Isaya
3 Nɛ dia eenda, Nkumadiɔndjɔ ka mɛtɛ, Jehowa kanga lolembelembe,
Ekɔ lo minya woho tshɛ w’osukɔ oma la Jɛrusalɛma ndo la Juda,
Osukɔ tshɛ wa mbo ya ndɛ ndo ashi,+
2 Pami ka wolo ndo ɔndɔshi wa ta,
Shushi ndo omvutshi,+ osadi wa diendja ndo ekumanyi,
3 Owandji w’anto 50,+ ɔnɛnɛ ndo ondaki,
Ose maji la manamana ndo osaki w’ekanga wele la diewo.+
4 Dimi layetɛ ana w’akɛnda ewandji awɔ,
Ndo onto lele bu shikaa* ayowaolɛ.
5 Anto wayosoyana,
Onto la wonyande.+
Ɔna dikɛnda ayɔlɔsha osombe w’onto,
Ndo onto lahalɛmiyama efula ayohetsha ɔnɛ lalɛmiyama.+
6 Onto tshɛ ayokimɛ ɔnango lo luudu la she ndo ayota ate:
“Wɛ ekɔ la okutu wa laadiko, onga omboledi aso.
Ɔsa ɔkɛndɛ wa tota dia kɛnɛ kakalanyema.”
7 Koko nde ayotona lushi lɔsɔ ate:
“Dimi hantonga osodi* wa mpota yanyu;
Dimi bu la mbo ya ndɛ kana ahɔndɔ lo luudu lami.
Tanyombetɛke omboledi w’anto.”
8 Nɛ dia Jɛrusalɛma ambotakana,
Ndo Juda ambɔkɔ,
Nɛ dia vɔ wekɔ lo ndɔshana la Jehowa lo ɛtɛkɛta ndo lo etsha,
9 Ɛnamelo ka dungi diawɔ mbafundaka,
Ndo diɔ mbewoyaka pɛkato kawɔ oko Sɔdɔma+;
Diɔ hadioyange dia kishɛ.
Mananu le wɔ,* nɛ dia vɔ wekɔ lo ndjaela mpokoso le wɔ vɔamɛ!
11 Mananu le kanga kɔlɔ!
Mpokoso kayowokomɛ,
Nɛ dia kɛnɛ kakasale anya ande kayowoosalɛ!
12 Lo kɛnɛ kendana la anto ami, wanɛ wawasha elimu wekɔ lo mbahɛnyɔla,
Wamato wekɔ lo mbawahemɛ.
Anto ami le, ɛlɔmbɔdi anyu wekɔ lo nsala dia nyu mbekekɔ,
Ndo vɔ fukutanyaka ɛlɔmbwɛlɔ ka mboka yanyu.+
13 Jehowa ambemala dia mfunda anto;
Nde ambonɛɛ dia mpembola dombo di’anto.
14 Jehowa ayɔtɔ lo kilombo nde la dikumanyi la ewandji w’anto ande.
“Nyu nyakatshumbe ekambɔ ka vinyɔ,
Ndo kɛnɛ kakanyave ose wola kekɔ lo mvudu yanyu.+
15 Bonde kasombɔnyu minola anto ami
Ndo mbatshatsha dungi di’ase wola lo ditshu?”+ mbata Nkum’Olongo Nkumadiɔndjɔ Jehowa kanga lolembelembe.
16 Jehowa kata ate: “Lam’ele ana wa wamato wa Siɔna wekɔ la lotamanya,
Wakɛndakɛnda ɛtɛ awɔ l’olongo,
Walɛngiya washo awɔ, wakɛndakɛnda ɔkɔkɛ,
Watondja londjo l’osakanyelo wa tɔkɔlɔngɔnyɔ tawɔ,
17 Jehowa ayotoma nto ahaka lo ɛtɛ w’ana wa wamato wa Siɔna,
Jehowa ayotshika ekoko awɔ etakataka.+
18 Lushi lɔsɔ Jehowa ayonya olangala w’ɛkɔma awɔ,
Bɛtshi di’ahɔndɔ diakelekawɔ l’ɔtɛ ndo dɛngalɛnga+ diele oko ngɔndɔ,
19 Azama, ɛkɔma ndo ahɔndɔ wakomba ɔtɛ,
20 Tambala, tɔshɛnɛtɛ ta l’ekolo, la eya,
Diangɔ diadjawɔ malashi* ndo tɔshɛnɛtɛ,
21 Mpɛtɛ ya lo mpita ndo azama wa lo ɛhɛmbɛ,
22 Ekutu wa nshi ya weke, toshumishi t’etale, akɔti ndo totapatapa tadjawɔ falanga,
23 Talatala ya lo anya+ ndo ahɔndɔ wa linɛnɛ,*
Ahɔndɔ wadingawɔ l’ɔtɛ ndo ahɔndɔ wakombawɔ ɔtɛ.
24 Nsolo k’ɛhɔndɛlɔ kayoyala lo dihole dia esɔ ka balasama+;
Lɔkɔdi lo dihole dia oya;
Diwandji lo dihole dia yoho ya dimɛna ya nɔngɔsɔla divo+;
Dihɔndɔ dia dikoto lo dihole dia dihɔndɔ dia dimɛna+;
Ndo lofuu lo dihole di’olangala.
25 Apami ayɛ wayodiakema la lokuwa la ta,
Ndo apami ayɛ wa wolo lo ta.+