NƐHƐMIYA

1 Ɛtɛkɛta wa Nɛhɛmiya*+ ɔna Hakaliya vɔ ɛnɛ: Lo ngɔndɔ ka Kislɛvɛ,* l’ɔnɔnyi wa 20,* dimi laki la Shushana*+ dihole di’eshamelo.* 2 L’etena kɛsɔ, Hanani,+ ɔnalengo ɔmɔtshi akaye kaamɛ la apami akina w’oma la Juda, ko dimi lakawambola awui wendana la atshikadi w’ase Juda waki kɔtɔlama lo lɔhɔmbɔ+ ndo wendana la Jɛrusalɛma. 3 Vɔ wakakadimola vate: “Wanɛ wotshikadi lɛkɔ lo prɔvɛnsɛ waki kɔtɔlama lo lɔhɔmbɔ wekɔ lo okakatanu wa wolo ndo lo nsɔnyi.+ Mpele dia Jɛrusalɛma diambonyukɔ+ ndo nkuke ya lo asoko ayɔ yakatshumbama la dja.”+

4 Kam’akamoke awui asɔ, dimi lakadjasɛ, ko lakatatɛ ndela l’edja ka nshi efula ndo dimi lakatetemala nkila mbo ya ndɛ+ ndo nɔmba la ntondo ka Nzambi ka l’olongo. 5 Lakate nte: “Jehowa Nzambi ka l’olongo le, wɛ Nzambi ka woke ndo ka diambo efula katolamaka sheke yayɛ ndo katɛnyaka ngandji kayɛ ka kɔlamelo le wanɛ wakooka ngandji ndo wakitanyiya ɛlɛmbɛ ayɛ.+ 6 Lam’alangayɛ, ohokɛ toyi ndo odihole washo ayɛ dia mpokamɛ dɔmbɛlɔ dia okambi ayɛ diakɔlɔmbami ɛlɔ otsho la yanyi+ lo kɛnɛ kendana la ekambi ayɛ w’ase Isariyɛlɛ, etena tshɛ kasholami pɛkato yakakosalɛ ase Isariyɛlɛ. Dimi l’ase luudu la papa+ takasale pɛkato. 7 Sho mɛtɛ takakosalɛ akambo lo yoho ya kɔlɔ+ lo woho wakiso konama ɛlɛmbɛ, wadjango ndo tɛdikɔ takayasha okambi ayɛ Mɔsɛ.+

8 “Lam’alangayɛ, ohɔ ɔtɛkɛta wakayatɛ* okambi ayɛ Mɔsɛ wate: ‘Naka nyu nshisha kɔlamelo, dimi layonyohandjola l’atei wa wedja.+ 9 Ko naka nyambokalola le mi ko nyamboyela ɛlɛmbɛ ami ndo nyambaakitanyiya, oyadi kaanga anto anyu wakahandjɔnɛ polo la koma y’olongo, dimi layowaela+ oma lɛkɔ ndo layowatshumanya lo dihole diakamasɔnɛ dia mbidjashiya+ lokombo lami.’ 10 Vɔ wekɔ ekambi ayɛ ndo anto ayɛ wakayatshungola la wolo ayɛ w’efula ndo la lonya layɛ la wolo.+ 11 Jehowa le, lam’alangayɛ, ohokɛ toyi lo dɔmbɛlɔ dia okambi ayɛ ndo lo dɔmbɛlɔ dia ekambi ayɛ wangɛnangɛna dia mboka lokombo layɛ wɔma, ndo lam’alangayɛ, okimanyiya okambi ayɛ ɛlɔ dia nde mpomɔ lokolo l’ɔlɔ ndo onkimanyiya dia pami kɛnɛ mbokami kɛtshi.”+

L’etena kɛsɔ, dimi kakadjɛka nkumekanga+ wanu lo dikɔhɔ.

2 Lo ngɔndɔ ka Nisana,* l’ɔnɔnyi wa 20+ w’ɛlɔmbwɛlɔ ka nkumekanga Aratashasha,+ wanu wakakitshama la ntondo kande ndo dimi lakɔshi wanu akɔ oko mbala nkina ko lakasha nkumekanga.+ Koko ndooko lushi lakimi la otshutshumalo la ntondo kande. 2 Ko nkumekanga akambutɛ ate: “Aha hemɔ kele la yɛ, ko lande na katshutshumalayɛ nganɛ? Ɔnɛ ekɔ la dia monga otshutshumalo wa l’otema.” Ko lakoke wɔma w’efula.

