Ene-ataň goýan düzgünini bozsaň näme etmeli?

Her bir maşgalanyň öz tertip-düzgüni bar. Muňa öýe wagtynda gelmek, elektron enjamlaryny ulanmak we başgalar bilen özüňi gowy alyp barmak degişli.

Ene-ataň goýan düzgünini bozan bolsaň näme etmeli? Boljak iş bolansoň, geçeni yzyna dolap bolmaýar. Ýöne ýagdaý beterleşmez ýaly öňüni alyp bolýar. Şu makalada muny nädip etmelidigini bileris.

• Näme etmeli däl

• Iň gowy çykalga

• Deň-duşlaryň näme diýýär?

Näme etmeli däl

• Ene-ataň öýüň düzgünini bozandygyňy bilmeýän bolsa, sen eden işiňi gizlemegiň mümkin.

• Ene-ataň öýüň düzgünini bozandygyňy bilýän bolsa, sen özüňi aklamagyň ýa-da başga birini günäkärlemegiň mümkin.

Bularyň hiç birini etmeseň gowy. Näme üçin? Sebäbi eden işini gizleýän ýa-da özüni aklaýan adam çaga ýaly bolýar. Eger şeýle etseň, eneň-ataň çagamyz entek ulalmandyr diýer.

«Eden işiňi gizlemek bu öz-özüňi aldamak. Sebäbi iru-giç hemme zadyň üsti açylýar, şonda ýagdaý hasam beterleşýär» (Diýana).

Iň gowy çykalga

• Dogryňy aýt. Mukaddes Kitapda: «Günäsini gizleýän üstünlik gazanmaz» diýilýär (Nakyllar 28:13). Ene-ataň seniň bikämildigiňi we ýalňyşýandygyňy bilýär, ýöne olar dogruçyl bolmagyňy isleýär.

  «Sen dogryňy aýdanyňda, ene-ataň saňa eglişik edýär. Dogruçyl bolsaň, ene-ataň ynamyny gazanarsyň» (Oliwiýa).

• Ötünç sora. Mukaddes Kitapda: «Pesgöwünli boluň» diýilýär (1 Petrus 5:5). Özüňi aklaman, ötünç soramak üçin pesgöwünlilik gerek.

  «Özüni aklaýan adam hiç haçan özüni günäli hasaplamaýar. Soňabaka şeýle adamyň ynsaby kütelýär» (Heter).

• Eden işiň arkasynda dur. Mukaddes Kitapda: «Terbiýäni kabul et» diýilýär (Nakyllar 8:33). Eneň-ataň beren temmisini igenmän kabul et.

  «Eneň-ataň beren temmisine igenip ýörmegiň peýdasy ýok. Berlen temmini kabul edip, geçeni geçdi bil» (Jeýson).

• Ene-ataň ynamyny gazanjak bol. Mukaddes Kitapda: «Öňki häsiýetleriňizi egniňizden çykaryň... sebäbi olar öňki ýaşaýşyňyza laýyk gelýärdi» diýilýär (Efesliler 4:22). Dogry işleri edip, ene-ataň ynamyny gazanjak bol.

  «Eneň-ataň öňki ýalňyşlaryňy gaýtalamaýandygyňy we dogry işleri edýändigiňi görse, saňa bolan ynamy artar» (Karen).

Maslahat. Ene-ataň ynamyny gazanmak üçin, ilkinji ädimi özüň ät. Mysal üçin, wagtynda barýan bolsaňam, entek ýolda wagtyň ene-ataňa öýe barýandygyňy jaň edip aýt. Şonda olar saňa arkaýyn ynanyp biler.