Iň güýçli adam

DÜNÝÄDE iň güýçli adamyň adyny bilýäňmi? Ol Ysraýylyň kazysy Şimşon. Oňa güýji Ýehowa berdi. Entek Şimşon dogulmanka, Ýehowa onuň ejesine: «Sen basym ogul dograrsyň. Ol Ysraýyly filistililerden azat eder» diýdi.

Filistililer Kengan ýurdunda ýaşaýan erbet halkdy. Olaryň esgeri köpdi. Olar ysraýyllylara azar berýärdiler. Bir gezek Şimşon filistilileriň ýanyna barýarka, onuň öňünden bir uly ýolbars arlap çykýar. Ýöne Şimşon ony ýaragsyz öldürýär. Şeýle-de ol ýüzlerçe erbet filistilileri öldürýär.

Birnäçe wagtdan Şimşon Delile atly gyzy söýýär. Eger-de Delile Şimşonyň güýjüniň syryny bilse, filistili baştutanlaryň her biri 1 100 kümüş teňňe berjek diýipdi. Deliläniň şol pullary alasy gelýär. Ol Şimşonyň we Hudaýyň halkynyň hakyky dosty däldi. Şonuň üçinem ol Şimşondan güýjüniň syryny birnäçe gezek soraýar.

Ahyry Delile Şimşonyň güýjüniň syryny bilýär. Şimşon: «Meniň saçymy hiç haçan gyrkmadylar. Doglanymdan bäri Hudaý meni özüniň aýratyn gullukçysy, ýagny neziri edip saýlady. Eger-de meniň saçymy gyrksalar, onda men güýjümi ýitirerin» diýýär.

Delile muny bilende, Şimşony dyzynda ukladýar. Soňra bir adamy çagyryp, Şimşonyň saçyny gyrkdyrýar. Şimşon oýananda güýjüni ýitiripdi. Şonda filistililer ony ýesir alýarlar. Olar onuň iki gözüni oýup, gul edýärler.

Bir gezek filistililer Dagon taňrysy üçin uly baýramçylyk edende, Şimşonyň üstünden güljek bolup, ony türmeden çykardylar. Şondan bäri Şimşonyň saçy ýene-de ösdi. Şimşon elinden tutup barýan oglana: «Bu jaýyň sütünlerini elläp göreýin» diýýär. Şonda Şimşon Ýehowadan güýç diläp, sütünleri tutýar-da: «Goý, men filistililer bilen öleýin!» diýip gygyrýar. Bu baýramçylykda 3 000 filistili bardy. Şimşon sütünleri gozganda, jaý ýykylýar. Erbet adamlaryň hemmesi ölýär.