EOHWELO K’ƐLƐMBƐ

1 Ɔnɛ ele ɛtɛkɛta wakatɛ Mɔsɛ ase Isariyɛlɛ tshɛ lo ɛtshi ka nkɛtɛ kaki suke la Jɔrdana, l’oswe, lo laandja l’oswe lɛlane la Sufu, lam’asa Parana, Tɔfɛlɛ, Labana, Hazerɔtɛ la Dizahaba. 2 Ɔsɔ ekɔ lɔkɛndɔ la nshi 11 oma la Hɔrɛbɛ otsha la Kadɛshɛ-Baranea+ lo mboka k’otsha lo Dikona dia Seirɛ. 3 Lo Ngɔndɔ ka 11 lushi 1 ɔnɔnyi wa 40,+ Mɔsɛ akatɛ ase Isariyɛlɛ* akambo tshɛ wakawotɛ Jehowa dia nde mbatɛ. 4 Dui sɔ diakasalema l’ɔkɔngɔ wa nde nɛndja Sihɔna+ nkumekanga k’ase Amɔra kakadjasɛka la Hɛshibɔna ndo Onga+ nkumekanga ka Bashana kakadjasɛka la Ashitarɔta, la Ɛdɛrɛi.+ 5 Mɔsɛ akatatɛ nembetshiya Ɛlɛmbɛ ɛnɛ+ lo ɛtshi ka nkɛtɛ ka Jɔrdana lo wodja wa Mɔaba ate:

6 “Jehowa Nzambi kaso akatotɛ la Hɔrɛbɛ ate: ‘Nyambodjasɛ edja lo lɛkɛ l’akona lɔnɛ.+ 7 Nyokadimɔ ndo nyotshu otsha lo lɛkɛ l’akona l’ase Amɔra+ ndo lo bɛtshi dia nkɛtɛ tshɛ diosukanyi la wɔ: Araba,*+ lɛkɛ l’akona, Shɛfɛla, Nɛngɛbɛ, omamu wa ndjale,+ wodja w’ase Kanana ndo Lɛbanɔna*+ polo lo ɔkɛdi wa woke, ɔkɛdi w’Efaratɛ.+ 8 Nyende, dimi lambokitsha wodja la ntondo kanyu. Nyotshu kele nyɔshi wodja wakatshibɛ Jehowa washɛnyu Abrahama, Isaka+ ndo Jakɔbɔ+ dia mbashawɔ vɔ la tokanula* tawɔ.’+

9 “Ndo dimi lakanyotɛ l’etena kɛsɔ nte: ‘Dimi bu la akoka wa nyɛmba dimɛ.+ 10 Jehowa Nzambi kanyu ambonyofudia ndo ɛlɔ kɛnɛ nyaya efula oko tɔɔtɔ ta l’olongo.+ 11 Jehowa Nzambi ka watshɛnyu anyofudia+ mbala nunu ndeka woho wenyu ndo anyɔtshɔkɔlɛ oko wakandanyolake.+ 12 Ngande wakokami mɛmba wotsho anyu, oshikɔ anyu ndo mindjo yanyu dimɛ?+ 13 Nyɔsɔnɛ apami wa tomba, wa tɔkɛsɔ ndo wambohokɔ akambo oma lo waoho anyu kele mbaetɛ ewandji anyu.’+ 14 Nyu nyakankadimola nyate: ‘Kɛnɛ kamboyototɛ dia nsala kɛsɔ kekɔ dimɛna.’ 15 Ko dimi lakɔshi ɛtɛ wa waoho anyu, apami wa tomba ndo wambohokɔ akambo ko lakawaetɛ ewandji anyu, ewandji w’anto nunu nunu, ewandji w’anto nkama nkama, ewandji w’anto akumi atanu akumi atanu, ewandji w’anto dikumi dikumi ndo topita ta waoho anyu.+

16 “L’etena kɛsɔ, dimi lakatɛ toshushi tanyu nte: ‘Lam’ayonyolomboshaka anangɛnyu, nyu pombaka nombosha onto l’ɔnango kana ɔngɛndangɛnda+ la losembwe.+ 17 Tanyongake la shɔnɔdi lo kilombo.+ Kanyolomboshake anto k’anto woho walomboshanyu anto wa lokumu.+ Tanyokake anto wɔma,+ nɛ dia kilombo kekɔ kaki Nzambi.+ Naka dikambo dimɔtshi diambonyoleka wolo, ko nyu diela le mi ko dimi layodihokamɛ.’+ 18 L’etena kɛsɔ, dimi lakanyotɛ akambo tshɛ wahombanyu nsala.

19 “Oma laasɔ, takonɛɛ oma la Hɔrɛbɛ ko takakɛndakɛnda l’oswe wa shɛnga+ w’otondo wa shaka ndo wa wɔma wakanyɛnyi lo mboka k’otsha lo lɛkɛ l’akona l’ase Amɔra,+ oko wakatodjangɛ Jehowa Nzambi kaso, ko l’edjedja ka wonya takayokoma la Kadɛshɛ-Baranea.+ 20 Oma laasɔ, lakanyotɛ nte: ‘Nyamboya lo lɛkɛ l’akona l’ase Amɔra lɛnɛ ayanga Jehowa Nzambi kaso tosha. 21 Nyende, Jehowa Nzambi kanyu ambonyosha wodja. Nyotshu, nyowɔshi oko wakanyotɛ+ Jehowa Nzambi ka watshɛnyu. Tanyokake wɔma ndo tanyatɛke asolo.’

22 “Koko nyu tshɛ nyakaye le mi ko nyakambutɛ nyate: ‘Totome apami amɔtshi la ntondo kaso dia vɔ totendɛ wodja akɔ kele kawoyotote mboka kahombaso mbeta ndo woho wele esomba wayotototana.’+ 23 Dimi lakɛnyi dia kanyi yanyu yekɔ dimɛna, ko lakasɔnɛ apami anyu 12, ɔtɔi oma lo dioho la dioho.+ 24 Vɔ wakonɛɛ, wakatshu otsha lo lɛkɛ l’akona+ ko wakatokoma l’Okidi wa Eshikɔlɛ ndo wakookembe. 25 Vɔ wakambe elowa ɛmɔtshi wa lo wodja akɔ ko wakatelawɔ ndo wakayototɛ vate: ‘Wodja walanga Jehowa Nzambi kaso tosha wekɔ dimɛna.’+ 26 Koko nyu nyakatone ntshɔ lɛkɔ ndo nyakatone nkitanyiya didjango dia Jehowa Nzambi kanyu.+ 27 Nyakatetemalaka ngunanguna lo mvudu yanyu y’apɛma, nyata nyate: ‘Jehowa tohetshaka, diakɔ diakandatotondja oma lo wodja w’Edjibito dia nde ndjotokimɔ l’anya w’ase Amɔra dia vɔ toshila oshiki. 28 Woho akɔna wele dihole diatatatshu? Anangɛso wakataate asolo*+ lo mbuta vate: “Vɔ wekɔ anto wa weke ndo akongote toleka, esomba awɔ wekɔ weke ndo dingama la mpele polo l’olongo*+ ndo takatɛna ana wa Anakima lɛkɔ.”’+

29 “Ko lakanyotɛ nte: ‘Tanyatɛke asolo ndo tanyowaokake wɔma.+ 30 Jehowa Nzambi kanyu ayeta la ntondo kanyu ndo nde ayonyɔlwɛ+ ta oko wakandasale l’Edjibito lo washo anyu.+ 31 L’oswe wa shɛnga, nyakɛnyi woho wakanyɛmbɛ Jehowa Nzambi kanyu oko watɛmbaka onto ɔnande, dihole tshɛ diakanyatshu polo lam’akanyakome lanɛ.’ 32 Koko kaanga mbakidiɔ ngasɔ, nyu komonga la mbetawɔ le Jehowa Nzambi kanyu,+ 33 lakatatshɔka la ntondo kanyu lo mboka dia nyanga dihole dia nyu mpanga. Nde akɛnamaka l’otsho lo dja ndo la yanyi lo dinge dia nyɛnya mboka kakanyahombe nkɛndakɛnda.+

34 “L’etena kɛsɔ tshɛ Jehowa akokaka kɛnɛ kakanyataka, ko nde akomala ndo akatshibe ate:+ 35 ‘Ndooko kaanga pami 1 ka lo lɔlɔnga la kɔlɔ lɔnɛ kayɛna wodja wa dimɛna wakamatshibe dia mbisha washɛnyu,+ 36 onyake Kalɛba ɔna Jefune. Nde ayɛna wodja akɔ. Dimi layowosha nde l’anande wodja wakandatshu lɛkɔ, nɛ dia nde akayele Jehowa la otema ɔtɔi.*+ 37 (Jehowa akayomomalɛ ndo dimi l’ɔtɛ anyu, ko nde akate ate: “Wɛ lawɔ hatɔtɔ lɔkɔ.+ 38 Jashua ɔna Nuna lemadi la ntondo kayɛ+ kayɔtɔ lo wodja akɔ.+ Keketshande,*+ nɛ dia nde kayokimanyiya ase Isariyɛlɛ dia vɔ nkita wodja akɔ.”) 39 Ndo nto, ananyu wakanyate dia wayonga diangɔ dia dimbo,+ ndo ananyu w’apami wahateye ɔlɔlɔ la kɔlɔ ɛlɔ kɛnɛ, mbayɔtɔ lɔkɔ ndo dimi layowashawɔ.+ 40 Koko nyu, nyokadimɔ ndo nyotshu otsha l’oswe wa shɛnga lo mboka k’otsha lo Ndjale ka Beela.’+

41 “Ko nyakambutɛ nyate: ‘Sho tambosalɛ Jehowa pɛkato. Kakianɛ tekɔ suke dia ntshɔ ndo tɔlɔsha, oko wakatodjangɛ Jehowa Nzambi kaso!’ Ɔnkɔnɛ, ɔmɔmɔ l’atei anyu akɔshi dihomɔ diande dia ta, ko nyakadɛ lo dikona,+ nyafɔnya dia ɔsɔ ekɔ dikambo dia tshitshɛ. 42 Koko Jehowa akambutɛ ate: ‘Tɛwɔ wate: “Tanyotshɔke ndo tanyɔlɔshake, dikambo dimi hantonga kaamɛ la nyu.+ Naka nyu ntshɔ, atunyi anyu wayotonyɔlɛndja.”’ 43 Dimi lakanyotɛ, koko nyu komboka. Nyu nyakɔnyɔla didjango dia Jehowa ndo nyakalange mbidɛ lo dikona la lotamanya tshɛ. 44 Oma laasɔ, ase Amɔra wanɛ wakadjasɛka lo dikona diakɔ wakaye dia ndjohomana la nyu ndo wakanyotshanya wate kana oko ndjwe ndo wakayelana la nyu la Seirɛ polo ndo la Horima. 45 Ko nyakakalola ndo nyakatatɛ ndela la ntondo ka Jehowa, koko Jehowa konyohokamɛ ndo konyodja yimba. 46 Diakɔ diakanyatetemala mbidjasɛ la Kadɛshɛ l’edja tshɛ kakinyu lɛkɔ.

2 “Oma laasɔ, takakadimɔ ko takatshu otsha l’oswe wa shɛnga lo mboka kele suke la Ndjale ka Beela, oko wakambutɛ Jehowa.+ Ko takatshimbɛ Dikona dia Seirɛ l’edja ka nshi efula. 2 L’edjedja ka wonya, Jehowa akayombutɛ ate: 3 ‘Nyambotshimbɛ dikona nɛ edja efula. Nyokadimɔke otsha lo nɔrdɛ. 4 Ndo djangɛ anto wate: “Nyayeta l’olelo w’anangɛnyu, tokanula ta Esao+ todjashi la Seirɛ.+ Vɔ wayonyoka wɔma,+ koko nyu pombaka monga la yewo. 5 Tanyaahetshake,* nɛ dia dimi hantonyosha ɛtshi kawɔ ka nkɛtɛ kaanga 1, kaanga yɛtshi ya nkɛtɛ ya nkitsha dikaka, dikambo dimi lakasha Esao Dikona dia Seirɛ.+ 6 Nyu pombaka nsomba mbo ya ndɛ oma le wɔ la falanga ndo nyu pombaka nsomba ashi wa nnɔ.+ 7 Nɛ dia Jehowa Nzambi kanyu ambonyɔtshɔkɔla lo akambo tshɛ wambonyosala. Nde mbeyaka dimɛna woho wamonyɔkɛndakɛnda l’oswe wa shɛnga wa shaka ɔnɛ. Lo ɛnɔnyi 40 ɛnɛ, Jehowa Nzambi kanyu ekɔ kaamɛ la nyu ndo nyu kopomba ndooko ɛngɔ.”’+ 8 Ko takete l’olelo w’anangɛso, tokanula ta Esao+ tadjasɛ la Seirɛ, takatshike mboka ka Araba, ka Elatɛ ndo ka Eziɔna-Ngɛbɛrɛ.+

“Oma laasɔ, takakadimɔ ko takatetemala la lɔkɛndɔ lo mboka k’otsha l’oswe wa Mɔaba.+ 9 L’ɔkɔngɔ diko, Jehowa akambutɛ ate: ‘Tanyohetshake ase Mɔaba ndo tanyɔlɔke la wɔ, nɛ dia dimi hantonyosha ɛtshi ka nkɛtɛ kawɔ kaanga 1 dikambo dimi lakasha tokanula taki Lɔta Arɛ.+ 10 (Ase Emimɛ,+ anto wa wolo, wele efula ndo akongote wele oko aseka Anakima mbakadjasɛka ntondo laawɔ. 11 Aseka Rɛfayima+ vɔ lawɔ wakɔsamaka oko aseka Anakima+ ndo ase Mɔaba wakawaelɛka ɔnɛ Emimɛ. 12 Ase Hɔri+ wakadjasɛka ntondo la Seirɛ, koko tokanula ta Esao wakaahɔtɔla ndo wakaashile oshiki, ko wakadjasɛ lo dihole diawɔ,+ oko wayosalɛ ase Isariyɛlɛ wodja wayangawɔ mbɔsa wele Jehowa ayanga mbashawɔ ndooko onyake.) 13 Laasɔ nyotshu ndo nyotenyanya Okidi wa Zɛrɛdɛ.’ Ko takatenyanya Okidi wa Zɛrɛdɛ.+ 14 Oma la Kadɛshɛ-Baranea polo lam’akatatenyanya Okidi wa Zɛrɛdɛ, takande lɔkɛndɔ la ɛnɔnyi 38 polo lam’akashile lɔlɔnga l’apami w’andɔshi wa ta lo mpango, oko wakaatshibɛ Jehowa.+ 15 Lonya la Jehowa laki le wɔ dia mbamana lo mpango polo lam’akawashile.+

16 “Kam’akavu apami tshɛ w’andɔshi wa ta,+ 17 Jehowa akambutɛ nto ate: 18 ‘Ɛlɔ, nyayeta lo ɛtshi ka nkɛtɛ k’ase Mɔaba, mbuta ate Arɛ. 19 Lam’ayonyokoma suke l’ase Amɔna, tanyaahɛnyahɛnyake ndo tanyaasolake, nɛ dia dimi hantonyosha ɛtshi ka nkɛtɛ k’ase Amɔna kaanga 1, dikambo dimi lakakisha tokanula taki Lɔta.+ 20 Ndo ɛtshi ka nkɛtɛ kɛsɔ kakɔsamaka oko ɛtshi ka nkɛtɛ k’aseka Rɛfayima.+ (Aseka Rɛfayima mbakadjasɛka ntondo laawɔ ndo ase Amɔna wakawaelɛka ɔnɛ Zamɛzumima. 21 Vɔ waki anto wa wolo, waki efula ndo akongote oko aseka Anakima.+ Koko Jehowa akaashile oshiki la ntondo k’ase Amɔna, ko ase Amɔna wakawatshanya ndo wakadjasɛ lo dihole diawɔ. 22 Kɛsɔ mbakandasalɛ tokanula ta Esao tadjasɛ nshi nyɛ la Seirɛ+ etena kakandakimɔ ase Hɔri+ lo anya awɔ, ko vɔ wakaahɔtɔla ndo wakadjasɛ lo dihole diawɔ polo ndo lushi l’ɛlɔ. 23 Lo dikambo di’aseka Avimɛ, vɔ wakadjasɛka lo tongelongelo tele polo la Ngaza+ polo lam’akaamane aseka Kafitɔrima wanɛ wakaye oma la Kafitɔra,*+ ko wakadjasɛ lo dihole diawɔ.)

24 “‘Nyone, nyotenyanya okidi w’Aranɔna.+ Nyende, dimi lambokimɔ Sihɔna+ nkumekanga ka Hɛshibɔna ose Amɔra lo anya anyu. Ɔnkɔnɛ, nyotate mbɔsa wodja ande ndo nyɔɔlɔsha. 25 Ɛlɔ, dimi layanga nsala dia anto tshɛ wele l’ɛse olongo wayoka lokumu lanyu nyoka wɔma ndo nsaka lokomba. Vɔ wayotshimba wɔɔngɔ ndo wayosaka lokomba* l’ɔtɛ anyu.’+

26 “Oma laasɔ, dimi lakatome akɛndji oma l’oswe wa Kɛdɛmɔtɛ+ otsha le Sihɔna nkumekanga ka Hɛshibɔna dia towotɛ ɛtɛkɛta wa wɔladi ɛnɛ:+ 27 ‘Ontshike mbete lo wodja ayɛ. Layeta paka lo mboka ndo hantɛtɔla lo lonya l’omi kana la lɔmɔsɔ.+ 28 Layɔlɛ paka mbo ya ndɛ yayoyonsondja ndo layɔnɔ paka ashi wayoyonsondja. Ontshike mbete tsho l’ekolo, 29 kɛsɔ mbakansalɛ tokanula ta Esao tadjasɛ la Seirɛ ndo ase Mɔaba wadjasɛ la Arɛ polo lam’akamatehɔ Jɔrdana ko ndja lo wodja wambotosha Jehowa Nzambi kaso.’ 30 Koko Sihɔna nkumekanga ka Hɛshibɔna kombetawɔ dia sho mbeta, nɛ dia Jehowa Nzambi kanyu akootshike dia nde ntshininala lo kanyi yande ndo nkeketsha otema,+ la oyango wa mbokimɔ l’anya anyu, oko wamondookimɔ kakianɛ.+

31 “Ko Jehowa akambutɛ ate: ‘Eenda, dimi lamboshilaka nkimɔ Sihɔna la wodja ande lo anya ayɛ. Tatɛ mbɔsa wodja ande.’+ 32 Lam’akaye Sihɔna nde l’anto ande tshɛ dia ndjohomana la so dia tɔlɔsha la Jahaza,+ 33 Jehowa Nzambi kaso akookimɔ lo anya aso, ko takɔɔlɛndja nde l’anande l’anto ande tshɛ. 34 Takɔshi esomba ande tshɛ l’etena kɛsɔ ndo takalanya esomba tshɛ, mbidja ndo apami, wamato ndo ana. Sho kotshika ndooko onto la lɔsɛnɔ.+ 35 Takɔshi paka dongalonga to kaamɛ la diangɔ dia dimbo oma l’esomba wakatɔshi. 36 Ntatɛ oma la Aroɛrɛ+ wele l’omamu w’Okidi wa Aranɔna (mbidja ndo osomba wele l’okidi) polo la Ngiliyadɛ, ndooko shombasomba yakiso kɔmbɔsa. Jehowa Nzambi kaso akaakimɔ vɔ tshɛ lo anya aso.+ 37 Koko nyu kotshɔ otsha l’ɛtshi ka nkɛtɛ k’ase Amɔna,+ omamu w’otondo w’Okidi wa Jabɔka+ ndo esomba wa lo lɛkɛ l’akona kana dihole dikina tshɛ diakatoshimbe Jehowa Nzambi kaso.

3 “Oma laasɔ, takakadimɔ ko takatshu lo Mboka k’otsha la Bashana. Ko Onga nkumekanga ka Bashana akaye la anto ande tshɛ dia ndjohomana la so dia tɔlɔsha la Ɛdɛrɛi.+ 2 Ko Jehowa akambutɛ ate: ‘Towokake wɔma, nɛ dia dimi layowokimɔ nde l’anto ande tshɛ la wodja ande lo anya ayɛ. Wɛ ayowosalɛ woho wakayasalɛ Sihɔna nkumekanga k’ase Amɔra kakadjasɛka la Hɛshibɔna.’ 3 Ɔnkɔnɛ Jehowa Nzambi kaso akakimɔ ndo Onga nkumekanga ka Bashana l’anto ande tshɛ lo anya aso, ko takatetemala mbadiaka polo lam’akashile anto ande tshɛ. 4 Oma laasɔ, takɔshi esomba ande tshɛ. Ndooko osomba wakiso kombahɔtɔla, esomba 60, ɛtshi ka nkɛtɛ k’otondo ka Arangoba, diolelo dia Onga dia la Bashana.+ 5 Esomba ɛsɔ tshɛ wakadingama la mpele di’etale, diaki la nkuke ndo diaki la tokengete kaamɛ ndo ngelo nkina efula ya lo tosamba. 6 Koko takaalanya+ oko wakatasalɛ Sihɔna nkumekanga ka Hɛshibɔna lo ndanya oseka osomba tshɛ mbidja ndo apami, wamato ndo ana.+ 7 Takɔshi dongalonga tshɛ ndo diangɔ dia dimbo dia lo esomba akɔ.

8 “L’etena kɛsɔ, takɔshi ɛtshi ka nkɛtɛ ka nkumi ya dikanga 2 y’ase Amɔra+ yaki lo ɛtshi ka nkɛtɛ ka Jɔrdana, oma l’okidi w’Aranɔna polo lo Dikona dia Hɛrɛmɔna,+ 9 (dikona diakelɛka ase Sidɔna ɔnɛ Siriyɔna ndo ase Amɔra wakadielɛka ɔnɛ Senirɛ), 10 esomba tshɛ wa lo ebamubamu ka la diko dia dikona, Ngiliyadɛ k’otondo ndo Bashana k’otondo mbidja ndo Salɛka la Ɛdɛrɛi,+ esomba wa lo diolelo dia Onga wa la Bashana. 11 Nɛ dia Onga nkumekanga ka Bashana kaki onto l’ekomelo lo atshikadi wa la Rɛfayima. Kaka* ya odo ande yakasalema la mbolo ndo yɔ yekekɔ la Raba, osomba w’ase Amɔna. Yɔ yekɔ la otale wa kubita* 9 ndo woke wa kubita 4 lo ndjela kubita ka yɛdikɔ. 12 L’etena kɛsɔ, takɔshi ɛtshi ka nkɛtɛ kɛnɛ: Oma la Aroɛrɛ+ wele suke l’okidi w’Aranɔna ndo k’ahende ɔtɔi ka lɛkɛ l’akona wa la Ngiliyadɛ, ko dimi lakasha aseka Rubɛna l’aseka Ngada+ esomba wa lɛkɔ. 13 Etenyi kekina ka Ngiliyadɛ ndo Bashana k’otondo ka lo diolelo dia Onga, dimi lakasha k’ahende ɔtɔi ka dioho dia Manase.+ Ɛtshi ka nkɛtɛ k’otondo ka Arangoba kele la Bashana kakeyamaka oko ɛtshi ka nkɛtɛ ka Rɛfayima.

14 “Jayira+ ɔna Manase akɔshi ɛtshi ka nkɛtɛ k’otondo ka Arangoba+ polo l’olelo wasa aseka Ngeshurɛ l’aseka Maakata+ ndo nde akɔlɛ ngelo ya la Bashana lokombo lande ɔnɛ Havotɛ-Jayira*+ polo ndo ɛlɔ. 15 Dimi lakasha Makiri Ngiliyadɛ.+ 16 Ndo dimi lakasha aseka Rubɛna l’aseka Ngada+ oma la Ngiliyadɛ polo l’Okidi w’Aranɔna ndo olelo awɔ waki l’atei atei w’okidi polo la Jabɔka, okidi wele l’olelo w’ase Amɔna, 17 ndo Araba la Jɔrdana kaamɛ la olelo watshɔ oma la Kinɛrɛtɛ polo lo Ndjale ka Araba, Ndjale ka Lɛɛhɔ* l’ɛse k’oholola wa Pisinga otsha lo ɛstɛ.+

18 “Oma laasɔ, lakanyodjangɛ nte: ‘Jehowa Nzambi kanyu ambonyosha wodja ɔnɛ dia nyu mbowɔsa. Apami anyu tshɛ w’ahonga kawɔshi dihomɔ diawɔ dia ta ndo kawotehɔ la ntondo k’anangɛnyu, ase Isariyɛlɛ.+ 19 Onyake wadiɛnyu, ananyu ndo dongalonga dianyu (dimi mbeyaka dimɛna dia nyekɔ la dongalonga efula ka mamba) mbayotetemala mbidjasɛ lo esomba ɛnɛ wamomonyosha, 20 polo ndo lam’ayosha Jehowa anangɛnyu momuya oko wamondonyosha ndo vɔ wambɔsa wodja wayowasha Jehowa Nzambi kanyu la wedi wa Jɔrdana. Oma laasɔ mbayonyoyokalola onto l’onto lo ɛtshi kande ka nkɛtɛ kakamanyosha.’+

21 “L’etena kɛsɔ, dimi lakadjangɛ Jashua nte:+ ‘Wɛmɛ ambɛna la washo ayɛ kɛnɛ kambosalɛ Jehowa Nzambi kayɛ nkumi ya dikanga nyɛ 2. Woho akɔ waamɛ mbayosalɛ Jehowa waolelo tshɛ wayohomana la yɛ.+ 22 Tanyowaokake wɔma, nɛ dia Jehowa Nzambi kanyu kanyɔlwɛ ta.’+

23 “L’etena kɛsɔ, dimi lakasɛngasɛnga Jehowa nte: 24 ‘Nkum’Olongo Nkumadiɔndjɔ Jehowa le, wɛ ambotatɛ mɛnya okambi ayɛ woke woke ayɛ ndo lonya layɛ la wolo.+ Jambizambi yakɔna yele l’olongo kana la nkɛtɛ yasala akambo wa wolo nganɛ oko wɛ?+ 25 Lam’alangayɛ, etawɔ dia dimi ntehɔ kele tɛnyi wodja wa dimɛna wele la wedi wa Jɔrdana, lɛkɛ l’akona la dimɛna lɔnɛ ndo Lɛbanɔna.’+ 26 Koko Jehowa akatetemala momalɛmi l’ɔtɛ anyu+ ndo nde kombokami. Jehowa akambutɛ ate: ‘Ambokoka! Tombutɛke dikambo sɔ nto pondjo. 27 Dɛ lo shɔdi ya Pisinga+ kele toshishime lo owɛstɛ, lo nɔrdɛ, lo sidɛ ndo lo ɛstɛ, kele tende wodja akɔ la washo ayɛ, nɛ dia wɛ hatotehɔ Jɔrdana nyɛ.+ 28 Sha Jashua+ ɔkɛndɛ wa nɔmbɔla, kimanyiyande dia nde monga la dihonga ndo keketshande, nɛ dia nde kayotehɔ+ la ntondo k’anto anɛ ndo nde kayosala dia vɔ nkita wodja wayoyɛna.’ 29 Akambo asɔ tshɛ wakasalema etena kakatadjasɛka l’okidi wɛlane la Bɛtɛ-Pɛɔrɛ.+

4 “Isariyɛlɛ le, nyohokame wadjango la tɛdikɔ tayangami nyetsha dia nyu ndjelaka, dia nyu ntshikala la lɔsɛnɔ+ ndo dia nyu mbɔtɔ ko mbɔsa wodja wayanga nyosha Jehowa Nzambi ka watshɛnyu. 2 Tanyahɛke ndo tanyaholake+ ndooko dui oma lo kɛnɛ kanyodjangɛmi dia nyu nkitanyiya wadjango wa Jehowa Nzambi kanyu wanyodjangɛmi.

