Patyşalygyň gullukçylaryna tälim berilýär

1—3. Isa nädip wagyz işiniň ýaýbaňlanmagynyň aladasyny etdi we munuň bilen bagly nähili soraglar ýüze çykýar?

ISA MESIH iki ýyllap Jelilede wagyz etdi (Matta 9:35—38-nji aýatlary okaň). Ol köp şäherlere we obalara aýlanyp, olaryň sinagogalarynda adamlara öwredýärdi, Patyşalyk baradaky hoş habary wagyz edýärdi. Isa nirede wagyz etse-de, onuň ýanyna uly märeke ýygnanýardy. Isa: «Hasyl bol» diýip belläp geçdi. Şol sebäpli köp işçi gerekdi.

² Isa wagyz işiniň ýaýbaňlanmagynyň aladasyny etdi. Nädip? Ol 12 resulyny «Hudaýyň Patyşalygyny wagyz etmäge» iberdi (Luka 9:1, 2). Emma bu işi nädip amala aşyrmalydygy babatda resullarda köp sorag dörän bolmaly. Şol sebäpli Isa resullaryny ýollamazyndan öň, gökdäki Atasy Ýehowanyň oňa öwredişi ýaly, olara söýgi bilen tälim berdi.

³ Emma bizde şeýle soraglar ýüze çykmagy mümkin: Isa Atasyndan nähili tälim aldy? Ol resullaryna nähili tälim berdi? Biziň günlerimiz barada näme diýse bolar? Patyşa Isa Mesih şägirtlerine wagyz işini ýerine ýetirmegi öwredýärmi? Eger öwredýän bolsa, onda nädip?

«Men Atamdan öwrenen zatlarymy aýdýaryn»

4. Isa Atasyndan haçan we nirede tälim aldy?

⁴ Isa Atasynyň öwreden zatlaryny höwes bilen kabul etdi. Ol ýer ýüzünde wagyz edende: «Men Atamdan öwrenen zatlarymy aýdýaryn» diýdi (Ýahýa 8:28). Isa haçan we nirede tälim aldy? Hudaý ilkinji Ogluny ýaradansoň, oňa tälim berip başlady (Kol. 1:15). Ogul sansyz-sajaksyz ýyllaryň dowamynda gökde Atasy bilen bile bolup, onuň aýdan zatlaryny diňledi we eden işlerini synlady (Iş. 30:20). Şeýdip, Ogul öz Atasynyň häsiýetleri, işleri we niýetleri babatda wajyp bilim aldy.

5. Atasy öz Ogluna ýer ýüzünde ýerine ýetirmeli işi babatda nähili görkezme berdi?

⁵ Wagty gelende, Ýehowa Ogluna ýer ýüzünde nähili işi ýerine ýetirmelidigini aýtdy. Geliň, Beýik Mugallym bilen onuň ilkinji ýaradan Oglunyň gatnaşygyny beýan edýän pygamberlige seredeliň (Işaýa 50:4, 5-nji aýatlary okaň)a. Pygamberlikde Ýehowanyň öz Ogluny «her säher» oýarandygy barada aýdylýar. Bu sözler mugallymyň öz okuwçysyna öwretmek üçin, ony säher bilen oýarýandygyny suratlandyrýar. Bir kitapda şeýle diýilýär: «Ýehowa... ony okuwçy ýaly mekdebe äkidip, oňa nädip we näme barada wagyz etmelidigini öwredýär». Şol gökdäki «mekdepde» Ýehowa Ogluna «näme diýmelidigini we näme öwretmelidigini» düşündirdi (Ýahýa 12:49). Şeýle-de Ýehowa Isanyň adamlara nädip öwretmelidigi babatda görkezme berdib. Isa ýer ýüzünde diňe bir öz gullugyny ýerine ýetirmän, eýsem, şägirtlerine-de wagyz etmegi öwredip, Ýehowadan alan tälimini gowy ulanmagy başardy.

6, 7. a) Isa resullaryna nähili tälim berdi we bu olara nädip kömek etdi? b) Şu günler Isa şägirtlerine nähili tälim berilmeginiň aladasyny edýär?

⁶ Isa resullaryna nähili tälim berdi? Mattanyň 10-njy babynda aýdylyşy ýaly, Isa olara wagyz etmek babatda anyk görkezmeleri berdi. Mysal üçin, ol resullaryna nirede wagyz etmelidigini (5, 6-njy aýatlar), adamlara nähili habary aýtmalydygyny (7-nji aýat), Ýehowa bil baglamagyň wajypdygyny (9, 10-njy aýatlar), adamlaryň öýüne baryp, olar bilen nädip gürrüňe başlamalydygyny (11—13-nji aýatlar), garşylyklara nähili garamalydygyny (14, 15-nji aýatlar) we yzarlamalarda nähili hereket etmelidigini (16—23-nji aýatlar) öwretdic. Şeýle aýdyň görkezmeler resullara I asyrda wagyz işine ýolbaşçylyk etmäge kömek etdi.

⁷ Biziň günlerimiz barada näme diýse bolar? Hudaýyň Patyşalygynyň Patyşasy Isa şägirtlerine örän ähmiýetli ýumuş, ýagny «Patyşalyk baradaky hoş habary bütin ýer ýüzünde ähli milletlere wagyz etmegi» tabşyrdy (Mat. 24:14). Patyşa bize bu wajyp işi ýerine ýetirmegi öwredýärmi? Elbetde! Gökde höküm sürýän Patyşa wagyz etmek we ýygnakdaky jogapkärli borçlary ýerine ýetirmek babatda şägirtlerine tälim berilmeginiň aladasyny edýär.

Patyşalygyň gullukçylary wagyz etmegi öwrenýär

8, 9. a) Wagyz mekdebiniň esasy maksady näme? b) Wagyz mekdebi size ökdelik bilen wagyz etmäge nädip kömek edýär?

⁸ Ýehowanyň guramasy köp wagtdan bäri kongresler we ýygnak duşuşyklary (meselem, Gulluk duşuşygy) arkaly Hudaýyň halkyna wagyz etmegi öwredýär. Emma 1940-njy ýyllarda baş edaradaky jogapkär doganlar tälim bermek üçin dürli mekdepleri gurnap başladylar.

⁹ Wagyz mekdebi. Geçen bapdan bilşimiz ýaly, bu mekdep 1943-nji ýylda geçirilip başlandy. Mekdebiň maksady diňe ýygnak duşuşyklarynda nutuklar bilen gowy çykyş etmegi öwretmekmi? Ýok, onuň esasy maksady — Hudaýyň halkyna geplemek ukybyny wagyz gullugynda Ýehowany şöhratlandyrmak üçin ulanmagy öwretmek (Zeb. 150:6). Bu mekdep dogan-uýalara Patyşalyk barada ökdelik bilen wagyz etmäge kömek edýär.

10, 11. Häzir Gilead mekdebine kimler çagyrylýar we bu mekdep näme maksat bilen geçirilýär?

¹⁰ Gilead mekdebi. Häzirki Gilead mekdebi 1943-nji ýylyň 1-nji fewralynda, duşenbe güni geçirilip başlandy. Bu mekdep, esasan, pionerleri we başga-da doly wagtly gullukçylary dünýäniň dürli künjeginde missioner bolup gulluk etmäge taýýarlamak üçin geçirilýärdi. Emma 2011-nji ýylyň oktýabr aýyndan bäri Gilead mekdebine diňe ýörite doly wagtly gullukçylar, ýagny ýörite pionerler, etrap gözegçileri bilen olaryň aýallary, beýtelçiler we heniz bu mekdepde okamadyk missionerler çagyrylýar.

¹¹ Gilead mekdebi näme maksat bilen geçirilýär? Köp wagtdan bäri tälim berýän bir dogan bu mekdebiň maksady babatda şeýle diýýär: «Mekdepde okaýanlar Hudaýyň Sözüni çuňňur öwrenip, imanyny berkidýärler we borçlaryny ýerine ýetirende ýüze çykjak kynçylyklara döz gelmäge kömek edýän häsiýetleri ösdürýärler. Şeýle-de bu mekdep, esasan, dogan-uýalaryň yhlasly wagyz etmäge islegini artdyrmak maksady bilen geçirilýär» (Efes. 4:11).

12, 13. Gilead mekdebi bütindünýä wagyz işine nähili täsir etdi? Mysal getiriň.

¹² Gilead mekdebi bütindünýä wagyz işine nähili täsir etdi? 1943-nji ýyldan bäri bu mekdepde 8 müň 500-den gowrak dogan-uýalar tälim alypd, 170-den hem köp ýurtda gulluk edýärler. Missionerler yhlasly wagyz etmek we başgalary hem şeýle etmäge höweslendirmek bilen, mekdepde alan tälimini gowy ulanýarlar. Olar köplenç wagyzçylaryň az ýerinde gulluk edýärler.

¹³ Geliň, Ýaponiýada bolan waka seredeliň. II Jahan urşy döwründe bu ýurtda wagyz işi togtadylan ýalydy. 1949-njy ýylyň awgust aýynda Ýaponiýadaky wagyzçylaryň sany 10-a hem ýetmeýärdi. Emma şol ýylyň ahyrynda Gilead mekdebinde okan 13 sany missioner Ýaponiýa gelip, yhlasly wagyz edip başlaýar. Soňra ol ýere başga-da köp missioner gelýär. Ilkibada, olar ünsüni uly şäherlerde wagyz etmäge gönükdirýärler, soňra kiçiräk şäherlere-de gidip başlaýarlar. Missionerler beýleki dogan-uýalary we Mukaddes Ýazgylar okuwyny geçýän adamlary pioner gullugyna başlamaga höweslendirýärler. Olaryň eden tagallalary bol hasyl berdi. Häzir Ýaponiýada 216 müňden gowrak wagyzçy bar we olaryň takmynan 40 göterimi pioner bolup gulluk edýär!e

14. Hudaýyň guramasyndaky mekdepler nämäni subut edýär? (Şeýle-de 188—191-nji sahypalardaky «Patyşalygyň gullukçylary üçin mekdepler» diýen çarçuwa serediň).

¹⁴ Hudaýyň guramasyndaky beýleki mekdepler. Pionerler mekdebi, Mesihçi är-aýallar üçin mekdep we Sallah doganlar üçin mekdep dogan-uýalara ruhy taýdan ösmäge hem-de has yhlasly wagyz etmäge kömek edýärf. Bu mekdepler Patyşamyzyň öz şägirtlerini ähli gerekli zatlar bilen üpjün edip, olara gullugyny doly amala aşyrmaga kömek edýändigini subut edýär (2 Tim. 4:5).

Doganlar jogapkärli borçlary ýerine ýetirmegi öwrenýär

15. Jogapkärli borjy ýerine ýetirýän doganlar Isadan görelde alyp näme etmek isleýärler?

¹⁵ Ýadyňyza düşýän bolsa, Işaýanyň pygamberliginde Isanyň Hudaýdan tälim alandygy aýdylýar. Gökdäki «mekdepde» Hudaýyň Ogly göwnüçökgünlere «söz bilen ýardam etmegi» öwrendi (Iş. 50:4). Isa ýer ýüzünde ýaşanda şol alan tälimini ulanýardy. Ol «ýadap halys bolan we agyr ýükli adamlara» dynçlyk berýärdi (Mat. 11:28—30). Ýygnakda jogapkärli borçlary ýerine ýetirýän doganlar hem Isadan görelde alyp, imandaşlaryny ruhlandyrmak isleýärler. Doganlar imandaşlaryna höwes bilen gulluk edip biler ýaly, olara dürli mekdeplerde tälim berilýär.

16, 17. Patyşalyk gullugynyň mekdebi näme maksat bilen geçirilýär? (Şeýle-de çykgyda serediň).

