Ýehowa Ýermeýany iberýär

Ýehowa Ýermeýany pygamber belledi. Ol ýahuda halkyna wagyz etmelidi, erbet işleriňizi goýuň diýmelidi. Ýöne Ýermeýa: «Ýehowa, men entek ýaş. Halka näme diýmelidigini hem bilmeýärin» diýýär. Ýehowa: «Gorkma, men saňa näme aýtmalydygyny öwrederin, kömek ederin» diýýär.

Ýehowa Ýermeýa pygambere şeýle diýýär: «Halkyň ýaşulularyny ýygna. Olaryň gözüniň öňünde bir küýzäni döw. Soňra adamlara: „Iýerusalim hem şu küýze ýaly çym-pytrak bolar“ diý». Ýermeýa Ýehowanyň aýdyşy ýaly edýär. Oňa ýaşulularyň gahary gelýär. Paşhur atly ruhany Ýermeýany urýar. Soňra el-aýagyny zynjyr bilen daňýar. Ýermeýa uzak gije gymyldap bilmeýär. Ertesi gün irden Paşhur ony boşadýar. Şondan soň Ýermeýa: «Men halys ýadadym. Indi adamlara wagyz etmerin» diýýär. Ýermeýa wagyz etmegini goýdumy? Ýok. Ol: «Ýehowanyň sözi içimde ot ýaly ýanýar. Wagyz etmän durup bilmeýärin» diýýär. Ýermeýa ýene-de adamlara Hudaýyň sözüni aýtdy.

Birnäçe ýyldan soň, Ýahudada başga biri patyşa boldy. Ruhanylar we ýalan pygamberler Ýermeýany diňlemek islemeýärdi. Şonuň üçin hanlara: «Ýermeýany öldürmeli» diýýärler. Ýermeýa olara: «Meniň hiç hili günäm ýok. Meni öldürseňiz günä edersiňiz. Men öz sözümi däl, Ýehowanyň sözüni wagyz edýärin» diýýär. Şondan soň hanlar: «Ýermeýany öldürmäň. Ol erbet iş etmändir» diýýär.

Ýermeýa ýene wagyz edýär. Hanlaryň oňa gaty gahary gelýär. Olar patyşa: «Ýermeýany öldür» diýýärler. Patyşa: «Ýermeýa siziň eliňizde. Näme edesiňiz gelse ediň» diýýär. Olar Ýermeýany öldürmek üçin guýa taşladylar. Guýy çuňdy, içi hem batgady. Ýermeýa batga batdy.

Abdymälik diýen bir adam köşkde işleýärdi. Ol patyşanyň ýanyna baryp: «Hanlar Ýermeýany guýa taşlapdyr. Ony halas etmesek öler» diýýär. Patyşa-da: «Ýanyňa 30 adam al. Ýermeýany guýudan çykar» diýýär. Ýermeýa şondan soňam wagyz etdi. Ony hiç kim, hiç zat saklap bilmedi. Biz hem Ýermeýa ýaly hiç kimden gorkman wagyz ederismi?