5. Ano ang gumawa ng pagkakaiba sa gitna niyaong bumubuo ng sampung dalaga, at ano ang nangyari sa pagtatagal ng nobyo?

⁵ Ang ilustrasyon na ibinigay ni Jesus tungkol sa sampung dalaga ay may kaugnayan sa “kaharian ng langit,” ang pandaigdig na pamahalaan sa ikapagpapala ng lahat ng sangkatauhan. Kaya si Jesu-Kristo ay nagpatuloy sa pagsasabi: “Ang kaharian ng langit ay makakatulad sa sampung dalaga na kumuha ng kanilang mga ilawan at nagsilabas upang salubungin ang nobyo. Ang lima sa kanila’y mga mangmang, at ang lima’y matatalino. Sapagkat nang dalhin ng mga mangmang ang kanilang mga ilawan ay hindi sila nagdala ng langis, datapuwat ang matatalino ay nagdala ng langis sa kanilang sisidlan kasama ng kanilang mga ilawan. Samantalang nagtatagal ang nobyo, silang lahat ay nag-antok at nakatulog.”​—Mateo 25:1-5.

7. Sa anong yugto ng panahon waring nagtatagal ang Nobyo sa pagdating sa kasintahang babae, at bakit?

⁷ Ang pag-iisang dibdib ng magiging mga membro ng uring kasintahang babae sa kanilang makalangit na Nobyo ay hindi naganap, gaya ng inaasahan, sa pagtatapos ng “itinakdang panahon ng mga bansa” noong 1914. (Lucas 21:24) Makatuwiran kung gayon, sa kanila wari bang ang Nobyo ay nagtatagal sa kaniyang pagdating, bagaman ang kaniyang pagkanaririto sa kaniyang makalangit na Kaharian ay nangyari noong 1914. Yaong mapanglaw na mga taon ng Digmaang Pandaigdig I ay napatunayang gaya ng napakadilim na gabi sa karanasan ng uring mga dalaga.

8. (a) Sa makasagisag na pananalita, paano nangyari ang pag-aantok at pagkatulog sa bahagi ng mga dalaga? (b) Sa anong layunin dumating ang Nobyo sa templo, at bakit may kaugnayan ito sa uring kasintahang babae?

⁸ Sa makasagisag na pananalita, ang pag-aantok at pagkatulog sa bahagi ng mga dalaga ay nangyari. Ang pangangaral sa madla ng mabuting balita tungkol sa dumarating na sanlibong taóng paghahari ni Kristo sa ikapagpapala ng lahat ng sangkatauhan ay totoong huminto. Mula sa huling taon ng Digmaang Pandaigdig I, isang napakahalagang yugto ng paghatol ang nagsimula para roon sa makasagisag na mga dalaga. Ito’y dahilan sa ang nagpupunong Haring Jesu-Kristo ay dumating sa espirituwal na templo. Sa pagdating niya roon, sinimulan niya ang paghatol upang linisin yaong hinirang na maglingkod sa templo ng Diyos na Jehova. (Malakias 3:1-3) Ito ang panahon para sa kaniyang pagpapakita kung kailan, bilang ang makalangit na Nobyo, nakatakdang tanggapin niya sa kaniyang sarili sa langit ang sinang-ayunang mga membro ng uring kasintahang babae na nangamatay na noon.