KAPITAN NG TEMPLO

Ang opisyal na pumapangalawa sa mataas na saserdote sa karangalan (Gaw 4:1). Siya ang nangangasiwa sa mga nanunungkulang saserdote at sa mga Levitang nasa ilalim ng nakabababang mga kapitan at inatasang magbantay sa templo sa Jerusalem at magpanatili ng kaayusan. (Luc 22:4, 52) Ang mga Levita ay inorganisa sa 24 na pangkat, at ang mga pangkat na ito ay halinhinang naglilingkod nang lingguhan, makalawang ulit sa isang taon. Malamang na mayroon ding nangangasiwang kapitan sa bawat pangkat, anupat may iba pang mga kapitan sa mas maliliit na grupo.

Maimpluwensiyang mga tao ang mga kapitan. Nakipagsabuwatan sila sa mga punong saserdote nang upahan ng mga ito si Hudas upang ipagkanulo si Jesus. Nagdala sila ng kanilang mga tauhan kasama ng mga saserdote upang arestuhin si Jesus. (Luc 22:3, 4, 52) Nagtinging legal ang pag-aresto kina Pedro at Juan sa templo dahil kasama sa mga nang-aresto ang kapitan ng templo. (Gaw 4:1, 3) Noong ibang pagkakataon naman, pagkatapos palayain ng isang anghel si Pedro at ang ilang mga apostol mula sa bilangguan, pumaroon sa kanila ang kapitan ng templo kasama ang kaniyang mga opisyal upang dalhin sila sa harap ng Sanedrin sa tila legal at walang-dahas na paraan.​—Gaw 5:24-26.