Bahagi 6—Pagdaraos ng Progresibong mga Pag-aaral sa Bibliya

Kapag Nagtanong ang Estudyante

¹ Minsang maitatag na ang pag-aaral sa Bibliya, karaniwan nang pinakamabuting talakayin nang sistematiko ang mga turo sa Bibliya sa halip na magpabagu-bago ng paksang pinag-uusapan. Makatutulong ito upang makapagtatag ang estudyante ng pundasyon sa tumpak na kaalaman at sumulong siya sa espirituwal. (Col. 1:9, 10) Gayunman, kadalasan nang nagtatanong ang mga estudyante hinggil sa iba’t ibang paksa sa panahon ng pag-aaral. Paano dapat harapin ang mga ito?

² Gumamit ng Unawa: Ang mga tanong na nauugnay sa materyal na pinag-aaralan ay kadalasan nang maaaring sagutin agad. Kung ang tanong ay tatalakayin sa pinag-aaralang publikasyon sa kalaunan, baka sapat nang banggitin sa kaniya ang bagay na iyon. Gayunman, kung ang tanong ay walang kaugnayan sa materyal na pinag-aaralan o kailangan pa ang pagsasaliksik upang masagot ito nang wasto, baka makabubuting talakayin ito pagkatapos ng pag-aaral o sa ibang pagkakataon. Napansin ng ilang mamamahayag na makabubuting isulat ang tanong upang makita ng estudyante na talagang binibigyang-pansin ang kaniyang tanong at nakatutulong din ito upang huwag kayong lumayo sa paksang tinatalakay sa panahon ng pag-aaral.

³ Maraming turo sa Bibliya ang hindi detalyadong tinatalakay sa ating saligang mga publikasyon na pinag-aaralan. Paano kung nahihirapan ang estudyante na tanggapin ang isang espesipikong turo o mahigpit siyang nanghahawakan sa maling paniniwala? Baka makabubuting suriin ang karagdagang materyal na lubusang tumatalakay sa sinasabi ng Bibliya hinggil sa paksang iyon. Kung hindi pa rin kumbinsido ang estudyante, talakayin na lamang sa ibang pagkakataon ang paksa at magpatuloy sa regular na pag-aaral. (Juan 16:12) Habang lumalawak ang kaalaman niya sa Bibliya at sumusulong siya sa espirituwal, baka maunawaan din niya ang turong iyon ng Bibliya.

⁴ Maging Mahinhin: Kung hindi mo tiyak ang sagot sa isang tanong, huwag tangkaing magbigay ng sariling opinyon. (2 Tim. 2:15; 1 Ped. 4:11) Ipaliwanag na magsasaliksik ka at sasagutin iyon sa pagbalik mo. Maaari mo pa ngang gamitin ang pagkakataong iyon upang turuan ang estudyante kung paano magsaliksik. Pasulong na ipakita sa kaniya kung paano gagamitin ang iba’t ibang pantulong sa pagsasaliksik na inilaan ng organisasyon ni Jehova. Sa ganitong paraan, masasagot na niya sa bandang huli ang sarili niyang mga tanong.—Gawa 17:11.

Tulungan Silang Makatanggap ng Higit Pang Patotoo

¹ Habang ibinabahagi natin ang mabuting balita, madalas tayong makatagpo ng mga taong nakatira sa lugar na hindi saklaw ng ating teritoryo o nagsasalita ng ibang wika, kasali na ang wikang pasenyas. Ang iba naman na napagdausan natin ng mainam na talakayan sa Bibliya ay maaaring lumipat na sa lugar na hindi sakop ng ating teritoryo. Paano natin maisasaayos na makatanggap ng higit pang patotoo ang gayong mga tao? Sa pamamagitan ng paggamit ng Please Follow Up (S-43) form.

² Kadalasan nang mas matamang nakikinig ang mga tao sa mabuting balita kapag inihaharap ito sa kanilang katutubong wika. (Gawa 22:1, 2) Kaya karaniwan na, kapag iba ang wika ng taong ating nakausap, dapat nating punan ang form kahit na ang tao ay hindi nagpakita ng interes sa mensahe ng Kaharian. Gayunman, kung malaki-laki naman ang populasyon ng mga nagsasalita ng wikang banyaga sa isang lugar at regular silang napangangaralan sa kanilang sariling wika, baka hindi na kailangang punan ang form maliban na lamang kung may nagpakita ng interes.

³ Kung Paano Pupunan ang Form: Sikaping makuha sa mataktikang paraan ang pangalan, adres, at numero ng telepono ng iyong kausap. Isulat kung gaano siya kainteresado, kung kailan siya maaaring kausapin, ang literaturang naipasakamay o hiniling niya, at ang wika na higit niyang nauunawaan. Pagkatapos punan ang form, ibigay ito kaagad sa kalihim ng kongregasyon, na siya namang magpapadala nito sa angkop na kongregasyon o grupo.

⁴ Kung Paano Ipadadala ang Form: Kung hindi alam ng kalihim kung aling kongregasyon o grupo ang dapat tumanggap ng form o kung wala siyang adres ng padadalhan nito, maaari niya itong ipadala sa tanggapang pansangay upang maibigay ito sa angkop na kongregasyon o grupo.

⁵ Kapag ang isang kongregasyon o grupo ay nakatanggap ng napunan nang Please Follow Up form, dapat gumawa ng mga kaayusan upang madalaw kaagad ang indibiduwal. Habang masikap nating ginagawa ang ating bahagi, makapagtitiwala tayo na bubuksan ni Jehova ang puso ng mga “wastong nakaayon ukol sa buhay na walang hanggan.”—Gawa 13:48.