Biziň gullugymyz — duýgudaşlyk bildirýän iş
1 Isa özüni diňleýän adamlaryň «çopansyz goýunlar ýaly pytraňňy, alaçsyzdygyny» gördi (Mat. 9:36). Ol adamlara ýumşaklyk we söýgi bilen Ýehowanyň ýollaryny öwredip, teselli berdi hem-de olaryň ruhy zerurlyklaryna duýgudaşlyk bildirdi. Biz onuň durmuşy barada oýlansak, Isa ýaly pikirlenmegi, duýmagy öwreneris we wagyzda, onuň ýaly duýgudaşlyk bildireris.
2 Agyr ýagdaýa düşen adamlar Isanyň ýanyna kömek sorap baranda, onuň nähili seslenendigi barada oýlanyp gör (Luka 5:12, 13; 8:43—48). Ol oňaýsyz ýagdaýa düşenlere üns berýärdi (Mar. 7:31—35). Isa başgalaryň duýgusyny göz öňünde tutup, duýgudaşlyk bildirýärdi. Ol adamlara ilkinji göreninden baha bermeýärdi (Luka 7:36—40). Dogrudan-da, Isa Hudaýymyzyň duýgudaşlygyny görkezdi.
3 «Haýpy geldi». Isa gullugyna ýöne bir borç hökmünde garamaýardy. Onuň adamlara «haýpy gelýärdi» (Mar. 6:34). Häzirem şeýle. Biz ýöne bir habar ýetirmäge däl-de, adamlary halas etmäge jan edýäris. Adamlaryň näme üçin şeýle jogap berýändigine düşünjek bol. Olary näme biynjalyk edýär? Belki, olar ruhy taýdan aç bolany üçin, horluk çekýändir ýa-da ýalan taglymat bilen aldanandyr? Biz adamlar bilen ýürekden gyzyklansak, olaryň hoş habary diňlemegi mümkin (2 Kor. 6:4, 6).
4 Duýgudaşlyk ýürege täsir edýär. Meselem: Bir aýalyň üç aýlyk gyzy ýogalanda, gaýgy-hasrat çekýärdi. Haçanda iki sany uýa onuň gapysyny kakanda, ol aýal Hudaýyň horluklara ýol bermeginiň sebäbini düşündirişlerini ýalana çykarmak üçin olary öýüne çagyrdy. Emma soňra ol aýal hatynda şeýle diýdi: «Olaryň meni juda duýgudaşlyk bilen diňlänleri üçin, meniň ýüregim giňedi. Men hatda olaryň ýene bir gezek gelmeklerine-de razy boldum». Sen her bir wagyz edýän adamyňa duýgudaşlyk bildirmäge çalyşýaňmy?
5 Adamlara duýgudaşlyk bildirsek, hakykatdan-da, teselli bereris. Şeýdip, biz «rehimler Atasy» Ýehowany şöhratlandyrarys (2 Kor. 1:3).