3 Oma laasɔ, lakatɛ nkumekanga nte: “Nkumekanga, olombe! Lande na kahamatshutshumala lam’ele osomba wa lɛnɛ akakundɛma watshɛmi waya tɔngɔ to, ndo nkuke y’asoko awɔ yambolongola la dja?”+ 4 Ko nkumekanga akamimbola ate: “Kakɔna kayangayɛ?” Mbala kakɔ ɔtɔi dimi lakalɔmbɛ Nzambi ka l’olongo.+ 5 Oma laasɔ, lakatɛ nkumekanga nte: “Naka wɛ nkumekanga nangaka ndo naka okambi ayɛ ambohomɔ lokolo l’ɔlɔ la ntondo kayɛ, onkimɔ ntshu otsha la Juda, l’osomba wa lɛnɛ akakundɛma watshɛmi dia dimi towoka nto.”+ 6 Ko nkumekanga akamimbola etena kakadjasɛ wadi aki nkumekanga l’omamu ande ate: “Lɔkɛndɔ layɛ layɔsa nshi ngana ndo etena kakɔna kayoyokalola?” Ɔnkɔnɛ, nkumekanga akangɛnangɛna dia kimɔmi,+ ko dimi lakooshikikɛ etena.+

7 Oma laasɔ, lakatɛ nkumekanga nte: “Naka wɛ nkumekanga nangaka, wambisha mikanda otsha le nguvɛrnɛrɛ ya l’ɛtshi ka nkɛtɛ ka la Wedi w’Ɔkɛdi*+ dia vɔ mbetshami la ki polo la Juda, 8 kaamɛ ndo mukanda wa tɔlɛ Asafu olami w’okonda wa nkumekanga, dia nde mbishami esongo wa nsala abaya wa nkuke ya Longele+ la Luudu* ndo ya lo mpele dia osomba+ la ya lo luudu layomotodjasɛ.” Ko nkumekanga akambishawɔ,+ nɛ dia lonya l’ɔlɔlɔ la Nzambi kami laki kaamɛ la mi.+

9 L’ɔkɔngɔ diko, lakatokoma le nguvɛrnɛrɛ ya l’ɛtshi ka nkɛtɛ ka la Wedi w’Ɔkɛdi, ko lakawasha mikanda w’oma le nkumekanga. Ndo nto, nkumekanga akambisha ewandji w’asɔlayi ndo ambahemi wa mfalasa dia ntshɔ kaamɛ la mi. 10 Lam’akoke Sanabalata+ ose Hɔrɔna nde la Tobiya+ ɔlɔhɛ* w’ose Amɔna+ dui sɔ, vɔ kɔngɛnangɛna kaanga yema tshitshɛ dia onto ɔmɔtshi ndja ndjosalɛ ase Isariyɛlɛ dikambo di’ɔlɔlɔ.

11 L’edjedja ka wonya, lakatokoma la Jɛrusalɛma ko lakatshikala lɛkɔ l’edja ka nshi 3. 12 Dimi lakonɛɛ l’otsho, dimi l’apami amɔtshi waki kaamɛ la mi, ndo dimi kombutɛ ndooko onto kɛnɛ kakadje Nzambi kami l’otema ami dia nsala dikambo dia Jɛrusalɛma, ndo dimi komonga ndooko la nyama paka kɛnɛ kakamaahema. 13 Ko dimi lakete l’otsho oma lo Soko+ dia l’Okidi, lakete la ntondo ka Ɛtɛkɔ k’Oloyi wa Woke polo la Soko dia Tota di’Otoko,+ lakasɛdingola mpele dia Jɛrusalɛma diakanyukɔ ndo nkuke y’asoko ayɔ yakalongola la dja.+ 14 Dimi lakete l’omamu wa Soko di’Ɛtɛkɔ+ polo ndo l’Oduwa wa nkumekanga, ndo dihole komonga kambe dia nyama kakamatahemaka mbeta. 15 Koko lakatetemala la lɔkɛndɔ lo okidi+ akɔ l’otsho ndo lakatetemala nsɛdingola ehele; l’ɔkɔngɔ wa laasɔ, lakakalola ndo lakɔtɔ oma lo Soko dia l’Okidi, ko lakakalola.