3 “Nyakɛnyi la washo anyu nyuamɛ kɛnɛ kakasale Jehowa lo dikambo dia Baala ka Pɛɔrɛ. Jehowa Nzambi kanyu akadiake onto tshɛ la l’atei anyu lakayele Baala ka Pɛɔrɛ.+ 4 Koko nyu wanɛ watetemala mamema Jehowa Nzambi kanyu, nyu tshɛ nyekɔ la lɔsɛnɔ polo ndo ɛlɔ. 5 Nyende, dimi lakanyetsha wadjango ndo tɛdikɔ+ oko wakambidjangɛ Jehowa Nzambi kami, dia nyu mbakitanyiya lo wodja wayanganyu mbɔsa. 6 Nyu pombaka mbayela nna lo nna,+ nɛ dia kɛsɔ ayɛnya dia nyekɔ la lomba+ ndo la yimba+ la ntondo k’anto wayoka wadjango asɔ tshɛ, ko vɔ wayota vate: ‘Wodja wa woke ɔnɛ wekɔ mɛtɛ anto wele la lomba ndo la yimba.’+ 7 Nɛ dia wodja akɔna wa woke wele la tozambizambi tele suke la wɔ woho wele Jehowa Nzambi kaso suke la so wonya tshɛ wawetaso?*+ 8 Ndo wodja akɔna wa woke wele la wadjango wosembwe ndo tɛdikɔ ta dombo tele oko Ɛlɛmbɛ ɛnɛ tshɛ wamomokitsha la ntondo kanyu ɛlɔ?+

9 “Nyonge la yambalo ndo nyoyalame dimɛna* diaha nyu mbohɛ akambo wakanyɛnyi la washo anyu ndo diaha vɔ mimɔ oma l’etema anyu lo nshi tshɛ ya lɔsɛnɔ lanyu. Kanyowaewoyake ananyu ndo ekana anyu.+ 10 Lushi lakanyemala la ntondo ka Jehowa Nzambi kanyu la Hɔrɛbɛ, Jehowa akambutɛ ate: ‘Sanganya anto kaamɛ la ntondo kami kele mbaokiya awui ami,+ dia vɔ mbeka woho wa mbokakami wɔma+ nshi tshɛ yewɔ la lɔsɛnɔ la nkɛtɛ dia vɔ mbetsha anawɔ.’+

11 “Ko nyu nyakasukana ndo nyakemala l’ɛse ka dikona, ko dikona diakalombalombaka la dja polo l’olongo* ndo wodjima, dinge la wodjima wa tshududu+ wakayala. 12 Ko Jehowa akatatɛ nsawola la nyu oma l’atei wa dja.+ Nyu nyakoke wendjo w’ɛtɛkɛta koko nyu kɔmɛna woho wende,+ nyakokaka paka dui to.+ 13 Nde akanyotɛ sheke yande+ yakandanyodjangɛ dia nyu nama, mbuta ate Ɛlɛmbɛ 10.+ Oma laasɔ, nde akaafunde lo pase 2 di’ave.+ 14 L’etena kɛsɔ, Jehowa akambidjangɛ dia dimi nyetsha wadjango la tɛdikɔ tahombanyu toyelaka lo wodja wayanganyu mbɔtɔ dia tɔsa.

15 “Ɔnkɔnɛ nyoyalame dimɛna,* nɛ dia nyu kɔmɛna efanelo kɛmɔtshi lushi lakatɛkɛta Jehowa la nyu la Hɔrɛbɛ oma l’atei wa dja, 16 diaha nyu nsala kɔlɔ lo ndjasalɛ ekishi kele la efanelo ka djembetelo mɔtshi, efanelo ka pami kana womoto,+ 17 efanelo ka nyama kɛmɔtshi kele la nkɛtɛ kana efanelo ka fudu kɛmɔtshi kafumbɔ l’olongo,+ 18 efanelo ka ɛngɔ kɛmɔtshi kayakotola la nkɛtɛ kana efanelo ka lose lɔmɔtshi lele l’ashi l’ɛse ka nkɛtɛ.+ 19 Lam’edianyu washo l’olongo ndo lam’ɛnanyu wonya, ngɔndɔ la tɔɔtɔ, mbuta ate alembe tshɛ wa l’olongo, tanyokotɔmake dia kusamɛ diangɔ sɔ ndo dikambɛ.+ Jehowa Nzambi kanyu akadisha anto tshɛ wele l’ɛse olongo. 20 Koko nyu mbele wanɛ wele Jehowa akawaɔshi ndo akaatondja oma lo nkuka kalɛlɔla mbolo, oma l’Edjibito dia monga wodja ande,*+ oko wayanyu ɛlɔ.

21 “Jehowa akamomalɛ l’ɔtɛ anyu+ ndo nde akatshibe dia dimi halahombe ntehɔ Jɔrdana kana mbɔtɔ lo wodja wa dimɛna wayanga nyosha Jehowa Nzambi kanyu oko etenyi k’okitɔ.+ 22 Nɛ dia dimi layovɔ l’ɛtshi ka nkɛtɛ kɛnɛ, dimi hantotehɔ Jɔrdana,+ koko nyu nyayotehɔ ndo nyayɔsa wodja wa dimɛna ɔnɛ. 23 Nyonge la yambalo diaha nyu mbohɛ sheke ya Jehowa Nzambi kanyu yakandadje kaamɛ la nyu+ ndo tanyoyasalɛke ekishi kana efanelo k’ɛngɔ kɛmɔtshi kakanyoshimbe Jehowa Nzambi kanyu.+ 24 Nɛ dia Jehowa Nzambi kanyu ekɔ dja yatshumba,+ Nzambi kalɔmba dia mbomamema paka ndamɛ oto.+

25 “Naka nyambotota ana, nyaya la ekana ndo nyambodjasɛ edja lo wodja akɔ, ko nyambotosala kɔlɔ ndo nyambotosala ekishi+ ka woho ɔmɔtshi ndo nyambotosala kɛnɛ kele kɔlɔ lo washo wa Jehowa Nzambi kanyu dia nyu mbookiya nkɛlɛ,+ 26 dimi lambɔsa olongo la nkɛtɛ oko ɛmɛnyi lo dikambo dianyu ɛlɔ dia ndooko onyake nyayolanyema esadi eto lo wodja wayanganyu ntehɔ dia tɔsa la wedi wa Jɔrdana. Hanyotodjasɛ edja lɔkɔ, koko nyayoshilama oshiki.+ 27 Jehowa ayonyohandjola l’atei wa wedja+ ndo paka anto angana ato l’atei anyu mbayotshikala+ lo wedja wayonyɔtɔla Jehowa. 28 Lɛkɔ, nyayotokambɛ tozambizambi t’esongo ndo t’ave takasalema l’anya w’anto,+ tozambizambi tahɛnyi kana tahoke kana tahale kana tahoke nsolo.

29 “Naka nyu toyanga Jehowa Nzambi kanyu lɛkɔ, kete ndooko onyake nyayowotana,+ naka nyu mboyanga la otema anyu tshɛ ndo la anima*+ anyu tshɛ. 30 Lam’ayonyonga lo shɔkɔ y’efula ko akambo asɔ tshɛ wambonyokomɛ lo nshi yayaye, kanyokadimɔ le Jehowa Nzambi kanyu ndo kanyohokame dui diande.+ 31 Nɛ dia Jehowa Nzambi kanyu ekɔ Nzambi kokana kɛtshi.+ Nde hatonyotshika, hatonyolanya ndo hatohɛ sheke yakandatshibɛ watshɛnyu.+

32 “Ɔnkɔnɛ, nyombole akambo wendana la nshi yakete la ntondo ka nshi yanyu nyɛ, oma ko lushi lakatonge Nzambi onto la nkɛtɛ. Nyoyangeyange oma lo koma mɔtshi y’olongo polo lo koma kina y’olongo. Onde dui dimɔtshi dia woke dia ngasɔ diambosalemaka, kana onde nyambokaka dui dia ngasɔ?+ 33 Onde wodja okina wambokaka dui dia Nzambi diatɛkɛta oma l’atei wa dja oko wakanyadioke ko ntshikala la lɔsɛnɔ?+ 34 Kana onde Nzambi ambohembaka ndjaɔsɛ wodja ɔmɔtshi oma l’atei wa wedja ekina lo nkamba la alanya,* la tolembetelo, la ahindo,+ la ta,+ la lonya la wolo,+ la lonya losembwe tɔɔ ndo la akambo wa wɔma,+ oko wakasale Jehowa Nzambi kanyu lo dikambo dianyu l’Edjibito lo washo anyu? 35 Wakanyɛnya akambo asɔ dia nyu mbeya dia Jehowa kele Nzambi ka mɛtɛ.+ Laadiko diande ndooko okina.+ 36 Nde akanyokiya dui diande oma l’olongo dia nyongola, ndo la nkɛtɛ, nde akanyɛnya dja yande y’efula ndo nyakoke dui diande oma l’atei wa dja.+

37 “Lam’ele nde akokaka watshɛnyu ngandji ndo akasɔnɛ tokanula* tawɔ,+ diakɔ diakandanyotondja oma l’Edjibito la ntondo kande la wolo ande w’efula. 38 Nde akatshanya wedja wakanyoleke weke ndo wolo oma la ntondo kanyu dia nyela lɔkɔ ndo dia nyosha nkɛtɛ yawɔ oko etenyi k’okitɔ, oko wediɔ ɛlɔ.+ 39 Ɔnkɔnɛ, nyeye lushi l’ɛlɔ ndo nyohɔke l’etema anyu dia Jehowa kele Nzambi ka mɛtɛ l’olongo ndo la nkɛtɛ.+ Ndooko okina.+ 40 Nyu pombaka nkitanyiya ɛlɛmbɛ la wadjango ande wamomonyodjangɛ ɛlɔ dia nyu mpomɔ lokolo l’ɔlɔ nyu la ananyu dia nyu ntshikala edja lo wodja wambonyosha Jehowa Nzambi kanyu.”+

41 L’etena kɛsɔ, Mɔsɛ akakakitola esomba 3 lo ɛstɛ ka Jɔrdana.+ 42 Naka onto ɔmɔtshi ambodiaka onto aha la okonda ko nde kombohetshaka ntondo,+ nde pombaka ndawɔ l’osomba ɔmɔtshi l’atei w’esomba ɛsɔ dia nde ntshikala la lɔsɛnɔ.+ 43 Esomba akɔ vɔ ɛnɛ: Bezɛrɛ+ kele l’oswe lo ebamubamu ka la diko dia dikona dikambo di’aseka Rubɛna, Ramɔta+ wa la Ngiliyadɛ dikambo di’aseka Ngada ndo Ngɔlana+ kele la Bashana dikambo di’aseka Manase.+

44 Ɛlɛmbɛ+ wayela ɛnɛ mbakakitsha Mɔsɛ la ntondo k’ase Isariyɛlɛ. 45 Vɔ wekɔ la waohwelo, wadjango ndo tɛdikɔ ta dombo takasha Mɔsɛ ase Isariyɛlɛ l’ɔkɔngɔ wa vɔ ntomba oma l’Edjibito,+ 46 lo ɛtshi ka nkɛtɛ ka Jɔrdana l’okidi wɛlane la Bɛtɛ-Pɛɔrɛ,+ lo wodja wa Sihɔna nkumekanga k’ase Amɔra kakadjasɛka la Hɛshibɔna,+ ɔnɛ lele Mɔsɛ la ase Isariyɛlɛ wakɔɔlɛndja l’ɔkɔngɔ wa vɔ ntomba oma l’Edjibito.+ 47 Ko vɔ wakɔshi nkɛtɛ yande ndo nkɛtɛ ya Onga+ nkumekanga ka Bashana, nkumi ya dikanga 2 y’ase Amɔra yaki l’ɛtshi ka nkɛtɛ ka ɛstɛ ka Jɔrdana, 48 oma la Aroɛrɛ+ wele l’omamu w’Okidi wa Aranɔna polo lo Dikona dia Siɔna, mbuta ate Hɛrɛmɔna,+ 49 ndo Araba w’otondo wele l’ɛtshi ka nkɛtɛ ka ɛstɛ ka Jɔrdana polo lo Ndjale ka Araba* l’ɛse k’oholola wa Pisinga.+

5 Oma laasɔ, Mɔsɛ akatshumanya ase Isariyɛlɛ tshɛ ndo akawatɛ ate: “Isariyɛlɛ le, nyohokame wadjango ndo tɛdikɔ ta dombo tanyewoyami ɛlɔ. Nyu pombaka tieka ndo tiyela nna lo nna. 2 Jehowa Nzambi kaso akadje la so sheke la Hɔrɛbɛ.+ 3 Jehowa kombidja sheke shɔ la watshɛso, koko la so, sho wanɛ tshɛ wele la lɔsɛnɔ lanɛ ɛlɔ. 4 Jehowa akatɛkɛta la nyu elungi lo elungi oma lo dikona, oma l’atei wa dja.+ 5 L’etena kɛsɔ, dimi lakemala lam’asa Jehowa la nyu+ dia nyewoya ɔtɛkɛta wa Jehowa, nɛ dia nyakoke wɔma l’ɔtɛ wa dja ndo nyu kombidɛ lo dikona.+ Nde akate ate:

6 “‘Dimi kele Jehowa Nzambi kayɛ lakakotondja oma lo wodja w’Edjibito, oma lo luudu la lɔhɔmbɔ.+ 7 Toyalake la nzambi nkina laadiko diami.*+

8 “‘Toyasalɛke ekishi+ kana efanelo* k’ɛngɔ kɛmɔtshi kele l’olongo la diko kana kele la nkɛtɛ l’ɛse kana kele l’ashi l’ɛse ka nkɛtɛ. 9 Todikusamɛke ndo todikambɛke,+ nɛ dia dimi Jehowa Nzambi kayɛ lekɔ Nzambi kalɔmba dia mamemami paka dimɛ oto,+ dimi mbishaka ana dilanya l’ɔtɛ wa munga k’ambutshi awɔ polo lo lɔlɔnga la 3 ndo lɔlɔnga la 4 la wanɛ wampetsha.+ 10 Koko dimi mɛnyaka ngandji ka kɔlamelo polo le lɔlɔnga la kinunu (1 000) la wanɛ wamboka ngandji ndo wakitanyiya wadjango ami.

11 “‘Tokambake la lokombo la Jehowa Nzambi kayɛ lo yoho ya kɔlɔ,+ nɛ dia Jehowa hatotshika ɔnɛ lakamba la lokombo lande lo yoho ya kɔlɔ+ aha la mbosha dilanya.

12 “‘Kɔlɛmiyake lushi la Sabato, dia wɛ lietɛ ekila, oko wakakodjangɛ Jehowa Nzambi kayɛ.+ 13 Kosalake akambo ayɛ ndo kokambake elimu ayɛ tshɛ l’edja ka nshi 6,+ 14 koko lushi la 7 lekɔ sabato dikambo dia Jehowa Nzambi kayɛ.+ Tokambake ndooko olimu+ oyadi wɛ, kana ɔnayɛ la pami kana ɔnayɛ la womoto, kana mfumbe kayɛ ka pami kana mfumbe kayɛ ka womoto, kana ngɔmbɛ kayɛ, kana mponda kayɛ, kana elongalonga kayɛ tshɛ, kana ɔngɛndangɛnda wodjashi lo esomba*+ anyu, dia mfumbe kayɛ ka pami kana mfumbe kayɛ ka womoto momuya oko wɛ.+ 15 Ohɔ dia wɛ aki mfumbe lo wodja w’Edjibito ko Jehowa Nzambi kayɛ akakotondja oma lɛkɔ la lonya la wolo ndo lonya losembwe tɔɔ.+ Diakɔ diakakodjangɛ Jehowa Nzambi kayɛ dia wɛ nɛmiyaka lushi la Sabato.

16 “‘Lɛmiya shɔ la nyɔ,+ oko wakakodjangɛ Jehowa Nzambi kayɛ, dia wɛ nsɛna edja ndo ngɔna* lo nkɛtɛ yayanga kosha+ Jehowa Nzambi kayɛ.

17 “‘Todiakake.+

18 “‘Tosalake loseka.+

19 “‘Tovake.+

20 “‘Toyalake ɔmɛnyi wa kashi lo dikambo dia osekayɛ onto.+

21 “‘Tɔkɔmiyake wadi aki osekayɛ onto.+ Tɔkɔmiyake la lokaki tshɛ luudu laki osekayɛ onto kana ekambɔ kande kana mfumbe kande ka pami kana mfumbe kande ka womoto kana ngɔmbɛ kande kana mponda kande kana ɛngɔ tshɛ ka osekayɛ onto.’+

22 “Ɔsɔ mbele ɛlɛmbɛ* wakatɛ Jehowa etshumanelo k’otondo la dui dia wolo lo dikona oma l’atei wa dja, dinge ndo wodjima wa tshududu,+ ndo nde kombahɛ ndooko dui. Oma laasɔ, nde akaafunde lo pase 2 di’ave ko akambishadiɔ.+

23 “Koko kam’akanyoke dui diande oma lo wodjima, etena kakalombalombaka dja lo dikona,+ ewandji tshɛ wa waoho anyu ndo dikumanyi wakaye le mi. 24 Ko nyakate nyate: ‘Lanɛ, Jehowa Nzambi kaso ambotɛnya lotombo lande ndo woke woke ande, ndo sho tamboka dui diande diatomba oma l’atei wa dja.+ Ɛlɔ tambɛna dia Nzambi kokaka ntɛkɛta la onto ko nde ntetemala la nsɛna.+ 25 Ko lande na kahombaso mvɔ? Nɛ dia dja ya wolo nyɛ mbeyaka totshumba. Naka sho ntetemala la mpokamɛ dui dia Jehowa Nzambi kaso, kete lo mɛtɛ tayovɔ. 26 Nɛ dia akɔna l’atei w’anto tshɛ akoke dui dia Nzambi kasɛna diatomba oma l’atei wa dja oko wambotoka ko ntshikala la lɔsɛnɔ? 27 Wɛ kahomba nsukana dia mboka kɛnɛ tshɛ kayota Jehowa Nzambi kaso, ko wɛ ndjototɛ kɛnɛ tshɛ kayokotɛ Jehowa Nzambi kaso, ko sho tayohokamɛ ndo tayokisala.’+

28 “Ɔnkɔnɛ, Jehowa akoke kɛnɛ kakanyambutɛ ko Jehowa akambutɛ ate: ‘Dimi lamboka kɛnɛ kakotɛ anto anɛ. Kɛnɛ tshɛ kotshiwɔ kekɔ dimɛna.+ 29 Naka vɔ wayongaka nshi tshɛ la otema waatshutshuya dia mbokami wɔma+ ndo nkitanyiya ɛlɛmbɛ ami,+ kete awui tshɛ wayongaka dimɛna le wɔ ndo le anawɔ pondjo pondjo!+ 30 Tshɔka towate wate: “Nyokalole lo mvudu yanyu y’apɛma.” 31 Koko wɛ pombaka ntshikala lanɛ kaamɛ la mi kele kote ɛlɛmbɛ, wadjango ndo tɛdikɔ tshɛ ta dombo tahombayɛ mbaetsha ndo tahombawɔ nkitanyiya lo wodja wayangami mbasha.’ 32 Ɔnkɔnɛ, nyu pombaka nsala tshɛ dia nkitanyiya kɛnɛ kakanyodjangɛ Jehowa Nzambi kanyu.+ Hanyohombe mbɛtɔla lo lonya l’omi kana la lɔmɔsɔ.+ 33 Nyu pombaka nkɛndakɛnda paka lo mboka kakanyodjangɛ Jehowa Nzambi kanyu,+ dia nyu nsɛna ndo ngɔna ndo monga la lolombe lo wodja wayanganyu mbɔsa.+

6 “Ɔnɛ ele ɛlɛmbɛ, wadjango ndo tɛdikɔ ta dombo takakimɔ Jehowa Nzambi kanyu dia nyetsha, dia nyu nkitanyiya lam’ayonyotehɔ dia ntshɔ lo wodja wayanganyu mbɔsa, 2 dia nyu mboka Jehowa Nzambi kanyu wɔma ndo nkitanyiya wadjango ande tshɛ ndo ɛlɛmbɛ ande tshɛ wamomonyodjangɛ, wɛ la ɔnayɛ ndo okana ayɛ,+ nshi tshɛ ya lɔsɛnɔ lanyu dia nyu nsɛna edja.+ 3 Isariyɛlɛ le, nyu pombaka mpokamɛ ndo mbakitanyiya dimɛna dimɛna, dia nyu ngɔna ndo fulanɛ lo wodja wakɛlanɛ abɛlɛ la osanga, oko wakanyolake Jehowa Nzambi ka watshɛnyu.

4 “Isariyɛlɛ le, ohokame: Jehowa Nzambi kaso ekɔ ndamɛ Jehowa.+ 5 Langa Jehowa Nzambi kayɛ la otema ayɛ tshɛ ndo la anima*+ ayɛ tshɛ ndo la wolo* ayɛ tshɛ.+ 6 Awui wamomokodjangɛ ɛlɔ anɛ pombaka monga l’otema ayɛ, 7 ndo kowakɔkɔmiyake* anayɛ+ ndo kowatɛkewɔ lam’odjashiyɛ lo luudu layɛ, lam’atayakɛndakɛnda lo mboka, lam’etamayɛ ndo lam’etɔyɛ.+ 8 Kowakeleke oko diohwelo lo lonya layɛ ndo kawoyale lo okoko* ayɛ oko yɛtshi ya dihɔndɔ yakelekawɔ l’ɔtɛ.+ 9 Kowafunde lo kadrɛma ya la soko dia luudu layɛ ndo lo asoko ayɛ.

10 “Lam’atanyɔtɔlɛ Jehowa Nzambi kanyu lo wodja wakandatshibɛ watshɛnyu, Abrahama, Isaka la Jakɔbɔ dia nyosha,+ esomba wa weke ndo w’amɛna wakinyu kombika,+ 11 mvudu yoludi tɔɔ la weho tshɛ wa diangɔ di’amɛna diakinyu kokamba dia dikondja, afuku w’ashi wakinyu kotshima ndo dikambɔ dia vinyɔ la esongo w’ɔlivɛ wakinyu komonɛ, ndo lam’ayonyɔlɛka ko ndota,+ 12 kanyende dimɛna diaha nyu mbohɛ Jehowa+ lakanyotondja oma lo wodja w’Edjibito, oma lo luudu la lɔhɔmbɔ. 13 Jehowa Nzambi kanyu kahombanyu mboka wɔma,+ nde kahombanyu kambɛ olimu+ ndo lo lokombo lande kahombanyu ntshiba.+ 14 Tanyoyelake tozambizambi tokina, tozambizambi tshɛ t’anto wonyodingi,+ 15 nɛ dia Jehowa Nzambi kanyu lele l’atei anyu ekɔ Nzambi kalɔmba dia mbomamema paka ndamɛ oto.+ Naka hanyosadi ngasɔ, kete Jehowa Nzambi kanyu ayonyomalɛ+ ndo ayonyoshila oshiki oma la nkɛtɛ.+

16 “Tanyodjake Jehowa Nzambi kanyu l’ohemba+ woho wakanyawodje l’ohemba la Masa.+ 17 Nyu pombaka monga la yambalo dia nkitanyiya ɛlɛmbɛ, waohwelo ndo wadjango wa Jehowa Nzambi kanyu wakandanyodjangɛ dia nkitanyiya. 18 Nyu pombaka nsala kɛnɛ kosembwe ndo kele ɔlɔlɔ lo washo wa Jehowa, dia nyu ngɔna ndo dia nyu mbɔtɔ ndo mbɔsa wodja wa dimɛna wakatshibɛ Jehowa watshɛnyu,+ 19 lo mbitshanya atunyi anyu tshɛ la ntondo kanyu, oko wakalake Jehowa.+

20 “Lo nshi yayaye, naka ananyu wambonyombola vate: ‘Naa kitshimudi ya waohwelo, wadjango ndo tɛdikɔ ta dombo takanyodjangɛ Jehowa Nzambi kaso?’ 21 Ko nyu mbutɛ ananyu nyate: ‘Taki mfumbe ya Farawɔ l’Edjibito, koko Jehowa akatotondja oma l’Edjibito la lonya la wolo. 22 Ɔnkɔnɛ, Jehowa akasale tolembetelo ndo ahindo wa weke ndo walanya lo Edjibito,+ le Farawɔ ndo le ase luudu lande tshɛ lo washo aso.+ 23 Ko nde akatotondja oma lɛkɔ dia tela lanɛ dia tosha wodja wakandatshibɛ watshɛso.+ 24 Oma laasɔ, Jehowa akatodjangɛ dia sho kitanyiyaka ɛlɛmbɛ ɛsɔ tshɛ ndo dia mboka Jehowa Nzambi kaso wɔma dikambo dia ɔlɔlɔ aso wa pondjo,+ dia sho ntshikala la lɔsɛnɔ,+ oko weso la lɔ ɛlɔ kɛnɛ. 25 Ndo tayɔsama oko anto w’ɛlɔlɔ naka sho ndjela dimɛna dimɛna wadjango asɔ tshɛ dia nkitanyiya* Jehowa Nzambi kaso, oko wakandatodjangɛ.’+

7 “Lam’ayonyɔtɔla Jehowa Nzambi kanyu lo wodja wayanganyu mbɔtɔ ndo mbɔsa,+ nde ayotshanya wedja wele l’anto efula ɛnɛ oma la ntondo kanyu:+ Ase Hiti, ase Ngiringashɛ, ase Amɔra,+ ase Kanana, ase Perizi, ase Hivi ndo ase Jɛbusɛ,+ wedja 7 wele l’anto efula ndo wele la wolo nyoleka.+ 2 Jehowa Nzambi kanyu ayowakimɔ l’anya anyu, ko nyayowalɛndja.+ Nyu pombaka mbalanya ndooko onyake.+ Tanyodjake ndooko sheke kaamɛ la wɔ ndo tanyowaokake kɛtshi.+ 3 Tanyodjake sheke ya tshukanaka la wɔ. Tanyotshukanyake ananyu wa wamato le anawɔ w’apami ndo tanyotshukɛke ananyu w’apami anawɔ wa wamato.+ 4 Nɛ dia vɔ wayokadimola ananyu oma le mi dia vɔ ntshika ndjelami ko vɔ kambɛ nzambi nkina,+ ko Jehowa ndjonyomalɛ nkɛlɛ k’efula ndo ndjonyoshila oshiki.+

5 “Koko kɛnɛ kahombanyu mbasalɛ tɔ kɛnɛ: Kanyohandjole dilambwelo diawɔ, kanyatshatsha dimɛta diawɔ dia l’ave+ ndo kanyohendjahendja dimɛta diawɔ dia l’esongo*+ ndo kanyotshumbe dikishi diawɔ.+ 6 Nɛ dia nyu nyekɔ wodja w’ekila le Jehowa Nzambi kanyu, ndo Jehowa Nzambi kanyu akanyɔsɔnɛ dia nyu monga wodja ande, ɛngɔ kande ka laande,* oma l’atei wa wedja tshɛ wele la nkɛtɛ.+

7 “Aha l’ɔtɛ w’ɔnɛ nyu mbaki wodja wakaleke anto efula mbakanyoke Jehowa ngandji ndo mbakandanyɔsɔnɛ,+ nɛ dia nyu mbaki wodja wakaleke tshitshɛ l’atei w’anto tshɛ.+ 8 Koko, l’ɔtɛ wa ngandji kakanyoke Jehowa ndo l’ɔtɛ wakandalame etshibelo kakandatshibɛ watshɛnyu,+ mbakanyotondja Jehowa la lonya la wolo dia nyotshungola oma lo luudu la lɔhɔmbɔ,+ oma l’anya wa Farawɔ nkumekanga k’Edjibito. 9 Nyu mbeyaka dimɛna dia Jehowa Nzambi kanyu ekɔ Nzambi ka mɛtɛ, Nzambi ka kɔlamelo, kalama sheke yande ndo kɛnya ngandji kande ka kɔlamelo polo lo lɔlɔnga la kinunu (1000) la wanɛ wawoka ngandji ndo wakitanyiya ɛlɛmbɛ ande.+ 10 Koko wanɛ woohetsha, nde ayowafuta elanyelo lo washo awɔ.+ Nde hatotshimbatshimba dia mendana la wanɛ woohetsha. Nde ayowafuta lo washo awɔ. 11 Ɔnkɔnɛ, nyoyalame dia ndjela ɛlɛmbɛ, wadjango ndo tɛdikɔ ta dombo tamomonyodjangɛ ɛlɔ lo nkitanyiya.

