“Nakakatulong Ito sa Akin Para Maabot ang Puso ng mga Tao”
ISANG internasyonal na komperensiya tungkol sa mga usaping panlipunan ang ginanap kamakailan sa Porto Alegre, isang lunsod sa timugang Brazil. Libu-libo mula sa 135 bansa ang dumalo. Kapag intermisyon, nilalapitan ng ilang Saksi mula sa isang kongregasyon sa Porto Alegre ang mga delegado para ibahagi ang mensahe ng Kaharian. Paano kaya sila nagkaintindihan?
“Ginamit namin ang buklet na Good News for People of All Nations,” ang sabi ni Elizabete, isang payunir. Sinabi pa niya: “Marami sa mga delegado ang hindi pa nakarinig ng mabuting balita ng Kaharian, pero positibo ang tugon nila sa aming mensahe. Nakipag-usap kami sa mga tao mula sa Bolivia, India, Israel, Nigeria, Pransiya, at Tsina. Mayroon kaming mga literatura sa mga wika ng ilang delegado, at natuwa naman silang tanggapin iyon.”
Sa Mexico, ginagamit din ng payunir na si Raúl ang buklet na ito at magaganda ang resulta. Kamakailan, nilapitan niya ang isang 80-anyos na Arabo na kamamatay lang ng asawa. Napaiyak sa tuwa ang lalaki nang mabasa niya sa kaniyang sariling wika ang mensahe ng Kaharian. Bakit kaya? Talagang naantig siya sa pangako ng Diyos sa Apocalipsis 21:3, 4 na mawawala na ang kamatayan. Minsan naman, isang lalaking nagsasalita ng Portuges ang nakausap ni Raúl. Namatayan din ito ng mahal sa buhay—ang kaniyang anak na lalaki. Ipinabasa ni Raúl sa kaniya ang pahina na nasa wikang Portuges. Pagkabasa, sinabi ng lalaki na gusto niyang matuto pa nang higit tungkol sa Bibliya at pumayag itong makipag-aral.
Ginagamit ni Raúl ang Good News for People of All Nations para magpatotoo sa mga nagsasalita ng Aleman, Armeniano, Hindi, Ingles, Koreano, Mixe, Persiano, Pranses, Ruso, Tsino, at Zapotec. Sinabi niya: “Subók ko na ang buklet na ito sa ministeryo. Nakakatulong ito sa akin para maabot ang puso ng mga tao kahit hindi ako marunong magsalita ng wika nila.”
Dahil parami nang parami ang naglalakbay o nandarayuhan, mas marami tayong oportunidad na magpatotoo sa mga nagsasalita ng ibang wika. Maibabahagi natin sa kanila ang mensahe ng Kaharian sa tulong ng buklet na Good News for People of All Nations. Lagi mo ba itong dala?
[Mga larawan sa pahina 32]
Si Raúl, hawak ang buklet na ginagamit niya para maabot ang puso ng mga tao