AMATISTA

Isang uri ng semiprecious na kristal na kwarts na kulay purpura o ube, at ginagamit sa mga alahas. Masusumpungan ito sa anyong hexagonal na mga kristal, at ang nagbibigay dito ng kulay ay ang mga bahid ng mangganeso o bakal na sangkap nito. Ang isang klase ng amatista ay uring kwarts (Occidental), samantalang ang mamahaling amatista (Oriental) ay isang uri ng corundum o safiro. Ang pangalang amatista ay galing sa salitang Griego na a·meʹthy·stos (nangangahulugang “huwag languin”), na ginamit sa Griegong Septuagint bilang salin ng salitang Hebreo na ʼach·la·mahʹ sa Exodo 28:19 at 39:12.

Ang ikatlong bato sa ikatlong hanay ng mga bato sa burdadong “pektoral ng paghatol” ng mataas na saserdote ng Israel ay isang amatista. (Exo 28:2, 15, 19, 21; 39:12) Sa pangitain ni Juan tungkol sa “Bagong Jerusalem,” nakita niya na batong amatista ang ikalabindalawang pundasyon ng pader ng banal na lunsod.​—Apo 21:2, 10, 19, 20.