12 “Naka nyu ntetemala mpokamɛ tɛdikɔ ta dombo tɔnɛ ndo nkamba la tɔ ndo tiyela, kete Jehowa Nzambi kanyu ayolama sheke ndo ngandji ka kɔlamelo kakandatshibɛ watshɛnyu. 13 Nde ayonyoka ngandji, ayonyɔtshɔkɔla ndo ayonyofudia. Ɛɛ, nde ayonyɔtshɔkɔla lo nyosha ana efula*+ ndo dia nkɛtɛ ngɔnya diangɔ, ntɔngɔ yanyu, wanu anyu w’eyoyo, esɔ kanyu,+ ɛsɔngɔ anyu wa ngɔmbɛ ndo ɛsɔngɔ anyu w’ɛkɔkɔ lo wodja wakandatshibɛ watshɛnyu dia nyosha.+ 14 Nyu nyayonga wanɛ wayoleka tshɔkwama l’atei w’anto tshɛ.+ Ndooko pami kana womoto la l’atei anyu layonga ekomba ndo ndooko elongalonga kanyu kahatota.+ 15 Jehowa ayonyonyɛ hemɔ tshɛ ndo nde hatonyela ndooko olando wa wolo wakanyeye l’Edjibito.+ Koko nde ayela akambo asɔ le wanɛ tshɛ wanyohetsha. 16 Kanyolanya anto tshɛ wayokimɔ Jehowa Nzambi kanyu l’anya anyu.+ Nyu* hanyohombe mbaoka kɛtshi+ ndo hanyohombe kambɛ tozambizambi tawɔ,+ nɛ dia ɔsɔ ayonga djonga le nyu.+

17 “Naka nyambota l’etema anyu nyate: ‘Wedja ɛnɛ wekɔ la anto efula toleka. Ngande wayotokoka mbatshanya?’+ 18 Tanyowaokake wɔma.+ Nyohɔ kɛnɛ kakasalɛ Jehowa Nzambi kanyu Farawɔ ndo Edjibito w’otondo:+ 19 Alanya wa wolo* wakanyɛnyi la washo anyu, ndo tolembetelo la ahindo+ la lonya la wolo ndo lonya losembwe tɔɔ lakakambe la Jehowa Nzambi kanyu dia nyotondja.+ Kɛsɔ kayosalɛ Jehowa Nzambi kanyu wedja tshɛ wokanyu wɔma.+ 20 Jehowa Nzambi kanyu ayowasatsha lokomba la wɔma polo ndo lam’ayoshila wanɛ wakatshikala+ ndo wakashɛma la ntondo kanyu. 21 Tanyowaokake wɔma, nɛ dia Jehowa Nzambi kanyu ekɔ kaamɛ la nyu.+ Nde ekɔ Nzambi ka woke kahomba mbokama wɔma.+

22 “Jehowa Nzambi kanyu ayotatshanyaka mɛtɛ wedja ɛsɔ yema yema oma la ntondo kanyu.+ Nde hatetawɔ dia nyu mbamana esadi esadi, diaha nyama ya mpango ya l’okonda ndjofulanɛ dia nyosalɛ kɔlɔ. 23 Jehowa Nzambi kanyu ayowakimɔ l’anya anyu, ko nyayowalɛndja polo lam’ayowoshila oshiki.+ 24 Nde ayokimɔ nkumi ya dikanga yawɔ l’anya anyu,+ ndo nyayonya nkombo yawɔ l’ɛse olongo.+ Ndooko onto layemala la ntondo kanyu+ polo lam’ayonyashila oshiki.+ 25 Kanyotshumbe dikishi dia tozambizambi tawɔ lo dja.+ Tanyokombolake mfɛsa ndo paonyi yawɔ ndo tanyoyiɔsake,+ diaha nyu ndjotala lo djonga oma lɔkɔ. Nɛ dia ɔsɔ ekɔ ɛngɔ ka wɔnɔnyi le Jehowa Nzambi kanyu.+ 26 Tanyelake ndooko ɛngɔ ka wɔnɔnyi lo luudu lanyu diaha nyu ndjonga ɛngɔ kahomba ndanyema oko tɔ. Nyu pombaka kiɔsa oko ɛngɔ ka wɔnɔnyi ndo kihetsha, nɛ dia tɔ kekɔ ɛngɔ kahomba ndanyema.

8 “Nyu pombaka nsala tshɛ dia nkitanyiya ɛlɛmbɛ tshɛ wamomonyosha ɛlɔ, dia nyu ntetemala nsɛna+ ndo fulanɛ ko ntshɔ ndo tɔsa wodja wakatshibɛ Jehowa watshɛnyu.+ 2 Nyohɔ mboka k’otale kakanyɔkɛndjakɛndja Jehowa Nzambi kanyu lɔkɔ lo ɛnɔnyi 40 l’oswe wa shɛnga,+ dia nyokitshakitsha ndo dia nyodja l’ohemba+ dia mbeya kɛnɛ kaki lo etema anyu,+ kana nyayokitanyiya ɛlɛmbɛ ande kana bu. 3 Ɔnkɔnɛ, nde akanyokitshakitsha, akanyovusha ndjala+ ndo akanyolesha mana+ yakinyu kombeya, oyadi nyu kana washɛnyu, dia nyu mbeya dia onto hayala la lɔsɛnɔ oma lo mbo ya ndɛ tsho, koko ndjalaka la lɔ oma lo ɔtɛkɛta tshɛ watomba oma l’onyɔ wa Jehowa.+ 4 Ahɔndɔ wakanyalɔtɛ komonga emusu ndo ekolo anyu kombida lo ɛnɔnyi akɔ 40.+ 5 Nyu mbeyaka dimɛna lo etema anyu dia, oko watongolaka onto ɔnande mbakayanyongolaka Jehowa Nzambi kanyu.+

6 “Nyu pombaka nkitanyiya ɛlɛmbɛ wa Jehowa Nzambi kanyu lo nkɛndakɛnda lo mboka yande ndo lo mbooka wɔma. 7 Nɛ dia Jehowa Nzambi kanyu ekɔ lo tanyɔtɔlɛ lo wodja wa dimɛna,+ wodja wele la ɛkɛdi w’ashi,* wele la tɛkɔ ndo tɔkɔkɔ* takɛla ashi oma l’okidi ndo oma lo lɛkɛ l’akona, 8 wodja wele la eponga, asami, vinyɔ, esongo wa fingo ndo elowa wa pɔmɛgranatɛ,+ wodja wele la esɔ k’ɔlivɛ ndo osanga,+ 9 wodja wahanyatohomba mbo ya ndɛ ndo wahanyatohomba ndooko ɛngɔ, wodja wele ave wekɔ la mbolo lɔkɔ ndo wele la akona wayonyotondjaka nkonga.

10 “Etena kayonyɔlɛka ndo kayonyolotaka, kanyotombolake Jehowa Nzambi kanyu l’ɔtɛ wa wodja wa dimɛna wakandanyosha.+ 11 Kanyende dimɛna diaha nyu mbohɛ Jehowa Nzambi kanyu ndo diaha nyu ntshika nkitanyiya ɛlɛmbɛ ande, tɛdikɔ tande ndo wadjango ande wamomonyodjangɛ ɛlɔ. 12 Etena kayonyɔlɛka ndo kayonyolotaka, etena kayonyokaka mvudu y’amɛna ndo kayonyodjasɛka lɔkɔ,+ 13 etena kayofulanɛ ngɔmbɛ yanyu la ɛkɔkɔ anyu ndo lam’ayofula mfɛsa yanyu la paonyi yanyu, lam’ayonyonga la diangɔ tshɛ emete emete, 14 tanyetawɔke dia etema anyu nyokonya dia monga la lotamanya+ dia nyu mbohɛ Jehowa Nzambi kanyu lakanyotondja oma lo wodja w’Edjibito, oma lo luudu la lɔhɔmbɔ,+ 15 ɔnɛ lakanyɔkɛndjakɛndja l’oswe wa shɛnga+ wa woke ndo wa wɔma wele la eloyi wa nɛngɔ la nkoto ndo nkɛtɛ ya womu yele bu la ashi. Nde akasale dia ashi ntomba oma lo dive dia wolo,+ 16 akanyolesha mana+ l’oswe wa shɛnga, mana yele washɛnyu kombeya dia nyokitshakitsha+ ndo dia nyodja l’ohemba dikambo dia wahɔ anyu wa lo nshi yayaye.+ 17 Naka nyayota lo etema anyu onto l’onto ate: ‘La wolo ami hita ndo la nkudu k’oma l’anya ami hita kamomokondja ɔngɔnyi ɔnɛ,’+ 18 nyohɔ dia Jehowa Nzambi kanyu kanyosha wolo dia nyu monga la ɔngɔnyi+ dia nkotsha sheke yakandatshibɛ watshɛnyu, oko wediɔ ɛlɔ.+

19 “Naka nyu mbohɛ Jehowa Nzambi kanyu, ko nyu ndjela tozambizambi tokina, tikambɛ ndo tikusamɛ, dimi lambonyewola ɛlɔ nte: Ndooko onyake nyayovɔ.+ 20 Oko wedja watalanya Jehowa la ntondo kanyu kayonyolanyema, naka hanyotohokamɛ dui dia Jehowa Nzambi kanyu.+

9 “Isariyɛlɛ le, ohokame, ɛlɔ wɛ ayanga ntehɔ Jɔrdana+ dia ntshɔ ndo tɔsa wedja wokoleki woke ndo wolo,+ esomba wa weke ndo wodingami la mpele polo l’olongo,*+ 2 anto wa weke ndo akongote, ana wa Anakima,+ wanɛ weyanyu ndo wakanyoke wata vate: ‘Akoka memala la ntondo k’ana wa Anaka?’ 3 Ɔnkɔnɛ, nyu pombaka mbeya ɛlɔ dia Jehowa Nzambi kanyu ayotehɔ la ntondo kanyu.+ Nde ekɔ dja yatshumba+ ndo nde ayowalanya. Nde ayowakitshakitsha la ntondo kanyu dia nyu mbatshanya* esadi eto ndo mbalanya, oko wakanyolake Jehowa.+

4 “Lam’ayowatshanya Jehowa oma la ntondo kanyu, tanyotake l’etema anyu onto l’onto ate: ‘L’ɔtɛ w’ɔlɔlɔ ami hita kambombela Jehowa dia dimi ndjɔsa wodja ɔnɛ.’+ Koko l’ɔtɛ wa kɔlɔ ya wedja ɛnɛ+ kambowatshanya Jehowa oma la ntondo kanyu. 5 Aha l’ɔtɛ w’ɔlɔlɔ anyu kana l’ɔtɛ wenyu l’etema wa losembwe mbayanganyu mbɔsa wodja awɔ, koko l’ɔtɛ wa kɔlɔ ka wedja ɛnɛ kambowatshanya Jehowa Nzambi kanyu oma la ntondo kanyu+ ndo dia nkotsha ɔtɛkɛta wakatshibɛ Jehowa watshɛnyu, Abrahama,+ Isaka+ la Jakɔbɔ.+ 6 Ɔnkɔnɛ, nyeye dia aha l’ɔtɛ w’ɔlɔlɔ anyu kayanga nyosha Jehowa wodja ɔnɛ wa dimɛna dia vɔ monga wanyu, nɛ dia nyekɔ akanga w’ɛtɛ wolo.+

7 “Nyohɔ ndo tanyohɛke woho wakanyotsha Jehowa Nzambi kanyu nkɛlɛ l’oswe wa shɛnga.+ Oma ko lushi lakanyamɔ oma lo wodja w’Edjibito polo lam’akanyakome lo dihole nɛ, nyu nyakatɔmbɔkwɛka Jehowa.+ 8 Kaanga la Hɔrɛbɛ nyu nyakokiya Jehowa nkɛlɛ ko Jehowa akanyomalɛ ndo nde aki suke la nyoshila oshiki.+ 9 Lam’akamadɛ lo dikona dia tolongola pase di’ave,+ pase dia sheke yakadje Jehowa kaamɛ la nyu,+ dimi lakatshikala lo dikona tanyi 40 ndo etsho 40+ aha la ndɛ ndooko ɛngɔ ndo aha la nnɔ ashi. 10 Ko Jehowa akambisha pase 2 di’ave diakafundama la lohita la Nzambi ndo lɔkɔ mbaki awui tshɛ wakanyotɛ Jehowa lo dikona oma l’atei wa dja lushi lakanyatshumana.*+ 11 L’ekomelo ka tanyi 40 ndo etsho 40, Jehowa akambisha pase diakɔ 2 di’ave, pase dia sheke, 12 ko Jehowa akambutɛ ate: ‘Onɛɛ, holɔ yema esadi nɛ dia anto ayɛ wakayatondja oma l’Edjibito wambosala kɔlɔ.+ Vɔ wambotshika esadi eto mboka kakamawadjangɛ dia vɔ ndjela. Wamboyasalɛ ekishi ka lowolo.’+ 13 Oma laasɔ, Jehowa akambutɛ ate: ‘Dimi lambenda anto anɛ ndo lambɛna dia vɔ wekɔ akanga w’ɛtɛ wolo.+ 14 Ontshike mbashile oshiki ndo minya lokombo lawɔ oma l’ɛse olongo kele ketɛ wodja waaleki wolo ndo waaleki anto efula.’+

15 “Ko dimi lakakadimɔ ndo lakaholɔ oma lo dikona etena kakalombalombaka dja lo dikona,+ lokime pase 2 dia sheke l’anya ami 2.+ 16 Oma laasɔ dimi lakende, mɛnyi ko nyambosalɛ Jehowa Nzambi kanyu pɛkato! Nyakayasalɛ ekishi ka yana ya ngɔmbɛ la lowolo la lɔlɛlɔla. Nyakatshike esadi eto mboka kakanyodjangɛ Jehowa dia nyu ndjela.+ 17 Ko dimi lakɔshi pase diakɔ 2, lakadikasha oma l’anya ami akɔ 2 ndo lakadiatshatsha lo washo anyu.+ 18 Oma laasɔ, dimi lakakusama la ntondo ka Jehowa oko wakamasale mbala ka ntondo, tanyi 40 ndo etsho 40. Dimi kɔɔndɛ ndooko ɛngɔ ndo dimi kɔɔnɔ ashi+ l’ɔtɛ wa pɛkato tshɛ yakanyasale lo nsala kɛnɛ kele kɔlɔ lo washo wa Jehowa ndo lo mbookiya nkɛlɛ. 19 Nɛ dia dimi lakokaka wɔma l’ɔtɛ wa nkɛlɛ k’efula kakanyoke Jehowa+ polo ndo nde monga suke dia nyoshila oshiki. Koko Jehowa akampokamɛ ndo mbala kɛsɔ nto.+

20 “Jehowa akomalɛ Arɔna efula, diakɔ diakinde suke la mbodiaka,+ koko dimi lakɔɔsɛngasɛnga lo dikambo dia Arɔna l’etena kɛsɔ nto. 21 Oma laasɔ, dimi lakɔshi yana ya ngɔmbɛ+ yakanyasale pɛkato lo ndjisala, ko lakayitshumbe lo dja, lakayitɛtshatɛtsha ndo lakayetɛ otoko oto polo lam’akayakome oko ditshu, ko lakatshola ditshu diakɔ l’ɔkɛdi w’ashi wakɛla oma lo dikona.+

22 “Ndo nto, la Tabɛra,+ la Masa+ ndo la Kibɛrɔtɛ-Hatava+ nyu nyakokiya Jehowa nkɛlɛ nto. 23 Lam’akanyotome Jehowa oma la Kadɛshɛ-Baranea+ ate: ‘Nyotshu nyotɔshi wodja wayangami nyosha ndooko onyake,’ nyakɔnyɔla didjango dia Jehowa Nzambi kanyu+ ndo nyu komonga la mbetawɔ+ le nde ndo nyu kombokitanyiya. 24 Ntatɛ lam’akamanyeye, nyu nyokɔtɔmbɔkwɛka Jehowa.

25 “Ko dimi lakatetemala nkusama la ntondo ka Jehowa l’edja ka tanyi 40 ndo etsho 40,+ nɛ dia dimi lakakusamaka ngasɔ dikambo Jehowa akate dia nyoshila oshiki. 26 Dimi lakatatɛ nsɛngasɛnga Jehowa nte: ‘Nkum’Olongo Nkumadiɔndjɔ Jehowa le, tolanyake wodja ayɛ. Vɔ wekɔ ɛngɔ kayɛ hita*+ kakayatshungola la woke woke ayɛ ndo kakayatondja oma l’Edjibito la lonya la wolo.+ 27 Ohɔ ekambi ayɛ Abrahama, Isaka la Jakɔbɔ.+ Todjake yimba lo woho wele anto anɛ ɛtɛ wolo, kɔlɔ yawɔ ndo pɛkato yawɔ.+ 28 Naka aha ngasɔ, kete anto wa lo wodja wakayatotondja mbeyaka ndjota vate: “Jehowa komonga la akoka wa mbatɔla lo wodja wakandaalake, ndo nde mbahetshaka diakɔ diakandaatondja dia towadiaka l’oswe wa shɛnga.”+ 29 Nɛ dia vɔ wekɔ wodja ayɛ, ɛngɔ kayɛ hita*+ kakayatondja la wolo ayɛ w’efula ndo la lonya losembwe tɔɔ.’+

10 “L’etena kɛsɔ, Jehowa akambutɛ ate: ‘Sala pase 2 di’ave diele oko dia ntondo+ kele dɛ la diɔ le mi lo dikona ndo sala ɔshɛtɛ w’abaya. 2 Dimi layofunda lo pase diakɔ ɛtɛkɛta waki lo pase dia ntondo, diakayatshatsha kele kodidje l’ɔshɛtɛ.’ 3 Ko dimi lakasale ɔshɛtɛ l’abaya w’osongo wa akasia ndo lakasale pase 2 di’ave oko nɛ dia ntondo, ko lakadɛ lo dikona la pase diakɔ 2 lo lonya lami.+ 4 Ko nde akafunde ɛtɛkɛta wakandafunde ntondo+ lo pase diakɔ, mbuta ate Ɛlɛmbɛ 10+ wakanyotɛ Jehowa lo dikona oma l’atei wa dja+ lushi lakanyatshumana.*+ Ko Jehowa akambishadiɔ. 5 Oma laasɔ, dimi lakakadimɔ ko lakaholɔ oma lo dikona+ ndo lakayodja pase diakɔ lo ɔshɛtɛ wakamasale, lɛnɛ atshikaladiɔ, oko wakambidjangɛ Jehowa.

6 “Oma laasɔ, ase Isariyɛlɛ wakonɛ oma la Berɔtɛ Bɛnɛ-Jaakana otsha la Mɔsɛra. Lɛkɔ mbakavu Arɔna ndo mbakandakundɛma+ ko ɔnande Eleazara akatatɛ nkamba oko ɔlɔmbɛdi lo dihole diande.+ 7 Vɔ wakonɛ oma lɛkɔ ko wakatshu otsha la Ngudɛngɔda ndo oma la Ngudɛngɔda vɔ wakatshu otsha la Jɔtibata,+ ɛtshi ka nkɛtɛ kele la ɛkɛdi w’ashi* wakɛla.

8 “L’etena kɛsɔ, Jehowa akakitsha dioho dia Lɛwi+ laande dia vɔ mɛmbaka ɔshɛtɛ wa sheke wa Jehowa,+ dia memalaka la ntondo ka Jehowa dia mbokambɛka ndo dia vɔ tshɔkɔlaka anto lo lokombo lande,+ oko wasalawɔ dikambo sɔ ɛlɔ. 9 Diakɔ diele ase Lɛwi hawolongodi yema yawɔ kana etenyi k’okitɔ kaamɛ l’anangɛwɔ. Jehowa kele etenyi kawɔ k’okitɔ, oko wakawatɛ Jehowa Nzambi kanyu.+ 10 Dimɛ lakatshikala lo dikona oko wakamatshikala mbala ka ntondo, tanyi 40 ndo etsho 40,+ ko Jehowa akampokamɛ ndo mbala kɛsɔ nto.+ Jehowa konanga nyolanya. 11 Oma laasɔ, Jehowa akambutɛ ate: ‘Tshɔka la ntondo ka wodja ndo tɔlɔngɔsɔlɛ lɔkɛndɔ, kele vɔ watshu ndo watɔshi wodja wakamatshibɛ watshɛwɔ dia mbasha.’+

12 “Isariyɛlɛ le, kakɔna kakɔlɔmba Jehowa Nzambi kayɛ?+ Paka dia mboka Jehowa Nzambi kayɛ wɔma,+ nkɛndakɛnda lo mboka yande tshɛ,+ mbooka ngandji, kambɛ Jehowa Nzambi kayɛ la otema ayɛ tshɛ ndo la anima* ayɛ tshɛ,+ 13 ndo nkitanyiya ɛlɛmbɛ la wadjango wa Jehowa wamomokodjangɛ ɛlɔ dikambo di’ɔlɔlɔ ayɛ.+ 14 Jehowa Nzambi kayɛ mbakanga olongo, olongo wa laadiko di’elongo* ndo nkɛtɛ la kɛnɛ tshɛ kele lɔkɔ.+ 15 Koko paka le watshɛnyu kakayasukanya Jehowa ndo kakandɛnya ngandji kande, ndo nde akanyɔsɔnɛ nyu tokanula tawɔ+ oma l’atei wa wedja tshɛ oko wediɔ ɛlɔ. 16 Kakianɛ nyu pombaka mbɛdia* etema anyu+ ndo ntshika monga ɛtɛ wolo.+ 17 Nɛ dia Jehowa Nzambi kanyu ekɔ Nzambi ka waa nzambi+ ndo Nkumi ka waa nkumi, Nzambi ka woke, ka wolo ndo kahomba mbokama wɔma, kahasalɛ ndooko onto akambo la shɔnɔdi+ ndo kahalongola etshimba. 18 Nde atosambolɛka ɔna etshike* la wadi aki odo+ akambo la losembwe ndo nde tokaka ɔngɛndangɛnda ngandji,+ towoshaka mbo ya ndɛ ndo ahɔndɔ. 19 Nyu lawɔ pombaka mboka ɔngɛndangɛnda ngandji, nɛ dia nyu nyaki angɛndangɛnda lo wodja w’Edjibito.+

20 “Jehowa Nzambi kayɛ kahombayɛ mboka wɔma, nde kahombayɛ kambɛ,+ nde kahombayɛ mamema ndo lo lokombo lande kahombayɛ ntshiba. 21 Nde kahombayɛ tombolaka.+ Nde kele Nzambi kayɛ kakakosalɛ akambo asɔ tshɛ wa weke ndo wa diambo efula wakayɛnyi la washo ayɛ.+ 22 Watshɛnyu wakatshu otsha l’Edjibito+ l’anto* 70, ko wonya ɔnɛ Jehowa Nzambi kanyu ambonyofudia oko tɔɔtɔ ta l’olongo.+

11 “Nyolange Jehowa Nzambi+ kanyu ndo nyokotshake ɔkɛndɛ anyu otsha le nde ndo nyolamake wadjango ande, tɛdikɔ tande ta dombo ndo ɛlɛmbɛ ande. 2 Nyu mbeyaka dia ɛlɔ dimi lambɔtɛkɛta la nyu, koko aha ananyu waki kombeya kana kɔmɛna ohokwelo wa Jehowa Nzambi kanyu,+ woke woke ande,+ lonya lande la wolo+ ndo lonya lande losembwe tɔɔ. 3 Vɔ kɔmɛna tolembetelo tande ndo akambo ande wakandasale l’Edjibito le Farawɔ, nkumekanga k’Edjibito ndo le wodja ande w’otondo,+ 4 kana kɛnɛ kakandasalɛ asɔlayi w’ase Edjibito, mfalasa la pusupusu ya ta yaki Farawɔ yakadinde l’ashi lo Ndjale ka Beela etena kakawayanyotshanyaka, ko Jehowa mbalanya mbala kakɔ ɔtɔi lo pondjo.*+ 5 Vɔ kɔmɛna kɛnɛ kakandanyosalɛ l’oswe wa shɛnga polo lam’akanyakome lo dihole nɛ, 6 kana kɛnɛ kakandasalɛ Datana nde l’Abirama, ana wa Eliyabɛ ɔna Rubɛna etena kakaasola nkɛtɛ onyɔ ndo kakayaamɛnɛ kaamɛ l’ase mvudu yawɔ, mvudu yawɔ y’apɛma ndo ɛngɔ tshɛ kasɛna kakaayele, lo washo w’ase Isariyɛlɛ tshɛ.+ 7 Nyakɛnyi la washo anyu akambo wa weke tshɛ wakasale Jehowa.

8 “Nyu pombaka nkitanyiya ɛlɛmbɛ tshɛ wamomonyosha ɛlɔ dia nyu monga la wolo ndo ntehɔ dia ntshɔ otsha lo wodja ɔnɛ wayanganyu mbɔsa, 9 ndo dia nyu nsɛna edja+ lo wodja wakatshibe Jehowa dia mbisha watshɛnyu la tokanula*+ tawɔ, wodja wakɛlanɛ abɛlɛ la osanga.+

10 “Wodja wayanganyu mbɔsa keema oko wodja w’Edjibito oma lɛnɛ ayanyaye, lɛnɛ akanyonɛka woho ko paka nyu mbɛtɔya ashi l’ekolo anyu oko l’ekambɔ k’afuki. 11 Koko wodja wayanganyu ntehɔ dia tɔsa ekɔ wodja w’akona l’eholola.+ Vɔ ndɔyamaka l’ashi wa mvula w’oma l’olongo.+ 12 Vɔ wekɔ wodja walama Jehowa Nzambi kanyu. Washo wa Jehowa Nzambi kanyu wekɔ wonya tshɛ lɔkɔ oma k’etatelo k’ɔnɔnyi polo l’ekomelo k’ɔnɔnyi.

13 “Naka nyayokitanyiya dimɛna dimɛna ɛlɛmbɛ ami wamomonyodjangɛ ɛlɔ ndo nyayolanga Jehowa Nzambi kanyu ndo mbokambɛ la otema anyu tshɛ ndo la anima* anyu tshɛ,+ 14 dimi layonyɔlɔshɛ avula lo wodja anyu lo tena diahombama, avula wa alɔhɔki la avula wa lɔlɔla djɛsɛ, ko nyayona diangɔ dianyu, wanu anyu w’eyoyo ndo esɔ kanyu.+ 15 Dimi layotondja tombatomba l’oswe dikambo dia dongalonga dianyu, ko nyayɔlɛ ndo nyayolota.+ 16 Nyende dimɛna diaha nyu mbetawɔ dia etema anyu nyokonya dia nyu ntakɔ mboka ndo ntɛmɔla tozambizambi tokina ndo tikusamɛ.+ 17 Naka hanyosadi ngasɔ, kete Jehowa ayonyomalɛ ndo nde ayodiha olongo diaha mvula ndɔ+ ndo nkɛtɛ hatotondja tombatomba ndo nyayoshila esadi eto lo wodja wa dimɛna wambonyosha Jehowa.+

18 “Nyu pombaka mbidja ɛtɛkɛta ami ɛnɛ lo etema anyu ndo lo anima* anyu ndo kanyowakeleke lo anya anyu dia nyoholaka ndo kawoyale lo ekoko* anyu oko yɛtshi ya dihɔndɔ yakelekawɔ l’ɔtɛ.+ 19 Kanyowaetshake ananyu, kanyowatɛkewɔ lam’odjashinyu lo mvudu yanyu, lam’atanyakɛndakɛnda lo mboka, lam’etamanyu ndo lam’etɔnyu.+ 20 Kanyaafunde lo kadrɛma ya la soko dia mvudu yanyu ndo lo asoko anyu, 21 dia nyu la ananyu nsɛna edja+ lo wodja wakatshibe Jehowa dia mbisha watshɛnyu+ l’edja tshɛ kayongaka olongo la diko dia nkɛtɛ.

22 “Naka nyu nkitanyiya dimɛna dimɛna ɛlɛmbɛ ami ɛnɛ wamomonyosha ndo nyu mbayela, lo mboka Jehowa Nzambi kanyu ngandji,+ lo nkɛndakɛnda lo mboka yande tshɛ ndo lo mbomamema,+ 23 kete Jehowa ayotshanya wedja ɛsɔ tshɛ oma la ntondo kanyu+ ndo nyayɔsa wedja wonyoleki weke ndo wonyoleki anto efula.+ 24 Dihole tshɛ diayonyodja ekolo diayonga dianyu.+ Oma l’oswe wa shɛnga polo la Lɛbanɔna, oma l’Ɔkɛdi, ɔkɛdi w’Efaratɛ polo lo ndjale ka lo owɛstɛ* mbayonga olelo anyu.+ 25 Ndooko onto layemala la ntondo kanyu.+ Oko wakandanyolake, Jehowa Nzambi kanyu ayosala dia wodja w’otondo wayonyotshɔ+ nyoka wɔma ndo nsaka lokomba.

26 “Nyende, ɛlɔ dimi lambokitsha ɔtshɔkɔ la mananu la ntondo kanyu:+ 27 Ɔtshɔkɔ naka nyu nkitanyiya ɛlɛmbɛ wa Jehowa Nzambi kanyu wamomonyodjangɛ ɛlɔ,+ 28 ndo mananu naka hanyokitanyiya ɛlɛmbɛ wa Jehowa Nzambi kanyu+ ndo naka nyambotshika ndjela mboka kamomonyodjangɛ ɛlɔ dia nyu ndjela ko nyamboyela tozambizambi takinyu kombeya.

