Teokratik gulluk mekdebi
Maksady. Hoş habary ökde wagyz etmäge we öwretmäge kömek etmek.
Möhleti. Yzygiderli.
Geçirilýän ýeri. Ýerli Patyşalyk zalynda.
Talaby. Ýygnaga yzygider gatnaşýan, Mukaddes Ýazgylaryň taglymatlary bilen ylalaşýan we şoňa görä ýaşaýan ähli adamlar okap biler.
Nädip ýazylmaly. Teokratik gulluk mekdebiniň gözegçisine ýüz tutmaly.
Amiotrofik gapdal skleroz (AGS) keseli sebäpli ysmaz bolan Şeron şeýle gürrüň berýän: «Teokratik gulluk mekdebi maňa gözleg geçirmegi we maglumaty logiki yzygiderlikde beýan etmegi öwretdi. Şeýle-de men diňe bir özüm barada däl-de, eýsem, beýleki adamlaryň ruhy zerurlyklaryny göz öňünde tutmagy öwrendim».
Köp wagtdan bäri aýlanýan gözegçi bolup gulluk edýän Arni şeýle gürrüň berýär: «Men çagalygymdan bäri sakawlap gepleýärdim we adamlara seredip geplemek maňa kyn bolýardy. Bu mekdep maňa ynamly bolmaga we öz mertebämi saklamaga kömek etdi. Ýehowa bu mekdep arkaly maňa geplänimde dogry dem almagy we ünsümi jemlemegi öwretdi. Men ýygnakda we wagyzda Hudaýy şöhratlandyryp bilýändigime örän begenýärin».
Maksady. Beýtel gullugyna ýaňy başlanlara hyzmatyny üstünlikli ýerine ýetirmäge kömek etmek.
Möhleti. Hepdede bir gezek geçirilýär (45 minut) we on alty hepde dowam edýär.
Geçirilýän ýeri. Beýtelde.
Talaby. Beýtel maşgalasynyň agzasy ýa-da onda wagtlaýyn gulluk edýän bolmaly (bir ýyl ýa-da ondan köp).
Nädip ýazylmaly. Beýtel maşgalasynyň täze gelen agzalarynyň ählisi çagyrylýar.
1980-nji ýyllarda bu mekdepde okan Dimitrios şeýle diýýär: «Bu mekdep maňa şahsy okuwyna has köp üns bermegime we Beýtel gullugyny dowam etmegime ýardam berdi. Mugallymlar, berilýän bilim we maslahatlar Ýehowanyň söýgi bilen aladamy edýändigine hem-de Beýtelde üstünlikli gulluk etmegimi isleýändigine ynandyrdy».
Keýtlin şeýle gürrüň berýär: «Mekdep maňa iň esasy, ýagny ruhy zatlara has köp üns bermäge ýardam berdi. Ol maňa Ýehowanyň, Onuň öýüniň we guramasynyň edýän işlerine gowy düşünmäge hem-de olary gymmat saýmaga kömek etdi».
Patyşalyk gullugynyň mekdebi
Maksady. Aýlanýan gözegçilere, ýaşululara we käte gulluk hyzmatçylaryna gözegçilik etmäge hem-de guramanyň beýleki borçlaryny ýerine ýetirmäge kömek etmek (Res. iş. 20:28). Okuw döwri ýygnagyň işlerine, maksadyna we wajyp zerurlyklaryna seredilýär. Bu mekdep Ýolbaşçylyk maslahatynyň görkezmesi boýunça birnäçe ýyldan bir gezek geçirilýär.
Möhleti. Soňky ýyllarda bu mekdep aýlanýan gözegçiler üçin iki ýa-da iki ýarym gün, ýaşulular üçin bir ýarym gün, gulluk hyzmatçylary üçin bir gün geçirilýär.
Geçirilýän ýeri. Köplenç Patyşalyk ýa-da Kongres zalynda.
Talaby. Aýlanýan gözegçi, ýaşuly ýa-da gulluk hyzmatçysy bolmaly.
Nädip ýazylmaly. Ýaşulular we gulluk hyzmatçylary etrap gözegçisi tarapyndan çagyrylýar. Aýlanýan gözegçileri filial çagyrýar.
«Bu mekdep gysga wagt dowam etse-de, onda köp zatlar ara alyp maslahatlaşylýar. Ol ýaşululara şatlygyny ýitirmän, Ýehowa mertlik bilen gulluk etmäge ýardam berýär. Ýaňy ýaşuly bolanlar-da, köp wagtdan bäri ýaşuly bolup gulluk edýänler-de Ýehowanyň goýunlarynyň aladasyny ökdelik bilen etmegi hem-de bir pikirde bolmagy öwrenýärler» (Kuin, aşakdaky suratda).
«Bu bilim ruhy soraglara düşünmäge kömek edýär we biziň ruhy saglygymyza ýetiriljek howp barada duýdurýar hem-de süriniň aladasyny etmek üçin peýdaly görkezme berýär. Ýehowanyň bize kömek berýändigi nähili ajaýyp» (Maýkl).
Maksady. Pionerlere «hyzmatyny» doly ýerine ýetirmäge kömek etmek (2 Tim. 4:5).
Möhleti. Iki hepde.
Geçirilýän ýeri. Filial çözýär; köplenç Patyşalyk zalynda.
Talaby. Bir ýyl ýa-da ondan köp doly wagtly pioner bolup gulluk etmeli.
Nädip ýazylmaly. Talaba laýyk gelýän pionerler etrap gözegçisi tarapyndan çagyrylýar.
Lili (sagda) şeýle gürrüň berýär: «Bu mekdep maňa wagyzda we durmuşymda ýüze çykýan kynçylyklary ýeňmäge kömek etdi. Meniň Mukaddes Ýazgylar esasynda gözleg geçirişim, öwredişim we ony ulanyşym has kämilleşdi. Indi men başgalara kömek bermäge, ýygnak ýaşululary bilen hyzmatdaşlyk etmäge we ýygnagyň ösüşine ýardam bermäge has gowy taýýarlandym».
Bu mekdepde iki gezek okan Brenda atly bir uýa şeýle diýýär: «Ol maňa ünsümi bütinleý ruhy zatlara gönükdirmäge, başgalara kömek etmäge we ynsabymy terbiýelemäge ýardam berdi. Ýehowa, hakykatdan-da, jomart Hudaý!»
Ýygnak ýaşululary üçin mekdep
Maksady. Ýaşululara ýygnakdaky borçlaryny ýerine ýetirmäge we ýygnagyň ruhy taýdan ösmegine goşant goşup biler ýaly kömek etmek.
Möhleti. Bäş gün.
Geçirilýän ýeri. Filial çözýär; köplenç Patyşalyk ýa-da Kongres zalynda.
Talaby. Ýaşuly bolmaly.
Nädip ýazylmaly. Ýaşulular filial tarapyndan çagyrylýar.
ABŞ-da geçirilen bu mekdebiň 92-nji klasynda okan käbir doganlaryň aýdan sözlerine üns beriň.
«Bu mekdep maňa gaty köp peýda getirdi. Ol maňa özümi barlamaga we Ýehowanyň sürüsiniň nädip aladasyny edip biljekdigimi görmäge kömek etdi».
«Indi men Ýazgylardaky esasy pikirleri nygtap, adamlary has gowy ruhlandyryp bilýärin».
«Bu mekdepde öwrenen zatlarym maňa bütin ömrüme kömek eder».
Aýlanýan gözegçiler we olaryň aýallary üçin mekdep
Maksady. Etrap we welaýat gözegçilerine ýygnaklaryň aladasyny etmäge, «sözi ýaýratmakda, öwretmekde zähmet» çekip, Hudaýyň sürüsini bakmaga kömek etmek (1 Tim. 5:17; 1 Pet. 5:2, 3).
Möhleti. Iki aý.
Geçirilýän ýeri. Filial çözýär.
Talaby. Dogan etrap ýa-da welaýat gözegçisi bolmaly.
Nädip ýazylmaly. Aýlanýan gözegçiler we olaryň aýallary filial tarapyndan çagyrylýar.
