ÝERMEÝA PYGAMBERIŇ AGYSY

א [Elip]*

1 Wah, adamdan doly şäher+, indi boşap galdy!

At-abraýly* şäher+, indi dul hatyna döndi!

Welaýatlaryň gözeli*, indi gyrnaga döndi!+

ב [Bet]

2 Gijelerine aglaýar+, gözýaşy sil deý akýar.

Hiç bir oýnaşy indi göwünlik bermeýär+.

Dost-ýary duşman boldy, dönüklik edýär+.

ג [Gimel]

3 Ýahuda sürgün edildi+, jebir-jepa çekýär+.

Halklaryň arasynda+ jany aram tapmaýar.

Agyr gününde duşman eline düşýär.

ד [Dal]

4 Baýramçylyga gelýän ýok, Sion ýoly aglaýar+.

Derwezesi weýran boldy+, ruhanysy ah çekýär.

Şäher agyr dert içinde, gelin-gyzy nalaýar.

ה [He]

5 Ýagylary gaýgy-gamsyz ýaşaýar, agalyk edýär+.

Agyr günäsi üçin Ýehowa hasrat çekdirýär+.

Duşmany çagalaryny ýesir edip äkidýär+.

ו [Waw]

6 Sion gyzy şan-şöhratyny ýitirdi+,

Han-begi sugun kimin sährany küýsedi,

Ýöremäge ysgyn-mydary galmady.

ז [Zaýn]

7 Iýerusalimiň bagty ýatdy, sergezdan boldy,

Elden giden mal-mülküni ýatlady+.

Ýykylanyny görüp, duşmany güldi+,

Ýesir düşen halky goldan bolmady+.

ח [Het]

8 Iýerusalim külli günä etdi+,

Nejis zada öwrüldi,

Hormat goýanlar ýalaňaç halyna güldi+.

Ýerden başyny galdyrman, onuň özem ah çekdi+.

ט [Tet]

9 Köýneginiň etegi hapalandy,

Gelejegini oýlanmady+.

Ýykylyşy gorkunç boldy, hiç kim teselli bermedi.

Eý Ýehowa, nazar sal, agyrdyr halym,

Özüni beýgeltdi ganym duşmanym+.

י [Ýod]

10 Ganym duşman hazynasyna el urdy+.

Milletler mukaddes mekanyna girdi+.

Olar seniň jemagatyňa goşulmazdy.

כ [Käp]

11 Çörek gözläp sermenýär, bütin halk nalaýar+,

Bir döwüm çörek üçin, mal-mülküni paýlaýar.

Eý Ýehowa, bir naçara* meňzedim.

ל [Lam]

12 Eý ötegçiler, azaryňyza dälmidir?

Geliň, görüň!

Meniň ýaly dert çekýän barmydyr?

Ýehowa gazaplanyp, maňa ejir çekdirdi+.

מ [Mim]

13 Ýokardan ot ýagdyryp, süňklerimi kül etdi+.

Aýagyma duzak gurdy, meni yza serpikdirdi.

Ol meni terk etdi,

Günuzyn dert çekýärin.

נ [Nun]

14 Günälerim boýuntyryk boldy,

Boýnumdan asyldy, ysgyn-mydarym galmady.

Ýehowa meni duşman eline tabşyrdy+.

ס [Sameh]

15 Ýehowa pälwanlary ýykdy+,

Goç ýigitleri gyrmaga goşun toplady+.

Ýehowa Ýahuda gyzyny üzüm deý ezdi+.

ע [Aýn]

16 Şonuň üçin aglaýaryn+, gözýaşym sil dek akýar.

Göwünlik berjek adamlar uzakda galdy.

Duşmanlarym üstün çykdy, ogul-gyzymy gyrdy.

פ [Pe]

17 Sion elini uzadyp nalaýar+, göwünlik berýän tapylmaýar.

Ýehowanyň emri bilen Ýakuba hüjüm edilýär+.

Iýerusalim duşmanlaryna ýigrenji bolup görünýär+.

צ [Sad]

18 Ýehowa adyldyr+, men tabşyryklaryny bozdum+.

Eý halklar, meni diňläň, agyr derdimi görüň.

Ogul-gyzlarym ýesirlige düşdi+.