29 “Lam’ayonyɔtɔla Jehowa Nzambi kanyu lo wodja wayanganyu mbɔsa, nyu pombaka tshɔkɔlaka* anto lo Dikona dia Ngɛrizimɛ ndo mbidjaka anto mananu lo Dikona dia Ebala.+ 30 Shi vɔ wekɔ lo wedi okina wa Jɔrdana otsha lo owɛstɛ,* lo nkɛtɛ y’ase Kanana wadjasɛ la Araba mbɛlanɛ la Ngilingalɛ suke la esongo wa weke wa Mɔrɛ?+ 31 Nɛ dia nyayanga ntehɔ Jɔrdana dia ntshɔ tɔsa wodja wayanga nyosha Jehowa Nzambi kanyu.+ Lam’ayonyowɔsa ndo lam’ayonyodjasɛ lɔkɔ, 32 kanyosale tshɛ dia nkitanyiya wadjango tshɛ ndo tɛdikɔ tshɛ tamomokitsha la ntondo kanyu ɛlɔ.+

12 “Ɔnɛ mbele wadjango ndo tɛdikɔ ta dombo tahombanyu ndjela nna lo nna nshi tshɛ yenyu la lɔsɛnɔ lo wodja wayonyosha Jehowa Nzambi ka watshɛnyu. 2 Lo wedja tshɛ wayonyɔsa, nyu pombaka ndanya ahole tshɛ wakakambaka la wɔ dia ntɛmɔla tozambizambi tawɔ,+ oyadi lo akona w’etale, lo tokonakona kana l’ɛse k’osongo wele la akatshi efula. 3 Kanyohandjole dilambwelo diawɔ, kanyatshatsha dimɛta diawɔ dia l’ave,+ kanyotshumbe dimɛta diawɔ dia l’esongo* lo dja, kanyohendjahendja dikishi dia tozambizambi tawɔ+ ndo kanyonya nkombo yawɔ oma l’ahole asɔ.+

4 “Tanyɔtɛmɔlake Jehowa Nzambi kanyu yoho shɔ.+ 5 Koko kanyoyange Jehowa Nzambi kanyu dihole tshɛ diayondɔsɔna dia nshikikɛ lokombo lande ndo dihole diande dia edjaselo l’atei wa waoho anyu tshɛ, ko nyu ntshɔ lɛkɔ.+ 6 Lɛkɔ mbahombanyu tɔlaka elambo anyu wa lotshumba,+ weshasha anyu, tenyi dianyu dia dikumi,+ weshasha w’oma lo anya anyu,+ elambo anyu wakanyatshike dɔkɔlɔkɔ, weshasha anyu wa la lolango+ ndo ana wa nondo wa ngɔmbɛ yanyu la w’ɛkɔkɔ anyu.+ 7 Nyu la ase mvudu yanyu pombaka ndɛ lɛkɔ la ntondo ka Jehowa Nzambi kanyu+ ndo ngɛnangɛna lo kɛnɛ tshɛ kasalanyu,+ nɛ dia Jehowa Nzambi kanyu ambonyɔtshɔkɔla.

8 “Hanyohombe nsala oko wasalaso lanɛ ɛlɔ, onto l’onto ekɔ lo nsala kɛnɛ kele ɔlɔlɔ lo washo ande,* 9 nɛ dia nyatakome lo dihole dia momuya+ ndo lo etenyi k’okitɔ kayanga nyosha Jehowa Nzambi kanyu. 10 Lam’ayonyotehɔ Jɔrdana+ ndo lam’ayonyodjasɛ lo wodja wayanga nyosha Jehowa Nzambi kanyu, ndooko onyake nde ayonyosha momuya oma le atunyi anyu tshɛ wonyodingi ndo nyayodjasɛ lo lotui tshitshi.+ 11 Kanyɔtɔlɛ kɛnɛ tshɛ kamomonyodjangɛ lo dihole diayɔsɔna Jehowa Nzambi kanyu dia mbidjashiya lokombo lande,+ mbuta ate elambo anyu wa lotshumba, weshasha anyu, tenyi dianyu dia dikumi,+ weshasha w’oma lo anya anyu ndo olambo tshɛ wa dɔkɔlɔkɔ wakanyatshike dɔkɔlɔkɔ dia mbisha Jehowa. 12 Nyayɔngɛnangɛna la ntondo ka Jehowa Nzambi kanyu,+ nyu la ananyu w’apami, ananyu wa wamato, mfumbe yanyu y’apami ndo mfumbe yanyu ya wamato, kaamɛ ndo ose Lɛwi lodjashi lo esomba* anyu, nɛ dia nde bu la yema yande kana etenyi kande k’okitɔ l’atei anyu.+ 13 Kanyosale tshɛ diaha nambola elambo anyu wa lotshumba lo dihole dikina tshɛ diayonyɛna.+ 14 Nyu pombaka nambolaka elambo anyu wa lotshumba paka lo dihole diayɔsɔna Jehowa lo ɛtshi ka nkɛtɛ kɛmɔtshi ka dioho dianyu, ndo lɛkɔ mbahombanyu salaka kɛnɛ kamomonyodjangɛ.+

15 “Koko etena tshɛ kalanganyu,* nyu mbeyaka ndjaka nyama ndo ndɛ onatshi+ lo ndjela woho wambonyɔtshɔkɔla Jehowa Nzambi kanyu lo esomba* anyu tshɛ. Onto lele mindo kana onto lele pudipudi kokaka kilɛ, woho watonyɔlɛka mboloko kana mpele. 16 Koko, hanyohombe ndɛ dikila.+ Nyu pombaka ditshola la nkɛtɛ oko ashi.+ 17 Lo esomba* anyu, hanyotonga la lotshungɔ la ndɛ etenyi ka dikumi ka ntɔngɔ yanyu, wanu anyu w’eyoyo, esɔ kanyu, ana wa nondo wa ngɔmbɛ kana w’ɛkɔkɔ anyu,+ elambo anyu watshikanyu dɔkɔlɔkɔ, weshasha anyu wa la lolango, kana weshasha w’oma lo anya anyu. 18 Kɔlɛke diangɔ sɔ la ntondo ka Jehowa Nzambi kayɛ, lo dihole diayɔsɔna+ Jehowa Nzambi kayɛ, wɛ la ɔnayɛ la pami, ɔnayɛ la womoto, okambi ayɛ wa pami ndo okambi ayɛ wa womoto, ndo ose Lɛwi lodjashi lo esomba* ayɛ, ndo wɛ ayɔngɛnangɛnaka la ntondo ka Jehowa Nzambi kayɛ lo kɛnɛ tshɛ kayoyosalaka. 19 Ewɔ diaha minya ose Lɛwi+ yimba edja tshɛ kayoyɔsɛnaka lo wodja ayɛ.

20 “Etena kayonanula Jehowa Nzambi kayɛ elelo ayɛ,+ oko wakandakolake,+ ndo etena kayoyota wate: ‘Dimi nangaka ndɛ onatshi,’ nɛ dia wɛ nangaka* ndɛ onatshi, wɛ mbeyaka ndɛ onatshi etena tshɛ kalangayɛ.*+ 21 Naka dihole diakasɔnɛ Jehowa Nzambi kayɛ dia nkitsha lokombo lande+ diekɔ etale mangana la yɛ, kete wɛ pombaka ndjaka ngɔmbɛ kayɛ kɛmɔtshi kana ɔkɔkɔ ayɛ ɔmɔtshi wakakosha Jehowa, oko wamomokodjangɛ, ndo wɛ pombaka ndɛ lo esomba* ayɛ etena tshɛ kalangayɛ.* 22 Wɛ kokaka kilɛ oko wakokayɛ ndɛ mboloko la mpele.+ Onto lele mindo ndo onto lele pudipudi kokaka kilɛ. 23 Koko, ɔsa yɛdikɔ ya wolo diaha ndɛ dikila,+ nɛ dia dikila diekɔ lɔsɛnɔ*+ ndo wɛ hahombe ndɛ lɔsɛnɔ* la emunyi. 24 Wɛ hahombe dilɛ. Wɛ pombaka ditshola la nkɛtɛ oko ashi.+ 25 Wɛ hahombe dilɛ, dia awui tshɛ ketɛ dimɛna ndo ndjetɛ anayɛ dimɛna, nɛ dia wɛ ekɔ lo nsala kɛnɛ kele ɔlɔlɔ lo washo wa Jehowa. 26 Kɔshi paka diangɔ di’ekila diele diayɛ ndo elambo wakayatshike dɔkɔlɔkɔ etena kayoyotshɔ lo dihole diayɔsɔna Jehowa. 27 Lɛkɔ kayoyotolambola elambo ayɛ wa lotshumba, emunyi la dikila+ lo elambwelo kaki Jehowa Nzambi kayɛ, ndo dikila di’elambo ayɛ pombaka tshulɔma lo elambwelo+ kaki Jehowa Nzambi kayɛ, koko wɛ mbeyaka ndɛ emunyi.

28 “Nyosale tshɛ dia nkitanyiya awui asɔ tshɛ wamomonyodjangɛ, dia awui mongaka nshi tshɛ dimɛna le nyu ndo le ananyu, nɛ dia nyekɔ lo nsala kɛnɛ kele ɔlɔlɔ ndo dimɛna lo washo wa Jehowa Nzambi kanyu.

29 “Lam’ayolanya Jehowa Nzambi kanyu wedja wayanganyu mbɔsa,+ ko nyu nyodjasɛ lo wodja awɔ, 30 kanyewɔ diaha ntala lo djonga l’ɔkɔngɔ wa vɔ ndanyema oma la ntondo kanyu. Tanyoyambolake dikambo dia tozambizambi tawɔ nyate: ‘Ngande wakatɛmɔlaka wedja akɔ tozambizambi tawɔ? Sho lawɔ tayosala oko vɔ.’+ 31 Tanyosalɛke Jehowa Nzambi kanyu ngasɔ, nɛ dia vɔ wakasalaka weho tshɛ w’akambo wa wɔnɔnyi dikambo dia tozambizambi tawɔ, akambo wele Jehowa akahetshaka. Vɔ wakakome polo lo ntshumba anawɔ w’apami ndo anawɔ wa wamato lo dja dikambo dia tozambizambi tawɔ.+ 32 Kɛnɛ tshɛ kamomonyodjangɛ mbahombanyu nsala tshɛ dia nkitanyiya.+ Tanyahɛke ndo tanyaholake ndooko dui oma lɔkɔ.+

13 “Naka omvutshi ɔmɔtshi kana onto lata akambo wahataye lo tshimbo y’alɔ ambotomba l’atei anyu ko ambonyosha djembetelo mɔtshi kana ambota dui dimɔtshi dia diambo, 2 ko djembetelo yakɔ kana dui dia diambo diakandanyotɛ diambokotshama ndo nde ambota ate: ‘Nyoye toyele tozambizambi tokina,’ tozambizambi takinyu kombeya, ‘ndo totikambe,’ 3 tanyohokamɛke kɛnɛ kata omvutshi ɔsɔ kana ɔmɛnyi w’alɔ ɔsɔ,+ nɛ dia Jehowa Nzambi kanyu ekɔ lo nyohemba+ dia mbeya kana nyu nangaka Jehowa Nzambi kanyu la otema anyu tshɛ ndo la anima* anyu tshɛ.+ 4 Jehowa Nzambi kanyu kahombanyu ndjelaka, nde kahombanyu mboka wɔma, ɛlɛmbɛ ande mbahombanyu kitanyiyaka, dui diande mbahombanyu pokamɛka, nde kahombanyu kambɛka ndo nde kahombanyu mamema.+ 5 Koko omvutshi ɔsɔ kana ɔmɛnyi w’alɔ ɔsɔ pombaka ndjakema,+ nɛ dia nde ambokeketsha anto dia tɔmbɔkwɛ Jehowa Nzambi kanyu lakanyotondja oma lo wodja w’Edjibito ndo lakanyotshungola oma lo luudu la lɔhɔmbɔ dia nyonya oma lo mboka kakanyodjangɛ Jehowa Nzambi kanyu dia nyu nkɛndakɛnda lɔkɔ. Nyu pombaka minya kɛnɛ kele kɔlɔ oma l’atei anyu.+

6 “Naka ɔnanyɔ, otemanyɔ kana ɔnayɛ la pami kana ɔnayɛ la womoto kana wadɛyɛ lokayɛ ngandji efula kana wonyayɛ la suke suke* ambolanga kokotola lo woshɛshɛ, ata ate: ‘Yete totokambe tozambizambi tokina,’+ tozambizambi tele wɛ kana watshɛyɛ kombeya, 7 oma l’atei wa tozambizambi ta anto wonyodingi, oyadi wanɛ wele suke la nyu kana wanɛ wanganyi la nyu etale, oma lo koma nyɛ polo lo koma kina ya wodja, 8 towetawɔke ndo toohokamɛke,+ towokake kandji, towokake kɛtshi ndo towokokɛke. 9 Wɛ pombaka mbodiaka ndooko onyake.+ Lonya layɛ kahomba tɔngɔna dive ntondo dia mbooka ko mbodiaka, oma laasɔ ko anto akina tshɛ l’ɔkɔngɔ.+ 10 Wɛ pombaka mbooka ave polo nde mvɔ,+ nɛ dia nde ambolanga kanganya la Jehowa Nzambi kayɛ lakakotondja oma lo wodja w’Edjibito, oma lo luudu la lɔhɔmbɔ. 11 Oma laasɔ, ase Isariyɛlɛ tshɛ wayoka dui diakɔ, ko wayoka wɔma ndo hawosalaki pondjo dui dia kɔlɔ dia ngasɔ l’atei anyu.+

12 “Naka wɛ amboka wata l’osomba anyu ɔmɔtshi wakakosha Jehowa Nzambi kayɛ dia mbidjasɛ lɔkɔ ɔnɛ: 13 ‘Anto w’anyanya wambotomba oma l’atei anyu dia minganyiya anto wodjashi l’osomba awɔ, wata vate: “Nyoyete totokambe tozambizambi tokina,” tozambizambi takinyu kombeya,’ 14 wɛ pombaka menda dikambo diakɔ, nyangiayangia dimɛna ndo mimbola.+ Naka amboshikikɛma mɛtɛ dia dikambo dia wɔnɔnyi sɔ diakasalema l’atei anyu, 15 kete ndooko onyake wɛ pombaka ndjaka wanɛ wodjashi lo osomba akɔ la lokuwa la ta.+ Kolanya osomba akɔ ndo ɛngɔ tshɛ kele lɔkɔ mbidja ndo dongalonga dia lɔkɔ+ la lokuwa la ta. 16 Oma laasɔ, kotshumanya diangɔ dia dimbo tshɛ dia lɔkɔ l’atei atei wa dihole dia lo sɛkɛ, ko wɛ ntshumba osomba akɔ la dja ndo diangɔ diakɔ dia dimbo oko olambo w’otondo dikambo dia Jehowa Nzambi kayɛ. Vɔ wayonga tota di’elanyelo pondjo. Vɔ hawohombe mbikama nto pondjo. 17 Lonya layɛ halohombe mbɔsa ndooko ɛngɔ kakakitshama laande dia ndanyema,*+ dia Jehowa minya nkɛlɛ kande kadɔdɔ le yɛ ndo dia nde kooka kandji ndo kɛtshi ndo kofudia, oko wakandatshibɛ watshɛyɛ.+ 18 Nɛ dia wɛ pombaka nkitanyiya* Jehowa Nzambi kayɛ lo ndjelaka ɛlɛmbɛ ande tshɛ wamomokodjangɛ ɛlɔ, lo nsala kɛnɛ kele ɔlɔlɔ lo washo wa Jehowa Nzambi+ kayɛ.

14 “Nyu nyekɔ ana wa Jehowa Nzambi kanyu. Tanyoyakɔtake mpota+ ndo tanyonyake divo di’oma l’okoko anyu dia nsala diwandji* dikambo di’onto lambovɔ.+ 2 Nɛ dia nyu nyekɔ wodja+ w’ekila le Jehowa Nzambi kanyu ndo Jehowa akanyɔsɔnɛ dia nyu monga wodja ande, ɛngɔ kande ka laande* oma l’atei wa wedja tshɛ wele la nkɛtɛ.+

3 “Tanyɔlɛke ndooko ɛngɔ kele wɔnɔnyi.+ 4 Nyama nyɛ mbakokanyu ndɛ:+ Ngɔmbɛ, ɔkɔkɔ, mbudi, 5 mpele, mboloko, lofumbɔ, mpambi, nkawe, mangana ndo kuduha. 6 Nyu mbeyaka ndɛ nyama tshɛ kele la losabɔ latɔnyi ndo katɔmɔla. 7 Koko tanyɔlɛke nyama nyɛ yatɔmɔla kana yele la nsabɔ yatɔnyi: Kamɛlɔ, otomba ndo eshidi ka l’ave, nɛ dia yɔ tɔmɔlaka koko yɔ bu la nsabɔ yatɔnyi. Yɔ yekɔ mindo le nyu.+ 8 Ndo nto, tanyɔlɛke nsombo, nɛ dia tɔ kekɔ la losabɔ latɔnyi koko tɔ hatɔmɔla. Tɔ kekɔ mindo le nyu. Tanyɔlɛke emunyi ayɔ ndo tanyonandake edo ayɔ.

9 “L’atei wa diangɔ diasɛna l’ashi, nɛ mbakokanyu ndɛ: Ɛngɔ tshɛ kele la mpakuhaku ndo la mposo, nyu mbeyaka kilɛ.+ 10 Koko tanyɔlɛke ɛngɔ tshɛ kele bu la mpakuhaku ndo la mposo. Tɔ kekɔ mindo le nyu.

11 “Nyu mbeyaka ndɛ fudu tshɛ ka pudipudi. 12 Koko tanyɔlɛke nyɛ: Mpongo, mpongo kanda nse, eke k’odima,+ 13 lɔdi la beela, lɔdi l’odima, woho tshɛ wa lɔdi, 14 woho tshɛ wa dingwangwa, 15 teke, esukula, yembe, woho tshɛ wa djɛla, 16 esukula ka tshitshɛ, esukula k’atoyi etale, ɔkɔndɛkɔndɛ, 17 diata, eke, diɔkɔkɔ, 18 kiombe, woho tshɛ wa yɔnga akoke, momboko ndo lolema. 19 Ditongami tshɛ diele elui elui diele la nsala* diekɔ mindo le nyu. Hanyohombe dilɛ. 20 Nyu koka ndɛ ditongami tshɛ diafumbɔ diele pudipudi.

21 “Tanyɔlɛke nyama tshɛ kambovɔ osena.+ Nyu mbeyaka kisha ɔngɛndangɛnda wodjashi lo esomba* anyu ko nde mbeyaka kilɛ, kana nyu mbeyaka kisondja le ɔngɛndangɛnda. Nɛ dia nyu nyekɔ wodja w’ekila le Jehowa Nzambi kanyu.

“Tokatɛke ɔsɔngɔ wa mbudi lo awɛlɛ+ wa nyangɛtɔ.

22 “Ndooko onyake, wɛ pombaka kimɔka etenyi ka dikumi k’oma lo diangɔ diayɛ tshɛ di’oma l’ekambɔ kayɛ ɔnɔnyi l’ɔnɔnyi.+ 23 Kɔlɛke etenyi ka dikumi k’oma lo ntɔngɔ yayɛ, wanu ayɛ w’eyoyo, esɔ kayɛ ndo ana wa nondo wa ngɔmbɛ kana w’ɛkɔkɔ ayɛ la ntondo ka Jehowa Nzambi kayɛ, lo dihole diayondɔsɔna dia mbidjashiya+ lokombo lande, dia wɛ mbeka woho wa mbokaka Jehowa Nzambi kayɛ wɔma nshi tshɛ.+

24 “Ko naka lɔkɛndɔ lekɔ otale efula le yɛ ndo wɛ bu la akoka wa diɛmba polo lo dihole diayɔsɔna Jehowa Nzambi kayɛ oko dihole dia lokombo+ lande, nɛ dia diɔ diekɔ etale efula mangana la yɛ, (dikambo Jehowa Nzambi kayɛ ayokɔtshɔkɔla), 25 kete wɛ koka disondja ko wɛ nkimɛ falanga yakɔ l’anya, ko wɛ minda lɔkɛndɔ polo lo dihole diayɔsɔna Jehowa Nzambi kayɛ. 26 Oma laasɔ, wɛ mbeyaka tosomba kɛnɛ tshɛ kalangayɛ* la falanga yakɔ, mbuta ate ngɔmbɛ, ɔkɔkɔ, mbudi, vinyɔ ndo wanu akina wadjoya, ndo ɛngɔ tshɛ kalangayɛ,* ko wɛ dilɛ laawɔ la ntondo ka Jehowa Nzambi kayɛ ndo wɛ ngɛnangɛna wɛ la ase luudu layɛ.+ 27 Tonyake ose Lɛwi lodjashi lo esomba+ anyu yimba, nɛ dia nde bu la yema yande kana etenyi k’okitɔ kaamɛ la yɛ.+

28 “Lo ekomelo k’ɛnɔnyi 3 tshɛ, wɛ pombaka mbelaka etenyi ka dikumi k’otondo k’oma lo diangɔ diayɛ dia l’ɔnɔnyi ɔsɔ, ko wɛ kikitsha l’etei ka esomba anyu.+ 29 Oma laasɔ, ose Lɛwi lele bu la yema yande ndo lele bu la etenyi k’okitɔ kaamɛ la yɛ, ɔngɛndangɛnda, ɔna etshike* ndo wadi aki odo lodjashi lo esomba anyu ayoya ndo ayoyɔlɛ ko ndota,+ dia Jehowa Nzambi kanyu nyɔtshɔkɔla lo kɛnɛ tshɛ kasalanyu.+

15 “Lo ekomelo k’ɛnɔnyi 7 tshɛ, wɛ pombaka kimwɛka+ anto abasa. 2 Nganɛ mbayonyokimwanɛka abasa akɔ: Onto tshɛ lokole osekande ayokimwɛka ɔnɛ lokolami. Nde hahombe nɔmba osekande kana ɔnango dia mbɔsɔmbɔlɛ, nɛ dia ɔnɔnyi ɔsɔ wayewoyamaka dia kimwanɛ lo dikambo dia Jehowa.+ 3 Wɛ koka nɔmba ɔngɛndangɛnda+ dia nde kɔsɔmbɔlɛ kɛnɛ kokolaminde, koko wɛ pombaka nkimwɛ ɔnanyɔ kɛnɛ tshɛ kokolaminde. 4 Ndooko onto l’atei anyu layonga ose wola, nɛ dia lo mɛtɛ Jehowa ayonyɔtshɔkɔla+ lo wodja wayanga nyosha Jehowa Nzambi kanyu oko etenyi k’okitɔ, 5 koko paka nyu mbokitanyiyisha tshɛ lo tshɛ dui dia Jehowa Nzambi kanyu ndo nyu mboyedi dimɛna dimɛna wadjango anɛ tshɛ wamomonyosha ɛlɔ.+ 6 Nɛ dia Jehowa Nzambi kanyu ayonyɔtshɔkɔla oko wakandanyolake, ndo nyu nyayɔsɔndja wedja efula diangɔ, koko nyu hanyotonga l’ohomba wa nsɔmba.+ Nyu nyayahemɛ wedja efula, koko vɔ hawotonyahemɛ.+

7 “Naka ɔnangɛnyu ɔmɔtshi aya wola l’atei anyu lo osomba anyu ɔmɔtshi wa lo wodja wayanga nyosha Jehowa Nzambi kanyu, towokeketshɛke otema ndo tongake onyishi le ɔnanyɔ lele ose wola.+ 8 Nɛ dia wɛ pombaka mbokukolɛ lonya+ la lokaho tshɛ ndo lo weho akɔ tshɛ wɛ pombaka mbɔsɔndja kɛnɛ kende l’ohomba ndo kende bu la tɔ. 9 Nyewɔ dia monga la kanyi ya kɔlɔ nyɛ l’etema anyu: ‘Ɔnɔnyi wa 7, ɔnɔnyi wa kimwanɛ abasa wambosukana,’+ ko wɛ ntona dia monga la lokaho otsha le ɔnanyɔ lele ose wola ndo ntona dia mbosha yangɔ. Naka nde ndelɛ Jehowa lo dikambo diayɛ, ɔsɔ ayonga pɛkato le yɛ.+ 10 Wɛ pombaka mbosha+ la lokaho tshɛ ndo tookahɛke la etema ehende, nɛ dia ngasɔ mbayɔtshɔkɔla Jehowa Nzambi kayɛ etsha ayɛ ndo kɛnɛ tshɛ kasalayɛ.+ 11 Nɛ dia ase wola wayongaka nshi tshɛ lo wodja,+ diakɔ diakodjangɛmi nte: ‘Wɛ pombaka nkukola lonya layɛ la lokaho tshɛ otsha le ɔnanyɔ lasowa kana lele ose wola lo wodja ayɛ.’+

12 “Naka ɔnanyɔ ɔmɔtshi, ose Hɛbɛru la pami kana la womoto ambosondjama le yɛ ko ambokokambɛ ɛnɔnyi 6, lo ɔnɔnyi wa 7 wɛ pombaka mbotshungola.+ 13 Ndo naka wɛ pombaka mbotshungola, kete tɔɔkɛndjake anya hwe. 14 La lokaho tshɛ, wɛ pombaka mbosha yangɔ mɔtshi oma lo dongalonga diayɛ, oma lo dihole diayɛ di’esuswelo, oma lo diamula diayɛ di’esɔ kana dia vinyɔ. Woho wambokɔtshɔkɔla Jehowa Nzambi kayɛ kahombayɛ mbosha. 15 Ohɔ dia wɛ aki mfumbe lo wodja w’Edjibito, koko Jehowa Nzambi kayɛ akakotshungola. Diakɔ diakodjangɛmi ɛlɔ dia wɛ nsala ngasɔ.

16 “Ko naka nde ambokotɛ ate: ‘Dimi halange mimɔ oma lakayɛ!’ nɛ dia nde kookaka ngandji wɛ la ase luudu layɛ, dikambo nde akangɛnangɛnaka etena kakinde kaamɛ la yɛ,+ 17 kete wɛ pombaka mbɔsa lowolo la shɔdi ko mbotondola toyi lo lokuke, ko nde ayotshikala mfumbe kayɛ lɔsɛnɔ lande l’otondo. Ngasɔ kahombayɛ salɛ ndo mfumbe kayɛ ka womoto. 18 Tɔsake dia ekɔ dui dia wolo etena kootshungolayɛ ndo kakotshikande, nɛ dia ɛnɔnyi 6 wakandakokambɛ mbɛdima la difuto di’ose olimu ndodia lo 2, ndo Jehowa Nzambi kayɛ akakɔtshɔkɔla lo kɛnɛ tshɛ kakasalema.

19 “Wɛ pombaka nkidia nyama tshɛ kotɔ ntondo oma lo ngɔmbɛ yayɛ kana ɛkɔkɔ ayɛ dikambo dia Jehowa Nzambi kayɛ.+ Wɛ hahombe nkamba ndooko olimu la ngɔmbɛ* kayɛ kotɔ ntondo kana mpembola wɛɔsa w’ɔkɔkɔ ayɛ wotɔ ntondo. 20 Wɛ la ase luudu layɛ pombaka kilɛka la ntondo ka Jehowa Nzambi kayɛ ɔnɔnyi l’ɔnɔnyi lo dihole diayɔsɔna Jehowa.+ 21 Ko naka tɔ kekɔ la ɛkɔmɔ, mbuta ate etshumbe, tshungu kana ɛkɔmɔ kɛmɔtshi ka woke, kete wɛ hahombe kilambola Jehowa Nzambi kayɛ.+ 22 Wɛ pombaka kilɛ lo esomba* anyu. Oyadi onto lele mindo kana onto lele pudipudi kokaka kilɛ, woho watowɔlɛka mboloko kana mpele.+ 23 Koko tɔlɛke dikila diatɔ.+ Wɛ pombaka ditshola la nkɛtɛ oko ashi.+

16 “Kanyohɔke ngɔndɔ ka Abiba* ndo kanyosalake fɛtɛ k’Elekanelo dikambo dia Jehowa Nzambi kanyu,+ nɛ dia lo ngɔndɔ ka Abiba mbakanyotondja Jehowa Nzambi kanyu oma l’Edjibito l’otsho.+ 2 Nyu pombaka nambola olambo w’Elekanelo dikambo dia Jehowa Nzambi kanyu+ oma l’ɛkɔkɔ anyu ndo oma lo ngɔmbɛ+ yanyu lo dihole diayɔsɔna Jehowa dia mbidjashiya+ lokombo lande. 3 Tanyɔlɛke ndooko ɛngɔ kele la wodoya kaamɛ la nyama kakɔ.+ L’edja ka nshi 7, nyayɔlɛka mapa waha la wodoya, mapa wa sui, nɛ dia nyakatombe epatshapatsha oma lo wodja w’Edjibito.+ Kanyosalake dui sɔ edja tshɛ kenyu la lɔsɛnɔ+ dia nyu mbohɔka lushi lakanyatombe oma lo wodja w’Edjibito. 4 Wodoya hawohombe tanema le nyu l’ɛtshi kanyu ka nkɛtɛ k’otondo l’edja ka nshi 7+ ndo ndooko yema ya nyama kayonyolambola la dikɔlɔ dia lushi la ntondo yahomba ntshikala otsho w’otondo polo la pindju.+ 5 Hanyotonga la lotshungɔ la nambola olambo w’Elekanelo lo osomba akɔna tshɛ wayonyosha Jehowa Nzambi kanyu. 6 Koko nyayowolambolaka lo dihole diayɔsɔna Jehowa Nzambi kanyu dia mbidjashiya lokombo lande. Kanyolambolake olambo w’Elekanelo la dikɔlɔ kam’adja wonya,+ l’etena kakashikikɛma kakanyatombe oma l’Edjibito. 7 Kanyookatɛke ndo kanyɔɔlɛke+ lo dihole diayɔsɔna Jehowa Nzambi kanyu,+ ko la pindju nyu mbeyaka nkalola lo mvudu yanyu y’apɛma. 8 Nyayɔlɛka mapa waha la wodoya l’edja ka nshi 6 ndo lushi la 7 ayongaka losanganya la laande dikambo dia Jehowa Nzambi kanyu. Hanyohombe nkamba ndooko olimu.+

9 “Nyu pombaka mbadia mingu 7. Nyayotatɛ mbadia mingu 7 shɔ oma l’etena katatɛnyu mina diangɔ.+ 10 Oma laasɔ, kanyosalake Fɛtɛ ka mingu dikambo dia Jehowa Nzambi+ kanyu la weshasha wa la lolango w’oma l’anya anyu wakimɔnyu lo ndjela woho wanyɔtshɔkɔla Jehowa Nzambi kanyu.+ 11 Kanyɔngɛnangɛnake la ntondo ka Jehowa Nzambi kanyu nyu la ananyu w’apami, ananyu wa wamato, mfumbe yanyu y’apami, mfumbe yanyu ya wamato, ose Lɛwi lodjashi lo esomba* anyu ndo ɔngɛndangɛnda, ɔna etshike* ndo wadi aki odo lodjashi l’atei anyu lo dihole diayɔsɔna Jehowa Nzambi kanyu dia mbidjashiya lokombo lande.+ 12 Kanyohɔ dia nyaki mfumbe l’Edjibito.+ Nyokitanyiyake ndo nyoyelake wadjango asɔ.

13 “Kanyosalake Fɛtɛ ka Totombotombo*+ l’edja ka nshi 7 etena kalɔnganyu diangɔ di’oma lo dihole di’esuswelo ndo oma lo diamula di’esɔ ndo dia wanu. 14 Kanyɔngɛnangɛnake fɛtɛ kanyu,+ nyu la ananyu w’apami, ananyu wa wamato, mfumbe yanyu y’apami, mfumbe yanyu ya wamato, ose Lɛwi, ɔngɛndangɛnda, ɔna etshike ndo wadi aki odo lodjashi lo esomba anyu. 15 L’edja ka nshi 7, kanyosalake fɛtɛ+ dikambo dia Jehowa Nzambi kanyu lo dihole diayɔsɔna Jehowa, nɛ dia Jehowa Nzambi kanyu ayɔtshɔkɔla diangɔ dianyu tshɛ ndo kɛnɛ tshɛ kasalanyu+ ndo nyayongaka paka l’ɔngɛnɔngɛnɔ.+

16 “Mbala 3 l’ɔnɔnyi, apami anyu tshɛ kawɛnamake la ntondo ka Jehowa Nzambi kanyu lo dihole diayondɔsɔna: Lo Fɛtɛ ka mapa waha la wodoya,+ Fɛtɛ ka Mingu+ ndo Fɛtɛ ka Totombotombo.*+ Ndooko onto l’atei awɔ lahomba mɛnama la ntondo ka Jehowa anya hwe. 17 Woshasha wayelaka onto l’onto pombaka monga lo ndjela ɔtshɔkɔ wanyɔtshɔkɔla Jehowa Nzambi kanyu.+

18 “Kanyɔsɔnɛ toshushi+ la topita dikambo dia dioho la dioho lo esomba* anyu tshɛ wayonyosha Jehowa Nzambi kanyu, ko vɔ wayolomboshaka anto la kilombo ka losembwe. 19 Tanyosambolake kilombo ka wɛngɛngɛ,+ tanyongake la shɔnɔdi+ kana nongola etshimba, nɛ dia etshimba ndjihaka washo wa kanga lomba+ ndo mengesolaka ɛtɛkɛta wa kanga losembwe. 20 Losembwe, ɛɛ, losembwe mbahombanyu ndjela+ dia nyu ntshikala la lɔsɛnɔ ndo mbɔsa wodja wayanga nyosha Jehowa Nzambi kanyu.

21 “Tanyokake osongo wa woho akɔna tshɛ oko kimɛta ka l’osongo*+ suke la elambwelo kaki Jehowa Nzambi kanyu kayonyoyasalɛ.

22 “Ndo tanyoyaemɛke kimɛta ka l’ave,+ ɔsɔ ekɔ ɛngɔ kahetsha Jehowa Nzambi kanyu.

17 “Tanyolambolake Jehowa Nzambi kanyu ngɔmbɛ kana ɔkɔkɔ wele la ɛkɔmɔ kana ɛngɔ tshɛ kele la kɔlɔ kɛmɔtshi, nɛ dia ɔsɔ ayonga ɛngɔ ka wɔnɔnyi le Jehowa Nzambi kanyu.+

2 “Tɔshi dia pami kana womoto ɔmɔtshi ambotanema l’atei anyu, lo osomba ɔmɔtshi wayanga nyosha Jehowa Nzambi kanyu, asala kɛnɛ kele kɔlɔ lo washo wa Jehowa Nzambi kanyu ndo ɔnyɔla sheke yande,+ 3 ambotakɔ mboka ndo ɔtɛmɔla tozambizambi tokina, otikusamɛ kana okusamɛ wonya kana ngɔndɔ kana alembe tshɛ wa l’olongo,+ dui diakimi kombidjanga.+ 4 Naka wamboyonyotɛ dikambo sɔ kana nyambodioka, kete nyu pombaka disɛdingola dimɛna dimɛna. Naka amboshikikɛma mɛtɛ+ dia dikambo dia wɔnɔnyi diakasalema lo Isariyɛlɛ, 5 kete nyu pombaka ntondja pami kana womoto lakasale dikambo dia kɔlɔ sɔ l’andja w’osomba, ndo pami kana womoto akɔ pombaka mbokama ave polo ndo nde mvɔ.+ 6 Paka naka ɛmɛnyi 2 kana ɛmɛnyi 3+ wamboshikikɛ* kahomba onto ndjakema. Nde hahombe ndjakema naka ekɔ etelo k’ɔmɛnyi 1 oto.+ 7 Anya w’ɛmɛnyi akɔ mbahomba ntɔngɔna ave ntondo dia mbooka ko mbodiaka, oma laasɔ ko anto akina tshɛ l’ɔkɔngɔ. Nyu pombaka minya kɛnɛ kele kɔlɔ oma l’atei anyu.+

8 “Naka dui dimɔtshi diambotomba lo osomba anyu ɔmɔtshi, dui diele wolo efula le nyu dia dilombosha, oyadi onto ɔmɔtshi akakɛdia dikila+ kana owanu ɔmɔtshi wambotomba kana dui dimɔtshi dia ngala diambosalema, kana ekakatanu ekina, kete nyu pombaka monɛɛ ndo ntshɔ otsha lo dihole diayɔsɔna Jehowa Nzambi kanyu.+ 9 Kanyotshu le ɛlɔmbɛdi w’ase Lɛwi ndo le shushi+ yakamba lo nshi yakɔ, ko nyu towambola, ko vɔ wayonyewoya yɛdikɔ yambɔsama.+ 10 Oma laasɔ, kanyosale akambo lo yoho yɔtɔnɛ la yɛdikɔ yayowonyotɛ oma lo dihole diayɔsɔna Jehowa. Kanyodje yimba dia nsala akambo lo ndjela kɛnɛ tshɛ kayowonyotɛ. 11 Kanyosale akambo lo yoho yɔtɔnɛ la ɛlɛmbɛ wayowonyɛnya ndo lo yoho yɔtɔnɛ la yɛdikɔ yayowonyewoya.+ Tanyotakɔke mboka ka yɛdikɔ yawɔ ko nyu mbɛtɔla lo lonya l’omi kana la lɔmɔsɔ.+ 12 Onto layosala akambo la otako lo ntona dia mpokamɛ ɔlɔmbɛdi wakambɛ Jehowa Nzambi kanyu kana shushi pombaka mvɔ.+ Nyu pombaka minya kɛnɛ kele kɔlɔ oma lo Isariyɛlɛ.+ 13 Ko anto tshɛ wayoka dui diakɔ ko wayoka wɔma ndo hawosalaki akambo la otako nto.+

14 “Lam’ayonyɔtɔ lo wodja wayanga nyosha Jehowa Nzambi kanyu, ko nyambɔsa wodja akɔ ndo nyambodjasɛ lɔkɔ, ko nyambota nyate: ‘Nyɛsɔ toyasɔnɛ nkumekanga dia tɔlɔmbɔla, oko wasalema lo wedja tshɛ wotodingi,’+ 15 l’etena kɛsɔ, paka ɔnɛ layɔsɔna Jehowa Nzambi kanyu+ mbahombanyu mbidja nkumekanga. Nyu pombaka nsɔna ɔnangɛnyu ɔmɔtshi dia monga nkumekanga. Hanyohombe nsɔna ɔngɛndangɛnda ɔnɛ lele bu ɔnangɛnyu. 16 Koko nde hahombe ndjamɔtshɛ mfalasa efula,+ kana nkaloya anto otsha l’Edjibito dia nde nyomokondja mfalasa nkina,+ nɛ dia Jehowa akanyotɛ ate: ‘Hanyohombe pondjo nkalola nto lo mboka kɛnɛ.’ 17 Ndo nde hahombe ntshuka wadi efula, diaha otema ande ndjotakɔ mboka.+ Nde hahombe ndjamɔtshɛ lokema la mfɛsa la paonyi.+ 18 Lam’ayondodjasɛ lo kiti kande ka lowandji lo diolelo diande, nde pombaka ndjasangolɛ dibuku di’Ɛlɛmbɛ ɛnɛ oma lo dibuku* dialama ɛlɔmbɛdi w’ase Lɛwi.+

19 “Nde ayotshikalaka la diɔ ndo nde pombaka diadiaka nshi tshɛ ya lɔsɛnɔ lande,+ dia nde mbeka dia mboka Jehowa Nzambi kande wɔma ndo nkitanyiya ɛtɛkɛta tshɛ wele lo Ɛlɛmbɛ ɛnɛ ndo wadjango anɛ lo nkamba la wɔ.+ 20 Ngasɔ kahandatoyadiya lo otema ande laadiko di’anango ndo kahandatotakɔ mboka k’ɛlɛmbɛ ko ntshɔ lo lonya l’omi kana la lɔmɔsɔ, dia nde ntshikala edja lo lowandji lo diolelo diande, nde l’anande w’apami l’atei w’ase Isariyɛlɛ.

18 “Ɛlɔmbɛdi w’ase Lɛwi, mbuta ate dioho di’otondo di’ase Lɛwi hawotonga la yema yawɔ, kana etenyi kawɔ k’okitɔ kaamɛ la ase Isariyɛlɛ. Vɔ wayɔlɛka elambo watshumbama lo dja dikambo dia Jehowa, wele etenyi kande k’okitɔ.+ 2 Ɔnkɔnɛ, vɔ hawotonga la etenyi k’okitɔ l’atei w’anangɛwɔ. Jehowa kele etenyi kawɔ k’okitɔ, oko wakandawatɛ.

3 “Ɛlɔmbɛdi wayongaka la lotshungɔ la nongola diangɔ nɛ oma le anto: Onto tshɛ layelaka olambo, oyadi ngɔmbɛ kana ɔkɔkɔ, ayoshaka ɔlɔmbɛdi elemba ka lonya, manga ndo dikundju. 4 Kanyowoshake ɛlɔnga w’oma lo diangɔ dianyu dia ntɔngɔ, wanu anyu w’eyoyo, esɔ kanyu ndo wɛɔsa wa ntondo wayonyohembolaka oma lo ɛkɔkɔ anyu.+ 5 Jehowa Nzambi akɔɔsɔnɛ nde l’anande l’atei wa waoho anyu tshɛ dia kambaka nshi tshɛ lo lokombo la Jehowa.+

6 “Ko naka ose Lɛwi ɔmɔtshi ambonɔ oma l’osomba anyu ɔmɔtshi wa lo Isariyɛlɛ, oma lɛnɛ akandadjasɛka,+ ko nde* nangaka ntshɔ lo dihole diambɔsɔna Jehowa,*+ 7 nde kokaka tokamba lɛkɔ lo lokombo la Jehowa Nzambi kande oko anango akina tshɛ, ase Lɛwi wemadi lɛkɔ la ntondo ka Jehowa.+ 8 Nde ayolongolaka yɛdikɔ ya mbo ya ndɛ woho ɔtɔi la wɔ,+ laadiko dia kɛnɛ kakandakondja lo nsondja diangɔ dia watshɛnde.

9 “Lam’ayonyɔtɔ lo wodja wayanga nyosha Jehowa Nzambi kanyu, tanyoyangake dia mbokoya ditshelo dia wɔnɔnyi dia wedja ɛsɔ.+ 10 Onto latshumba ɔnande la pami kana la womoto lo dja+ atotanemake l’atei anyu, oyadi onto lasala diendja,+ onto lasala awui wa maji,+ kanga alɔhɔ,+ kanga dɔka,+ 11 onto lakeleka lɔsɛnɔ l’anto akina la sengi, onto latɛkɛtsha dimu,+ wetshi,+ kana onto latɛkɛta la wanɛ wakavu.+ 12 Nɛ dia onto tshɛ lasala awui asɔ ekɔ wɔnɔnyi le Jehowa, ndo l’ɔtɛ wa ditshelo dia wɔnɔnyi sɔ kayanga mbitshanya Jehowa Nzambi kanyu wedja ɛsɔ oma la ntondo kanyu. 13 Nyu pombaka monga aha l’onongo la ntondo ka Jehowa Nzambi kanyu.+

14 “Nɛ dia wedja ɛnɛ wayanganyu mbɔsa nkɛtɛ yawɔ wakahokamɛka wanɛ wasala awui wa maji+ ndo diendja,+ koko Jehowa Nzambi kanyu hetawɔ dia nyu nsala awui wa ngasɔ. 15 Jehowa Nzambi kanyu ayonyotondjɛ omvutshi wele oko dimi oma l’atei w’anangɛnyu. Nyu pombaka mbohokamɛ.+ 16 Ɔsɔ ekɔ okadimwelo lo kɛnɛ kakanyalɔmbɛ Jehowa Nzambi kanyu la Hɔrɛbɛ lushi lakanyasangana*+ ndo lakanyate nyate: ‘Tototshikake dia sho mpokamɛ dui dia Jehowa Nzambi kaso kana mɛna dja yande ya wolo nyɛ nto diaha sho ndjovɔ.’+ 17 Ko Jehowa akambutɛ ate: ‘Kɛnɛ katawɔ kekɔ dimɛna. 18 Dimi layowatondjɛ omvutshi wele oko wɛ+ oma l’atei w’anangɛwɔ ndo dimi layodja ɛtɛkɛta ami l’onyɔ ande,+ ko nde ayowatɛ kɛnɛ tshɛ kayomowodjangɛ.+ 19 Lo mɛtɛ, dimi layoyokoya la onto tshɛ lahatohokamɛ ɛtɛkɛta ami wayondɔtɛkɛta lo lokombo lami.+

20 “‘Naka omvutshi ɔmɔtshi ambota la otako tshɛ dui dimɔtshi lo lokombo lami diakimi kombotɛ dia mbuta kana ambɔtɛkɛta lo lokombo la tozambizambi tokina, omvutshi ɔsɔ pombaka ndjakema.+ 21 Koko nyu mbeyaka ndjambola l’etema anyu nyate: “Ngande wayoteya dia Jehowa kombuta dui diakɔ?” 22 Naka omvutshi ɔmɔtshi ambɔtɛkɛta lo lokombo la Jehowa, ko dui diakɔ hadiokotshami kana hadiongi mɛtɛ, kete Jehowa kɔtɛkɛta dui sɔ. Omvutshi akɔ kakaditɛkɛta la otako tshɛ. Tanyowokake wɔma.’

19 “Lam’ayolanya Jehowa Nzambi kanyu wedja wakanga nkɛtɛ yayanga nyosha Jehowa Nzambi kanyu, ko nyambaakɔsɔlayɔ ndo nyambodjasɛ lo esomba awɔ la lo mvudu yawɔ,+ 2 kanyokitsha esomba 3 laande l’atei atei wa wodja anyu wayanga nyosha Jehowa Nzambi kanyu.+ 3 Kanyokahanya ɛtshi ka nkɛtɛ ka wodja wayonyosha Jehowa lo 3 ndo kanyɔlɔngɔsɔlɛ mboka dia ondjakanyi ndawɔka otsha l’osomba ɔmɔtshi l’atei w’esomba akɔ.

4 Nganɛ mbahomba akambo salemaka lo kɛnɛ kendana la ondjakanyi walawɔ lɛkɔ dia nde ntshikala la lɔsɛnɔ: Naka nde akakɔmɔla osekande onto aha la okonda ndo nde kombohetshaka ntondo,+ 5 kana naka nde akatshu la osekande onto lo okonda dia tona nkunyi, ko nde ambonyiya lonya lande dia nkɔta osongo la shɔka, ko ɛsɛlɛngɛ kambongɔ oma lo wenyi ndo kambɔkɔmɔla osekande onto, ko osekande ambovɔ, ondjakanyi pombaka ndawɔ otsha l’osomba ɔmɔtshi wa lo esomba ɛsɔ dia nde ntshikala la lɔsɛnɔ.+ 6 Naka aha ngasɔ, kete la nkɛlɛ tshɛ,* ɔsɔmbɔyishi wa dikila+ mbeyaka mbitshanya ondjakanyi ɔsɔ ko nde towonda ndo mbodiaka, nɛ dia osomba akɔ wamboleka etale. Koko nde hakoke ndjakema, nɛ dia nde kopetshaka osekande onto ntondo.+ 7 Diakɔ diamomonyodjangɛ nte: ‘Nyokitsha esomba 3 laande.’

8 “Naka Jehowa Nzambi kanyu ambonyonunyɛ ɛtshi kanyu ka nkɛtɛ oko wakandatshibɛ watshɛnyu,+ ndo nde ambonyosha wodja w’otondo wakandalake dia mbisha watshɛnyu,+ 9 nɛ dia nyekɔ lo nkitanyiya la kɔlamelo tshɛ ɛlɛmbɛ ɛnɛ tshɛ wamomonyosha ɛlɔ, dia nanga Jehowa Nzambi kanyu ndo dia kɛndakɛndaka nshi tshɛ lo mboka yande,+ kete nyu pombaka nkotsha esomba ekina 3 laadiko dia wɛnɛ 3.+ 10 Ngasɔ mbahatɔkɛla dikila di’onto laha la onongo+ lo wodja anyu wayanga nyosha Jehowa Nzambi kanyu oko etenyi k’okitɔ ndo mbahanyatonga la onongo wa dikila.+

11 “Ko naka pami kɛmɔtshi akahetshaka osekande onto+ ndo nde akawangemɛ dia mbɔlɔsha, ko nde amboohomuya* wolo ndo onto akɔ ambovɔ, ko pami kakɔ ambolawɔ l’osomba ɔmɔtshi l’atei w’esomba ɛsɔ, 12 dikumanyi dia l’osomba ande pombaka mbeelɛ oma lɛkɔ, ko vɔ mbokimɔ lo anya w’ɔsɔmbɔyishi wa dikila, ndo nde pombaka ndjakema.+ 13 Nyu* hanyohombe mbooka kɛtshi ndo nyu pombaka minya onongo wa dikila di’onto laha la onongo oma l’Isariyɛlɛ+ dia awui mongaka dimɛna le nyu.

14 “Lam’ayoyolongola etenyi kayɛ k’okitɔ lo nkɛtɛ yayanga kosha Jehowa Nzambi kayɛ, tɔsɛkɔlake olelo+ w’osukanyi ayɛ oma lo dihole diakatadjisha watshɛyɛ olelo.

15 “Ɔmɛnyi 1 oto hakoke nshikikɛ* kɔlɔ kana pɛkato kakasale onto okina.+ Paka ɛmɛnyi 2 kana ɛmɛnyi 3 wambota* kahomba dikambo shikikɛma.+ 16 Naka ɔmɛnyi wa kashi ambota dui dimɔtshi lo dikambo di’onto ɔmɔtshi ndo amboohindɛ onongo,+ 17 anto akɔ 2 wakakatana pombaka memala la ntondo ka Jehowa, la ntondo ka ɛlɔmbɛdi ndo ka toshushi tayokambaka lo nshi shɔ.+ 18 Toshushi kawoyangeyange dimɛna,+ ndo naka onto lakate dikambo diakɔ ekɔ ɔmɛnyi wa kashi ndo nde akahindɛ ɔnango onongo, 19 kete nyu pombaka mbosalɛ kɛnɛ kakandakongɛ dia salɛ ɔnango+ ndo nyu pombaka minya kɛnɛ kele kɔlɔ oma l’atei anyu.+ 20 Wanɛ watshikala wayoka dikambo diakɔ ndo wayoka wɔma, ko vɔ hawosalaki pondjo dui dia ngasɔ l’atei anyu.+ 21 Nyu* hanyohombe mbooka kɛtshi:+ Lɔsɛnɔ* lo lɔsɛnɔ,* sso lo sso, nnu lo nnu, lonya lo lonya, lokolo lo lokolo.+

20 “Naka nyambotshɔ lo ta dia tɔlɔsha atunyi anyu ndo nyambɛna dia mfalasa yawɔ, pusupusu yawɔ ndo asɔlayi awɔ nyoleka efula, tanyowaokake wɔma, nɛ dia Jehowa Nzambi kanyu lakanyotondja oma lo wodja w’Edjibito ekɔ kaamɛ la nyu.+ 2 Lam’ayonyolangaka ntshɔ lo ta, ɔlɔmbɛdi pombaka nsukana ko nde nsawola l’anto.+ 3 Nde pombaka mbatɛ ate: ‘Isariyɛlɛ le, nyohokame, nyayanga tɔlɔsha atunyi anyu. Tanyatɛke asolo, tanyokake wɔma, tanyodidimake ndo tanyosakake lokomba l’ɔtɛ awɔ, 4 nɛ dia Jehowa Nzambi kanyu ekɔ lo takɛndakɛnda kaamɛ la nyu dia ndɔsha atunyi anyu ndo nyoshimbɛ.’+

5 “Topita lawɔ pombaka mbutɛ anto vate: ‘Onto akɔna amboka luudu l’oyoyo ko atatatɛ mbidjasɛ lɔkɔ? Nde akalole lo luudu lande. Naka aha ngasɔ, kete nde mbeyaka tovɔ lo ta, ko onto okina ndjotatɛ mbidjasɛ lɔkɔ. 6 Onto akɔna akakambe ekambɔ ka vinyɔ ko atatatɛ mimba elowa w’oma lɔkɔ? Nde atshu, akalole lo luudu lande. Naka aha ngasɔ, kete nde mbeyaka tovɔ lo ta, ko onto okina ndjomba elowa w’oma lɔkɔ. 7 Onto akɔna ambambɛ womoto ko nde atawotshuke? Nde atshu, akalole lo luudu lande.+ Naka aha ngasɔ, kete nde mbeyaka tovɔ lo ta, ko pami kekina ndjootshuka.’ 8 Topita pombaka mimbola nto vate: ‘Onto akɔna ele la wɔma ndo atɛ asolo?+ Nde akalole lo luudu lande diaha nde ndjokonya anango dia vɔ lawɔ mbatɛ asolo oko nde.’*+ 9 Lam’ayoshidiya topita nsawola l’anto, vɔ wayɔsɔna ewandji w’asɔlayi dia nɔmbɔla anto.

10 “Naka nyambosukana la osomba ɔmɔtshi dia mbɔlɔsha, nyu pombaka nto mbeewoya kɛnɛ kahombama dia mbidja ki.+ 11 Naka vɔ wambonyosha okadimwelo wa mbidja ki ndo wambonyodiholɛ mboka, kete anto tshɛ watanema lɛkɔ wayonga anto anyu dia nyu mbakandjaka elimu la wolo ndo vɔ wayonyokambɛka.+ 12 Ko naka vɔ wambotona dia mbidja ki la nyu, ndo wamboya dia ndjɔlɔ la nyu, nyu pombaka dinga osomba akɔ, 13 ko ndooko onyake, Jehowa Nzambi kanyu ayowokimɔ l’anya anyu ndo nyu pombaka ndjaka pami tshɛ ka lɔkɔ la lokuwa la ta. 14 Koko wamato, ana, dongalonga ndo ɛngɔ tshɛ kele lo osomba, mbuta ate diangɔ dia dimbo tshɛ, nyu mbeyaka diɔsa dikambo dianyu,+ ndo nyayɔlɛ diangɔ dia dimbo dia atunyi anyu, wanɛ wele Jehowa Nzambi kanyu ambaakimɔ l’anya anyu.+

15 “Kɛsɔ mbayonyosalɛ esomba tshɛ wanganyi etale la nyu, esomba wele bu l’atei w’esomba wa lo wedja wele suke. 16 Koko lo esomba w’anto asɔ wayanga nyosha Jehowa Nzambi kanyu oko etenyi k’okitɔ, hanyohombe ntshika ndooko ɛngɔ kahɛnga la lɔsɛnɔ.+ 17 Nyu pombaka dilanya tshɛ lo tshɛ, ase Hiti, ase Amɔra, ase Kanana, ase Perizi, ase Hivi ndo ase Jɛbusɛ,+ oko wakanyodjangɛ Jehowa Nzambi kanyu, 18 diaha vɔ ndjonyetsha dia ndjela mbekelo yawɔ tshɛ ya wɔnɔnyi yasalawɔ dikambo dia tozambizambi tawɔ, ko vɔ ndjonyokonya lo salɛ Jehowa Nzambi kanyu pɛkato.+

19 “Naka nyambodinga osomba ɔmɔtshi dia mbowɔsa ndo l’ɔkɔngɔ wa mbɔlɔsha l’edja ka nshi efula, tanyolanyake esongo wa lɔkɔ lo mbakɔta la shɔka. Nyu mbeyaka ndɛ elowa w’oma lɔkɔ, koko hanyohombe mbakɔta.+ Onde nyayodinga osongo wa l’ekambɔ oko watowodingaka onto? 20 Paka osongo weyanyu dia hawɔtɔ elowa mbakokanyu ndanya. Nyu koka mbɔkɔta ndo nkamba la wɔ dia dinga osomba walanga nyɔlɔsha polo lam’ayɔkɔ osomba akɔ.

21 “Naka nyambotana onto ɔmɔtshi akadiakema lo oswe ɔmɔtshi wa lo wodja wayanga nyosha Jehowa Nzambi kanyu, ko onto lakoodiake heyama, 2 kete dikumanyi dianyu ndo toshushi+ pombaka ntshɔ dia tɛdika etale kanganyi odo akɔ la esomba woodingi. 3 Oma laasɔ, dikumanyi diele l’osomba woleki nsukana la odo pombaka mbɔsa ɔsɔngɔ wa ngɔmbɛ oma lo ngɔmbɛ yahawatakandjaka olimu ndo yahawatakelekaka osembe, 4 ko dikumanyi dia l’osomba akɔ ntɔla ɔsɔngɔ akɔ wa ngɔmbɛ otsha l’okidi wele la ashi wakɛla, lɛnɛ ele anto watakambaka kana watonɛka woho, ndo vɔ pombaka mbɔkɔla nkingo k’ɔsɔngɔ akɔ wa ngɔmbɛ l’okidi akɔ.+

5 “Ɛlɔmbɛdi, ase Lɛwi wayosukana, nɛ dia Jehowa Nzambi kanyu akaasɔnɛ dia mbokambɛka+ ndo dia tshɔkɔlaka anto lo lokombo la Jehowa.+ Vɔ wayotaka woho wahomba kandɔma owanu tshɛ wendana la akambo wa ngala.+ 6 Oma laasɔ, dikumanyi tshɛ dia l’osomba woleki suke la odo pombaka nsola anya awɔ+ laadiko di’ɔsɔngɔ akɔ wa ngɔmbɛ wakɔkɔmi nkingo l’okidi, 7 ko vɔ wayota vate: ‘Anya aso kɔkɛdia dikila nɛ ndo washo aso kɔmɛna ɔnɛ lakadikɛdia. 8 Jehowa le, tɛndjake Isariyɛlɛ wodja ayɛ wakayatshungola+ onongo ndo tetawɔke dia onongo wa dikila di’onto laha la onongo ntshikala l’atei wa wodja ayɛ w’Isariyɛlɛ.’+ Ko vɔ hawotonga la onongo wa dikila. 9 Ngasɔ mbayonyonya onongo wa dikila di’onto laha la onongo oma l’atei anyu, lo nsala kɛnɛ kele ɔlɔlɔ lo washo wa Jehowa.