16 Topita tolɛ+ kombeya lɛnɛ akamatshu ndo kɛnɛ kakamasalaka, nɛ dia laasɔ ko latatɛ ase Juda, ɛlɔmbɛdi, ɛlɔhɛ, topita tolɛ ndo ekambi ekina w’olimu ndooko dui. 17 L’edjedja ka wonya, lakayowatɛ nte: “Ondo nyekɔ lo mɛna okakatanu wa wolo wele la so, woho wambolana Jɛrusalɛma ndo woho wambotshumbama nkuke ya l’asoko ayɔ la dja. Nyoye toke nto mpele dia Jɛrusalɛma, diaha sho ntetemala monga lo nsɔnyi nganɛ.” 18 Oma laasɔ, dimi lakawatɛ woho waki lonya l’ɔlɔlɔ la Nzambi kami kaamɛ la mi+ ndo awui wakambutɛ nkumekanga.+ Ko vɔ wakate vate: “Nyɛsɔ temale kele toke.” Ɔnkɔnɛ, vɔ wakayakeketsha* dia nkamba olimu w’ɔlɔlɔ.+

19 Lam’akoke Sanabalata ose Hɔrɔna, Tobiya+ ɔlɔhɛ* w’ose Amɔna+ ndo Ngɛshɛmɛ ose Arabiya+ dui sɔ, vɔ wakatatɛ tɔɔla+ ndo wakatɔnyɔla ko wakate vate: “Kakɔna kasalanyu? Onde nyɔɔtɔmbɔkwɛ nkumekanga?”+ 20 Ko dimi lakakadimola nte: “Nzambi ka l’olongo kayotokimanyiya dia sho ntondoya,+ ndo sho ekambi ande tayemala, ko tayoka; koko la Jɛrusalɛma,+ ndooko kele kanyu, nyu ndooko la lotshungɔ ndo ndooko la eohwelo.”

3 Eliyashibɛ+ ɔlɔmbɛdi a laadiko nde l’ɛlɔmbɛdi w’anango wakemala dia mbika Soko di’Ɛkɔkɔ.+ Vɔ wakadikidia*+ ndo wakongɛɛ nkuke ya lɔkɔ; vɔ wakadikidia polo lo Tshoto ya Mea,+ polo ndo lo Tshoto ya Hananɛlɛ.+ 2 Oma lalewɔ, apami w’ase Jeriko+ wakakaka; ndo oma lalewɔ, Zakura ɔna Imiri akakaka.

3 Ana w’apami wa Hasɛna wakake Soko dia Nse;+ vɔ wakadje esembe lɔkɔ+ ko wakongɛɛ nkuke ya lɔkɔ, kɔkɔmɔ yayɔ ndo tokengete tayɔ. 4 Oma lalewɔ, Mɛrɛmɔtɛ+ ɔna Uridja ɔna Hakɔzɛ akakambe olimu w’ɔlɔngɔswɛlɔ; oma lalewɔ, Meshulama+ ɔna Bɛrɛkiya ɔna Meshɛzabɛlɛ akakambe olimu w’ɔlɔngɔswɛlɔ; ndo oma lalewɔ, Zadɔka ɔna Baana akakambe olimu w’ɔlɔngɔswɛlɔ. 5 Oma lalewɔ, aseka Tekoa+ wakakambe olimu w’ɔlɔngɔswɛlɔ, koko apami awɔ wa lokumu kondjakitshakitsha dia mbisha lonya* lo olimu wa nkumi yawɔ.

