SEKSIYON 4

Sino ang Diyos?

MARAMING sinasambang diyos ang mga tao. Pero itinuturo ng Banal na Kasulatan na may iisang tunay na Diyos lamang. Siya ay kataas-taasan, walang katulad, at walang hanggan. Nilalang niya ang lahat ng nasa langit at lupa. Binigyan niya tayo ng buhay. Kaya siya lamang ang nararapat nating sambahin.

Ang Kautusan ay ibinigay sa pamamagitan ni propeta Moises bilang “salita na sinalita sa pamamagitan ng mga anghel”

Maraming titulo ang Diyos pero isa lang ang personal niyang pangalan—JEHOVA. Sinabi ng Diyos kay Moises: “Ito ang sasabihin mo sa mga anak ni Israel, ‘Isinugo ako sa inyo ni Jehova na Diyos ng inyong mga ninuno, na Diyos ni Abraham, Diyos ni Isaac at Diyos ni Jacob.’ Ito ang aking pangalan hanggang sa panahong walang takda, at ito ang pinakaalaala sa akin sa sali’t salinlahi.” (Exodo 3:15) Mga 7,000 ulit na lumilitaw ang pangalang Jehova sa Banal na Kasulatan. Gaya ng sinasabi sa Awit 83:18, ang Diyos lamang “na ang pangalan ay Jehova,” ang “Kataas-taasan sa buong lupa.”

Makikita ang pangalan ng Diyos sa sinaunang manuskrito ng Dead Sea Scroll

Walang taong nakakita sa Diyos kailanman. Sinabi ng Diyos kay Moises: “Hindi mo maaaring makita ang aking mukha, sapagkat walang tao ang makakakita sa akin at mabubuhay pa.” (Exodo 33:20) Nakatira ang Diyos sa langit. Hindi siya kayang makita ng mga tao. Mali na gumawa ng imahen, larawan, o simbolo ng Diyos, o manalangin sa mga ito. Ganito ang iniutos ng Diyos na Jehova sa pamamagitan ni propeta Moises: “Huwag kang gagawa para sa iyo ng inukit na imahen o ng anyo na tulad ng anumang nasa langit sa itaas o nasa lupa sa ibaba o nasa tubig sa ilalim ng lupa. Huwag mong yuyukuran ang mga iyon ni maganyak ka man na paglingkuran ang mga iyon, sapagkat akong si Jehova na iyong Diyos ay Diyos na humihiling ng bukod-tanging debosyon.” (Exodo 20:2-5) Nang maglaon, ganito naman ang sinabi ng Diyos sa pamamagitan ni propeta Isaias: “Ako ay si Jehova. Iyan ang pangalan ko; at sa kaninuman ay hindi ko ibibigay ang aking kaluwalhatian, ni ang aking kapurihan man sa mga nililok na imahen.”—Isaias 42:8.

Naniniwala ang ilan sa Diyos pero iniisip nilang mahirap siyang makilala o malapitan, at na siya ay dapat katakutan sa halip na ibigin. Ano sa tingin mo? Interesado ba sa iyo ang Diyos? Maaari mo ba talaga siyang makilala? Puwede ka rin kayang maging malapít sa kaniya? Tingnan natin kung ano ang sinasabi ng Kasulatan tungkol sa mga katangian ng Diyos.

Ang Banal na Espiritu ng Diyos at ang Kaniyang mga Anghel

Paano isinasakatuparan ng Diyos ang kaniyang kalooban? Ang isang paraan ay sa pamamagitan ng kaniyang banal na espiritu. Ang espiritu ng Diyos ay hindi isang persona na may sariling isip ni isa itong anghel. Ito ang kaniyang di-nakikitang aktibong puwersa, ang kaniyang walang-limitasyong kapangyarihan na ginagamit niya para isakatuparan ang kaniyang mga layunin. Ginamit ito ng Diyos para likhain ang langit at lupa. “Sa pamamagitan ng salita ni Jehova ay nalikha ang langit, at ang buong hukbo nila ay sa pamamagitan ng espiritu ng kaniyang bibig.” (Awit 33:6) Ipinaliliwanag ng Genesis 1:2 na noong natatakpan pa ng tubig ang lupa at inihahanda pa ito ng Diyos para maging tahanan ng mga tao, “ang aktibong puwersa ng Diyos ay gumagalaw nang paroo’t parito sa ibabaw ng tubig.” Pagkatapos, ginamit ng Diyos ang kaniyang banal na espiritu para lalangin ang lahat ng uri ng buhay sa lupa.

Ginagamit din ng Diyos ang mga anghel para gawin ang kaniyang kalooban. Nilalang sila ng Diyos para makasama niya sa langit. Makapangyarihan ang mga anghel. Sila ang naghahatid ng mga mensahe mula sa Diyos at gumagawa ng iba pang mahahalagang atas. Halimbawa, tinukoy ng Kasulatan ang Kautusan na ibinigay sa pamamagitan ni propeta Moises bilang “salita na sinalita sa pamamagitan ng mga anghel.” Tinutulungan din ng mga anghel ang mga lingkod ng Diyos sa lupa. Ang totoo, tinatawag sa Kasulatan ang mga anghel ng Diyos bilang mga “espiritung ukol sa pangmadlang paglilingkod, na isinugo upang maglingkod doon sa mga magmamana ng kaligtasan.”—Hebreo 1:14; 2:2.