10 “Naka nyambotshɔ lo ta dia tɔlɔsha atunyi anyu, ko Jehowa Nzambi kanyu ambonyɔlɛndjɛwɔ ndo nyambowanda mfumbe,+ 11 ko wɛ ambɛna womoto l’olangala l’atei wa mfumbe yakɔ, ambookombola ndo ambolanga mbotshuka, 12 wɛ mbeyaka mbɔtɔla lo luudu layɛ. Oma laasɔ, nde pombaka minya divo dia l’ɔtɛ ande ndo nkala yande. 13 Nde pombaka nkolola ahɔndɔ ande wa mfumbe ko nde mbidjasɛ lo luudu layɛ. Nde ayolela she la nyango ngɔndɔ k’otondo,+ l’ɔkɔngɔ wa laasɔ, wɛ mbeyaka ndjeyana la nde. Wɛ ayonga omɛnde ndo nde ayonga wadɛyɛ. 14 Ko naka wɛ hayowɔngɛnangɛna, kete wɛ pombaka mbokimɔ dia nde ntshɔ+ lɛnɛ alangande.* Koko wɛ hakoke mbosondja la falanga kana mbosalɛ akambo l’esehe, nɛ dia wɛ ambowosha nsɔnyi.

15 “Naka pami kɛmɔtshi ekɔ la wadi 2, ko nde nangaka ɔmɔtshi oleki okina* ndo vɔ akɔ 2 wakote la nde, ko womoto lahandaleke nanga+ kakote ɔna l’enondo, 16 lushi layondosha anande etenyi kawɔ k’okitɔ, nde hahombe mbɔsa kɛnɛ kotondosha ɔna aki womoto lahandaleke nanga lele enondo, ko nde mbisha ɔna aki womoto lalekande nanga. 17 Nde pombaka mbetawɔ ɔna aki womoto lahandaleke nanga lele enondo lo mbosha yɛdikɔ ya ɛngɔ tshɛ kele la nde ndodia lo 2, nɛ dia nde kele etatelo ka wolo ande wa diwutshi. Nde kele la lotshungɔ la ɔna enondo.+

18 “Naka onto ɔmɔtshi ekɔ la ɔna l’ɔtɛ wolo, ɔtɔmbɔki ndo lahakitanyiya she kana nyango,+ ko vɔ wambohemba mbongola koko ɔnakɔ hawaokɛ,+ 19 kete she la nyango pombaka mbɔɔsa ko mbɔtɔla le dikumanyi la soko di’osomba, 20 ko vɔ mbutɛ dikumanyi dia l’osomba awɔ vate: ‘Ɔnaso ɔnɛ ekɔ ɔtɛ wolo, ɔtɔmbɔki ndo nde halange tokitanyiya. Nde ekɔ lɔtɔmɔ+ ndo ombidjɔki.’+ 21 Oma laasɔ, apami tshɛ wa l’osomba akɔ pombaka mbooka ave polo nde mvɔ. Ngasɔ mbahombanyu minya kɛnɛ kele kɔlɔ oma l’atei anyu, ko ase Isariyɛlɛ tshɛ wayoka dui diakɔ ko wayoka wɔma.+

22 “Naka onto ɔmɔtshi ambosala pɛkato kakoka mbofundɛ nyɔi,+ ko nde ambodiakema ndo nyamboohanɛ l’otamba,+ 23 odo ande hawohombe ntshikala l’otamba+ otsho w’otondo. Nyu pombaka nsala tshɛ dia mbokundɛ ko lushi lakɔ, nɛ dia ɔnɛ lambohanema l’otamba ekɔ ɛngɔ ka mananu le Nzambi+ ndo hanyohombe mbidja wodja anyu mindo, wodja wayanga nyosha Jehowa Nzambi kanyu oko etenyi k’okitɔ.+

22 “Naka wɛ ambɛna ngɔmbɛ k’ɔnanyɔ kana ɔkɔkɔ ande watekekɔ, towonyake yimba la okonda.+ Wɛ pombaka mɛtɛ mbokaloya le ɔnanyɔ. 2 Ko naka ɔnanyɔ hadjashi suke la yɛ kana wɛ haweye, kete wɛ pombaka ntshɔ la nyama kakɔ lo luudu layɛ, ko wɛ ntshikala la tɔ polo lam’ayokiyanga ɔnanyɔ. Oma laasɔ, wɛ pombaka kikaloya le nde.+ 3 Ngasɔ kahombayɛ nsala la mponda kande, dihɔndɔ diande ndo ɛngɔ tshɛ kayoshisha ɔnanyɔ ko wɛ ambokiɛna. Wɛ hahombe kinya yimba.

4 “Naka wɛ ambɛna mponda kana ngɔmbɛ k’ɔnanyɔ kambɔkɔ lo mboka, wɛ hahombe kinya yimba la okonda. Wɛ pombaka mɛtɛ mbokimanyiya dia monyiya nyama kakɔ.+

5 “Womoto hahombe ndɔta dihɔndɔ dia pami ndo pami hahombe ndɔta dihɔndɔ dia womoto. Nɛ dia onto tshɛ lasala ngasɔ ekɔ wɔnɔnyi le Jehowa Nzambi kanyu.

6 “Naka wɛ ambotana kefu kɛmɔtshi l’omamu a mboka kele la ana wa tofudu kana ekele, oyadi lo osongo kana la nkɛtɛ, ko onyango mbakukumɛ kana mbidama ekele, tɔsake onyango kaamɛ la ana atɔ.+ 7 Kokimɔ onyango ko wɛ mbɔsa ana. Kosalake ngasɔ dia akambo mbeta dimɛna le yɛ, ko wɛ ayɔsɛna edja.

8 “Naka wɛ amboka luudu l’oyoyo, kodje ndo lokombo lo ɔtɛ wa luudu,*+ diaha wɛ mbela onongo wa dikila lo luudu layɛ, nɛ dia onto ɔmɔtshi mbeyaka nkɔ oma lɛkɔ.

9 “Tonɛke weho wa diangɔ 2 lo ekambɔ kayɛ ka vinyɔ.+ Naka aha ngasɔ, kete diangɔ tshɛ diayotomba oma lo kɛnɛ kakayonɛ, mbidja ndo diangɔ di’oma l’ekambɔ kayɛ ka vinyɔ diayɔtɔlama lo tɛmpɛlɔ k’ekila.

10 “Tokelekake ngɔmbɛ la mponda dia yɔ nkamba kaamɛ.+

11 “Tɔlɔtake dihɔndɔ diakasalema la wɛɔsa wa nyama wɔsɔhanyemi la linɛnɛ.+

12 “Kodjake tofufɔ lo atshuku 4 wa dihɔndɔ diayoyɔlɔtaka.+

13 “Naka pami ambotshuka wadi ndo ambeyana la nde, ko oma laasɔ nde amboohetsha* 14 ndo owofunda dia nde ekɔ la lɔkɛwɔ la kɔlɔ ndo ambolanya lokombo lande lo mbuta ate: ‘Dimi lakatshuke womoto ɔnɛ, koko lam’akameyana la nde, dimi kɔmɛna ndooko djembetelo yakɛnya dia nde aki emuma,’ 15 kete she la nyango womoto akɔ pombaka ntondja djembetelo yɛnya dia womoto akɔ aki emuma le dikumanyi diele la soko di’osomba. 16 She womoto akɔ ayotɛ dikumanyi ate: ‘Dimi lakatshukanya ɔnami le pami kɛnɛ, koko nde owohetsha* 17 ndo owofunda dia nde ekɔ la lɔkɛwɔ la kɔlɔ lo mbuta ɔnɛ: “Lamboyɛna dia ndooko kɛnya dia ɔnayɛ aki emuma.” Laasɔ djembetelo yɛnya dia ɔnami aki emuma yɔ nyɛ.’ Oma laasɔ, vɔ wayosandjola dihɔndɔ la ntondo ka dikumanyi dia l’osomba. 18 Dikumanyi dia l’osomba+ wayɔsa pami kakɔ ndo wayowosha dilanya.+ 19 Vɔ wayowodja kibawo ka tɔshɛkɛlɛ* 100 ta mfɛsa ndo nde ayotisha she womoto akɔ, nɛ dia pami kɛsɔ ambɔnyɔla emuma k’ose Isariyɛlɛ,+ ndo womoto akɔ ayotetemala monga wadɛnde. Nde hatonga la lotshungɔ la ndjaka diwala la womoto akɔ edja tshɛ kekende la lɔsɛnɔ.

20 “Ko naka kɛnɛ koofundande kekɔ mɛtɛ ndo ndooko djembetelo yɛnya dia womoto akɔ aki emuma, 21 kete vɔ pombaka ntɔla womoto akɔ la soko dia luudu la she, ko apami wa l’osomba mbooka ave polo nde mvɔ, nɛ dia nde akasale dui dia nsɔnyi+ lo Isariyɛlɛ lo nsala awui wa mindo wa dieyanelo* lo luudu la she.+ Ngasɔ mbayonyonya kɛnɛ kele kɔlɔ oma l’atei anyu.+

22 “Naka wambonda pami kɛmɔtshi etami la wadi a kana, vɔ akɔ 2, mbuta ate pami kaketami la womoto ndo womoto akɔ pombaka mvɔ.+ Ngasɔ mbayonyonya kɛnɛ kele kɔlɔ oma l’Isariyɛlɛ.

23 “Naka osekaseka w’emuma ambambemɛ le pami kɛmɔtshi, ko pami kekina ambohomana la nde lo osomba ndo ambetama la nde, 24 nyu pombaka mbatondja vɔ akɔ 2 l’andja w’osomba ko nyu mbaoka ave polo ndo vɔ mvɔ. Womoto ayovɔ nɛ dia nde kombida ekoko lo osomba ndo pami ayovɔ nɛ dia nde ambosha wadi aki osekande nsɔnyi.+ Ngasɔ mbayonyonya kɛnɛ kele kɔlɔ oma l’atei anyu.

25 “Ko naka pami kakɔ ambohomana lo okonda la womoto lakambemɛ ko pami kakɔ mbooleka wolo ndo ambetama la nde, pami kaketami la nde kahomba mvɔ ndamɛ, 26 ndo hanyohombe salɛ womoto ndooko dui. Womoto akɔ hasadi pɛkato kahombande mvɔ. Dui sɔ di’ekɔ oko etena kalɔsha pami kɛmɔtshi osekande ko amboodiaka.*+ 27 Nɛ dia nde akahomanyi la nde lo okonda ndo womoto lakambemɛ akadi ekoko, koko ndooko onto lakakoki mbotshungola.

28 “Naka pami kɛmɔtshi ambohomana la osekaseka w’emuma wahatambemɛ ko nde ambowonda ndo ambetama la nde, ko wambowanda,+ 29 pami kaketami la womoto akɔ pombaka mbisha she womoto tɔshɛkɛlɛ 50 ta mfɛsa, ko womoto akɔ ayonga wadɛnde.+ Lam’ele nde ambowosha nsɔnyi, nde hatonga la lotshungɔ la ndjaka diwala la womoto akɔ edja tshɛ kekende la lɔsɛnɔ.

30 “Ndooko pami kahomba mbɔsa wadi a she, diaha nde mbisha she nsɔnyi.*+

23 “Ndooko pami kakawatongola lo minola tokundju kana kakawahembola demba dia pami kakoka mbɔtɔ lo etshumanelo ka Jehowa.+

2 “Ndooko ɔna la lo loseka lakoka mbɔtɔ lo etshumanelo ka Jehowa.+ Polo lo lɔlɔnga la 10, ndooko kanula yande yakoka mbɔtɔ lo etshumanelo ka Jehowa.

3 “Ndooko ose Amɔna kana ose Mɔaba lakoka mbɔtɔ lo etshumanelo ka Jehowa.+ Polo lo lɔlɔnga la 10, tokanula tawɔ hawɔtɔki pondjo lo etshumanelo ka Jehowa, 4 nɛ dia vɔ konyokimanyiya la mbo ya ndɛ ndo la ashi lam’akanyayatombaka oma l’Edjibito+ ndo nɛ dia vɔ wakanyotomɛ Balama ɔna Beɔrɛ oma la Pɛtɔrɛ ka la Mezɔpɔtamiya dia ndjonyodja mananu.*+ 5 Koko Jehowa Nzambi kanyu kopokamɛ Balama.+ Jehowa Nzambi kanyu akakadimola mananu ɔtshɔkɔ le nyu,+ nɛ dia Jehowa Nzambi kanyu akanyolangaka.+ 6 Tanyaakombolɛke pondjo lokolo l’ɔlɔ ndo ɔngɔnyi lo nshi yanyu tshɛ.+

7 “Tanyohetshake ase Ɛdɔmɛ, nɛ dia vɔ wekɔ anangɛnyu.+

“Tanyohetshake ase Edjibito, nɛ dia nyu nyaki angɛndangɛnda lo wodja awɔ.+ 8 Lɔlɔnga la 3 la ana wayowota mbeyaka mbɔtɔ lo etshumanelo ka Jehowa.

9 “Lam’ayonyokaka mpango kanyu dihole dimɔtshi dia ndɔsha atunyi anyu, kanyewɔ dui tshɛ dia kɔlɔ.*+ 10 Naka pami kɛmɔtshi amboyadja mindo l’ɔtɛ w’ɛkɛlɛlɔ kɛmɔtshi kakasalemi l’otsho,+ nde pombaka ntomba l’andja wa mpango ndo nde hahombe nkalola lo mpango. 11 La dikɔlɔ, nde pombaka mbɔka ndo oma laasɔ kakokande ndjokalola lo mpango lo ɛɔtwɛlɔ ka wonya.+ 12 Kanyoyalake la dihole dia wɛtɔ* l’andja wa mpango ndo kanyotshɔke lɛkɔ. 13 Kanyɛmbake ndo okeke kaamɛ la dihomɔ dianyu. Etena kayonyolangaka nnɔ tumi, kanyotshimake difuku la wɔ, ko nyu nkundɛ tumi tanyu. 14 Nɛ dia Jehowa Nzambi kanyu mbetetaka lo mpango kanyu+ dia nyotshungola ndo dia nkimɔ atunyi anyu lo anya anyu, ɔnkɔnɛ mpango kanyu pombaka monga ekila+ diaha nde mɛna ɛngɔ kɛmɔtshi ka kɔlɔ le nyu, ko nde ndjomɔ oma l’atei anyu.

15 “Naka mfumbe kɛmɔtshi ambolawɔ oma le nkumɛnde ko amboya le yɛ, tookimɔke lo anya wa nkumɛnde. 16 Nde kokaka mbidjasɛ kaamɛ la yɛ lo dihole tshɛ diayondɔsɔna l’osomba anyu ɔmɔtshi lɛnɛ alangande. Towɛngiyake.+

17 “Ndooko ɔna womoto la l’Isariyɛlɛ lakoka monga numba ka lo tɛmpɛlɔ+ ndo ndooko ɔna pami la l’Isariyɛlɛ lakoka monga numba ka lo tɛmpɛlɔ.+ 18 Tanyelake kɛnɛ kakawatshinde womoto la numba kana kɛnɛ kakawatshinde* pami ka numba* lo luudu la Jehowa Nzambi kanyu dia nkotsha dɔkɔlɔkɔ dianyu, nɛ dia diangɔ sɔ diekɔ wɔnɔnyi le Jehowa Nzambi kanyu.

19 “Tanyofutshake anangɛnyu diangɔ la wahɔ,+ oyadi wahɔ wa falanga, wa mbo ya ndɛ kana wa ɛngɔ tshɛ kakokawɔ mfutsha la wahɔ. 20 Nyu mbeyaka mfutsha ɔngɛndangɛnda la wahɔ,+ koko hanyohombe mfutsha anangɛnyu la wahɔ+ dia Jehowa Nzambi kanyu nyɔtshɔkɔla lo akambo anyu tshɛ lo wodja wayanganyu mbɔsa.+

21 “Naka wɛ ambotshika dɔkɔlɔkɔ le Jehowa Nzambi kayɛ,+ totshimbatshimbake dia dikotsha.+ Nɛ dia ndooko onyake Jehowa Nzambi kayɛ ayokɔlɔmbadiɔ. Naka aha ngasɔ, kete ɔsɔ ayonga tshondo ya pɛkato le yɛ.+ 22 Ko naka wɛ hatshiki dɔkɔlɔkɔ, kete wɛ hatonga la onongo wa pɛkato.+ 23 Kokotshake ɛtɛkɛta w’oma lo ɛlɔmɔ ayɛ+ ndo kokotshake kɛnɛ kakayatshike dɔkɔlɔkɔ oma lo onyɔ ayɛ oko woshasha wa la lolango dikambo dia Jehowa Nzambi kayɛ.+

24 “Naka wɛ ambɔtɔ lo ekambɔ ka vinyɔ ka wonyayɛ, wɛ kokaka ndɛ elowa polo lam’ayoshila mposa kayɛ,* koko todjake lo ɛngɔ dia mɛmba.+

25 “Naka wɛ ambotshɔ lo ekambɔ ka wonyayɛ kewɔ watane, wɛ mbeyaka mpatola washa la lonya, koko wɛ hahombe mina la lokuwa l’ekambɔ ka wonyayɛ.+

24 “Naka pami ambotshuka womoto ɔmɔtshi ko nde hayowɔngɛnangɛna nɛ dia nde ambɛna dui dimɔtshi dia kɔlɔ le womoto akɔ, nde pombaka mbofundɛ mukanda w’odiakelo wa diwala+ ko nde mboshawɔ ndo nde mbotondja oma lo luudu lande.+ 2 L’ɔkɔngɔ wa womoto akɔ ntomba oma lo luudu la omɛnde, nde koka ntshɔ ko totshukama le pami kekina.+ 3 Naka pami ka 2 amboohetsha* ndo amboofundɛ mukanda w’odiakelo wa diwala, ambowoshawɔ ndo ambootondja oma lo luudu lande, kana naka pami ka 2 kamboyootshuka ambovɔ, 4 omɛnde la ntondo lakawotshanya hatonga la lotshungɔ la mbɔɔsa nto oko wadɛnde l’ɔkɔngɔ wa womoto akɔ ndjadja mindo, nɛ dia ɔsɔ ekɔ dikambo dia wɔnɔnyi le Jehowa. Hanyohombe mbela pɛkato lo wodja wayanga nyosha Jehowa Nzambi kanyu oko etenyi k’okitɔ.

5 “Naka pami kɛmɔtshi eke katshuka, nde hahombe nkamba olimu w’ɔsɔlayi kana nongola ɛkɛndɛ ekina tshɛ. Nde hatosala akambo asɔ l’edja k’ɔnɔnyi 1 ndo nde ayotshikala la ngelo dia ngɛnyangɛnya wadɛnde.+

6 “Ndooko onto lahomba mbɔsa ɔhɛlɔ wa la anya kana dive di’ɔhɛlɔ dia la diko oko ɔkɔlɛ,+ nɛ dia ɔsɔ ayonga oko onto lɔsa ɛngɔ kasɛnya* onto oko ɔkɔlɛ.

7 “Naka wamboshola ose Isariyɛlɛ ɔmɔtshi lakande ɔnango dia ntshɔ la nde la wolo ko nde ambɔɔhɛnyahɛnya ndo amboosondja,+ kete ɔnɛ lakande onto la wolo pombaka mvɔ.+ Nyu pombaka minya kɛnɛ kele kɔlɔ oma l’atei anyu.+

8 “Naka onto ɔmɔtshi ekɔ la hemɔ ka sudi* kambotondɔ, nyu pombaka monga la yambalo y’efula dia nsala akambo lo ndjela kɛnɛ tshɛ kayonyotɛ ɛlɔmbɛdi w’ase Lɛwi.+ Kanyodje yimba dia nsala akambo tshɛ oko wakamawadjangɛ. 9 Kanyohɔke kɛnɛ kakasalɛ Jehowa Nzambi kanyu Miriyama lo mboka lam’akanyayatombaka oma l’Edjibito.+

10 “Naka wɛ ambɔsɔndja wonyayɛ ɛngɔ kɛmɔtshi,+ tɔtɔke lo luudu lande dia mbɔsa ɛngɔ kakandate dia nkimɔ oko ɔkɔlɛ. 11 Wɛ pombaka memala l’andja ndo ɔnɛ lakasɔmbɛ pombaka kela kɛnɛ kahombande nkimɔ oko ɔkɔlɛ l’andja. 12 Naka onto akɔ ekɔ lo dihombo, kete wɛ hahombe ndala la kɛnɛ kakandakimwe oko ɔkɔlɛ lakayɛ.+ 13 Lo weho akɔ tshɛ wɛ pombaka mbokaloya kɛnɛ kakandakimwe oko ɔkɔlɛ kam’adja wonya, ko nde ayolala la dihɔndɔ diande+ ndo nde ayokɔtshɔkɔla. Dui sɔ diayɛnya dia wɛ ekɔ la losembwe la ntondo ka Jehowa Nzambi kayɛ.

14 “Tokesake dia mbiva ose olimu wele lo dihombo ndo wele ose wola, oyadi nde ekɔ ɔnanyɔ kana ɔngɛndangɛnda wele lo wodja anyu, lo esomba* anyu.+ 15 Wɛ pombaka mbosha difuto diande ko lushi lakɔ,+ la ntondo ka wonya mbidja, nɛ dia nde ekɔ lo dihombo ndo lɔsɛnɔ* lande nemanɛka la difuto diande. Naka wɛ hasadi ngasɔ, kete nde ayolelɛ Jehowa lo dikambo diayɛ, ko wɛ ayonga la onongo wa pɛkato.+

16 “Ambutshi hawohombe ndjakema l’ɔtɛ wa kɛnɛ kasala anawɔ ndo ana hawohombe ndjakema l’ɔtɛ wa kɛnɛ kasala ambutshi awɔ.+ Onto pombaka ndjakema paka l’ɔtɛ wa pɛkato kande hita.+

17 “Tosambolake kilombo k’ɔngɛndangɛnda kana ka ɔna etshike*+ wɛngɛngɛ ndo tɔsake dihɔndɔ dia wadi aki odo oko ɔkɔlɛ.+ 18 Ohɔ dia wɛ aki mfumbe l’Edjibito ndo Jehowa Nzambi kayɛ akakotshungola oma lɛkɔ.+ Diakɔ diakodjangɛmi dia wɛ nsala ngasɔ.

19 “Lam’ayoyonaka diangɔ lo ekambɔ kayɛ, ko wɛ ambohɛ ekanda kɛmɔtshi lo ekambɔ, tokalolake dia tokiɔsa. Wɛ pombaka kitshikɛ ɔngɛndangɛnda, ɔna etshike ndo wadi aki odo+ dia Jehowa Nzambi kayɛ kɔtshɔkɔla lo kɛnɛ tshɛ kasalayɛ.+

20 “Lam’ayoyonyinginyaka esongo ayɛ w’ɔlivɛ, tokalolake dia ndjonyinginya ntahe nto. Wɛnɛ watshikala pombaka ntshikala dikambo dia ɔngɛndangɛnda, ɔna etshike ndo wadi aki odo.+

21 “Lam’ayoyombaka elowa lo ekambɔ kayɛ ka vinyɔ, tokalolake dia ndjomba wɛnɛ watshikala. Wɛ pombaka mbatshikɛ ɔngɛndangɛnda, ɔna etshike ndo wadi aki odo. 22 Ohɔ dia wɛ aki mfumbe lo wodja w’Edjibito. Diakɔ diakodjangɛmi dia wɛ nsala ngasɔ.

25 “Naka anto amɔtshi wambowana, vɔ mbeyaka ntshɔ le toshushi,+ ko vɔ wayowalombosha ndo wayota dia ɔnɛ lɔswɛ bu la onongo ndo ɔnɛ losadi kɔlɔ kele la onongo.+ 2 Naka ɔnɛ losadi kɔlɔ pombaka kɔmama,+ kete shushi ayowolasha ekukumadi ndo nde ayɔkɔmama la ntondo kande. Lofulo la mfimbɔ yahombande kɔmama pombaka mbɔtɔnɛ la woke woke wa kɔlɔ kakandasale. 3 Nde mbeyaka mbɔkɔmɔla polo mfimbɔ 40,+ koko aha ndekanya. Naka nde ambotetemala mbɔkɔmɔla ndekana laasɔ, kete ɔnanyɔ ayɔnywama lo washo ayɛ.

4 “Etena kasusola ngɔmbɛ ntɔngɔ,+ tokidihake onyɔ.

5 “Naka onto la ɔnango mbidjasɛ kaamɛ ko ɔmɔtshi ambovɔ aha la totshi ɔna pami, kete wadi aki odo hahombe ntshukama le pami kekina kele bu lo nkumbo kakɔ. Ɔnango omɛnde kahomba mbotshuka ndo nkitana la wadi aki ɔnango.+ 6 Nde ayɔlɛ ɔna l’enondo layondota lokombo l’ɔnango lakavu,+ diaha lokombo lande nshishɔ oma lo Isariyɛlɛ.+

7 “Naka pami kakɔ halange ntshukana la wadi aki dɛwɔ di’ɔnango, kete wadi aki dɛwɔ di’ɔnango pombaka ntshɔ le dikumanyi la soko di’osomba, ko nde towatɛ ate: ‘Ɔnango omɛmi halange nama lokombo la ɔnango lo Isariyɛlɛ. Nde halange ntshukana la mi dia nkitana la wadi aki ɔnango.’ 8 Dikumanyi dia l’osomba wayelɛ pami kakɔ ndo wayosawola la nde. Naka nde ambotshininala lo kanyi yande lo mbuta ate: ‘Dimi halange mbotshuka,’ 9 kete wadi aki dɛwɔ di’ɔnango pombaka nsukana la nde la ntondo ka dikumanyi, ko nde mbokolola sabata oma l’ekolo,+ mbotɛ nsɔyi lo elungi ko nde mbuta ate: ‘Nganɛ mbahombawɔ salɛ pami kahalange mbolola lohanga laki ɔnango.’ 10 L’ɔkɔngɔ wa laasɔ, lokombo la nkumbo* kande layeyamaka lo Isariyɛlɛ ɔnɛ: ‘Luudu laki ɔnɛ lakawakolola sabata.’

11 “Naka apami 2 wambɔlɔ ta, ko wadi aki pami kɛmɔtshi amboya dia ndjotsha omɛnde oma le ɔnɛ lawɔkɔmɔla, ko nde ambosembola lonya lande ndo ambookimɛ l’ɛse a demba, 12 kete nyu pombaka mbohembola lonya. Tanyowokake kɛtshi.

13 “Tanyongake la weho 2 wa mbɔkɔ ya tɛdikɔ ta wetsho lo atapa anyu,+ la woke la la tshitshɛ. 14 Tanyongake la weho 2 wa diangɔ dia tɛdikɔ*+ lo mvudu yanyu, ka woke la ka tshitshɛ. 15 Kanyongake la yɛdikɔ ya wotsho ya kokele ndo yaha la lokeso ndo yɛdikɔ ya diangɔ ya kokele ndo yaha la lokeso dia nyu nsɛna edja lo wodja wayanga nyosha Jehowa Nzambi kanyu.+ 16 Nɛ dia onto tshɛ lele bu la losembwe lasala akambo asɔ ekɔ wɔnɔnyi le Jehowa Nzambi kanyu.+

17 “Kanyohɔke kɛnɛ kakanyosalɛ ase Amalɛka lo mboka lam’akanyayatombaka oma l’Edjibito,+ 18 woho wakawahomana la nyu lo mboka ndo wakawalɔsha wanɛ tshɛ wakayayaka l’ɔkɔngɔ anyu etena kakanyalɛmbɛ ndo kakanyahekɔ. Vɔ komboka Nzambi wɔma. 19 Lam’ayonyosha Jehowa Nzambi kanyu diomuyelo oma le atunyi anyu tshɛ wonyodingi lo wodja wayanga nyosha Jehowa Nzambi kanyu oko etenyi k’okitɔ,+ nyu pombaka minya lokombo la Amalɛka oma l’ɛse olongo.+ Tanyohɛke.