6 Joyada ɔna Pasea nde la Meshulama ɔna Besodiya wakalɔngɔsɔla Soko di’Osomba w’Edjedja;+ vɔ wakadje esembe lɔkɔ, ko wakongɛɛ nkuke ya lɔkɔ, kɔkɔmɔ yayɔ ndo tokengete tayɔ. 7 Oma lalewɔ, Melatiya ose Ngibiyɔna+ nde la Jadɔna ose Merɔnɔtɛ wakakambe olimu w’ɔlɔngɔswɛlɔ, apami w’ase Ngibiyɔna ndo Mizipa+ waki l’ɛse ka lowandji la* nguvɛrnɛrɛ ka l’ɛtshi ka nkɛtɛ ka la Wedi w’Ɔkɛdi.*+ 8 Oma lalewɔ, Uziyɛlɛ ɔna Haraya, ɔnɛ laki otshudi wa yaandjo wakamba la paonyi akakambe olimu w’ɔlɔngɔswɛlɔ; oma lalende, Hananiya, ɔmɔtshi l’atei w’asɔhi* w’esɔ k’okitelo akakambe olimu w’ɔlɔngɔswɛlɔ; vɔ wakadje odihe* wa Jɛrusalɛma polo l’Ehele k’otale.+ 9 Oma lalewɔ, Rɛfaya ɔna Hura, owandji wa k’ahende ɔtɔi ka distrikɛ dia Jɛrusalɛma akakambe olimu w’ɔlɔngɔswɛlɔ. 10 Oma lalewɔ, Jedaya ɔna Harumafu akakambe olimu w’ɔlɔngɔswɛlɔ mbɛlanɛ la luudu lande hita; ndo oma lalende, Hatushɛ ɔna Hashabineya akakambe olimu w’ɔlɔngɔswɛlɔ.

11 Malakidja ɔna Harimɛ+ nde la Hashubɛ ɔna Pahata-Mɔaba+ wakalɔngɔsɔla etenyi kekina,* mbidja ndo Tshoto ya Nkuka.+ 12 Oma lalewɔ, Shaluma ɔna Halɔhɛshɛ, owandji wa k’ahende ɔtɔi ka distrikɛ dia Jɛrusalɛma akakambe olimu w’ɔlɔngɔswɛlɔ kaamɛ la anande wa wamato.

13 Hanuna nde la wanɛ wakadjasɛka la Zanoa+ wakalɔngɔsɔla Soko dia l’Okidi;+ vɔ wakadihike ko wakongɛɛ nkuke ya lɔkɔ, kɔkɔmɔ yayɔ ndo tokengete tayɔ, ndo vɔ wakalɔngɔsɔla ehele kubita kinunu (1 000)* polo la Soko dia Tota di’Otoko.+ 14 Malakidja ɔna Rɛkabɛ, owandji wa distrikɛ dia Bɛtɛ-Hakɛrɛma+ akalɔngɔsɔla Soko dia Tota di’Otoko; nde akadihike ko akongɛɛ nkuke ya lɔkɔ, kɔkɔmɔ yayɔ ndo tokengete tayɔ.

15 Shaluna ɔna Kɔlɔhɔzɛ, owandji wa distrikɛ dia Mizipa+ akalɔngɔsɔla Soko di’Ɛtɛkɔ;+ nde akadihike ndo akasale dɛfu diadiɔ, akongɛɛ nkuke ya lɔkɔ, kɔkɔmɔ yayɔ ndo tokengete tayɔ; ndo nto, nde akalɔngɔsɔla ehele k’Oduwa w’ashi+ wa lɛtɔya* watshɔ otsha lo Jardɛ+ ya nkumekanga polo lo Kibandola+ kakayaka oma l’Osomba wa Davidɛ.+

16 L’ɔkɔngɔ ande, Nɛhɛmiya ɔna Azibukɛ, owandji wa k’ahende ɔtɔi ka distrikɛ dia Bɛtɛ-Zurɛ+ akakambe olimu w’ɔlɔngɔswɛlɔ mbɛlanɛ la waombo wa Davidɛ+ polo l’oduwa+ wa losala ndo polo lo Luudu la akanga wa wolo.

17 L’ɔkɔngɔ ande, ase Lɛwi anɛ wakakambe olimu w’ɔlɔngɔswɛlɔ: Rɛhumɛ ɔna Bani; oma lalende ko Hashabiya, owandji wa k’ahende ɔtɔi ka distrikɛ dia Keila+ nde lawɔ akakambe olimu w’ɔlɔngɔswɛlɔ dikambo dia distrikɛ diande. 18 L’ɔkɔngɔ ande, anangɛwɔ anɛ wakakambe olimu w’ɔlɔngɔswɛlɔ: Bavai ɔna Henadada, owandji wa k’ahende ɔtɔi ka distrikɛ dia Keila.

19 Oma lalende, Ezɛrɛ ɔna Jeshua,+ owandji wa la Mizipa akalɔngɔsɔlaka etenyi kekina kɛlane la wodelo w’otsha lo Eombelo ka dihomɔ dia ta kele lo Esukɔ+ w’ehele.