«Biz Isanyň gurama ýolbaşçylyk edişini has gymmat saýyp başladyk. Hyzmat edýän doganlarymyzy ruhlandyrmagyň we her bir ýygnagyň agzybirligini berkitmegiň wajypdygyna göz ýetirdik. Aýlanýan gözegçiler maslahat we käte düzediş berseler-de, bu mekdep arkaly biz doganlara Ýehowanyň olary söýýändigini görkezmegi öwrendik» (Joel, 1-nji klas, 1999 ýyl).
Sallah doganlar üçin mekdep
Maksady. Sallah ýaşululara we gulluk hyzmatçylaryna Ýehowanyň guramasynda goşmaça borçlary ýerine ýetirmäge kömek etmek. Mekdebi tamamlanlaryň köpüsi öz ýurdunda zerurlygyň bar ýerlerine ugradylýar. Mümkinçiligi bolan käbir doganlary daşary ýurtlara belleýärler. Käbirleri bolsa, çet ýerdäki etraplara hoş habary ýetirmek üçin wagtlaýyn ýörite pioner bolup gulluk etmäge ugradylar.
Möhleti. Iki aý.
Geçirilýän ýeri. Filial çözýär; köplenç Patyşalyk ýa-da Kongres zalynda.
Talaby. Sallah ýaşulular we gulluk hyzmatçylary çagyrylýar. Olaryň ýaşy 23-den 62 aralygy we saglygy gowy bolmaly. Zerurlygyň bar ýerinde hyzmat etmäge taýyn bolmaly (Mar. 10:29, 30). Olar azyndan soňky iki ýyl pioner we ýaşuly ýa-da gulluk hyzmatçysy bolup gulluk etmeli.
Nädip ýazylmaly. Etrap kongresinde bu mekdebe ýazylmak isleýän doganlar üçin duşuşyk geçirilýär.
ABŞ-da geçen mekdebiň 23-nji klasynda okan Rik şeýle diýýär: «Men bar ünsümi okuwa berdim. Şol sebäpli Ýehowanyň ruhy meni düýbünden başga adam etdi. Haçanda Ýehowa saňa ýumuş tabşyranda, Ol bu işi ýerine ýetirip biler ýaly goldaw hem berýär. Eger-de men bar ünsümi özüme däl-de, Ýehowanyň islegine gönükdirsem, Onuň meni berkitjekdigine düşündim».
Germaniýada gulluk edýän Andreas şeýle gürrüň berýär: «Men Ýehowanyň guramasynyň işleýşini — biziň günlerimiziň gudraty hasaplaýaryn. Bu mekdep maňa öňde duran işlere taýýarlanmaga ýardam berdi. Şeýle-de Mukaddes Ýazgylardaky ençeme mysallar maňa wajyp hakykata düşünmäge kömek etdi: dogan-uýalara we Ýehowa gulluk etmeklik hakyky bagt getirýär».
Mesihçi är-aýallar üçin mekdep
Maksady. Ýehowa we onuň guramasy mesihçi är-aýallary gerekli gural hökmünde ulanyp biler ýaly, olara ýörite bilim berýär. Mekdebi tamamlanlaryň köpüsi öz ýurdunda zerurlygyň bar ýerlerine bellenilýär. Mümkinçiligi bolan är-aýallary daşary ýurtlara belläp bilerler. Şeýle-de olar çet ýerdäki etraplara hoş habary ýetirmek üçin wagtlaýyn pioner hökmünde belleniler.
Möhleti. Iki aý.
Geçirilýän ýeri. Bu mekdep ABŞ-da geçirilýär. Emma 2012-nji ýylyň sentýabr aýyndan başlap, käbir filiallaryň territoriýasyndaky Patyşalyk ýa-da Kongres zalynda geçiriler.
Talaby. Ýaşy 25-den 50 aralygy we saglygy gowy bolmaly. Zerurlygyň bar ýerinde gulluk etmäge olaryň mümkiçiligi bolmaly we olarda «Ine, men; meni iber!» diýen garaýyş bolmaly (Iş. 6:8). Şeýle-de olaryň durmuş guranyna we doly wagtly gulluk edýänine azyndan iki ýyl bolmaly. Dogan azyndan soňky iki ýyl ýaşuly ýa-da gulluk hyzmatçysy bolup gulluk etmeli.