26 “Lam’ayonyɔtɔ lo wodja wayanga nyosha Jehowa Nzambi kanyu oko etenyi k’okitɔ ko nyambowɔsa ndo nyambodjasɛ lɔkɔ, 2 kanyɔsake yema y’ɔlɔnga oma lo diangɔ* dianyu tshɛ di’oma lo dikambɔ diayonyona lo wodja wayanga nyosha Jehowa Nzambi kanyu, ko nyu mbidja diangɔ diakɔ lo saka ndo ntshɔ lo dihole diayɔsɔna Jehowa Nzambi kanyu dia mbidjashiya lokombo lande.+ 3 Kanyotshɔke le ɔlɔmbɛdi wayokambaka lo nshi yakɔ, ko onto l’onto mbotɛ ate: ‘Ɛlɔ, dimi lambotɛ Jehowa Nzambi kayɛ dia lambokoma lo wodja wakatshibɛ Jehowa watshɛso dia tosha.’+

4 “Oma laasɔ, ɔlɔmbɛdi ayɔsa saka diakɔ oma l’anya w’onto akɔ, ko ayodikitsha la ntondo ka elambwelo kaki Jehowa Nzambi kanyu. 5 L’ɔkɔngɔ wa laasɔ, kanyotake la ntondo ka Jehowa Nzambi kanyu nyate: ‘Shɛso aki ose Arama+ lakatekekɔka,* ko nde akaholɔ otsha l’Edjibito+ ndo akatodjasɛ lɛkɔ oko ɔngɛndangɛnda nde l’ase luudu lande angana ato.+ Koko lɛkɔ, nde akatoyala wodja wa woke, wa wolo ndo wele l’anto efula.+ 6 Ase Edjibito wakatɛngiyaka, wakatosoyaka ndo wakatokandjaka elimu la wolo oko ɛhɔmbɔ.+ 7 Ko takatatɛ ndelɛ Jehowa Nzambi ka watshɛso ko Jehowa akoke dui diaso ndo akɛnyi asui aso, shɔkɔ yaso ndo woho wakawatɛnyaka paa.+ 8 L’edjedja ka wonya, Jehowa akatotondja oma l’Edjibito la lonya la wolo+ ndo losembwe tɔɔ ndo la etsha wa wɔma, la tolembetelo ndo la ahindo.+ 9 Oma laasɔ, nde akatela lo dihole nɛ ndo akatosha wodja ɔnɛ, wodja wakɛlanɛ abɛlɛ la osanga.+ 10 Kakianɛ, dimi lambela ɔlɔnga wa diangɔ di’oma lo nkɛtɛ yambombisha Jehowa.’+

“Kokitsha diangɔ diakɔ la ntondo ka Jehowa Nzambi kayɛ, ko wɛ nkusama la ntondo ka Jehowa Nzambi kayɛ. 11 Oma laasɔ, wɛ ayɔngɛnangɛna wɛ l’ase luudu layɛ, la ose Lɛwi ndo ɔngɛndangɛnda wodjashi l’atei anyu l’ɔtɛ wa diangɔ tshɛ diambokosha Jehowa Nzambi kayɛ.+

12 “Lam’ayoyoshidiya nkimɔ+ tenyi dia dikumi di’oma lo diangɔ diayɛ lo ɔnɔnyi wa 3, ɔnɔnyi wa tenyi dia dikumi, kodisha ose Lɛwi, ɔngɛndangɛnda, ɔna etshike* ndo wadi aki odo, ko vɔ wayɔlɛ ko ndota lo esomba* anyu.+ 13 Oma laasɔ, kote la ntondo ka Jehowa Nzambi kayɛ wate: ‘Dimi lambonya yema yele ekila oma lo luudu lami ndo lamboyisha ose Lɛwi, ɔngɛndangɛnda, ɔna etshike ndo wadi aki odo+ oko wakayambidjangɛ. Dimi hamɔnyɔdi wadjango ayɛ ndo hambanyisha yimba. 14 Dimi handjile etena kakimi lo otanda kana minya yema mɔtshi oma lɔkɔ etena kakimi mindo kana nkimɔ yema mɔtshi oma lɔkɔ dikambo di’onto lambovɔ. Dimi lambokitanyiya dui dia Jehowa Nzambi kami ndo lambosala kɛnɛ tshɛ kakayambidjangɛ. 15 Ɔnkɔnɛ, oma lo edjaselo kayɛ k’ekila, oma l’olongo, enda ndo tshɔkɔla wodja ayɛ Isariyɛlɛ, wodja wakayatosha+ oko wakayatshibɛ watshɛso,+ wodja wakɛlanɛ abɛlɛ la osanga.’+

16 “Jehowa Nzambi kanyu ambonyodjangɛ ɛlɔ dia nyu ndjela wadjango ndo tɛdikɔ ta dombo tɔnɛ tshɛ. Nyu pombaka nkitanyiya ndo ndjela la otema anyu tshɛ+ ndo la anima* anyu tshɛ. 17 Ɛlɔ, nyambokondja etelo k’oma le Jehowa kɛnya dia nde ayonga Nzambi kanyu naka nyu nkɛndakɛnda lo mboka yande ndo nkitanyiya wadjango ande,+ ɛlɛmbɛ ande+ ndo tɛdikɔ tande ta dombo,+ ndo naka nyu mpokamɛ dui diande. 18 Ndo ɛlɔ, Jehowa amboka etelo kanyu kɛnya dia nyayonga wodja ande, ɛngɔ kande ka laande*+ oko wakandanyolake ndo dia nyayokitanyiyaka ɛlɛmbɛ ande tshɛ 19 ndo dia nde ayonyodiya la diko dia wedja ekina tshɛ wakandasale,+ ayonyosha lotombo, lokumu ndo kɛnɛmɔ naka nyu mɛnya dia nyekɔ wodja w’ekila le Jehowa Nzambi kanyu,+ oko wakandalake.”

27 Oma laasɔ, Mɔsɛ nde la dikumanyi dia l’Isariyɛlɛ wakadjangɛ anto vate: “Nyokitanyiyake ɛlɛmbɛ tshɛ wamomonyosha ɛlɔ. 2 Lushi layonyotehɔ Jɔrdana dia ntshɔ lo wodja wayanga nyosha Jehowa Nzambi kanyu, kanyemɛ ave wa weke ndo kanyaakite mpɛmbɛ.+ 3 Oma laasɔ, kanyofunde awui tshɛ w’Ɛlɛmbɛ ɛnɛ lɔkɔ lam’ayonyotehɔ, dia nyu mbɔtɔ lo wodja wayanga nyosha Jehowa Nzambi kanyu, wodja wakɛlanɛ abɛlɛ la osanga, oko wakanyolake Jehowa Nzambi ka watshɛnyu.+ 4 Lam’ayonyotehɔ Jɔrdana, kanyemɛ ave akɔ lo Dikona dia Ebala+ ndo kanyokite mpɛmbɛ lɔkɔ oko wamomonyodjangɛ ɛlɔ. 5 Kanyosale ndo elambwelo lɛkɔ dikambo dia Jehowa Nzambi kanyu, elambwelo ka l’ave. Tanyakɔlɔngake la dihomɔ dia mbolo.+ 6 Kanyosale elambwelo ka Jehowa Nzambi kanyu l’ave w’etondo ndo kanyolambolake Jehowa Nzambi kanyu elambo wa lotshumba lɔkɔ. 7 Kanyolambolake elambo w’osanga+ ndo kanyɔlɛke elambo akɔ laawɔ,+ ko nyayɔngɛnangɛnaka la ntondo ka Jehowa Nzambi kanyu.+ 8 Kanyofunde awui tshɛ w’Ɛlɛmbɛ ɛnɛ+ lo ave akɔ lo yoho yɛnama dimɛna.”

9 Oma laasɔ, Mɔsɛ nde l’ɛlɔmbɛdi w’ase Lɛwi wakatɛ ase Isariyɛlɛ tshɛ vate: “Isariyɛlɛ le, nyotshikale ki ndo nyohokame. Ɛlɔ, nyu nyaya wodja waki Jehowa Nzambi kanyu.+ 10 Nyu pombaka mpokamɛ dui dia Jehowa Nzambi kanyu ndo nkitanyiya ɛlɛmbɛ ande+ ndo wadjango ande wamomonyodjangɛ ɛlɔ.”

11 Lushi lɔsɔ, Mɔsɛ akadjangɛ wodja ate: 12 “Waoho anɛ mbayemalaka lo Dikona dia Ngɛrizimɛ+ dia tshɔkɔlaka anto lam’ayonyotehɔ Jɔrdana: Dioho dia Simɛyɔna, dia Lɛwi, dia Juda, dia Isakara, dia Yɔsɛfu ndo dia Bɛnjamina. 13 Ndo waoho anɛ mbayemalaka lo Dikona dia Ebala+ dia mbidjaka anto mananu: Dioho dia Rubɛna, dia Ngada, dia Ashɛrɛ, dia Zebuluna, dia Danɛ ndo dia Nafɛtali. 14 Ko ase Lɛwi wayokadimolaka ose Isariyɛlɛ tshɛ la dui dia wolo vate:+

15 “‘Mananu le ɔnɛ lasala ekishi+ kana lohingu la lowolo,+ ɛngɔ ka wɔnɔnyi le Jehowa,+ ɛngɔ kosalemi la anya w’otshudi* ko nde kishɛ.’ (Ko anto tshɛ wayokadimola vate: ‘Aamɛɛ!’*)

16 “‘Mananu le ɔnɛ lɔnyɔla she kana nyango.’+ (Ko anto tshɛ wayota vate: ‘Aamɛɛ!’)

17 “‘Mananu le ɔnɛ lasɛkɔla olelo w’osukanyi ande.’+ (Ko anto tshɛ wayota vate: ‘Aamɛɛ!’)

18 “‘Mananu le ɔnɛ langanyiya kanga tshungu lo mboka.’+ (Ko anto tshɛ wayota vate: ‘Aamɛɛ!’)

19 “‘Mananu le ɔnɛ lasambola kilombo+ k’ɔngɛndangɛnda, ɔna etshike* kana wadi aki odo wɛngɛngɛ.’+ (Ko anto tshɛ wayota vate: ‘Aamɛɛ!’)

20 “‘Mananu le ɔnɛ leyana la wadi a she, nɛ dia nde ambosha she nsɔnyi.’*+ (Ko anto tshɛ wayota vate: ‘Aamɛɛ!’)

21 “‘Mananu le ɔnɛ leyana la nyama.’+ (Ko anto tshɛ wayota vate: ‘Aamɛɛ!’)

22 “‘Mananu le ɔnɛ leyana la kadiyɛnde, ɔna she kana ɔna nyango.’+ (Ko anto tshɛ wayota vate: ‘Aamɛɛ!’)

23 “‘Mananu le ɔnɛ leyana la nyango wadɛnde.’+ (Ko anto tshɛ wayota vate: ‘Aamɛɛ!’)

24 “‘Mananu le ɔnɛ laholama ko ndjaka osekande.’+ (Ko anto tshɛ wayota vate: ‘Aamɛɛ!’)

25 “‘Mananu le ɔnɛ lalongola etshimba dia ndjaka onto laha la onongo.’*+ (Ko anto tshɛ wayota vate: ‘Aamɛɛ!’)

26 “‘Mananu le ɔnɛ lahatosukɛ ɛtɛkɛta w’Ɛlɛmbɛ ɛnɛ lo mbakitanyiya.’+ (Ko anto tshɛ wayota vate: ‘Aamɛɛ!’)

28 “Naka mɛtɛ nyayohokamɛ dui dia Jehowa Nzambi kanyu lo monga la yambalo dia nkitanyiya ɛlɛmbɛ ande tshɛ wamomonyodjangɛ ɛlɔ, kete ndooko onyake Jehowa Nzambi kanyu ayonyodiya la diko dia wedja ekina tshɛ wa la nkɛtɛ.+ 2 Ɛtshɔkɔ ɛnɛ tshɛ wayoya le nyu ndo wayonyokomɛ,+ nɛ dia nyayotetemala mpokamɛ dui dia Jehowa Nzambi kanyu:

3 “Ɔtshɔkɔ wayonga le nyu lo osomba ndo ɔtshɔkɔ wayonga le nyu lo shamba.+

4 “Ɔtshɔkɔ wayonga le ananyu,*+ lo elowa w’oma lo dikambɔ dianyu ndo le ana wa dongalonga dianyu, ana wa ngɔmbɛ yanyu ndo ana w’ɛkɔkɔ anyu.+

5 “Ɔtshɔkɔ wayonga lo asaka anyu+ ndo lo diangɔ diatonyɔsɔhaka ofushi lɔkɔ.+

6 “Ɔtshɔkɔ wayonga le nyu lam’ayonyɔtɔka ndo ɔtshɔkɔ wayonga le nyu lam’ayonyotombaka.

7 “Jehowa ayosala dia atunyi anyu wanyɔlɔsha nɛndjama la ntondo ka nyu.+ Vɔ wayonyɔlɔsha oma lo lɛkɛ 1, koko wayolawɔ otsha lo ndjɛkɛ 7.+ 8 Jehowa ayodjanga lo dikambo dianyu dia ɔtshɔkɔ monga lo apɛngɛ anyu+ ndo lo kɛnɛ tshɛ kasalanyu, ndo nde mɛtɛ ayonyɔtshɔkɔla lo wodja wayanga nyosha Jehowa Nzambi kanyu. 9 Jehowa ayonyetɛ wodja w’ekila dikambo diande,+ oko wakandanyotshibɛ,+ nɛ dia nyekɔ lo nkitanyiya ɛlɛmbɛ wa Jehowa Nzambi kanyu ndo nyekɔ lo nkɛndakɛnda lo mboka yande. 10 Anto tshɛ wa la nkɛtɛ wayɛna dia nyekɔ lo mbelamɛ lo lokombo la Jehowa,+ ko vɔ wayonyoka wɔma.+

11 “Jehowa ayonyofudiyɛ ana efula ndo lokema la dongalonga ndo ɛtɛtɔ+ lo wodja wakatshibɛ Jehowa watshɛnyu dia nyosha.+ 12 Jehowa ayonyodiholɛ olongo, dipɛngɛ diande dia dimɛna, dia mbisha nkɛtɛ avula lo deko diawɔ+ ndo ntshɔkɔla kɛnɛ tshɛ kasalanyu. Nyu nyayɔsɔndjaka wedja efula diangɔ, koko nyuamɛ hanyotonga la ohomba wa nsɔmba.+ 13 Jehowa ayonyetɛ ɔtɛ, koko aha wela. Nyayonga la diko,+ koko aha l’ɛse naka nyu ntetemala nkitanyiya ɛlɛmbɛ wa Jehowa Nzambi kanyu wamomonyodjangɛ ɛlɔ dia nyu nkitanyiya ndo ndjela. 14 Tanyotakɔke mboka k’awui tshɛ wamomonyodjangɛ ɛlɔ lo mbɛtɔla lo lonya l’omi kana la lɔmɔsɔ+ dia ndjela tozambizambi tokina ndo tikambɛ.+

15 “Ko naka hanyohokame dui dia Jehowa Nzambi kanyu lo monga la yambalo dia nkitanyiya ɛlɛmbɛ ande tshɛ ndo wadjango ande tshɛ wamomonyodjangɛ ɛlɔ, kete mananu nyɛ tshɛ yayoya le nyu ndo yayonyokomɛ:+

16 “Mananu kayonga le nyu lo osomba ndo mananu kayonga le nyu lo shamba.+

17 “Mananu kayonga lo asaka+ anyu ndo lo diangɔ dianyu diatonyɔsɔhaka ofushi lɔkɔ.+

18 “Mananu kayonga le ananyu,*+ lo elowa w’oma lo dikambɔ dianyu, le ana wa ngɔmbɛ yanyu ndo le ana w’ɛkɔkɔ anyu.+

19 “Mananu kayonga le nyu lam’ayonyɔtɔka ndo mananu kayonga le nyu lam’ayonyotombaka.

20 “Jehowa ayonyotomɛ mananu, lofunge ndo dilanya lo kɛnɛ tshɛ kasalanyu polo ndo nyambolanyema ndo nyamboshila oshiki esadi eto l’ɔtɛ wa ditshelo dianyu dia kɔlɔ ndo l’ɔtɛ wambonyombohɛ.+ 21 Jehowa ayosala dia hemɔ sɔmana la nyu polo ndo nde ambonyoshila oshiki lo wodja watanyatshu dia tɔsa.+ 22 Jehowa ayonyotomɛ lɔkɔsu la lohondja, demba dja dia wolo,+ wadada, djangambala ya wolo, lokuwa la ta,+ tanyi talongoya diononɛ ndo mombolenge.+ Ko paa shɔ yayoyelana la nyu polo ndo nyamboshila oshiki. 23 Olongo wele la diko di’ɛtɛ anyu wayonga nkonga ndo nkɛtɛ yele l’ɛse kanyu yayonga lowolo.+ 24 Jehowa ayɔlɔsha otoko la ditshu oma l’olongo lo wodja anyu oko mvula polo ndo nyamboshila oshiki. 25 Jehowa ayosala dia atunyi+ anyu nyɔlɛndja. Nyu nyayowalɔsha oma lo lɛkɛ 1, koko nyayolawɔ otsha lo ndjɛkɛ 7. Nyayonga ɛngɔ ka wɔnɔnyi le waolelo tshɛ wa la nkɛtɛ.+ 26 Edo anyu wayoyala mbo ya ndɛ le weho tshɛ wa tofudu ta l’olongo ndo le nyama ya la nkɛtɛ, ko ndooko onto layoyiotsha wɔma.+

27 “Jehowa ayonyotomɛ atshutshu wa l’Edjibito, kasadi, mpote ndo ahaka wahatokoka nkɔnɔ. 28 Jehowa ayonyodjoya aladi, ayonyetɛ totshungu+ ndo ayonyodja lo lofunge. 29 Nyayokungakunga la yanyi ya midi oko watokungakungaka kanga tshungu lo wodjima+ ndo ndooko kɛnɛ kayonyosala kayotondoyama. Nyayokesamaka nshi tshɛ ndo nyayovamaka nshi tshɛ, ko ndooko onto layonyoshimbɛ.+ 30 Nyayambɛ wamato, ko apami akina wayeyana la wɔ la wolo. Nyayoka mvudu, koko hanyotodjasɛ lɔkɔ.+ Nyayokamba dikambɔ dia vinyɔ, koko hanyototatɛ ndɛ elowa adiɔ.+ 31 Ngɔmbɛ yanyu yayodiakema lo washo anyu, koko hanyotɔlɛ kaanga yema. Mponda yanyu yayovama lo washo anyu ndo hanyotoyikondja nto. Ɛkɔkɔ anyu wayokimɔma le atunyi anyu, koko hanyotonga la oshimbedi. 32 Ananyu w’apami ndo ananyu wa wamato wayokimɔma le anto+ akina lo washo anyu ndo nyayongaka nshi tshɛ la ohomba awɔ, koko anya anyu hawotonga la wolo. 33 Elowa w’oma lo dikambɔ dianyu ndo diangɔ tshɛ diayonyɔngɔnyaka diayɔlɛma oma le anto akina wakinyu kombeya,+ ko nyayokesamaka nshi tshɛ ndo nyayɔhɔtshahɔtshamaka nshi tshɛ. 34 Kɛnɛ kɛna washo anyu kayonyodjoya aladi.

35 “Jehowa ayonyotomɛ atshutshu wa kandji ndo wahakɔnɔ lo adwe anyu ndo lo ekolo anyu, oma l’ɛse ka akaka anyu polo lo tɔsɔdi t’ɛtɛ anyu. 36 Jehowa ayonyɔtɔla nyu la nkumekanga kayonyoyasɔnɛ otsha lo wodja wele nyu la watshɛnyu kombeya+ ndo nyayotokambɛ tozambizambi tokina lɛkɔ, tozambizambi t’esongo ndo t’ave.+ 37 Ndo nyayonga ɛngɔ ka wɔnɔnyi, ka lɔsɔkɔ* ndo ka diɔnyɔ le anto tshɛ wa lɛnɛ ayonyɔtɔla Jehowa.+

38 “Nyayotshɔ la woho efula dia tonɛ lo ekambɔ, koko nyayona yema tshitshɛ tsho,+ nɛ dia akata w’ɛndjɔ wayɔlɛ diangɔ diakɔ. 39 Nyayokamba dikambɔ dia vinyɔ ndo nyayonɛ, koko hanyotɔnɔ vinyɔ ndo hanyotona ndooko ɛngɔ,+ nɛ dia ɛsɔhɔ wayɔlɛ diangɔ diakɔ. 40 Nyayonga la esongo w’ɔlivɛ lo bɛtshi dianyu dia nkɛtɛ tshɛ, koko hanyotoshinola esɔ k’oma lɔkɔ, nɛ dia elowa anyu w’ɔlivɛ wayɔkɔ ɛlɔlɔki. 41 Nyayota ana w’apami la ana wa wamato, koko vɔ hawototshikala kaamɛ la nyu, nɛ dia vɔ wayotshɔ lo lɔhɔmbɔ.+ 42 Nyemba ya tofumbɔfumbɔ* yayololanɛ lo esongo anyu tshɛ ndo lo elowa wa lo dikambɔ dianyu. 43 Ɔngɛndangɛnda wodjashi l’atei anyu ayotadɛka mbidɛ tsho la diko dianyu, koko nyu yayotaholɔka mpolɔ tsho l’ɛse. 44 Nde ayonyɔsɔndjaka, koko nyu hanyotowɔsɔndja.+ Nde ayonga ɔtɛ, koko nyu nyayonga wela.+

45 “Mananu+ shɔ tshɛ yayoya le nyu, yayonyoyela ndo yayokoma le nyu polo ndo nyamboshila oshiki,+ nɛ dia nyu kopokamɛ dui dia Jehowa Nzambi kanyu lo nkitanyiya ɛlɛmbɛ ande la wadjango ande wakandanyodjangɛ.+ 46 Yɔ yayotetemala monga le nyu ndo le ananyu oko djembetelo ndo ɔhɛmwɛlɔ wa pondjo,+ 47 nɛ dia nyu kokambɛ Jehowa Nzambi kanyu la ɔngɛnɔngɛnɔ ndo la ɔlɔ l’otema lam’akinyu la diangɔ tshɛ emete emete.+ 48 Jehowa ayotoma atunyi anyu dia nyɔlɔsha, ko nyayowakambɛ+ nyele la ndjala+ ndo la mposa k’ashi, nyele la olanda ndo lo dihombo dia ɛngɔ tshɛ. Nde ayokitsha osembe wa lowolo lo nkingo yanyu polo ndo nde ambonyoshila oshiki.

49 “Jehowa ayonyiya wodja w’oma l’etale,+ w’oma lo koma ya nkɛtɛ dia ndjonyɔlɔsha. Vɔ wayotolɔ oko mpongo,+ wodja watɛkɛta ɔtɛkɛta wahanyoke,+ 50 wodja wele la ɛnamelo ka wɔma, wahatɔlɛnya oyadi esombe kana akɛnda.+ 51 Vɔ wayɔlɛ ana wa dongalonga dianyu ndo elowa wa lo dikambɔ dianyu polo ndo nyamboshila oshiki. Vɔ hawotonyotshikɛ ndooko lɔtɔngɔ, wanu w’eyoyo kana esɔ, ɔsɔngɔ wa ngɔmbɛ kana ɔsɔngɔ w’ɔkɔkɔ polo ndo wambonyolanya.+ 52 Vɔ wayonyodinga, wayonyokuka lo esomba* anyu tshɛ lo wodja anyu w’otondo polo ndo lam’ayɔkɔ mpele dianyu di’etale ndo dia wolo diayaɛkɛnyu lɔkɔ. Ɛɛ, vɔ mɛtɛ wayonyodinga lo esomba anyu tshɛ, lo wodja anyu w’otondo wambonyosha Jehowa Nzambi kanyu.+ 53 Oma laasɔ, nyayohomba ndɛ ananyu* hita, emunyi w’ananyu w’apami ndo w’ananyu wa wamato+ wakanyosha Jehowa Nzambi kanyu l’ɔtɛ wa paa k’efula kayonga lam’ayowonyodinga ndo sui diayonyosoya atunyi anyu.

54 “Kaanga onto loleki ekondjelo ndo loleki mbokana kandji l’atei anyu hatoka ɔnango kana wadɛnde la ngandji kana ɔnande lambotshikala kɛtshi, 55 ndo nde hatokahana la wɔ yema y’emunyi w’anande wayondɔlɛ, nɛ dia nde ndooko la ɛngɔ kekina l’ɔtɛ wa paa k’efula kayonga lam’ayowonyodinga ndo sui diayonyosoya atunyi anyu lo esomba anyu.+ 56 Womoto lele la ekondjelo ndo lokana kandji l’atei anyu lahakoke nkanyiya dia nde okokitsha dikaka diande la nkɛtɛ l’ɔtɛ wende la ekondjelo k’efula+ hatoka omɛnde la ngandji kana ɔnande la pami kana la womoto kɛtshi, 57 oyadi kaanga wetshi watotombaka l’atei w’ekolo lam’otande ana, nde ayowalɛ lo woshɛshɛ l’ɔtɛ wa paa k’efula kayonga lam’ayowonyodinga ndo l’ɔtɛ wa sui diayonyosoya atunyi anyu lo esomba anyu.

58 “Naka hanyoyedi la yambalo tshɛ awui tshɛ w’Ɛlɛmbɛ ɛnɛ wofundami lo dibuku nɛ+ ndo hanyoki lokombo lɔnɛ la lotombo ndo la diambo efula+ laki Jehowa+ Nzambi kanyu wɔma, 59 kete Jehowa ayonyotomɛ nyu la ananyu asui wa wolo efula, asui wa weke ndo wayoviya edja,+ ndo hemɔ ya paa ndo yahakɔnɔ esadi. 60 Nde ayonyokaloyɛ hemɔ tshɛ ya l’Edjibito yakanyokaka wɔma ndo lo mɛtɛ yɔ yayɔsɔmana la nyu. 61 Ndo nto, Jehowa ayonyotomɛ weho tshɛ wa hemɔ ndo w’asui wahafundami lo dibuku di’Ɛlɛmbɛ nɛ polo ndo nyamboshila oshiki. 62 Kaanga mbayanyu efula oko tɔɔtɔ ta l’olongo,+ tɔtɔi toto l’atei anyu mbayotshikala,+ nɛ dia nyu kopokamɛ dui dia Jehowa Nzambi kanyu.

63 “Oko wakangɛnangɛna Jehowa ntondo dia nyɔngɔnya ndo nyofudia mbayɔngɛnangɛna Jehowa dia nyolanya ndo nyoshila oshiki. Nyayonyɛma oma lo wodja wayanganyu mbɔsa.

64 “Jehowa ayonyohandjola lo wedja tshɛ, oma lo koma mɔtshi ya nkɛtɛ polo lo koma kina ya nkɛtɛ,+ ndo nyayohomba tokambɛ tozambizambi t’esongo ndo t’ave lɛkɔ tele nyu la watshɛnyu kombeya.+ 65 Hanyotonga la wɔladi lo wedja ɛsɔ+ ndo hanyotonga la dihole dia nkitsha kaanga dikaka dia nyu momuya. Koko lɛkɔ, Jehowa ayotonyosha otema wa lɔkɔnyɔ,+ washo w’olengolengo ndo hanyotonga la elongamelo.+ 66 Lɔsɛnɔ lanyu layonga lo waale w’efula ndo nyayongaka la wɔma otsho oko otsho, yanyi oko yanyi. Hanyotonga la elongamelo ka shimbamɛ. 67 La pindju, nyayotaka nyate: ‘Otonga taya dikɔlɔ lee!’ Ndo la dikɔlɔ, nyayotaka nyate: ‘Otonga taya pindju lee!’ l’ɔtɛ wa wɔma wayonyokaka l’etema anyu ndo l’ɔtɛ wa kɛnɛ kayɛnaka washo anyu. 68 Ndooko onyake Jehowa ayonyokaloya l’Edjibito lo masuwa, lo mboka kakamanyotɛ nte: ‘Hanyokiɛnaki nto pondjo,’ ndo nyayoyanga dia ndjasondja le atunyi anyu oko mfumbe y’apami ndo ya wamato lɛkɔ, koko ndooko onto layonyosomba.”