ק [Kap]

19 Oýnaşlarymy çagyrdym, olar meni aldady+.

Ruhanylar, ýaşulular çörek diläp sermendi,

Şäher meýdançasynda* açlykdan heläk boldy+.

ר [Reş]

20 Eý Ýehowa, ser sal, agyrdyr halym,

Ýanyp tutaşyp dur, meniň janym.

Ýüregim ynjalmaýar, sebäbi gozgalaň turuzdym+,

Daşarda gylyç bar+, içerde ölüm.

ש [Şin]

21 Ahy-zarymy eşitseler-de, göwünlik beren bolmady,

Ganym duşmanlarym derdimi gördi.

Beren jezaňy görüp, ýagylarym begendi+,

Bellän günüň gelsin+, olar meniň günüme düşsün+.

ת [Taw]

22 Agyr günäm sebäpli maňa jeza beripdiň,

Erbet işlerini görüp, olara-da temmi ber+.

Sebäbi ýürek ýaraly, dertlerim köpdür.

א [Elip]

2 Wah, Ýehowanyň gahary Siony bulut kimin örtdi!

Ol Ysraýylyň şan-şöhratyny gökden ýere zyňdy+,

Gahar-gazap güni basgançagyny unutdy+.

ב [Bet]

2 Ýehowa Ýakubyň ýurduny rehimsizlik bilen weýran etdi.

Ýahuda galalaryna gaharlanyp, ýer bilen ýegsan etdi+.

Patyşalygyny ýumurdy+, han-beglerini masgara etdi+.

ג [Gimel]

3 Gahar bilen Ysraýylyň şahyny döwdi.

Duşmany çozanda, sag goluny yza çekdi+.

Ýakubyň ähli zadyny oda ýakdy+.

ד [Dal]

4 Duşman kimin ýaýyny gerdi, sag goluny galdyrdy+.

Meniň mähribanlarymy gyrdy+.

Sion çadyryna+ gahar oduny dökdi+.

ה [He]

5 Ýehowa bize duşman boldy+,

Ysraýyly ýuwutdy,

Diňlerini weýran etdi,

Galalaryny ýumurdy.

Ýahudanyň hasratyny artdyrdy.

ו [Waw]

6 Çatmasyny ýumurdy+.

Baýramçylygyny ýatyrdy+.

Sionyň baýramy, Sabat güni unudyldy.

Ýehowa gaharlanyp, patyşa-da, ruhana-da rehim etmedi+.

ז [Zaýn]

7 Ýehowa gurbanlyk ojagyny* terk etdi,

Mukaddes mekanyndan ýüz öwürdi+.

Diňlerini duşman eline berdi+.

Olar Ýehowanyň öýünde baýrama gelen ýaly gygyryşdylar+.

ח [Het]

8 Ýehowa Sionyň diwarlaryny ýykmagy ýüregine düwdi+.

Onuň diwarlaryna ölçeg ýüpüni çekdi+.

Güýçli goly bilen betbagtçylyk inderdi.

Gorag depeleri, diwarlary ýas tutdy.

Ikisi-de ýer bilen ýegsan boldy.

ט [Tet]

9 Diwarlary gara ýere çökdi+,

Kiltleri çym-pytrak boldy.

Patyşasy, hanlary ýat ýurda sürgün edildi+.

Kanuny ýerine ýetirýän ýok,

Pygambere Ýehowadan görnüş* ýok+.

י [Ýod]

10 Sionyň ýaşululary ýerde ümsüm otyrdylar+,

Olar jul* geýdiler, başyndan gum sowurdylar+.

Iýerusalim gyzlary ýerden başyny galdyrmadylar.

כ [Käp]

11 Aglaý-aglaý gözümiň nury öçdi+.

Hasratly ýüregim ýanyp tutaşdy.

Köçelerde huşsuz ýatan balalara+,

Halkymyň gyzynyň* agyr halyna

Gara bagrym gan boldy+.

ל [Lam]

12 Olar ejesine: «Çörek iýjek, suw içjek»+ diýýär,

Köçelerde ýaralanan adam dek huşuny ýitirýär,

Ejesiniň gujagynda jan berýär.

