1 Ɛkɔndɔ

21 Oma laasɔ, Satana* akalɔshana la Isariyɛlɛ ndo akatshutshuya Davidɛ dia mbadia lofulo l’ase Isariyɛlɛ.+ 2 Ɔnkɔnɛ Davidɛ akatɛ Jɔaba+ nde l’ewandji w’anto ate: “Nyotshu, nyotaadia ase Isariyɛlɛ oma la Bɛrɛ-Shɛba polo la Danɛ,+ kele kanyoyombute dia dimi mbeya lofulo lawɔ.” 3 Koko Jɔaba akate ate: “Jehowa afudia lofulo l’anto ande mbala 100! Nkumɛmi nkumekanga le, shi vɔ tshɛ wamboshilaka monga ekambi wa nkumɛmi? Lande na kalanga nkumɛmi nsala dui sɔ? Lande na kahombande monga kiɔkɔ y’onongo le Isariyɛlɛ?”

4 Koko dui dia nkumekanga diakaleke dia Jɔaba. Ko Jɔaba akatshu ndo aketeta lo Isariyɛlɛ w’otondo; l’ɔkɔngɔ wa laasɔ, nde akaye la Jɛrusalɛma.+ 5 Ko Jɔaba akasha Davidɛ lofulo l’anto wakafundjama nkombo. Ase Isariyɛlɛ waki tshɛ tshɛ apami miliyɔ ɔtɔi la nunu lokama (1 100 000) waki la tokuwa ta ta, ndo apami w’ase Juda waki nunu nkama nyɛi l’akumi esambele (470 000) waki la tokuwa ta ta.+ 6 Koko ase Lɛwi ndo aseka Bɛnjamina kofundjama nkombo l’atei awɔ,+ nɛ dia dui dia nkumekanga diaki wɔnɔnyi le Jɔaba.+

7 Dui sɔ kɔngɛnyangɛnya Nzambi ka mɛtɛ, ko nde akakɔmɔla Isariyɛlɛ. 8 Ko Davidɛ akatɛ Nzambi ka mɛtɛ ate: “Dimi lambosala pɛkato+ ka woke lo woho wosadimi dikambo nɛ. Koko lam’alangayɛ, odimanyiya okambi ayɛ munga kande,+ nɛ dia lambosala dikambo di’enginya efula.”+ 9 Ko Jehowa akatɛ Ngada+ laki ɔmɛnyi wa waɛnɛlɔ waki Davidɛ ɔnɛ: 10 “Tshɔka tote Davidɛ wate: ‘Jehowa kata ate: “Layanga kosha awui 3 wa wɛ nsɔna. Sɔna dui dimɔtshi diahombami kosalɛ.”’” 11 Ko Ngada akɔtɔ le Davidɛ ndo akawotɛ ate: “Jehowa kata ate: ‘Sɔna dui dimɔtshi 12 lam’asa ɛnɔnyi 3 wa ndjala ka kasha,+ kana talawɔka atunyi ayɛ watakotshanya+ l’edja ka ngɔndɔ 3, ko kana nshi 3 ya lokuwa la ta la Jehowa, mbuta ate olando lo wodja+ ndo ondjelo wa Jehowa ndanya+ ɛtshi ka nkɛtɛ k’otondo k’Isariyɛlɛ.’ Laasɔ kana yimba lo kɛnɛ kahombami totɛ Ɔnɛ lakantomi.” 13 Ɔnkɔnɛ Davidɛ akatɛ Ngada ate: “Dui sɔ diambompandjola wɔɔngɔ efula. Lam’alangayɛ, etawɔ dia dimi nkɔ lo anya wa Jehowa, nɛ dia kɛtshi kande kekɔ efula;+ koko tetawɔke dia dimi nkɔ lo anya w’onto.”+

14 Ko Jehowa akatome olando+ lo Isariyɛlɛ; ko ase Isariyɛlɛ nunu akumi esambele (70 000) wakavu.+ 15 Ndo nto, Nzambi ka mɛtɛ akatome ondjelo la Jɛrusalɛma dia ndjilanya, koko lam’akinde suke la nsala dui sɔ, Jehowa akayiende, ko akanyange* l’ɔtɛ wa mpokoso kakɔ,+ ko nde akatɛ ondjelo wakalanyaka ate: “Ambokoka!+ Kaloya lonya layɛ.” Ondjelo wa Jehowa akemala suke la dihole di’esuswelo diaki Ɔrɔnana*+ ose Jɛbusɛ.+

