ይሕግዘና እዩ።

2. መጽሓፍ ቅዱስ እንታይ ዓይነት መጻኢ እዩ ዜተስፉ፧

ኣብቲ መጽሓፍ ቅዱስ ዚገልጾ መጻኢ፡ “ደጊም ሞት ኣይኪኸውንን፡ ደጊም እውን ሓዘን ወይ ኣውያት ወይ ስቓይ ኣይኪኸውንን እዩ።” (ራእይ 21:4 ኣንብብ።) እቲ ሎሚ ንህይወት ተስፋ ኣልቦ ዚገብራ ኸም ድኽነት፡ ዘይፍትሓውነት፡ ሕማም፡ ሞት ዝኣመሰለ ጸገማት ኣይኪህሉን እዩ። ሰባት ኣብ ገነታዊት ምድሪ ንዘለኣለም ከም ዚነብሩ፡ መጽሓፍ ቅዱስ የተስፉ እዩ።

3. ነቲ መጽሓፍ ቅዱስ ዚህቦ ተስፋ ብኸመይ ክትኣምኖ ትኽእል፧

ብዙሓት ሰባት ጽቡቕ ኪኸውን ተስፋ ይገብሩ እዮም። ተስፋኦም ከም ዚፍጸም ግና ርግጸኛታት ኪዀኑ ኣይክእሉን እዮም። እቲ መጽሓፍ ቅዱስ ዜተስፍዎ ግና፡ ካብዚ እተፈልየ እዩ። “ቅዱሳት ጽሑፋት [ብምምርማር፡]” ኣብቲ ዚብሎ እምንቶ ኸነሕድር ንኽእል ኢና። (ግብሪ ሃዋርያት 17:11) መጽሓፍ ቅዱስ ከተጽንዕ ከለኻ፡ ነቲ ብዛዕባ መጻኢ ዚብሎ ኽትኣምኖ ትኽእል እንተ ዄንካ፡ ባዕልኻ ኽትውስን ትኽእል ኢኻ።

ኣዕሚቝካ ዅዓት

ገለ ኻብቲ መጽሓፍ ቅዱስ ብዛዕባ መጻኢ ዜተስፍዎ ተስፋታት መርምር። መጽሓፍ ቅዱስ ዚህቦ ተስፋ ሎሚ ንሰባት ብኸመይ ይሕግዞም ከም ዘሎ እውን ርአ።

ስእልታት፦ ሎሚ ዘሎ ዅነታት ምስቲ መጽሓፍ ቅዱስ ብዛዕባ መጻኢ ዜተስፍዎ ዅነታት ይነጻጸር። እቲ ንጽጽር ኣብ ታሕቲ እውን ይድገም።

4. መጽሓፍ ቅዱስ ኣብ ፍጹም ኵነታት ንዘለኣለም ክንነብር ከም እንኽእል የተስፉ

ነዚ ዚስዕብ ኣብ መጽሓፍ ቅዱስ ዚርከብ ተስፋታት ርአ። ካብዚ ምናዳ ንዓኻ ዚስሕበካ እንታይ እዩ፧ ስለምንታይከ፧

ነቲ ኣብ ጐድኒ እቲ ተስፋታት ዘሎ ጥቕስታት መጽሓፍ ቅዱስ ኣንብብ፡ ነዚ ሕቶታት እውን ተመያየጡሉ፦

እዚ ጥቕስታት መጽሓፍ ቅዱስ፡ ተስፋ ዚህብዶ ይመስለካ፧ ንስድራ ቤትካን ንፈተውትኻንከ ተስፋ ኺህቦም ይኽእልዶ፧

ሕስብ እሞ ኣብሎ

ሓደ እኳ . . .	ኵሉ ሰብ . . .
ኣይኪሳቐን፡ ኣይኪኣርግን፡ ወይ ኣይኪመውትን እዩ።—ኢሳይያስ 25:8።	ንዚፈትዎ ሰቡ ኣብ ምድሪ ብትንሳኤ ኺረክብ እዩ።—ዮሃንስ 5:28, 29።
ኣይኪሓምምን ወይ ምስ ስንክልናኡ ኣይኪነብርን እዩ።—ኢሳይያስ 33:24፣ 35:5, 6።	ጽቡቕ ጥዕናን ንእስነትን ኪረክብ እዩ።—እዮብ 33:25።
ኣደዳ ዘይፍትሓውነት ኣይኪኸውንን እዩ።—ኢሳይያስ 32:16, 17።	እኹል ምግብን ምሹእ መንበርን ዜዕግብ ስራሕን ኪረክብ እዩ።—መዝሙር 72:16፣ ኢሳይያስ 65:21, 22።
ግዳይ ውግእ ኣይኪኸውንን እዩ።—መዝሙር 46:9።	ምሉእ ሰላም ኪረክብ እዩ።—መዝሙር 37:11።
ብዚርብሽ ሓሳባት ወይ ተዘክሮታት ኣይኪሳቐን እዩ።—ኢሳይያስ 65:17።	ኣብ ብሉጽ ኵነታት ንዘለኣለም ኪነብር እዩ።—መዝሙር 37:29።

ኣሪጉ ዝነበረ ሰብኣይ ናብ ንእስነቱ ተመሊሱ ኣሕምልቲ ዝሓዘ ዓረብያ ይደፍእ።

5. ኣብ መጽሓፍ ቅዱስ ዚርከብ ተስፋ ንህይወትና ኼመሓይሾ ይኽእል

ብዙሓት ሰባት በቲ ኣብ ከባቢኦም ዚርእይዎ ጸገማት ይጕህዩ ወይ ይቝጥዑ እዮም። ገሊኦም ከኣ ለውጢ ኼምጽኡ ኢሎም ይቃለሱ እዮም። እቲ መጽሓፍ ቅዱስ ኵነታት ከም ዚመሓየሽ ዜተስፍዎ ተስፋ ሕጂ ንሰባት ብኸመይ ከም ዚሕግዞም ርአ። ቪድዮ ኣጻውት፡ ድሕሪኡ በዚ ሕቶታት ተመያየጡ፦