Pasulungin ang Kakayahan sa Ministeryo—Maging Maaasahang Partner

Kung Bakit Mahalaga: Alam ni Jesus na sa pangangaral, mahalaga ang may kasama. Kaya nang utusan niya ang 70 sa kaniyang mga alagad para mangaral, isinugo niya sila nang dala-dalawa. (Luc. 10:1) Makakatulong ang isang partner sa kasama niyang mamamahayag kapag bumangon ang isang mahirap na sitwasyon o kung nahihirapan itong sagutin ang tanong ng may-bahay. (Ecles. 4:9, 10) Puwede siyang magkuwento ng kaniyang karanasan at kung minsan ay magbigay ng mungkahi sa kasama niya para matulungan itong maging mas mabisa sa pangangaral. (Kaw. 27:17) Makapagbibigay din siya ng pampasigla sa pamamagitan ng nakapagpapatibay na pag-uusap habang papunta sila sa kasunod na bahay.—Fil. 4:8.

Kung Paano Ito Gagawin:

Makinig habang nagpapatotoo ang iyong partner. (Sant. 1:19) Kapag binabasa ang isang teksto, sundan iyon sa iyong Bibliya. Sa gayon, mas madali kang makakatulong kung kailangan.
Pag-isipang mabuti kung kailangan mong sumali at kung kailan ka sasali sa pag-uusap. (Kaw. 25:11) Kung isinama ka ng isang mamamahayag sa pag-aaral sa Bibliya, malamang na pahahalagahan niya kung magkokomento ka paminsan-minsan. Pero sa pagbabahay-bahay, baka gusto ng partner mo na siya lang muna ang magsalita kapag siya ang nakikipag-usap sa may-bahay. Siyempre, kung baguhan siyang mamamahayag o nahihirapan siyang sumagot sa isang tanong o pagtutol, malamang na pasalamatan niya ang iyong tulong. Pero sinasamahan mo man ang isang mamamahayag sa pagbabahay-bahay, pagdalaw-muli, o pag-aaral sa Bibliya, huwag sasabad, aagawin ang pakikipag-usap, o iibahin ang paksa.
Magkuwento ng iyong karanasan. Kung may maibibigay kang payo sa partner mo para maging mas epektibo siya sa ministeryo, huwag kang mag-atubili. (Kaw. 3:27) Sa tamang pagkakataon, puwede mo itong simulan sa pagsasabing, “Ano’ng napansin mo sa pag-uusap n’yo ng may-bahay?” o “Puwede bang magbigay ng mungkahi?” o “Ganito ang ginagawa ko.” Tandaan na pasasalamatan ng iba kung magbibigay ka ng mungkahi paminsan-minsan, pero kung lahat na lang ng pagkakamali niya ay papansinin mo, baka masiraan siya ng loob.

Subukan Ito Ngayong Buwan:

Pagkatapos maglingkod sa larangan, sabihin sa partner mo kung ano ang sinabi o ginawa niya na nakatulong sa iyo.