Ökde wagyzçy boluň
1. I asyrda ýaşan haýsy mesihçileriň mysaly ökde wagyzçy bolmalydygyny görkezýär?
1 Her bir mesihçi ökde wagyzçy bolmak isleýär. Isa şägirtlerine gowy wagyz etmegi öwredýärdi (Luka 9:1—5; 10:1—11). Şeýle-de Akila bilen Priskilla Apollosy öz ýanlaryna alyp, «Reb hakda anyk gürrüňler bilen sapak berdiler» (Res. iş. 18:24—26). Pawlus resul hem tejribeli wagyzçy Timoteosa «ilerleýşini hemmeleriň görmegi üçin» öwretmek ukybyny kämilleşdirmegi maslahat berdi (1 Tim. 4:13—15). Bizem näçe ýyl wagyz edýändigimize garamazdan, ökde wagyzçy bolmaga jan etmeli.
2. Biz dogan-uýalardan wagyz etmegi nädip öwrenip bileris?
2 Dogan-uýalardan öwreniň. Biz dogan-uýalardan ökdelik bilen wagyz etmegi öwrenip bileris (Sül. tym. 27:17). Şonuň üçin ýanyňyzdaky dogan ýa-da uýa wagyz edende, ony ünsli diňläň. Tejribeli wagyzçylardan maslahat sorap, olary ünsli diňläň (Sül. tym. 1:6). Siz ikilenç ideg etmäge, Mukaddes Ýazgylar okuwyny geçirmäge ýa-da wagyz gullugyň başga görnüşlerine gatnaşmaga ýaýdanýarsyňyzmy? Onda toparyň gözegçisinden ýa-da ökde wagyzçydan kömek etmegini haýyş ediň. Şeýle-de Ýehowanyň mukaddes ruhunyň ukyp berýändigini ýatdan çykarman, ony hemişe diläň (Luka 11:13).
3. Kömek soramasagam maslahat berenlerinde näme etmeli?
3 Siz ökdelik bilen wagyz etmek üçin kömek soramasaňyz-da, maslahat berenlerinde gaty görmäň (Wag. 7:9). Berlen maslahaty Apollos ýaly kiçigöwünlilik bilen kabul edip, minnetdar boluň. Şeýle etseňiz, paýhaslydygyňyzy görkezersiňiz (Sül. tym. 12:15).
4. Isanyň aýtmagyna görä, ökde wagyzçy bolmaga nähili sebäp bar?
4 Hudaýy şöhratlandyryň. Isa şägirtlerini mysal arkaly ökde wagyzçy bolmaga höweslendirdi. Ol özüni üzüm agajyna, mesh edilen şägirtlerini bolsa onuň şahalaryna meňzedýär. Isa şahalaryň «has-da köp miwe bermegi» üçin Atasynyň olaryň her birini arassalaýandygyny aýtdy (Ýahýa 15:2). Üzümligiň eýesiniň üzüm agajynyň has köp miwe bermegini isleýşi ýaly, biziň hem «dodaklarymyzyň miwesini» bermegimiz üçin, Ýehowa ökdelik bilen wagyz etmegimizi isleýär (Ýew. 13:15). Biz ökdelik bilen wagyz etmegi öwrensek nähili netije berer? Isa: «Siziň köp miwe bermegiňiz bilen Atam şöhratlanar» diýdi (Ýahýa 15:8).