Pasulungin ang Kakayahan sa Ministeryo—Pag-aalok ng Aklat na Itinuturo ng Bibliya

Kung Bakit Mahalaga: Ang aklat na Itinuturo ng Bibliya ay isang pangunahing kasangkapan sa ating pagtuturo. Pero bago natin ito magamit sa pagtuturo sa iba, kailangan muna silang magkaroon nito. Kaya dapat tayong maging mahusay sa pag-aalok ng aklat na Itinuturo ng Bibliya sa ating ministeryo. (Kaw. 22:29) Maraming paraan para gawin ito, at dapat gamitin ng mga mamamahayag kung ano ang epektibo para sa kanila.

Kung Paano Ito Gagawin:

Magbangon ng nakapupukaw-interes na tanong na magagamit mo para akayin ang may-bahay sa isang espesipikong kabanata sa aklat. Puwede ka ring pumili ng isang tanong sa pasimula ng bawat kabanata. Matapos marinig ang sagot ng may-bahay, magbasa ng isang angkop na teksto at ipakita sa kaniya ang isang parapo tungkol sa paksang iyon, at puwede rin ninyong talakayin ito sa maikli.
Ang isa pang paraan ay ang paggamit sa unang mga pahina ng aklat para makuha ang interes ng may-bahay, at ituro sa kaniya kung saang bahagi ng aklat makikita ang sagot ng Bibliya. Halimbawa, puwede kang bumanggit ng isang masamang balita at sabihin na marami ang nag-iisip kung ano ang sagot sa mga tanong sa pahina 3. O puwede mo ring sabihin na dumadalaw ka sa kanila para ibahagi ang isang magandang pag-asa sa hinaharap. Pagkatapos, ipakita ang mga larawan sa pahina 4-5 at magtanong, “Alin sa mga pangakong ito ang gusto mong matupad?” Ang isa pang puwedeng gawin ay ang sabihing dumadalaw ka para tulungan ang mga tao na malaman ang sagot sa mahahalagang tanong sa buhay. Saka mo ipakita sa may-bahay ang mga tanong sa ibaba ng pahina 6, at papiliin siya kung alin ang gusto niyang pag-usapan.
Tuwirang mag-alok ng pag-aaral sa Bibliya. Puwede mong sabihin: “Ipinakikita namin ang pantulong na ito sa pag-aaral ng Bibliya. Nakakita ka na ba nito? [Hayaang sumagot.] Kahit saglit lang, gusto ko sanang ipakita sa iyo kung paano ito pinag-aaralan gamit ang sarili mong Bibliya.”

Subukan Ito Ngayong Buwan:

Magkaroon ng practice session sa inyong pampamilyang pagsamba.
Kapag nasa ministeryo, ibahagi sa ibang mamamahayag ang plano mong sabihin. (Kaw. 27:17) Baguhin ang iyong presentasyon kapag hindi iyon epektibo.