20 L’ɔkɔngɔ ande, Baruka ɔna Zabai+ akakambe la wangasanu tshɛ ndo akalɔngɔsɔla etenyi kekina, oma lo Esukɔ w’ehele polo lo mbɔtwɛlɔ ka luudu la Eliyashibɛ+ ɔlɔmbɛdi a laadiko.

21 L’ɔkɔngɔ ande, Mɛrɛmɔtɛ+ ɔna Uridja ɔna Hakɔzɛ akalɔngɔsɔla etenyi kekina, oma lo mbɔtwɛlɔ ka luudu la Eliyashibɛ polo la koma ya luudu la Eliyashibɛ.

22 L’ɔkɔngɔ ande, ɛlɔmbɛdi, apami wa lo distrikɛ dia Jɔrdana*+ wakakambe olimu w’ɔlɔngɔswɛlɔ. 23 L’ɔkɔngɔ awɔ, Bɛnjamina nde la Hashubɛ wakakambe olimu w’ɔlɔngɔswɛlɔ mbɛlanɛ la luudu lawɔ. L’ɔkɔngɔ awɔ, Azariya ɔna Maseya ɔna Ananiya akakambe olimu w’ɔlɔngɔswɛlɔ suke la luudu lande hita. 24 L’ɔkɔngɔ ande, Binui ɔna Henadada akalɔngɔsɔla etenyi kekina, oma lo luudu la Azariya polo lo Esukɔ+ w’ehele ndo polo lo tshuku.

25 L’ɔkɔngɔ ande, Palala ɔna Uzai akakambe olimu w’ɔlɔngɔswɛlɔ mbɛlanɛ la Esukɔ w’ehele ndo tshoto yatomba oma lo Luudu la nkumekanga*+ la la diko laki lo Sɛkɛ dia Olamelo.+ L’ɔkɔngɔ ande kaki Pedaya ɔna Parɔshɛ.+

26 Ekambi wa lo tɛmpɛlɔ*+ wakadjasɛka la Ɔfɛlɛ+ wakakambe olimu w’ɔlɔngɔswɛlɔ polo la ntondo ka Soko di’Ashi+ lo ɛstɛ ndo tshoto yatomba l’andja.

27 L’ɔkɔngɔ awɔ, aseka Tekoa+ wakalɔngɔsɔla etenyi kekina, oma la ntondo ka tshoto yatomba l’andja polo l’ehele ka Ɔfɛlɛ.

28 Ɛlɔmbɛdi wakakambe olimu w’ɔlɔngɔswɛlɔ la diko dia Soko dia Mfalasa,+ onto l’onto mbɛlanɛ la luudu lande hita.

29 L’ɔkɔngɔ awɔ, Zadɔka+ ɔna Imɛrɛ akakambe olimu w’ɔlɔngɔswɛlɔ mbɛlanɛ la luudu lande hita.

L’ɔkɔngɔ ande, Shemaya ɔna Shekaniya, olami wa Soko dia lo ɛstɛ+ akakambe olimu w’ɔlɔngɔswɛlɔ.

30 L’ɔkɔngɔ ande, Hananiya ɔna Shelemiya nde la Hanuna ɔna la 6 laki Zalafu wakalɔngɔsɔla etenyi kekina.

L’ɔkɔngɔ ande, Meshulama+ ɔna Bɛrɛkiya akakambe olimu w’ɔlɔngɔswɛlɔ mbɛlanɛ la luudu lande hita.

31 L’ɔkɔngɔ ande, Malakidja, ose tshunda dia aseka etshudi wa yaandjo wakamba la paonyi akakambe olimu w’ɔlɔngɔswɛlɔ polo lo luudu la ekambi wa lo tɛmpɛlɔ*+ ndo la amundji w’okanda, mbɛlanɛ la Soko di’Ɔsɛdingwelo ndo polo lo luudu la ndala la la diko la lo tshuku.