מ [Mim]

13 Eý Iýerusalim, kimi şaýat edeýin?

Seni nämä meňzedeýin?

Eý Sion, göwünlik bermek üçin seni kime deňäýin?

Kim saňa melhem eder?+

Dertleriň deňiz suwlary kimin köpdür+.

נ [Nun]

14 Pygamberleriň görnüşleri ýalandyr, boşdur+.

Ýalan görnüşler bilen seni aldadylar+,

Günäleriňi aýtsadylar, ýesirlige düşmezdiň+.

ס [Sameh]

15 Ötegçiler ýaňsylap, ellerini çarpýarlar+.

Iýerusalime geň galyp, sykylyk çalýarlar*+,

Başlaryny ýaýkap diýýärler: «Şumy siziň:

„Gözelleriň gözeli, zeminiň guwanjy“ diýýän şäheriňiz?»+

פ [Pe]

16 Duşmanlaryň seni ýuwutmak üçin agzyny açýar.

Sykylyk çalyp*, dişlerini gyjap: «Diriligine ýuwudarys+.

Arzuw eden günümiz geldi+.

Ol güni gözümiz bilen gördük»+ diýýär.

ע [Aýn]

17 Ýehowa niýetini amala aşyrdy+, sözüni berjaý etdi+,

Ol gadymy günlerde emrini yglan edipdi+.

Ol rehim etmän, seni weýran etdi+.

Duşmanyny begendirdi, ýagylaryny güýçlendirdi.

צ [Sad]

18 Eý Sion diwarlary, halk Ýehowa perýat etsin,

Gözýaşlaryň gije-gündiz sil deý aksyn,

Dynman agla, gözýaşlaryň diňmesin.

ק [Kap]

19 Tur! Uzak gije, daň atýança* ses edip agla.

Ýehowanyň öňünde aglap ýüregiňi dök.

Balalaryň açlykdan köçede huşuny ýitirýär+,

Çagalaryň jany üçin Hudaýa ýalbar.

ר [Reş]

20 Eý Ýehowa, temmi beren halkyňa nazar sal!

Näme üçin aýallar bagryndan önen balasyny iýýärler?+

Näme üçin Ýehowanyň mukaddes mekanynda

Ruhanylaryň, pygamberleriň janyny alýarlar?+

ש [Şin]

21 Ýigitleriň, garrylaryň jesetleri köçede çaşyp ýatyr+.

Gyzlarym, goç ýigitlerim gylyçdan gyrlyp ýatyr+.

Gahar-gazap güni olary öldürdiň, rehim etmän gyrdyň+.

ת [Taw]

22 Toýa gelen+ myhman deý, çar-tarapdan gorky basdy.

Ýehowanyň gazap gününden hiç kim gutulyp bilmedi+.

Bagrymdan önen, öwüt berip ulaldan balamy duşmanlarym öldürdi+.

א [Elip]

3 Allanyň gazaply hasasy başymyzdan indi.

2 Ol meni kowdy, ýagty ýoldan däl-de,

Garaňky ýoldan ýöretdi+.

3 Meni uzakly gün gaýta-gaýta urdy+.

ב [Bet]

4 Ol meniň derimi, etimi çüýretdi,

Süňklerimi owratdy.

5 Zäherli otlar bilen+, jebir-jepa bilen daşymy gurşady.

6 Topraga siňen ata-babalarym kimin,

Meni tüm-garaňkylyga baglady.

ג [Gimel]

7 Elimi mis gandal bilen baglady+.

Daşyma diwar aýlady, gaçyp bilmedim.

8 Agyr halda kömek soradym,

Doga-dilegime jogap bermedi+.

9 Ýonma daşlar bilen ýolumy baglady.

Ýodalarymy egrem-bugram etdi+.

ד [Dal]

10 Ol bukuda ýatan aýy dek, şir dek üstüme topuldy+.

11 Gyra süýräp, meni parça-parça etdi*.

Başymy agyr derde saldy+.

12 Ýaýyny gerip, meni nyşana aldy.

ה [He]

13 Oklary bilen böwregimi deşdi.

14 Halklara gülki boldum, bütin gün dillerinden düşmedim.

15 Ol maňa zäher içirdi, ýowşandan gerk-gäbe doýurdy+.

ו [Waw]

16 Dişlerimi çagyl bilen owratdy,

Kül içinde meni dyza çökerdi+.

