2 Nkumi ya dikanga

1 L’ɔkɔngɔ wa nyɔi ka Ahaba, ase Mɔaba+ wakatɔmbɔkwɛ ase Isariyɛlɛ.

2 L’etena kɛsɔ mbakakɔ Ahaziya lo djongɔ ya lo luudu lande la ndala la la diko la Samariya, ko akahomɔ. Ɔnkɔnɛ, nde akatome akɛndji ndo akawatɛ ate: “Nyotshu, nyotombole Baala-Zɛbubɛ, jambizambi ya l’Ɛkɛrɔna+ kanyi dia mbeya kana mpota kami kayɔkɔnɔ.”+ 3 Koko ondjelo wa Jehowa akatɛ Elidja*+ ose Tishibɛ ate: “Onɛɛ, tshɔka tohomane la akɛndji wa nkumekanga ka Samariya kele towate wate: ‘Onde laasɔ ndooko Nzambi kele lo Isariyɛlɛ mbonyotatshu dia tombola Baala-Zɛbubɛ, jambizambi ya l’Ɛkɛrɔna+ kanyi? 4 Diakɔ diambota Jehowa ate: “Wɛ hatetɔ oma lo mbeto koladiyɛ, nɛ dia wɛ ayovɔ ndooko onyake.”’” Ko Elidja akatshu.

5 Lam’akakalola akɛndji le nde, mbala kakɔ ɔtɔi nde akawambola ate: “Lande na kambonyokalola?” 6 Vɔ wakookadimola vate: “Pami kɛmɔtshi akaye ndjohomana la so ko akatote ate: ‘Nyotshu, nyokalole le nkumekanga kakanyotomi ndo nyotowote nyate: “Jehowa kata ate: ‘Onde laasɔ ndooko Nzambi kele lo Isariyɛlɛ kamboyotoma anto dia tombola Baala-Zɛbubɛ, jambizambi ya l’Ɛkɛrɔna kanyi? Ɔnkɔnɛ, wɛ hatetɔ oma lo mbeto koladiyɛ, nɛ dia wɛ ayovɔ ndooko onyake.’”’”+ 7 Ko nde akawambola ate: “Ngande waki pami kakɔ kakaye ndjohomana la nyu ndo kakanyote awui asɔ?” 8 Ko vɔ wakawotɛ vate: “Pami kakɔ aki la ahɔndɔ wa wɛɔsa wa nyama+ ndo aki la oya w’ekoho ka nyama lo lokende lande.”+ Mbala kakɔ ɔtɔi nde akate ate: “Ɔsɔ ekɔ Elidja ose Tishibɛ.”

9 Oma laasɔ, nkumekanga akootomɛ owandji w’anto 50 kaamɛ l’anto ande 50. Lam’akandatshu le nde, nde akadjasɛka lo shɔdi ya dikona. Nde akawotɛ ate: “Okambi wa Nzambi ka mɛtɛ+ le, nkumekanga kata ate: ‘Holɔ.’” 10 Koko Elidja akakadimola owandji akɔ w’anto 50 ate: “Kawɔ. Naka dimi lekɔ okambi wa Nzambi, dja yaholɔ oma l’olongo,+ yakotshumbe wɛ l’anto ayɛ 50.” Ko dja yakaholɔ oma l’olongo, yakootshumbe nde l’anto ande 50.

11 Ko nkumekanga akatome nto owandji okina w’anto 50 kaamɛ l’anto ande 50. Nde akatshu, ko akawotɛ ate: “Okambi wa Nzambi ka mɛtɛ le, nkumekanga kata ate: ‘Holɔ esadi.’” 12 Koko Elidja akaakadimola ate: “Naka dimi lekɔ okambi wa Nzambi ka mɛtɛ, dja yaholɔ oma l’olongo ndo yakotshumbe wɛ l’anto ayɛ 50.” Ko dja ya Nzambi yakaholɔ oma l’olongo ndo yakootshumbe nde l’anto ande 50.

13 Ko nkumekanga akatome nto owandji wa 3 w’anto 50 kaamɛ l’anto ande 50. Koko owandji wa 3 w’anto 50 akatshu, ko akatoka adwe la ntondo ka Elidja ndo akatatɛ mbɔsɛngasɛnga dia nde mbooka kɛtshi, awotɛ ate: “Okambi wa Nzambi ka mɛtɛ le, lam’alangayɛ, etawɔ dia lɔsɛnɔ lami ndo nsɛnɔ* y’ekambi ɛnɛ 50 monga la nɛmɔ lo washo ayɛ. 14 Dja yamboshila mpolɔ oma l’olongo ndo yambodiaka ewandji 2 w’anto 50 wakaye ntondo kaamɛ l’elui awɔ w’anto 50, koko wonya ɔnɛ, etawɔ dia lɔsɛnɔ* lami monga la nɛmɔ lo washo ayɛ.”

15 Ko ondjelo wa Jehowa akatɛ Elidja ate: “Holɔ kaamɛ la nde. Towokake wɔma.” Ɔnkɔnɛ nde akonɛɛ, ko akaholɔ kaamɛ la nde otsha le nkumekanga. 16 Oma laasɔ, Elidja akatɛ nkumekanga ate: “Jehowa kata ate: ‘Wɛ akatome akɛndji dia tombola Baala-Zɛbubɛ, jambizambi ya l’Ɛkɛrɔna+ kanyi. Onde laasɔ ndooko Nzambi kele lo Isariyɛlɛ?+ Lande na kakiyɛ komimbola ɔtɛkɛta ande? Ɔnkɔnɛ, wɛ hatetɔ oma lo mbeto koladiyɛ, nɛ dia wɛ ayovɔ ndooko onyake.’” 17 Ko nde akavu lo ndjela ɔtɛkɛta wa Jehowa wakate Elidja. Lam’ele nde komonga la ɔna pami, Jɛhɔrama*+ akonge nkumekanga lo dihole diande lo ɔnɔnyi wa 2 w’ɛlɔmbwɛlɔ ka Jɛhɔrama+ ɔna Jɛhɔshafata nkumekanga ka Juda.

18 Lo kɛnɛ kendana l’etenyi kekina k’ɔkɔndɔ wa Ahaziya+ ndo kɛnɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ?