Ýatlama agşamyna taýýarlanýarsyňyzmy?

Isa üçin soňky Pasha baýramy gaty wajypdy. Sebäbi onuň ölümi golaýlap gelýärdi. Isa resullary bilen Pasha naharyny iýensoň, her ýyl belleniljek Halypamyzyň agşam naharyny girizmek isleýärdi. Şol sebäpli ol Petrus bilen Ýahýa baýramçylyk üçin gerek zatlary taýýarlamagy tabşyrýar (Luk 22:7—13; daşky sahypadaky surata serediň). Şol waka bize şu ýylyň 27-nji martynda geçiriljek Ýatlama agşamyna öňünden taýýarlanmagyň wajypdygyny ýatladýar. Ýaşulular Ýatlama agşamynda çykyş etjek nutukçyny, nyşanlary we şuňa meňzeş başga-da zatlary taýýarlaýarlar. Ýöne her birimiz aýratynlykda Ýatlama agşamyna nädip taýýarlanyp bileris?

Ýüregiňizi taýýarlaň. Munuň üçin Mukaddes Kitapdan Ýatlama agşamy hakyndaky aýatlary okap, oýlanmaly. Şol aýatlary «Her günki aýady okalyň» atly broşýuradan tapyp bileris. «Mukaddes Kitabyň Täze dünýä terjimesindäki» B12 goşmaça maglumatdan hem köp zatlary öwrenip bileris (şeýle-de 2020-nji ýylyň aprel aýynyň «Durmuş we wagyz okuw depderine» serediň). Maşgala okuwynda bolsa, «Ýehowanyň Şaýatlarynyň edebiýatlarynyň indeksinden» ýa-da «Ýehowanyň Şaýatlarynyň edebiýatlary boýunça gollanmasyndan» gözleg geçirip bilersiňiz.

Başgalary çagyryň. Ýatlama agşamyna çakylyk kampaniýasyna doly gatnaşyň. Ýatlama agşamyna kimleri çagyryp biljekdigiňiz hakda oýlanyň. Siz gaýtadan idegleriňizi, öň Mukaddes Kitap okuwyny geçip goýanlary, tanyş-bilişleriňizi ýa-da dogan-garyndaşlaryňyzy çagyryp bilersiňiz. Ýaşulular bolsa, wagyz etmeýän wagyzçylary çagyrmaly. Eger çagyrjak adamyňyz başga ýerde ýaşaýan bolsa, onda saýtymyzdan «BIZ BARADA» diýen ýere basyp, onuň ýaşaýan ýerinde geçiriljek Ýatlama agşamynyň ýerini we wagtyny aýdyp bilersiňiz.

Biz taýýarlanmak üçin ýene näme edip bileris?