Nädip ýazylmaly. Welaýat kongresinde oňa ýazylmak isleýänler üçin duşuşyk geçirilýär we gerekli maglumat şol duşuşykda aýdylýar. Eger siziň ýurduňyzda welaýat kongresinde şeýle duşuşyk geçirilmeýän bolsa, onda mekdepde okamak isleýändigiňiz barada öz ýurduňyzyň filialyna hat ýazyp bilersiňiz.
«Bu iki aý biziň durmuşymyzy özgertdi! Bu mekdep Ýehowa köpräk gulluk etmek isleýän är-aýallara köp mümkinçilik döredýär. Biz wagtymyzy paýhasly ulanmak üçin sada ýaşamak isleýäris» (2011-nji ýylda 1-nji klasy tamamlan Erik we Karina, aşakdaky suratda).
Gilead mekdebi
Maksady. Missionerleri köp adamly ýerlerde wagyz etmäge, aýlanýan gözegçi ýa-da Beýtel gullugyna taýýarlamak. Bu mekdep wagyz işini we filialyň işlerini berkitmäge kömek edýär.
Möhleti. Bäş aý.
Geçirilýän ýeri. «Garawul diňi» okuw merkezinde (ABŞ, Nýu-Ýork ştaty, Patterson).
Talaby. Mesihçi är-aýal ýörite gullugyň bir görnüşinde, ýagny pioner, aýlanýan gözegçi ýa-da Beýtel maşgalasynyň agzasy bolup gulluk edýän bolmaly. Olar gullugyň bu görnüşinde azyndan üç ýyl yzygiderli gulluk eden bolmaly. Är-aýal iňlis dilinde erkin gepläp, okap we ýazyp bilmeli.
Nädip ýazlymaly. Bu mekdebe ýurduň filialynyň komiteti çagyrýar.
Amerikaly Lade we Monika häzir Afrikada gulluk edýär. Lade şeýle diýýär: «Gilead mekdebi bizi dünýäniň islendik künjegine gitmäge we mähriban dogan-uýalarymyz bilen eginme-egin gulluk etmäge taýýarlady».
Monika şeýle gürrüň berýär: «Men Hudaýyň Sözünden öwrenen zatlarymy ulanyp, gullukdan köp şatlyk tapýaryn. Men bu şatlygy Ýehowanyň bildirýän söýgüsiniň ýene-de bir subutnamasy hasaplaýaryn».
Filial komitetiniň agzalary we olaryň aýallary üçin mekdep
Maksady. Filial komitetiniň agzasy bolup gulluk edýänlere Beýtel öýi barada alada etmegi, ýygnaga degişli meselelere, etraplara hem welaýatlara gözegçilik etmegi öwretmek. Şeýle-de olar terjimeçilik işleri, edebiýatlary çap etmek hem ugratmak bölümleri barada öwrenýärler.
Möhleti. Iki aý.
Geçirilýän ýeri. «Garawul diňi» okuw merkezinde (ABŞ, Nýu-Ýork ştaty, Patterson).
Talaby. Filial komitetiniň ýa-da Ýurt komitetiniň agzalary, ýa-da şol gulluga bellenjek doganlar bolmaly.
Nädip ýazylmaly. Doganlar we olaryň aýallary Ýolbaşçylyk maslahaty tarapyndan çagyrylýar.
Bu mekdebiň 25-nji klasyny tamamlan Louell we Kara Nigeriýada gulluk edýärler. Louell dogan şeýle diýýär: «Bu mekdep maňa işiň köplügine we nähili işiň tabşyrylandygyna garamazdan, Ýehowa ýaranmak üçin iň esasy zady, ýagny ruhy taýdan sagdyn bolmalydygyny ýatlatdy. Şeýle-de Ýehowanyň öz gullukçylaryna bildirýän söýgüsini adamlara bildirmelidigimizi öwretdi».
Kara şeýle gürrüň berýär: «Men mekdepde aýdylan bir pikir barada oýlanýaryn. Eger haýsydyr bir zady ýönekeý düşündirip bilmesem, onda adamlara tälim bermezden öňürti, şol temany gowy özleşdirmeli».