29 Ɔnɛ ele awui wa sheke yakadjangɛ Jehowa Mɔsɛ dia nde mbidja l’ase Isariyɛlɛ lo nkɛtɛ ya Mɔaba, laadiko dia sheke yakandadje la wɔ la Hɔrɛbɛ.+

2 Ko Mɔsɛ akasanganya ase Isariyɛlɛ tshɛ ndo akawatɛ ate: “Nyakɛnyi kɛnɛ tshɛ kakasale Jehowa lo washo anyu lo wodja w’Edjibito, le Farawɔ, le ekambi ande tshɛ ndo lo wodja ande w’otondo,+ 3 alanya wa wolo* wakanyɛnyi la washo anyu ndo tolembetelo la ahindo wa weke.+ 4 Koko Jehowa atanyosha otema wa nyu nshihodia, washo wa nyu mɛna ndo atoyi wa nyu mboka polo ndo lushi l’ɛlɔ.+ 5 ‘Lam’akamayanyɔlɔmbɔlaka l’edja k’ɛnɔnyi 40 l’oswe wa shɛnga,+ ahɔndɔ anyu komonga emusu ndo sabata ya lo ekolo anyu+ komonga emusu. 6 Nyu kɔɔndɛ mapa ndo nyu kɔɔnɔ vinyɔ kana wanu akina wadjoya, dia nyu mbeya dia dimi kele Jehowa Nzambi kanyu.’ 7 L’edjedja ka wonya, nyakayokoma lo dihole nɛ ndo Sihɔna nkumekanga ka Hɛshibɔna+ nde la Onga nkumekanga ka Bashana+ wakaye ndjohomana la so dia tɔlɔsha, koko takaalɛndja.+ 8 L’ɔkɔngɔ wa laasɔ, takɔshi wodja awɔ, ko takasha aseka Rubɛna, aseka Ngada ndo k’ahende ɔtɔi ka dioho dia Manase+ oko etenyi kawɔ k’okitɔ. 9 Ɔnkɔnɛ, nyoyelake awui wa sheke nyɛ ndo nyowakitanyiyake, dia akambo tshɛ wasalanyu ndowanaka.+

10 “Nyu tshɛ anɛ wemadi ɛlɔ la ntondo ka Jehowa Nzambi kanyu, ɛtɛ wa waoho anyu, dikumanyi dianyu, topita tanyu ndo pami tshɛ ka lo Isariyɛlɛ, 11 ananyu, wadiɛnyu+ ndo ɔngɛndangɛnda+ anyu wodjashi l’atei wa mpango kanyu, ntatɛ oma le ɔnɛ lanyonɛ nkunyi polo le ɔnɛ lanyotaholɛ ashi. 12 Nyekɔ lanɛ la oyango wa nyu mbɔtɔ lo sheke ya Jehowa Nzambi kanyu ndo lo etshibelo kande, sheke yayanga mbidja Jehowa Nzambi kanyu kaamɛ la nyu ɛlɔ,+ 13 dia nyu monga wodja ande+ ndo dia nde monga Nzambi kanyu,+ oko wakandanyolake ndo oko wakandatshibɛ watshɛnyu, Abrahama,+ Isaka+ la Jakɔbɔ.+

14 “Aha dimi la nyu ato mbayanga mbidja sheke nyɛ ndo etshibelo kɛnɛ, 15 koko la wanɛ wemadi lanɛ kaamɛ la so ɛlɔ la ntondo ka Jehowa Nzambi kaso ndo la wanɛ wele bu lanɛ kaamɛ la so ɛlɔ. 16 (Nɛ dia nyu mbeyaka dimɛna woho wakatasɛnaka lo wodja w’Edjibito ndo woho wakatete lo wedja wotshikitanyi lo lɔkɛndɔ laso.+ 17 Nyu nyakɛnaka diangɔ diawɔ dia wɔnɔnyi ndo dikishi diawɔ dia nyɛtɛɛtɛ dia la esongo*+ ndo dia l’ave, dia mfɛsa ndo dia paonyi diaki l’atei awɔ.) 18 Nyoyale la yambalo diaha pami kana womoto ɔmɔtshi, nkumbo kana dioho dimɔtshi diele ɛlɔ l’atei anyu ndjoka Jehowa Nzambi kaso ɔkɔngɔ lo otema ande, ko nde ntshɔ tokambɛ tozambizambi t’ase wedja ɛsɔ,+ diaha odio watondja elowa wa lɔlɛngɔ ndo w’ololo ndjotomba l’atei anyu.+

19 “Ko naka onto ɔmɔtshi amboka ɛtɛkɛta w’etshibelo kɛnɛ ko nde amboyafuna lo otema ande ate: ‘Dimi layonga la wɔladi oyadi dimi kotshininalaka dia nkɛndakɛnda lo mboka yalanga otema ami hita,’ otsha lo mboka kayokonya ɛngɔ tshɛ* kele lɔkɔ lo elanyelo, 20 Jehowa hatetawɔ mbodimanyiya.+ Koko Jehowa ayomalɛ onto ɔsɔ nkɛlɛ ka wolo, ko mananu tshɛ yofundami lo dibuku nɛ yayoya le nde+ ndooko onyake ndo lo mɛtɛ Jehowa ayonya lokombo lande oma l’ɛse olongo. 21 Oma laasɔ, Jehowa ayowokakitola la waoho tshɛ w’ase Isariyɛlɛ dia nde mpomɔ mpokoso lo yoho yɔtɔnɛ la mananu tshɛ yele lo sheke yofundami lo dibuku di’Ɛlɛmbɛ nɛ.

22 “Lam’ayɛna lɔlɔnga l’ananyu lokoya ndo ɔngɛndangɛnda w’oma lo wodja w’etale mpokoso kayokomɛ wodja akɔ, hemɔ yayotoma Jehowa lɔkɔ, 23 mbɔkɔ ya dja, lɛɛhɔ ndo dja yalombalomba woho wele hawotonɛ ndo ndooko ɛngɔ kayotomba lo wodja w’otondo, hawotokoka ntondja diangɔ ndo tombatomba hadiototomba lɔkɔ, oko elanyelo ka Sɔdɔma la Ngɔmɔra,+ ka Adɛma la Zebɔyima+ wele Jehowa akaalanya la nkɛlɛ kande ndo la odudu ande, 24 vɔ la wedja tshɛ wayota vate: ‘Lande na kakasalɛ Jehowa wodja ɔnɛ nganɛ?+ Kakɔna kakakonya lo nkɛlɛ ka wolo ndo kadɔdɔ nganɛ?’ 25 Oma laasɔ, vɔ wayota vate: ‘Nɛ dia vɔ wakatshike sheke ya Jehowa+ Nzambi ka watshɛwɔ yakandadje la wɔ lam’akandaatondja oma lo wodja w’Edjibito.+ 26 Koko vɔ wakatshu ndo wakatokambɛ tozambizambi tokina ndo wakatikusamɛ, tozambizambi takiwɔ kombeya ndo takinde kombasha lotshungɔ la vɔ ntɛmɔla.*+ 27 Ko nkɛlɛ ka Jehowa kadɔdɔ kakaye lo wodja akɔ lo mbatomɛ mananu tshɛ yofundami lo dibuku nɛ.+ 28 Ɔnkɔnɛ, Jehowa akaakundola oma lo nkɛtɛ yawɔ l’ɔtɛ wa nkɛlɛ kande,+ odudu ande ndo yɛnyi yande, ko akaatɔlɛ lo wodja okina lɛnɛ ewɔ ɛlɔ.’+

29 “Akambo woshɛmi wekɔ waki Jehowa Nzambi kaso,+ koko akambo wamboshɔma wekɔ waso ndo wa tokanula taso pondjo pondjo, dia sho nkitanyiya awui tshɛ wa lo Ɛlɛmbɛ ɛnɛ.+

30 “Lam’ayonyokomɛ awui asɔ tshɛ, ɔtshɔkɔ la mananu yamomokitsha la ntondo kanyu,+ ko nyambowaohɔ*+ lo wedja tshɛ wayonyohandjola Jehowa Nzambi kanyu,+ 2 ko nyambokalolɛ Jehowa Nzambi kanyu+ ndo nyohokamɛ dui diande lo ndjela kɛnɛ tshɛ kamomonyodjangɛ ɛlɔ nyu l’ananyu, la otema anyu tshɛ ndo la anima* anyu tshɛ,+ 3 kete Jehowa Nzambi kanyu ayonyokaloyɛ mfumbe yanyu,+ ayonyoka kɛtshi+ ndo ayonyosanganya oma lo wedja tshɛ wakanyohandjola Jehowa Nzambi kanyu.+ 4 Oyadi kaanga anto anyu wambodiangana polo lo koma y’olongo, Jehowa Nzambi kanyu ayonyotshumanya oma lɛkɔ ndo ayonyokaloya.+ 5 Jehowa Nzambi kanyu ayonyɔtɔla lo wodja wakɔshi washɛnyu ndo vɔ wayonga wanyu. Nde ayonyɔngɔnya ndo ayonyofudia oleki washɛnyu.+ 6 Jehowa Nzambi kanyu ayɛdia etema anyu ndo etema w’ananyu,+ ko nyayolanga Jehowa Nzambi kanyu la otema anyu tshɛ ndo la anima* anyu tshɛ, ko nyayotshikala la lɔsɛnɔ.+ 7 Ko Jehowa Nzambi kanyu ayotoma mananu shɔ tshɛ le atunyi anyu, wanɛ wanyohetsha ndo wanyɔhɛnyahɛnya.+

8 “Oma laasɔ, nyayokalola, nyayohokamɛ dui dia Jehowa ndo nyayokitanyiya ɛlɛmbɛ ande tshɛ wamomonyodjangɛ ɛlɔ. 9 Jehowa Nzambi kanyu ayonyɔngɔnya efula lo elimu w’anya anyu tshɛ,+ lo mfudia ananyu, dongalonga dianyu ndo diangɔ di’oma lo dikambɔ dianyu, nɛ dia Jehowa ayɔngɛnangɛna nto dia nyɔngɔnya oko wakandangɛnangɛna lo dikambo dia watshɛnyu.+ 10 Nɛ dia l’etena kɛsɔ, nyayohokamɛ dui dia Jehowa Nzambi kanyu ndo nyayokitanyiya ɛlɛmbɛ ande la wadjango ande wofundami lo dibuku di’Ɛlɛmbɛ nɛ, ndo nyayokalolɛ Jehowa Nzambi kanyu la otema anyu tshɛ ndo la anima* anyu tshɛ.+

11 “Ɛlɛmbɛ ɛnɛ wamomonyodjangɛ ɛlɔ bu wolo le nyu ndo hawanganyi etale la nyu.*+ 12 Vɔ bu l’olongo dia nyu ndjota nyate: ‘Akɔna ayodɛ l’olongo dia totɔsɛwɔ kele towahokame ndo towakitanyiya?’+ 13 Ndo vɔ bu lo wedi okina wa ndjale dia nyu ndjota nyate: ‘Akɔna ayotehɔ lo wedi okina wa ndjale dia totɔsɛwɔ kele towahokame ndo towakitanyiya?’ 14 Nɛ dia ɔtɛkɛta wekɔ suke suke la yɛ, lo onyɔ ayɛ ndo lo otema ayɛ,+ dia wɛ mbokitanyiya.+

15 “Nyende, ɛlɔ dimi lambokitsha lɔsɛnɔ ndo ɔlɔlɔ, nyɔi ndo kɔlɔ la ntondo kanyu.+ 16 Naka nyu mpokamɛ ɛlɛmbɛ wa Jehowa Nzambi kanyu wamomonyodjangɛ ɛlɔ, lo nanga Jehowa Nzambi kanyu,+ lo nkɛndakɛnda lo mboka yande ndo lo nkitanyiya ɛlɛmbɛ ande la wadjango ande ndo tɛdikɔ tande ta dombo, kete nyayotshikala la lɔsɛnɔ+ ndo nyayofulanɛ, ko Jehowa Nzambi kanyu ayonyɔtshɔkɔla lo wodja watanyatshu dia tɔsa.+

17 “Ko naka etema anyu wambokadimɔ+ ko hanyoyohokamɛ ndo nyambokotɔma, nyambokusamɛ tozambizambi tokina ndo nyotikambɛ,+ 18 dimi lambonyotɛ ɛlɔ nte ndooko onyake nyayolanyema.+ Hanyotɔsɛna edja lo wodja wayanganyu ntehɔ Jɔrdana dia tɔsa. 19 Dimi lambɔsa olongo la nkɛtɛ ɛmɛnyi ɛlɔ lo dikambo dianyu dia lambokitsha lɔsɛnɔ la nyɔi ndo ɔtshɔkɔ la mananu la ntondo kanyu.+ Nyu pombaka nsɔna lɔsɛnɔ dia nyu ntshikala la lɔsɛnɔ+ nyu la tokanula tanyu,+ 20 lo nanga Jehowa Nzambi kanyu,+ lo mpokamɛ dui diande ndo lo mbomamema,+ nɛ dia nde kele lɔsɛnɔ lanyu ndo lo ekimanyielo kande mbayonyotshikala edja lo wodja wakatshibe Jehowa dia mbisha watshɛnyu, Abrahama, Isaka la Jakɔbɔ.”+

31 Oma laasɔ Mɔsɛ akatombe ko akatotɛ ase Isariyɛlɛ tshɛ ɛtɛkɛta ɛsɔ, 2 ate: “Ɛlɔ, dimi laya l’ɛnɔnyi 120.+ Dimi handjokoka nyɔlɔmbɔla* nto, nɛ dia Jehowa akambutɛ ate: ‘Wɛ hatotehɔ Jɔrdana nyɛ.’+ 3 Jehowa Nzambi kanyu kayotehɔ la ntondo kanyu ndo ndamɛ ayolanya wedja ɛsɔ la ntondo kanyu, ko nyayowatshanya.+ Jashua kayonyɔlɔmbɔla dia nyu ntehɔ,+ oko wakate Jehowa. 4 Jehowa ayowasalɛ oko wakandasalɛ Sihɔna+ nde la Onga,+ nkumi ya dikanga y’ase Amɔra ndo oko wakandasalɛ wodja awɔ etena kakandaalanya.+ 5 Jehowa ayonyɔlɛndjɛwɔ ndo nyayowasalɛ akambo lo ndjela ɛlɛmbɛ tshɛ wamomonyosha.+ 6 Nyonge la dihonga ndo nyokeketale.+ Tanyokake wɔma ndo tanyodidimake la ntondo kawɔ,+ nɛ dia Jehowa Nzambi kanyu ekɔ lo takɛndakɛnda kaamɛ la nyu. Nde hatonyɔsɛka ndo hatonyotshika.”+

7 Oma laasɔ, Mɔsɛ akelɛ Jashua ko akawotɛ lo washo w’ase Isariyɛlɛ tshɛ ate: “Onga la dihonga ndo keketala,+ nɛ dia wɛ kayɔtɔla anto anɛ otsha lo wodja wakatshibɛ Jehowa watshɛwɔ dia mbasha ndo wɛ kayowashawɔ oko etenyi k’okitɔ.+ 8 Jehowa ekɔ lo takɛndakɛnda la ntondo kayɛ ndo nde ayotetemala monga kaamɛ la yɛ.+ Nde hatokɔsɛka ndo hatokotshika. Tokake wɔma ndo tosakake lokomba.”+

9 L’ɔkɔngɔ wa laasɔ, Mɔsɛ akafunde Ɛlɛmbɛ ɛnɛ,+ ko akawasha ɛlɔmbɛdi w’ase Lɛwi wanɛ wɛmba ɔshɛtɛ wa sheke wa Jehowa ndo dikumanyi tshɛ dia l’Isariyɛlɛ. 10 Mɔsɛ akawadjangɛ ate: “L’ekomelo k’ɛnɔnyi 7 tshɛ, lo etena kakashikikɛma ka l’ɔnɔnyi w’etshungwelo,+ lo Fɛtɛ ka Totombotombo,*+ 11 lam’ayɛnamaka ase Isariyɛlɛ tshɛ la ntondo ka woongelo wa Jehowa Nzambi kanyu+ lo dihole diayondɔsɔna, kanyadiyɛke ase Isariyɛlɛ tshɛ Ɛlɛmbɛ ɛnɛ dia vɔ mbaoka.+ 12 Kanyosanganyake anto kaamɛ,+ apami, wamato, ana* ndo ɔngɛndangɛnda wodjashi lo esomba* anyu dia vɔ mpokamɛ ndo mbeka ndo mboka Jehowa Nzambi kanyu wɔma ndo dia ndjalama dia nkitanyiya awui tshɛ w’Ɛlɛmbɛ ɛnɛ. 13 Oma laasɔ, anawɔ waki kombeya Ɛlɛmbɛ ɛnɛ wayoka+ ndo wayeka woho wa mboka Jehowa Nzambi kanyu wɔma nshi tshɛ yayonyodjasɛ lo wodja wayanganyu ntehɔ Jɔrdana dia tɔsa.”+

14 Oma laasɔ, Jehowa akatɛ Mɔsɛ ate: “Eenda, etena ka wɛ mvɔ kambosukana.+ Elɛ Jashua kele nyotshu* lo luudu la dipɛma l’esanganelo dia dimi towosha ɔkɛndɛ.”+ Ko Mɔsɛ nde la Jashua wakatshu ko wakatemala lo luudu la dipɛma l’esanganelo. 15 Ko Jehowa akɛnama lo luudu la dipɛma lo ekundji ka dinge ndo ekundji kakɔ ka dinge kakemala la soko dia luudu la dipɛma.+

16 Oma laasɔ, Jehowa akatɛ Mɔsɛ ate: “Eenda, wɛ aya suke la mvɔ,* ndo anto anɛ wayotatɛ nsala kinumba ka lo nyuma* vɔ la tozambizambi t’ase wedja waadingi lo wodja watawatshu.+ Vɔ wayombohɛ+ ndo wayohembola sheke yami yakamadje la wɔ.+ 17 L’etena kɛsɔ, nkɛlɛ kami kadɔdɔ kayoya le wɔ+ ko dimi layowaohɛ+ ndo layoshɛ elungi kami oma le wɔ+ polo ndo vɔ wamboshila oshiki. Oma laasɔ, l’ɔkɔngɔ wa mpokoso ndo asui efula ndja le wɔ,+ vɔ wayota vate: ‘Shi l’ɔtɛ wele Nzambi kaso keema l’atei aso mbambotokomɛ mpokoso nyɛ?’+ 18 Koko dimi layotetemala mbishɛ elungi kami lushi lɔsɔ l’ɔtɛ w’akambo tshɛ wa kɔlɔ wambowosala lo nkadimɔ otsha le tozambizambi tokina.+

19 “Ɔnkɔnɛ, nyofunde osambo ɔnɛ dikambo dianyu+ kele nyowetsha ase Isariyɛlɛ.+ Nyowaetshawɔ* dia osambo ɔnɛ monga ɔmɛnyi ami dikambo di’ase Isariyɛlɛ.+ 20 Lam’ayomaakonya lo wodja wakamatshibɛ watshɛwɔ,+ wodja wakɛlanɛ abɛlɛ la osanga+ ndo lam’ayowotɔlɛ ko ndota ndo lam’ayowɔngɔna,*+ vɔ wayokadimɔ otsha le tozambizambi tokina ndo wayotikambɛ, ko vɔ wayɔmɔnyɔla ndo wayohembola sheke yami.+ 21 Lam’ayowakomɛ mpokoso ndo asui efula,+ osambo ɔnɛ wayonga oko ɔmɛnyi le wɔ (nɛ dia tokanula tawɔ hawohombe mbohɛ osambo akɔ), dikambo dimi lamboshila mbeya kanyi yambonga la wɔ+ la ntondo ka kaanga dimi mbatɔla lo wodja wakamatshibe.”

22 Ko Mɔsɛ akafunde osambo akɔ lushi lɔsɔ ndo akawetsha ase Isariyɛlɛ.

23 Oma laasɔ, nde* akasha Jashua+ ɔna Nuna ɔkɛndɛ ndo akate ate: “Onga la dihonga ndo keketala,+ nɛ dia wɛ kayɔtɔla ase Isariyɛlɛ otsha lo wodja wakamaatshibɛ+ ndo dimi layotetemala monga kaamɛ la yɛ.”

24 Kam’akashidiya Mɔsɛ mfunda ɛtɛkɛta w’Ɛlɛmbɛ ɛnɛ tshɛ tshɛ lo dibuku,+ 25 Mɔsɛ akadjangɛ ase Lɛwi wakɛmbaka ɔshɛtɛ wa sheke wa Jehowa ate: 26 “Nyɔshi dibuku di’Ɛlɛmbɛ+ nɛ kele nyodikitsha l’omamu w’ɔshɛtɛ wa sheke+ wa Jehowa Nzambi kanyu, ko diɔ diayonga oko ɔmɛnyi laawɔ lo dikambo dianyu. 27 Nɛ dia dimɛ mbeyaka dimɛna woho wenyu atɔmbɔki+ ndo ɛtɛ wolo.+ Naka nyekɔ lo tɔmbɔkwɛ Jehowa etena kekemi la lɔsɛnɔ kaamɛ la nyu, kete hoke l’ɔkɔngɔ wa nyɔi kami! 28 Nyosanganya dikumanyi tshɛ dia waoho anyu ndo topita tanyu la ntondo kami kele mbate ɛtɛkɛta ɛnɛ lo atoyi awɔ ndo kele mbɔshi olongo la nkɛtɛ oko ɛmɛnyi lo dikambo diawɔ.+ 29 Nɛ dia dimi mbeyaka dimɛna dia l’ɔkɔngɔ wa nyɔi kami, ndooko onyake nyayoyosala akambo wa kɔlɔ+ ndo nyayoyotakɔ mboka kakamanyodjangɛ. Ndo ndooko onyake mpokoso kayonyokomɛ+ lo ekomelo ka nshi, nɛ dia nyayosala kɛnɛ kele kɔlɔ lo washo wa Jehowa ndo nyayowokiya nkɛlɛ l’ɔtɛ w’elimu w’anya anyu.”

30 Oma laasɔ, Mɔsɛ akate awui wa l’osambo akɔ oma lo etatelo polo lo ekomelo+ lo atoyi w’etshumanelo k’otondo k’Isariyɛlɛ ate:

 3 Nɛ dia dimi layewoya lokombo la Jehowa.+

Nyɔtɛkɛtɛ dikambo dia woke woke wa Nzambi kaso!+

 5 Vɔ wele wanɛ wakasale akambo lo yoho ya kɔlɔ.+

Vɔ keema anande, diwadi diekɔ diawɔ.+

Vɔ wekɔ lɔlɔnga la wɛngɛngɛ ndo la kɔlɔ!+

15 Lam’akanune Jeshuruna,* nde akatɔmbɔkɔ.

Wɛ ambonuna, wɛ aya woke, wɛ ambɔmɛtanɛ.+

29 Otowonga la lomba lee!+ Tshike vɔ wotokana yimba lo dikambo sɔ.+

Vɔ wotokanyiya kɛnɛ kayowakomɛ.+

Tɔ temale ndo tanyokimanyiya.

Tɔ tayale dihole dianyu di’eshamelo.

Dimi ndjakaka, ndo dimi mbishaka lɔsɛnɔ.+

44 Ko Mɔsɛ akaye ndo akate nto ɛtɛkɛta tshɛ wele l’osambo ɔnɛ lo atoyi w’anto,+ nde la Hɔshɛya*+ ɔna Nuna. 45 L’ɔkɔngɔ wa Mɔsɛ nshidiya mbutɛ ase Isariyɛlɛ tshɛ ɛtɛkɛta ɛsɔ tshɛ, 46 nde akawatɛ ate: “Nyodje ɛtɛkɛta tshɛ wanyɔhɛmɔlami ɛlɔ+ lo otema, dia nyu ndjodjangɛ ananyu dia vɔ monga la yambalo dia nkitanyiya awui tshɛ w’Ɛlɛmbɛ ɛnɛ.+ 47 Nɛ dia ɔnɛ bu ɔtɛkɛta w’anyanya le nyu, koko vɔ nembetshiyaka lɔsɛnɔ lanyu,+ ndo oma l’ɔtɛkɛta akɔ mbakokanyu nsɛna edja lo wodja wayanganyu ntehɔ Jɔrdana dia tɔsa.”

48 Jehowa akatɛ Mɔsɛ ko lushi lakɔ laamɛ ate: 49 “Dɛ lo dikona di’Abarimɛ+ nɛ, l’okongo wa Nɛbɔ+ wele lo nkɛtɛ ya Mɔaba, mbɛlanɛ la Jeriko kele tende wodja wa Kanana wayangami mbisha ase Isariyɛlɛ.+ 50 Oma laasɔ, wɛ ayovɔ lo dikona diayangayɛ mbidɛ ndo wɛ ayoyela watshɛyɛ,* oko wakavu ɔnanyɔ Arɔna lo Dikona dia Hɔra+ ko nde ndjela watshɛnde, 51 nɛ dia nyu akɔ 2 komonga la kɔlamelo le mi l’atei w’ase Isariyɛlɛ lo ashi wa la Meriba+ ka la Kadɛshɛ, l’oswe wa Zinɛ, dikambo nyu kokidiami la ntondo k’ase Isariyɛlɛ.+ 52 Wɛ ayɛna wodja akɔ oma l’etale, koko wɛ hatɔtɔ lo wodja wayangami mbisha ase Isariyɛlɛ.”+

33 Ɔnɛ ele ɔtshɔkɔ wakatshɔkɔla Mɔsɛ okambi wa Nzambi ka mɛtɛ ase Isariyɛlɛ la ntondo ka nde mvɔ.+ 2 Nde akate ate:

 7 Nde akatshɔkɔla Juda+ ate:

 8 Lo dikambo dia Lɛwi, nde akate ate:+

12 Lo dikambo dia Bɛnjamina, nde akate ate:+

13 Lo dikambo dia Yɔsɛfu, nde akate ate:+

18 Lo dikambo dia Zebuluna, nde akate ate:+

19 Vɔ wayelɛ anto lo dikona.

Lɛkɔ mbayowotolambola elambo wa losembwe.

20 Lo dikambo dia Ngada, nde akate ate:+

“Ɔnɛ lataloya elelo wa Ngada atshɔkwame.+

Ɛtɛ wa wodja wayotshumana kaamɛ.

22 Lo dikambo dia Danɛ, nde akate ate:+

“Danɛ ekɔ ɔna ntambwɛ.+

Nde ayofumbɔ oma la Bashana.”+

23 Lo dikambo dia Nafɛtali, nde akate ate:+

Ɔsa lɛkɛ la lo owɛstɛ ndo la lo sidɛ.”

24 Lo dikambo dia Ashɛrɛ, nde akate ate:+

“Ashɛrɛ atshɔkwame la ana.

29 Isariyɛlɛ le, wɛ ekɔ l’ɔngɛnɔngɛnɔ!+

34 Oma laasɔ, Mɔsɛ akamɔ oma lo laandja l’oswe wa Mɔaba ko akadɛ lo Dikona dia Nɛbɔ,+ la shɔdi ya Pisinga+ mbɛlanɛ la Jeriko.+ Ko Jehowa akawɛnya wodja w’otondo, oma la Ngiliyadɛ polo la Danɛ,+ 2 ndo Nafɛtali k’otondo la ɛtshi ka nkɛtɛ ka Efrayimɛ ndo ka Manase, ndo ɛtshi ka nkɛtɛ ka Juda k’otondo polo lo owɛstɛ wa ndjale,*+ 3 ndo Nɛngɛbɛ+ la Distrikɛ+ dia Jɔrdana, okidi w’ebamubamu wa Jeriko, osomba w’atoko, polo la Zɔara.+

4 Ko Jehowa akawotɛ ate: “Ɔnɛ kele wodja wakamatshibɛ Abrahama, Isaka la Jakɔbɔ nte: ‘Dimi layowosha tokanula* tayɛ.’+ Lambokɛnyawɔ la washo, koko wɛ hatotehɔ dia ntshɔ lɛkɔ.”+

5 L’ɔkɔngɔ wa laasɔ, Mɔsɛ okambi wa Jehowa akavu lɛkɔ, lo ɛtshi ka nkɛtɛ ka Mɔaba, oko wakate Jehowa.+ 6 Nde akookundɛ l’okidi wa lo ɛtshi ka nkɛtɛ ka Mɔaba mbɛlanɛ la Bɛtɛ-Pɛɔrɛ, ndo ndooko onto leya lɛnɛ ele diombo diande polo ndo ɛlɔ.+ 7 Mɔsɛ aki la ɛnɔnyi 120 etena kakandavu.+ Washo ande kɔnɛmba ndo wolo ande koshila. 8 Ase Isariyɛlɛ wakalele Mɔsɛ lo laandja l’oswe wa Mɔaba l’edja ka nshi 30.+ Oma laasɔ, nshi ya delo ndo y’otanda wa Mɔsɛ yakashile.

9 Jashua ɔna Nuna akalole la nyuma ka lomba, nɛ dia Mɔsɛ akawahɛ anya.+ Ko ase Isariyɛlɛ wakatatɛ mbohokamɛ ndo wakasale oko wakadjangɛ Jehowa Mɔsɛ.+ 10 Koko ndooko omvutshi wakayala nto pondjo lo Isariyɛlɛ oko Mɔsɛ+ lele Jehowa akaweyaka elungi lo elungi.+ 11 Nde akasale akambo wa diambo tshɛ ndo ahindo wakootome Jehowa dia nde tosala lo wodja w’Edjibito le Farawɔ, le ekambi ande tshɛ ndo lo wodja ande w’otondo,+ 12 kaamɛ la lonya la wolo ndo akambo wa diambo wakasale Mɔsɛ lo washo w’ase Isariyɛlɛ tshɛ.+