16 Lam’akedia Davidɛ washo, nde akɛnyi ondjelo wa Jehowa emadi lam’asa olongo la nkɛtɛ, ele la lokuwa la ta+ lo lonya lande ndo nde akɛlɛ otsha la Jɛrusalɛma. Davidɛ nde la dikumanyi wakalɔtɛ akoto,+ ko wakayakɔsha ekukumadi.+ 17 Davidɛ akatɛ Nzambi ka mɛtɛ ate: “Shi dimi kakate dia mbadia anto? Dimi kakasale pɛkato ndo dimi kakasale kɔlɔ.+ Ko ɛkɔkɔ ɛnɛ ambowosala? Jehowa Nzambi kami le, lam’alangayɛ, lonya layɛ lankɔmɔlɛ ndo lakɔmɔlɛ ase luudu la papa; koko telake mpokoso kɛnɛ le wodja ayɛ.”+

18 Ko ondjelo wa Jehowa akatɛ Ngada+ dia totɛ Davidɛ dia nde mbidɛ ndo tosalɛ Jehowa elambwelo lo dihole di’esuswelo diaki Ɔrɔnana ose Jɛbusɛ.+ 19 Ɔnkɔnɛ, Davidɛ akadɛ lo ndjela ɛtɛkɛta wa Ngada wakandawotɛ lo lokombo la Jehowa. 20 L’etena kɛsɔ, Ɔrɔnana akakadimɔ, ko akɛnyi ondjelo ndo anande w’apami 4 waki kaamɛ la nde wakawɛnyi, ko wakayashɛ. Ɔrɔnana akasusolaka eponga. 21 Lam’akaye Davidɛ le nde, Ɔrɔnana akende, ko akɛnyi Davidɛ ndo mbala kakɔ ɔtɔi nde akamɔ oma lo dihole di’esuswelo, ko akatokusamɛ Davidɛ elungi polo la nkɛtɛ. 22 Davidɛ akatɛ Ɔrɔnana ate: “Onsondja* ɛtshi ka nkɛtɛ kɛnɛ kele la dihole di’esuswelo dia dimi salɛ Jehowa elambwelo laawɔ. Onsondjatɔ l’oshinga tshɛ wayoyodja dia mpokoso kambokomɛ wodja nshila.”+ 23 Koko Ɔrɔnana akatɛ Davidɛ ate: “Ɔsatɔ; nkumɛmi nkumekanga asale kɛnɛ kele ɔlɔlɔ le nde.* Ngɔmbɛ tɔ kɛnɛ dikambo di’olambo wa lotshumba ndo ehomɔ k’esuswelo+ kakoka monga nkunyi kaamɛ la eponga w’olambo wa ntɔngɔ vɔ ɛnɛ. Dimi lambodikimɔ tshɛ.”

24 Koko nkumekanga Davidɛ akatɛ Ɔrɔnana ate: “Keema, dimi pombaka kisomba losomba, nɛ dia dimi hantɔsa ɛngɔ kayɛ ko kisha Jehowa kana nambola elambo wa lotshumba wahamasombi losomba.”+ 25 Ɔnkɔnɛ, Davidɛ akasha Ɔrɔnana tɔshɛkɛlɛ* 600 ta paonyi l’oshinga wa ɛtshi ka nkɛtɛ kakɔ. 26 Ko Davidɛ akasalɛ Jehowa elambwelo+ laawɔ ndo akalambola elambo wa lotshumba+ ndo elambo w’osanga, ndo nde akelɛ* Jehowa ko nde akookadimola lo ntoma dja oma l’olongo lo elambwelo k’olambo wa lotshumba. 27 Oma laasɔ, Jehowa akadjangɛ ondjelo+ dia nde nkaloya lokuwa lande la ta lo dihoso dialɔ. 28 L’etena kɛsɔ, lam’akɛnyi Davidɛ dia Jehowa ambookadimola lo dihole di’esuswelo diaki Ɔrɔnana ose Jɛbusɛ, nde akatetemala nambola elambo laawɔ. 29 Koko tabɛrnaklɛ ka Jehowa kakasale Mɔsɛ l’oswe wa shɛnga ndo elambwelo k’olambo wa lotshumba kakikɔ l’etena kɛsɔ lo dihole dia la diko dia la Ngibiyɔna.+ 30 Koko Davidɛ kokoka ntshɔ lɛkɔ dia tombola Nzambi kanyi, nɛ dia nde aki la wɔma l’ɔtɛ wa lokuwa la ta laki ondjelo wa Jehowa.