32 Ndo etshudi wa yaandjo wakamba la paonyi vɔ la amundji w’okanda wakakambe olimu w’ɔlɔngɔswɛlɔ lam’asa luudu la ndala la la diko la lo tshuku la Soko di’Ɛkɔkɔ.+

4 Kam’akoke Sanabalata+ dia tekɔ lo mbika nto ehele ka lokombo, nde akomala ndo akatshimbe wɔɔngɔ* efula, ko akatetemala nsɔka ase Juda. 2 Nde akate la ntondo k’anango ndo k’asɔlayi w’ase Samariya ate: “Kakɔna kasala ase Juda w’ɛhɔdu anɛ? Onde vɔ wayosala vɔamɛ? Onde wayolambola elambo? Onde wayoshidiya lushi lɔmɔtshi? Onde wayolola ave anɛ wakalongola oma lo tota dia otoko?”+

3 Ko Tobiya+ ose Amɔna+ lakemala suke la nde akate ate: “Naka kaanga ɔkɛngɛ mbidɛ lo kɛnɛ kakawɔ, vɔ wayonyukola ehele kawɔ k’ave.”

4 Nzambi kaso le, ohokame nɛ dia wekɔ lo tɔnyɔla+ ndo okadimole diɔnyɔ diawɔ lo ɛtɛ awɔ,+ ndo owakimɔ lo wodja wa lɔhɔmbɔ oko diangɔ dia dimbo. 5 Tokombake onongo awɔ ndo tetawɔke dia pɛkato kawɔ nimɔ oma la ntondo kayɛ,+ nɛ dia vɔ wambɔtɛnga ambiki.

6 Ɔnkɔnɛ takatetemala mbika ehele kakɔ, ko ehele ka lokombo k’otondo kakasangana ndo kakakama polo lo tanga dia l’atei atei, ndo anto wakatetemala mbidja etema awɔ tshɛ l’olimu.

7 Kam’akoke Sanabalata, Tobiya,+ ase Arabiya,+ ase Amɔna ndo ase Ashidɔdɛ+ dia olimu w’ɔlɔngɔswɛlɔ wa mpele dia lokombo la Jɛrusalɛma wekɔ lo tatshu otsha la ntondo ndo dia wesho wambodihama, vɔ wakoke nkɛlɛ k’efula. 8 Vɔ wakɔtɔ sheke dia ndɔsha Jɛrusalɛma ndo dia mbidja ofukutanu lɔkɔ. 9 Koko takalɔmbɛ Nzambi kaso ndo takakitsha alami dia namaka otsho la yanyi l’ɔtɛ awɔ.

10 Koko ase Juda wakataka vate: “Wolo w’ekambi w’olimu wamboshila, koko mindo yeke efula; hatongaki pondjo la akoka wa mbika ehele kɛnɛ ka lokombo.”

11 Atunyi aso wakataka vate: “La ntondo ka vɔ mbeya ndo ka vɔ tɛɛna, sho tayoya l’atei awɔ, tayowadiaka, ko tayemadia olimu.”

12 Etena tshɛ kakayaka ase Juda wakadjasɛka suke la wɔ, vɔ wakatotɛka mbala la mbala* vate: “Vɔ wayotɔtwɛ oma lo bɛkɛ tshɛ.”

13 Ko dimi lakakitsha apami lo ahole wa l’ɛse wa l’otshimba w’ehele ka lokombo lo ahole wa hwe, ndo dimi lakaakitsha lo ndjela nkumbo la nkumbo kaamɛ la tokuwa tawɔ ta ta, akɔnga awɔ ndo eta awɔ. 14 Lam’akamɛnyi dia vɔ wekɔ la wɔma, mbala kakɔ ɔtɔi dimi lakemala, ko lakatɛ ɛlɔhɛ+ la topita tolɛ ndo anto akina tshɛ nte: “Tanyowaokake wɔma.+ Nyohɔ Jehowa, ɔnɛ lele woke ndo lahomba mbokama wɔma;+ kele nyɔlwɛlɛ anangɛnyu, ananyu w’apami, ananyu wa wamato, wadiɛnyu ndo mvudu yanyu ta.”

15 Lam’akoke atunyi aso dia tambeya kɛnɛ kakawasalaka ndo dia Nzambi ka mɛtɛ ambofukutanya sangwelo diawɔ, sho tshɛ takakalola dia tokamba lo ehele ka lokombo. 16 Oma ko lushi lɔsɔ, k’ahende ɔtɔi k’apami ami wakakambaka olimu+ ndo k’ahende ɔtɔi ka l’atei awɔ wakakimɛka akɔnga, dingawo, eta ndo akɔti wa mbolo wa mposo mposo. Ko ewandji+ wakemala l’ɔkɔngɔ wa nkumbo k’otondo ka Juda 17 wanɛ wakakaka ehele ka lokombo. Wanɛ wakɛmbaka wetsho wakakambaka olimu lonya ɔtɔi ko nkimɛ ehomɔ ka ta* lonya lokina. 18 Ombiki tshɛ aki la lokuwa la ta lo lokende lande etena kakandakaka, ndo ɔnɛ lakadaka wɔɔndjɔ+ akemalaka suke la mi.

