Ang Pangmalas ng Bibliya

Mainit Ba ang Impierno?

“ANG tao ay masusunog, masusunog, masusunog!” Sa isang madilim na silid, iniuunat ng tagapagsalita na ang kamisidentro ay nagliliyab, ang kaniyang mga kamay at humahakbang patungo sa kaniyang nagtatakang mga tagapakinig. Mabuti na lamang, ang pagtatanghal ay tumagal lamang ng mga ilang segundo. Subalit sa tulong ng kaniyang madaling-magningas na pulbura, naikintal na maigi ng predikador sa kaniyang mga tagapakinig ang tungkol sa impiernong apoy sa pamamagitan ng kaniyang nakakukumbinsing pagtatanghal.

Gaya niya, maraming iba pang relihiyosong mga guro​—lalo na sa Sangkakristiyanuhan​—ang nagsasabi na inilalaan ng Diyos ang walang hanggang kapalarang ito para sa mga masasama. Subalit ganiyan nga ba ang sinasabi ng Bibliya?

Ang Mabuti at Masama sa Iisang Dako

“Ang masama ay mauuwi sa impierno, pati ng lahat ng mga bansa na nagsisilimot sa Diyos.” (Awit 9:17, King James Version) Dito, sa halip na salitang “impierno,” pinipili ng mas makabagong mga salin na gaya ng Lamsa at The Jerusalem Bible na panatilihin ang salitang lumilitaw sa tekstong Hebreo, ang “Sheol.” Subalit ano bang talaga ang kahulugan ng “impierno,” o “Sheol”?

Ang aklat ng Bibliya na Eclesiastes ay nagbibigay ng higit na impormasyon tungkol sa Sheol. Sabi nito: “Anumang masumpungang gawin ng iyong kamay, gawin mo ng iyong kapangyarihan, sapagkat walang gawa ni katha man ni kaalaman man ni karunungan man sa Sheol, na iyong paroroonan.” (Eclesiastes 9:10) Kung yaong mga nasa impierno, o Sheol, ay hindi nakapag-iisip o nakakaalam o kumikilos, tiyak na hindi sila maaaring dumanas ng paghihirap.

Kung gayon, hindi kataka-taka na maging ang tapat na mga lingkod ng Diyos ay nagtungo sa Sheol. Inisip ni Jacob na magtutungo siya roon kapag namatay siya, at si Job ay umasa na ikakanlong siya roon ng Diyos at sa gayo’y wawakasan ang kaniyang mga paghihirap. (Genesis 42:38; Job 14:13) Inaasahan ba ng dalawang tapat na mga lingkod na ito​—o hilingin pa nga​—na magtungo sa isang nagliliyab, maapoy na impierno na kasama ng mga masasama? Tiyak na hindi!

Ano ba ang “Apoy”?

Subalit paano natin uunawain ang mga salita ni Jesus nang sabihin niya na yaong mga hindi gumagawa ng kalooban ng Diyos ay magtutungo sa “apoy na hindi mapapatay,” o sa ‘kalan ng apoy na diyan nga ang pagtangis at ang pagngangalit ng mga ngipin’?​—Marcos 9:43-48; Mateo 13:42.

Sa pagtalakay sa dakong ito, hindi ginamit ni Jesus ang salitang “Hades,” ang Griegong katumbas ng salitang Hebreo na “Sheol.”a Bagkus, ginamit niya ang salitang “Gehenna.” Ang salitang ito ay tumutukoy sa isang tapunan ng basura na malapit sa Jerusalem, na tinatawag na Libis ng Hinnom, kung saan ang apoy ay patuloy na pinag-aalab upang sunugin ang basura. Isa itong angkop na kataga upang ang mga tagapakinig ni Jesus ay mag-isip, hindi tungkol sa walang hanggang pagpapahirap, kundi sa ganap na pagkawasak, pagkalipol sa pamamagitan ng apoy.