¹⁶ Patyşalyk gullugynyň mekdebi. Mekdebiň ilkinji klasy 1959-njy ýylyň 9-njy martynda Saut-Lansing şäherinde (Nýu-Ýork ştaty) geçirildi. Bu bir aýlyk kursa aýlanýan gözegçiler we ýygnagyň gullukçylary (häzirki ýaşulular maslahatynyň koordinatory) çagyrylýardy. Soňra bu kurslar iňlisçeden başga dillere terjime edildi we şol mekdepde bütin dünýädäki doganlara tälim berlip başlandyg.

¹⁷ Patyşalyk gullugynyň mekdebiniň näme maksat bilen geçirilýändigi barada 1962-nji ýylda çykan «Ýehowanyň Şaýatlarynyň ýyllyk kitabynda» şeýle diýildi: «Bu başagaý dünýäde Ýehowanyň Şaýatlarynyň ýygnagyndaky gözegçi dogan ýygnagyň her bir agzasyna üns berip, olar üçin bereket bolup biler ýaly, paýhasly ýaşaýan adam bolmaly. Şeýle-de ol ýygnakdaky borçlaryny ýerine ýetirmek üçin maşgalasyny gözden salmaly däl we sagdyn düşünjeli bolmaly. Şu günler bütin dünýädäki ýygnagyň gullukçylarynyň ajaýyp mümkinçiligi bar! Olar gözegçilik etmek babatda Mukaddes Ýazgylardaky talaplara doly laýyk geler ýaly, Patyşalyk gulluk mekdebinde bilelikde tälim alyp bilýärler» (1 Tim. 3:1—7; Titus 1:5—9).

18. Patyşalyk gullugynyň mekdebi nädip ähli mesihçilere peýda berýär?

¹⁸ Patyşalyk gullugynyň mekdebi ähli mesihçilere peýda berýär. Nädip? Eger ýygnak ýaşululary we gulluk hyzmatçylary mekdepde öwrenen zatlaryny durmuşda ulansalar, Isanyň göreldesine eýerip, imandaşlaryny ruhlandyryp bilýärler. Eýsem, aladaçyl ýaşuly ýa-da gulluk hyzmatçysy size mähirli sözleri aýtsa, ünsli diňlese ýa-da ruhlandyrmak üçin siziň öýüňize gelse begenmeýärsiňizmi? (1 Sel. 5:11). Hawa, Ýehowadan tälim alan bu doganlar ýygnak üçin hakyky bereket!

19. Okuw komiteti başga-da nähili mekdepleri gurnaýar we olar näme üçin geçirilýär?

¹⁹ Hudaýyň guramasyndaky beýleki mekdepler. Ýolbaşçylyk maslahatynyň Okuw komiteti guramada jogapkärli borçlary ýerine ýetirýän doganlar üçin başga-da mekdepleri geçirýär. Şol mekdepler jogapkär doganlara, ýagny ýygnak ýaşulularyna, etrap gözegçilerine we filial komitetiniň agzalaryna köp sanly borçlaryny gowy ýerine ýetirmäge kömek edýär. Mukaddes Ýazgylara esaslanan bu kurslar olary ruhy taýdan berkemäge we Ýehowanyň ynanan gymmatly goýunlarynyň aladasyny edenlerinde, Hudaýyň Sözündäki prinsiplere eýermäge höweslendirýär (1 Pet. 5:1—3).

20. Isa näme üçin biziň ählimiziň «Ýehowadan öwrenýändigimizi» aýtdy we siz näme etmegi ýüregiňize düwdüňiz?

²⁰ Dogrudan-da, Mesihi Patyşa öz şägirtlerine gowy tälim berilmeginiň aladasyny edýär. Bu bilimleriň hemmesi Hudaý tarapyn berilýär. Ýehowa öz Ogly Isa tälim berdi, ol hem şägirtlerine öwretdi. Şol sebäpli Isa biziň ählimiziň «Ýehowadan öwrenýändigimizi» aýtdy (Ýahýa 6:45; Iş. 54:13). Geliň, Patyşamyz Isa Mesihiň berýän täliminden doly peýdalanmagy berk ýüregimize düweliň! Bu bilimleriň ählisiniň gullugymyzy birkemsiz ýerine ýetirmegimiz üçin, bize ruhy taýdan berkemäge kömek edýändigini unutmalyň.