Mga Magulang—Sanayin ang Inyong mga Anak na Mangaral
1 Ang ating mga kongregasyon ay pinagpala sa pagkakaroon ng maraming mga bata na may taimtim na pagnanais na maglingkod sa Diyos. (Ecles. 12:1) Sila’y kabilang sa mga inanyayahan ni Jehova na makibahagi sa pagpuri sa kaniya. (Awit 148:12-14) Kaya, ang pang-araw-araw na pagsasanay na ibinibigay ng mga magulang sa kanilang mga anak ay dapat na maglakip sa tagubilin kung paano ibabahagi ang kanilang pananampalataya sa iba sa gawaing pangangaral ng Kaharian.—Deut. 6:6, 7.
2 Sanayin ang mga Anak sa Progresibong Paraan: Ang mga anak ay karapat-dapat sanayin mula sa napakamurang edad upang sumama sa kanilang mga magulang sa ministeryo. Bago magtungo sa paglilingkod, ihanda ang inyong mga anak na makibahagi sa makabuluhang paraan. Tiyakin nang patiuna kung ano ang inaasahan ninyong gagawin nila sa pintuan. Ang mumunting mga bata ay maaaring magbigay ng mga tract at mga handbill at anyayahan ang mga tao sa Kingdom Hall. Ang mga kabataang mahusay bumasa ay maaaring anyayahang basahin ang mga kasulatan sa pintuan. Maaari nilang ialok ang mga magasin, na ginagamit ang isang maikling presentasyon. Habang sila’y nagkakaroon ng karanasan, sanayin silang gumamit ng Bibliya sa kanilang presentasyon. Maraming kabataang mamamahayag ang nagpasimula ng kanilang sariling ruta ng magasin at palagiang gumagawa ng mga pagdalaw-muli. Napakainam kung ang isang bata ay gumawang kasama ng isang matanda sa halip na kasama ng iba pang kabataan. Maaaring ipaliwanag ng matanda sa maybahay na ang batang kasama ay sinasanay sa ministeryo.
3 Isang munting batang babae ang humiling ng tulong sa matatanda upang maging kuwalipikado bilang isang mamamahayag ng Kaharian. Kahit na siya’y limang taóng gulang lamang sa panahong iyon at hindi pa marunong bumasa, mabisa na niyang naihaharap ang mensahe ng Kaharian sa mga pintuan. Isinaulo niya ang lugar ng mga kasulatan, binuksan ang mga ito, hiniling sa maybahay na basahin ang mga ito, at pagkatapos ay nagbigay ng paliwanag.
4 Ang mga anak ay kailangan ding turuan sa pamamagitan ng halimbawa ng magulang hinggil sa kahalagahan ng pagkakaroon ng isang mabuting iskedyul sa pakikibahagi nang regular sa ministeryo. Kailangang itatag ng mga magulang ang isang hindi pabagu-bagong rutin linggu-linggo sa paglilingkod at panatilihin iyon, upang mabatid ng mga anak kung anong bahagi ng sanlinggo ang laging nakalaan sa gawaing pangangaral.
5 Kapag ang mga anak ay nasanay mula sa kamusmusan upang ibigin at tamasahin ang ministeryo, sila’y mapasisiglang abutin ang lalong malalaking pribilehiyo sa hinaharap, marahil kalakip na ang paglilingkurang payunir. (1 Cor. 15:58) Tayong lahat ay dapat na magpasigla sa mga bata na nasa gitna natin upang gumawa ng pagsulong bilang mga tagapuri ni Jehova.