Ang Apocalipsis na ibinigay kay apostol Juan ay bumabanggit tungkol sa isang “dagat-dagatang nagniningas sa apoy at asupre” kung saan inihahagis ang lahat ng nagsisigawa ng masasamang bagay. (Apocalipsis 21:8) Kung mayroong impierno, ito na nga iyon, yamang ang mga masasama ang nagtutungo roon. Subalit sinasabi sa atin ng aklat ding ito ng Bibliya na ang kamatayan, na minana kay Adan, at ang Hades ay ibubulid din sa dagat-dagatang apoy. Maaari bang pahirapan ang dalawang mahirap-unawain na mga bagay na ito? Hindi. Ngunit ang apoy dito ay maaari at kumakatawan sa paglaho nito, na magaganap minsang ‘ibigay [nito] ang mga patay na nasa kanila,’ yaon ay, pagkatapos na buhaying-muli ang mga patay.​—Apocalipsis 20:13, 14.

Ang huling mga halimbawang ito ay nagpapakita na ang apoy ay isa lamang sagisag ng paglipol, o walang hanggang pagkapuksa. Kaya walang pagdurusa o pagpapahirap sa dagat-dagatang apoy, o Gehenna, ni mayroon man nito sa Hades (o, Sheol), kung saan nagtutungo ang tapat na mga lingkod ng Diyos, gayundin ang mga masasama. Subalit kung susuriin pa natin ang paksang ito, mauunawaan natin ng higit kung bakit hindi tayo maaaring maniwala sa Bibliya at maniwala pa rin sa pag-iral ng impiernong apoy.

Hindi Kasuwato ng Personalidad ng Diyos

Ano ang iisipin mo sa mga magulang na ikinukulong ang kanilang mga anak araw-araw, o pinahihirapan pa nga sila? Kung ikaw ay namumuhi sa gayong mga pagkilos, hindi ka rin ba dapat mamuhi sa isang diyos na magpapangyari na ang kaniyang mga anak ay pahirapan magpakailanman sa apoy?

Ang katotohanan na ang tunay na Diyos ay hindi ganiyan ay makikita mula sa mga pagsaway na ipinatungkol niya sa mga Israelita na ‘sinusunog ang kanilang mga anak na lalaki at babae sa apoy.’ Sinabi ni Jehova na ito ay ‘isang bagay na hindi niya iniutos o pumasok man sa kaniyang pag-iisip.’ (Jeremias 7:31) Yamang hindi man lamang naisip ng Diyos ang gayong bagay, paano natin maguguniguni na gagawa siya ng isang impiernong apoy para sa kaniyang mga nilikha?b Oo, kung ang kalupitan at pagpapahirap ay nakamumuhi sa atin, gaano pa ngang higit na kinamumuhian ito ng Diyos, na isang Diyos ng pag-ibig?​—1 Juan 4:8.

Ang doktrina ng impiernong apoy ay labag din sa katarungan. Sa kaniyang liham sa mga taga-Roma, si apostol Pablo ay nagpapaliwanag: “Ang kabayaran ng kasalanan ay kamatayan.” (Roma 6:23) At, sabi niya sa atin: “Sapagkat ang namatay ay napawalang-sala na sa kaniyang kasalanan.” Kung ang kamatayan ay lubusang nag-aalis sa pagkakautang ng isang tao, kung gayong bakit kailangan niyang magdusa nang walang hanggan dahil lamang sa isang buong buhay na kasalanan?​—Roma 6:7.

Kaya, ipinakikita ng Bibliya na ang impiernong apoy, gaya ng karaniwang pagkaunawa rito, ay hindi umiiral. At ang kaalamang ito ay nagpapahintulot sa atin na magkaroon ng isang kaugnayan sa Diyos na salig sa pag-ibig at hindi sa labis na pagkatakot. Iminumungkahi namin na patuloy mong suriin ang Bibliya at alamin kung paano siya paluluguran nang wasto upang makabilang doon sa mga makakakita sa kahanga-hangang araw na iyon kapag ang Hades, o Sheol, ang karaniwang libingan ng sangkatauhan, ay maglaho magpakailanman.​—1 Juan 4:16-18.

[Mga talababa]

[Blurb sa pahina 18]

Ano ang iisipin mo sa mga magulang na pinahihirapan ang kanilang mga anak?

[Larawan sa pahina 19]

Ito ba ang impierno ng Bibliya?