Hoş habar hökman wagyz ediler!
1. Wagyz işini hiç zadyň togtadyp bilmejegini nireden bilýäris?
1 Ýehowanyň islegini amala aşyrmaga hiç zat päsgel berip bilmez (Iş. 14:24). Hatda Gideon kazynyň 300 adamly goşuny 135 000 midýanlara garşy söweşip bilmejek ýaly bolup görünse-de, Ýehowa oňa şeýle diýdi: «Sen Ysraýyly midýanlardan halas edersiň. Seni ýollaýan men dälmi?» (Kaz. 6:14). Bu gün Ýehowa haýsy işi goldaýar? Isa: «Patyşalyk baradaky bu Hoş Habar... dünýäniň ähli ýerinde wagyz ediler» diýdi (Mat. 24:14). Bu işi-de ýerine ýetirmäge hiç kim päsgel berip bilmez!
2. Wagyzda Ýehowanyň her birimizi goldajakdygyny nireden bilýäris?
2 Ýehowa saňa kömek edýär. Ýehowa mesihçiler ýygnagyna islegini berjaý etmäge kömek edýär. Ýöne Ol her birimizi aýratynlykda goldaýarmy? Pawlus resul durmuşyň kyn pursatlarynda-da, Ýehowa ony ogly Isa arkaly goldaýandygyny duýýardy (2 Tim. 4:17). Biz hem Ýehowanyň her birimiziň tagallamyza bereket berjegine ynanyp bileris (1 Ýahýa 5:14).
3. Ýehowa bizi haýsy ýagdaýlarda goldaýar?
3 Ýaşaýşyň gaýgylary seni ýadadýarmy? «Ol (Hudaý) ejizlere kuwwat berýändir» (Iş. 40:29—31). Belki-de, yzarlamalara ýa-da garşylyga duş gelýänsiň? «Ýüküňi Rebbiň üstüne taşla, Ol seni saklar» (Zeb. 55:22). Kämahallar imanyň gowşaklyk edýärmi? «Ýola düş, Men saňa sözlemäge kömek ederin» (Çyk. 4:11, 12). Belki-de, syrkawlyk sebäpli köp wagyz edip bilýän dälsiň? Nähili az bolup görünse-de, Ýehowa seniň çyn ýürekden edýän tagallalaryňy gymmat saýýar (1 Kor. 3:6, 9).
4. Ýehowa bolan ynamymyz bize nähili täsir edýär?
4 Ýehowanyň «eli uzyn, kim ony aýryp biler?» (Iş. 14:27). Onuň bizi wagyzda goldajakdygyna ynansak, güýjimizi gowşatman «Reb üçin gaýratly wagyz ederis» (Res. iş. 14:3).