Bäşinji Musa
19 Ýehowa Hudaýyňyz barjak ýurduňyzda ýaşaýan halklary ýok eder. Ýehowanyň kömegi bilen şol halklary kowup çykaryp, şäherlerinde we öýlerinde ýaşap başlanyňyzda+, 2 Ýehowa Hudaýyňyzyň mülk edip beren ýurdundan üç şäheri saýlaň+. 3 Ýehowa Hudaýyňyzyň mülk edip beren ýurduny üç bölege bölüň-de, hersinde bir şäheri gaçybatalga ediň. Adam öldüren kişi gaçyp biler ýaly, şol şäherlere ýol çekiň.
4 Gaçybatalga şäheri üçin düzgün şeýledir: eger biri hiç hili duşmançylygy bolman, bir adamy tötänden öldürse, şol şähere gaçyp gutulyp biler+. 5 Aýdaly, iki adam tokaýa odun almaga gidýär. Olaryň biri odun çapyp durka, palta sapyndan sypyp, beýleki adama degse, ol hem ölse, ganhor şol şäherleriň birine gaçyp başyny gutarsyn+. 6 Ýöne şäher uzak bolsa, gan algyly adam*+ ganhoryň yzyndan ýetip, gaharyna ony öldürer. Aslynda, ol ölüme mynasyp iş etmedi, sebäbi ölen adam bilen hiç hili duşmançylygy ýokdy+. 7 Şeýle ýagdaýyň öňüni almak üçin, size: „Üç şäher saýlaň“ diýip tabşyrýaryn.
8 Ýehowa Hudaýyňyz ata-babalaryňyza ant içişi ýaly, ýurduňyzy giňelder+, söz berişi ýaly, tutuş ýurdy eliňize berer+. 9 Ýöne munuň üçin ähli tabşyryklarymy gyşarnyksyz* berjaý ediň, Ýehowa Hudaýyňyzy söýüp, hemişe onuň ýolundan ýöräň+. Hudaý ýurdy tutuşlygyna eliňize berende, öňki üç şäheriň üstüne ýene üçüsini goşuň+. 10 Şonda Ýehowa Hudaýyňyzyň mülk edip beren ýurdunda bigünä adamyň gany dökülmez+, siz ganhorlykda aýyplanmarsyňyz+.
11 Emma bir adam başga birini ýigrenip+, bilgeşleýin* topulsa, ol hem agyr ýaralanyp ölse, ýöne topulan adam şol şäherleriň birine gaçyp gitse, 12 öz şäheriniň ýaşululary ganhory yzyna getirdip, gan algylynyň* eline bersin. Ganhor hökman öldürilsin+. 13 Ganhora rehim etmäň, Ysraýyl topragyny bigünä dökülen gandan arassalaň+. Şonda görjegiňiz gowy bolar.
14 Ýehowa Hudaýyňyzyň mülk edip berjek ýurdundan ýer alanyňyzda, goňşyňyz bilen araňyzdaky araçägi+, ata-babalaryňyzyň goýan serhedini süýşürmäň.
15 Hiç kimi ýekeje şaýadyň sözi bilen günä etmekde ýa erbet iş etmekde aýyplamaň+. Muny iki ýa üç şaýat tassyklamalydyr+. 16 Emma päliýaman adam ýalan şaýatlyk edip, birine töhmet atsa+, 17 olaryň ikisi-de Ýehowanyň öňüne, ruhanylaryň we şol wagtky kazylaryň ýanyna barsyn+. 18 Kazylar ähli zadyň anygyna ýetsin+. Eger şaýadyň sözi ýalan bolup çyksa we doganyna töhmet atan bolsa, 19 doganyna etjek bolan ýamanlygyny özüne ediň+. Şeýdip, erbetligi araňyzdan aýryň+. 20 Muny eşidenler gorkar, gaýdyp hiç kim şeýle erbetlige baş goşmaz+. 21 Ýalan sözlän adama rehim etmäň+: jan ýerine jan, göz ýerine göz, diş ýerine diş, el ýerine el, aýak ýerine aýak bolsun+.