17 Rahatlygymy elden aldyň,

Ýagşylygyň nämedigini unutdym.

18 Diýdim: «At-abraýym gaçdy,

Ýehowa bolan umydym üzüldi».

ז [Zaýn]

19 Çeken jepamy, sergezdan bolanymy unutma+,

Ýowşan iýenimi, zäher içenimi unutma+.

20 Meni ýada saljagyňy,

Aşak egilip ýardam berjegiňi bilýärin+.

21 Ählisini kalbymda gizläp saklaryn,

Saňa sabyrly garaşaryn+.

ח [Het]

22 Wepaly söýgä* baý Ýehowa bizi ýok etmedi+,

Onuň rehimdarlygy çäksizdir+.

23 Her säher rehimdarlygy täzelenýär+,

Wepadarlygy ebedilikdir+.

24 Diýdim: «Ýehowadyr paýym+, sabyrly garaşaýyn»+.

ט [Tet]

25 Ýehowa özüne umyt baglana+,

Hudaýy çagyrana ýagşylyk eder+.

26 Ümsüm oturyp*+,

Ýehowanyň halas etmegine garaşanyň gowudyr+.

27 Ýaşlykda agyr kynçylyk göreniň gowudyr+.

י [Ýod]

28 Hudaý adamyň üstüne ýük atsa,

Goý, ol dymsyn, ýalňyzlykda otursyn+.

29 Ýere ýüzin ýykylsyn+, belki-de, halas bolar+.

30 Urana ýaňagyny tutsun, kemsitmelere döz gelsin.

כ [Käp]

31 Ýehowa bizi ebedilik terk etmez+.

32 Dert çekmäge ýol berse-de, rehim eder,

Ýürekden söýýändigi* üçin haýpy geler+.

33 Hudaý ynsan ogullarynyň jebir çekmegini islemeýär+.

ל [Lam]

34 Ýer ýüzüniň ýesirleri aýak astynda ezilýär+,

35 Allatagalanyň* öňünde ynsan hukugy kemsidilýär+,

36 Kazyýetde adalatsyzlyk edilýär,

Ýehowa olara asla göz ýummaýar.

מ [Mim]

37 Ýehowa buýurmasa, kim söz berer?

Kim sözünde durup biler?

38 Allatagalanyň agzyndan

Ýamanlyk däl, ýagşylyk çykar.

39 Günäsi üçin ejir çekýän adam näme üçin şikaýat etsin?+

נ [Nun]

40 Geliň, ýodalarymyzy dykgatly barlalyň!+

Geliň, Ýehowa dolanalyň!+

41 Geliň, ellerimizi göge galdyryp,

Hudaýa ýürekden dileg edeliň+:

42 «Günä etdik, saňa garşy baş galdyrdyk+,

Sen bizi bagyşlamadyň+.

ס [Sameh]

43 Gahar-gazapdan ýaňa dileglerimizi eşitmediň+.

Yzymyzdan kowup, rehimsiz öldürdiň+.

44 Daşyňy bulut bilen örtüp, dogamyza böwet goýduň+.

45 Halklaryň arasynda zir-zibile, syr-süplüge öwürdiň».

פ [Pe]

46 Duşmanlarymyz ýuwutmak isleýär+.

47 Harabaçylyk, weýrançylyk+,

Gorky hem duzak paýymyz bolýar+.

48 Eziz halkymyň agyr halyny görüp,

Boýur-boýur ýaş dökýärin+.

ע [Aýn]

49 Gözýaşlarym sil bolup akar, asla diňmez+,

50 Ýehowa gökden nazar salýança+ gözýaşlarym diňmez.

51 Şäherimiň gyzlarynyň* halyna+ ýüregim gyýyldy.

צ [Sad]

52 Duşmanlarym nähak ýere meni guş deý awlady.

53 Meni öldürjek bolup, çukura taşladylar, meni daşladylar.

54 Suwlar depämden aşanda: «Janym çykyp barýar!» diýdim.

ק [Kap]

55 Eý Ýehowa, çukuryň düýbünden adyňy tutup çagyrdym+,

56 Eşit sesimi, ýapma gulagyňy, ýardam et, meni halas et.

57 Seni çagyrdym. Şol gün gelip: «Gorkma!» diýdiň.

ר [Reş]

58 Ýehowa, kazyýetde hemaýat etdiň, meni azat eýlediň+.

