Siz nämä ynanýarsyňyz?

Köp dindar adamlar Mukaddes Kitaby okanlarynda ýer ýüzi bary-ýogy alty günüň dowamynda (her gün 24 sagady öz içine alýar) ýaradylandyr öýdýärler. Ateistler bolsa: «Hudaý ýok, Mukaddes Kitapda ýazylan zatlar erteki, älem-jahan öz-özünden döredi» diýýärler.

Adamlaryň köpüsi iki oduň arasynda galýar. Olar Hudaýa ynanýar, Mukaddes Kitaba hormat goýýar. Ýöne: «Eger alymlar älem-jahan öz-özünden döredi diýýän bolsa dogrudyr. Sebäbi ylymly-bilimli, öz ugrunda tejribeli alymlar ýalňyşmaz ahyry» diýip pikir edýärler. Eger siz şu broşýurany okaýan bolsaňyz, onda ýaşaýşyň nädip dörändigini bilmek isleýänsiňiz. Belki, çagalaryňyz: «Ähli zady Hudaý ýaratdymy ýa-da ewolýusiýa arkaly döredi?» diýip sorag berende, olara näme jogap berjekdigiňizi bilmeýänsiňiz.

Broşýuranyň maksady

Şu broşýura dindar adamlary ýa-da ateistleri ýazgarmak üçin ýazylmady. Ol size ynanýan zatlaryňyzy barlamaga kömek eder. Şeýle-de onda älem-jahany Allanyň ýaradandygyny görkezýän Mukaddes Kitaba esaslanan deliller bar. Siz şu broşýurany okanyňyzda ýaradylyş hakda aýdylýan zatlara köre-körlük bilen ynanman, olaryň dogry ýa nädogrudygyny barlamalydygyna düşünersiňiz.

Siz: «Hudaý ýok, Mukaddes Kitapda ýazylan zatlar erteki» diýýän adamlara ynanarsyňyzmy? Ýa-da hakykaty bilmek üçin Mukaddes Kitapda näme diýilýändigini okap görersiňiz? Älem-jahany Hudaý ýaratdymy ýa-da ewolýusiýa arkaly döredi? (Ýewreýler 11:1). Geliň, subutnamalara seredeliň.