KEDEMOT

[mula sa salitang-ugat na nangangahulugang “silangan”].

Ang pangalang ito ay tumukoy sa isang lunsod sa S ng Jordan. Lumilitaw na tumukoy rin ito sa ilang na nakapalibot dito. Mula sa Ilang ng Kedemot, si Moises ay nagsugo ng mga mensahero sa Amoritang si Haring Sihon, at humingi siya ng pahintulot na makaraan sa lupain nito. (Deu 2:26, 27) Noong una, ang Kedemot ay ibinigay sa mga Rubenita. Nang maglaon, ito’y iniatas sa mga Meraritang Levita. (Jos 13:15, 18; 21:34, 36, 37; 1Cr 6:77-79) Karaniwang pinapaboran ng mga iskolar, bilang posibleng lokasyon nito, ang isa sa mga gulod na malapit sa pinagmumulan ng agusang libis ng Arnon, gaya ng Qasr ez-Zaʽfaran, na mga 16 na km (10 mi) sa HS ng ipinapalagay na lugar ng sinaunang Dibon.