59 Ýehowa, maňa adalatsyzlyk edildi, arymy alyp ber+.

60 Olaryň menden ar alşyny gördüň,

Päliniň ýamandygyny bildiň.

ש [Sin] ýa-da [Şin]

61 Eý Ýehowa, olaryň ýaňsylaýjy sözüni eşit,

Olaryň erbet niýetlerini gör+.

62 Duşmanlarym meni dilden düşürmän,

Bütin gün hyşy-wyşy edýärler.

63 Seret, olar otursa-tursa,

Meni kemsidip*, üstümden gülýärler.

ת [Taw]

64 Eý Ýehowa, eli bilen edenini egni bilen çekdir.

65 Olary näletläp, doňýürek edersiň.

66 Ýehowa, gazap atyňa atlanyp, olaryň yzyndan kow,

Olary ýeriň ýüzünden ýok et.

א [Elip]

4 Wah, sap altynyň reňki öçdi!+

Mukaddes ýeriň daşlary+ köçelerde pytrap ýatyr!+

ב [Bet]

2 Sion ogullary sap altyn deý arzylydy.

Indi olar küýzegäriň küýzesine döndi,

Toýundan ýasalan küýzä öwrüldi!

ג [Gimel]

3 Hatda şagallar hem çagasyny emdirýär,

Emma halkymyň gyzy düýeguş+ kimin doňýürekdir+.

ד [Dal]

4 Süýt emýän balalar teşne bolup, dili damagyna ýapyşýar.

Çagalary el serende, hiç kim çörek bermeýär+.

ה [He]

5 Näz-nygmatlar iýenler köçede sergezdan+.

Gyrmyzy lybas geýenler kül içinde ýatyr+.

ו [Waw]

6 Halkyma berlen jeza Sodomyňkydan agyrdyr+.

Sodom az salymda ýok edildi, kömek beren bolmady+.

ז [Zaýn]

7 Nezirleri+ gardan arassady, süýtden akdy.

Olar merjenden has gyzyldy, ýakut kimin öwşün atýardy.

ח [Het]

8 Olar kömürden has gara boldy,

Köçelerde olary hiç kim tanamady.

Derisi süňküne ýelmeşip, çöpe döndi+.

ט [Tet]

9 Açlykdan ölenden gylyçdan öleniň gowudyr+.

Olar bir döwüm çörege zar bolup, gurap galdy.

י [Ýod]

10 Mähirli ejeler çagalaryny gaýnatdy+.

Halkyň agyr gününde balalary ýas nahary boldy+.

כ [Käp]

11 Ýehowa olara gaharlanyp, gazabyny dökdi+,

Siony oda ýakyp, düýbi bilen kül etdi+.

ל [Lam]

12 Ýer ýüzüniň patyşalary, mes topragyň ilaty,

Iýerusalim derwezesinden duşmanyň girjegine ynanmady+.

מ [Mim]

13 Pygamberi, ruhanysy agyr günä etdiler+,

Şäheriň merkezinde bigünä gan dökdüler+.

נ [Nun]

14 Kör kimin köçelerde enteşip+,

Haram boldy gara gana bulaşyp+.

Donlaryna el degrip bolmady.

ס [Sameh]

15 Olara diýerler: «Gidiň, haramlar!

Gümüňizi çekiň! Bize el degirmäň!»

Olar öýsüz-öwzarsyz enteýärler.

Il içinde diýdiler: «Olar bärde galmasyn+.

פ [Pe]

16 Ýehowa olary dargatdy+.

Indi Hudaý olara rehim etmez.

Il-gün ruhana+, ýaşula hormat goýmaz»+.

ע [Aýn]

17 Berilmejek kömege garaşyp, gözümiziň nury öçdi+.

Ejiz halkdan kömek sorap, gözlerimiz ýolda galdy+.

צ [Sad]

18 Her ädimde olar bizi awlaýar+,

Şäher meýdançasyna* çykarmaýarlar.

