Isa Kapernaumda uly işleri edýär

Isa Petrus, Andreas, Ýakup bilen Ýahýany adamlary tutýan balykçy bolmaga çagyrypdy. Sabat günüdi. Kapernaumyň ýaşaýjylarynyň bary sinagoga barýarlar. Isa hem sinagoga baryp, adamlara tälim berip başlaýar. Adamlar hemişekisi ýaly onuň öwredişine haýran galýarlar. Sebäbi ol kanunçylar ýaly däl-de, ygtyýarly adam ýaly öwredýärdi.

Sinagoga bir jynly adam hem barýar. Ol batly ses bilen şeýle diýýär: «Eý nazaretli Isa, sen bizi näme etjek bolýarsyň? Bizi ýok etmek üçin geldiňmi? Men seniň kimdigiňi gowy bilýärin, sen Hudaýyň Mukaddes gullukçysysyň» Emma Isa jyna käýäp: «Sem bol-da, onuň içinden çyk!» diýýär (Markus 1:24, 25).

Edil şol wagt jyn hemmeleriň gözüniň alnynda ol adamy sandyradyp, sesiniň ýetdiginden gygyrdýar. Emma şonda-da «hiç hili zyýan ýetirmän», onuň içinden çykýar (Luka 4:35). Sinagogadaky adamlar muny görüp, diýseň haýran galýarlar! Olar: «Bu näme boldugy? ...Onuň hatda jynlara-da buýruk bermäge ygtyýary bar, olar hem oňa gulak asýarlar» diýişýärler (Markus 1:27). Bu wakanyň bütin Jelile welaýatyna ýaýrandygy geň galdyrmasa gerek.

Şondan soň Isa şägirtleri bilen sinagogadan çykyp, Simunyň, ýagny Petrusyň öýüne gaýdýar. Petrusyň gaýynenesiniň gyzgyny galyp, syrkaw ýatyrdy. Şägirtleri Isadan ony sagaltmagyny haýyş edýärler. Şonda Isa onuň ýanyna baryp, elinden tutýar-da galdyrýar. Ol hem şol bada sagalýar, soňra Isa we onuň şägirtlerine hyzmat edip başlaýar. Ol gelen myhmanlara nahar bişirip beren bolmaly.

Gün ýaşyberende, giden märeke syrkaw adamlaryny getirip, Petrusyň öýüniň gapysynyň agzynda üýşýärler. Göräýmäge, şäheriň ähli ýaşaýjylary şol ýere ýygnanan ýalydy. Näme üçin? Syrkaw adamlar derdine şypa gözleýärdiler. «Adamlar onuň ýanyna dürli keselli syrkawlary getirýärler. Isa hem olaryň her biriniň üstüne elini goýup sagaldýardy» (Luka 4:40). Hawa, adamlaryň keseli nähili bolsa-da, pygamberlikde aýdylyşy ýaly, Isa olaryň baryny sagaldýar (Işaýa 53:4). Ol hatda jynlary hem kowup çykarýar. Olar adamlardan çykanda: «Sen Hudaýyň Oglusyň» diýip gygyrýardylar (Luka 4:41). Emma Isa olara käýäp, geplemäge ýol bermeýärdi. Jynlar Isanyň Mesihdigini bilýärdiler. Ýöne Isa olaryň hak Hudaýa gulluk edýän ýaly bolup görünmegini islemeýärdi.