Bakit Pinahihintulutan ng Diyos ang Kasamaan?
KAHIT saan ka tumingin, laganap ang kasamaan at pagdurusa. Kapuwa ang mga sibilyan at sundalo ay namamatay sa mga digmaan. Laganap ang krimen at karahasan. Marahil ay naging biktima ka kamakailan ng pagtatangi o kawalang-katarungan. Dahil sa iyong mga nakikita at nararanasan, malamang na naitanong mo, ‘Bakit pinahihintulutan ng Diyos ang kasamaan?’
Hindi bago ang tanong na iyan. Mga 3,600 taon na ang nakalilipas, nagtanong ang tapat na lingkod ng Diyos na si Job: “Bakit nga ba patuloy na nabubuhay ang mga balakyot?” (Job 21:7) Palibhasa’y nababagabag sa kasamaan ng kaniyang mga kababayan, ang propetang si Jeremias na nabuhay noong ikapitong siglo B.C.E. ay nagtanong: “Bakit kaya ang lakad ng mga balakyot ang siyang nagtatagumpay, at silang lahat na gumagawa ng kataksilan ang siya pang hindi nababahala?” (Jeremias 12:1) Batid ni Job at ni Jeremias na matuwid ang Diyos. Gayunman, inisip nila kung bakit laganap ang kasamaan. Marahil ay naisip mo rin ito.
Isinisisi ng ilan sa Diyos ang kasamaan at pagdurusa. Ang iba naman ay nagtatanong: ‘Kung ang Diyos ay makapangyarihan-sa-lahat, makatarungan, at maibigin, bakit hindi pa niya winawakasan ang kasamaan at pagdurusa? Bakit niya hinayaang magpatuloy ang kasamaan hanggang sa ating panahon?’ Tatalakayin ito at ang iba pang mahahalagang tanong sa susunod na artikulo.
[Picture Credit Line sa pahina 3]
AP Photo/Adam Butler