Golaýlaşdy soňumyz, günlerimiz gutardy,

Sebäbi ahyrymyz geldi.

ק [Kap]

19 Duşmanlar bürgütden çakgandyr+.

Dagda yzarlaýarlar, düzde duzak gurýarlar.

ר [Reş]

20 Ýehowanyň saýlany+, ýaşaýyş demimiz

Indi duşman duzagyna düşdi+.

Biz oňa: «Milletler arasynda ýaşarys saýasynda» diýerdik.

ש [Sin]

21 Uz ýurdunyň Edom gyzy, şatlanýansyň, begenýänsiň+,

Saňa käsäni geçirerler+, lül bolarsyň, uýat ýeriň görner+.

ת [Taw]

22 Eý Sion gyzy, günäleriň üçin berlen jezaň möhleti doldy.

Hudaý indi gaýdyp seni sürgün etmez+.

Emma ol Edom gyzynyň günälerine göz ýummaz,

Ýazyklaryny gizlemez+.

5 Eý Ýehowa, başymyza geleni unutma.

Seret, biz masgara bolduk+.

2 Mirasymyz ýada geçdi, kesekiler öýümizi aldy+.

3 Ýetim galdyk, ejemiz dul aýal kimin boldy+.

4 Agyz suwuny+, sazak oduny satyn alýarys.

5 Duşmanymyz ökjämizi basyp gelýär,

Dynçlyk ýok, ysgyn-mydarymyz gaçdy+.

6 Müsüre+, Assiriýa+ el serip, çörek diledik.

7 Günäli ata-babamyz gara ýere siňip gitdi,

Eden etmişlerini egnimiz bilen çekýäris.

8 Gul-gyrnagymyz agalyk edýär,

Biziň başymyzy gutarjak adam ýok.

9 Çölden gelýän gylyçly duşman sebäpli,

Bir döwüm çörek üçin başymyzy orta goýduk+.

10 Açlygyň derdinden+ bedenimiz ojak kimin gyzýar.

11 Sion gelinleriniň, Ýahuda gyzlarynyň namysyna degýärler+.

12 Han-beglerini elinden asdylar+,

Ýaşulusyny sylamadylar+.

13 Ýigitler degirmen aýlaýar, çagalar odun daşap maýrylýar.

14 Şäher derwezesinde aksakgallar oturmaýar+,

Goç ýigitler saz çalmasyny goýýar+.

15 Ýüregimizde şatlyk galmady, toýumyz* ýasa öwrüldi+.

16 Waý halymyza, täjimiz başymyzdan gaçdy, başymyz günäli.

17 Dertlerden ýaňa ýüregimiz ýaraly+,

Gözümiziň nury öçdi+.

18 Sion dagynda adam-gara galmady+,

Tilkileriň sürenine öwrüldi.

19 Eý Ýehowa, tagtyň bakydyr, hökümdarlygyň ebedidir+.

20 Bizi näme üçin ýatdan çykardyň?

Näme üçin uzak wagtlyk terk etdiň?+

21 Eý Ýehowa, dolanmak isleýäris, bizi kabul et+,

Öňki günlerimizi gaýtaryp ber+.

22 Sen bizden bütinleý ýüz öwürdiň,

Bize garşy gazaply oduň köşeşmedi+.

1—4-nji baplar ýewreý elipbiýiniň tertibinde ýazylypdyr (akrogoşgy görnüşi).

Ýa-da: Köp ilatly.

Sözme-söz: melikesi.

Iýerusalime degişli.

Sözlüge serediň.

Bu şahyrana jümle duýgudaşlygy görkezýän bolmaly.

Üstünden gülmegi ýa-da haýran galmagy aňladýan bolmaly.

Sözme-söz: säher çagynda. Gije 2:00-dan daňdan 6:00-a çenli aralyk göz öňünde tutulýar.

Başga manysy: bar ysgynymy aldy.

Sözlüge serediň.

Ýa-da: Sabyrly bolup.

Ýa-da: Wepaly söýgä baýdygy.

Sözlüge serediň.

Ýa-da: daş-töweregindäki şäherleriň.

Sözme-söz: Aýdym aýdyp.

Sözlüge serediň.

Sözme-söz: tansymyz.