Wawilon şäheriniň golaýynda Ur şäheri bardy. Ol ýerdäki adamlaryň köpüsi her hili zat ýasap, şoňa sežde edýärdi. Ýöne bir adam diňe Ýehowa sežde edýärdi. Onuň ady Ybraýym.

Ýehowa Ybraýyma: «Öýüňi, dogan-garyndaşlaryňy goýup ýola düş, saňa nirä gitmelidigini aýdaryn» diýdi. Soňra: «Seniň çagalaryňy köpelderin, sen arkaly hemme adamlara ýagşylyk ederin» diýdi.

Ybraýym nirä gitmelidigini bilmese-de, Ýehowanyň aýdanyny etdi. Ybraýym, gelni Bibisara, kakasy Tarah we inisi Lut ýola düşdi. Olar diňe egin-eşiklerini we gerek zatlaryny aldylar.

Ybraýym maşgalasy bilen ahyry Ýehowanyň aýdan ýurduna bardy. Oňa Kengan diýilýärdi. Şol wagt Ybraýym 75 ýaşyndady. Ýehowa Kenganda Ybraýym bilen gepleşdi. Oňa: «Şu ýurdy çagalaryňa bererin» diýip söz berdi. Ýöne Ybraýym bilen Bibisaranyň çagasy ýokdy, özleri hem garrydy. Onda Ýehowanyň aýdyşy ýaly bolarmy?

Ybraýymyň Bibisara öýlenenine köp ýyl bolupdy. Olar Ur şäherindekä owadan uly jaýda ýaşaýardylar. Ýöne indi çadyrda ýaşaýarlar. Bibisara çadyrda ýaşaýanyna gynanmaýardy. Ol Ýehowany gowy görýärdi, hemişe kömek etjegine ynanýardy.

Bibisaranyň çagasy bolmaýardy. Şonuň üçin ol Ybraýyma: «Hyzmatkärim Hajar ikiňiz maňa çaga edip beriň, oňa öz çagam ýaly serederin» diýýär. Şeýdip, Hajaryň ogly bolýar, adyna Ysmaýyl dakýar.

Köp ýyl geçýär, Ybraýym 99, Bibisara bolsa 89 ýaşaýar. Bir gezek olaryň öýüne üç adam gelýär. Ybraýym agajyň aşagynda saçak ýazýar, olar iýip içýär. Bilýäňmi, şol üç adam kim? Olar perişdeler. Perişdeler Ybraýyma: «Indiki ýyl şu wagtlar ogluň bolar» diýýär. Şol wagt Bibisara çadyrdady, olaryň gürrüňini eşidip durdy. Ol içinden: «Meniň ýaly garryja aýalyňam çagasy bolarmy?!» diýip gülýär.

Bir ýyldan perişdeleriň aýdyşy ýaly, Bibisaranyň ogly bolýar. Ybraýym onuň adyna Yshak dakýar. Yshak «gülki» diýmegi aňladýar.

Yshak ulalyp bäş ýaşyna ýetdi. Ysmaýyl Yshagyň üstünden gülýärdi. Bibisara Ysmaýylyň eden işini halamady. Şonuň üçin Ybraýyma: «Hajar bilen Ysmaýyly öýden kow» diýýär. Ybraýymyň olary kowasy gelmedi. Ýöne Ýehowa adamlara Ysmaýyl arkaly däl-de, Yshak arkaly ýagşylyk etjek bolýardy. Şonuň üçinem Ýehowa Yshagy gorady. Ol Ybraýyma: «Bibisaranyň diýenini et, Ysmaýyla özüm kömek ederin» diýýär.