19 Oma laasɔ, dimi lakatɛ ɛlɔhɛ la topita tolɛ ndo anto akina tshɛ nte: “Olimu wekɔ efula ndo woke, koko sho tambohandjɔnɛ lo ehele ka lokombo, ɔnɛ lɛnɛ ɔnɛ lɛnɛ. 20 Lam’ayonyoka wondjo wa wɔɔndjɔ, kanyotshumane lɛnɛ eeso. Nzambi kaso ayotɔlwɛlɛ ta.”+

21 Ɔnkɔnɛ, takatetemala nkamba etena kele k’ahende ɔtɔi kekina wakakimɛka akɔnga, oma ko yosose polo lam’akatombaka tɔɔtɔ. 22 L’etena kɛsɔ, dimi lakatɛ wodja nte: “Apami kawetshake otsho l’etei ka Jɛrusalɛma, onto l’onto la okambi ande, ndo vɔ wayotolamaka l’otsho ko kambaka la yanyi.” 23 Ɔnkɔnɛ oyadi dimi, analengo, ekambi ami+ kana alami wakandjele, sho kokolola ahɔndɔ aso ndo onto l’onto l’atei aso akakimɛ ehomɔ kande ka ta lo lonya lande l’omi.

5 Koko anto la wadiɛwɔ wakadɛ anangɛwɔ+ w’ase Juda ekoko wa wolo. 2 Amɔtshi wakataka vate: “Sho la anaso w’apami la anaso wa wamato tekɔ efula. Watosha mbo ya ndɛ dia sho ntshikala la lɔsɛnɔ.” 3 Akina wakataka vate: “Tayanga nkimɔ dikambɔ diaso ndo dikambɔ diaso dia vinyɔ la mvudu yaso ɔkɔlɛ dia sho nkondja mbo ya ndɛka lo nshi ya ndjala ka kasha.” 4 Akina nto wakataka vate: “Sho takatshungɛ dikambɔ diaso ndo dikambɔ diaso dia vinyɔ dia nkondja falanga ya mfuta olambo wa nkumekanga.+ 5 Sho la anangɛso tekɔ demba ɔtɔi ndo dikila ɔtɔi,* ndo anaso wekɔ oko anawɔ; koko sho pombaka nkimɔ anaso w’apami la anaso wa wamato lo lɔhɔmbɔ, ndo anaso amɔtshi wa wamato wamboshilaka monga lo lɔhɔmbɔ.+ Koko sho bu la wolo wa nkomiya dikambo sɔ, nɛ dia dikambɔ diaso ndo dikambɔ diaso dia vinyɔ diaya dia anto akina.”

6 Dimi lakomala nkɛlɛ k’efula lam’akamoke ekoko awɔ ndo ɛtɛkɛta ɛsɔ. 7 Ko lakasɛdingola akambo asɔ lo otema ami, ndo lakaanya ɛlɔhɛ la topita tolɛ, ko lakawatɛ nte: “Onto l’onto l’atei anyu ekɔ lo nyanga wahɔ oma le ɔnango hita.”+

Ndo nto, dimi lakakongɛ losanganya la woke l’ɔtɛ awɔ. 8 Ko lakawatɛ nte: “Lo yɛdikɔ yakoka, sho takakaloya anangɛso hita w’ase Juda wakasondjama lo wedja; ko onde wonya ɔnɛ nyolanga nsondja anangɛnyu hita,+ ndo onde vɔ pombaka sondjama nto le so?” Ko vɔ wakɔlama ki ndo vɔ kokondja ndooko dui dia mbuta. 9 Oma laasɔ, lakate nte: “Kɛnɛ kasalanyu bu dimɛna. Onde hanyokoke nkɛndakɛnda lo wɔma wa Nzambi+ kaso diaha wedja, mbuta ate atunyi aso tɔtɛnga? 10 Ndo nto, dimi la analengo ndo ekambi ami tayanga mbasɔndja falanga ndo ntɔngɔ. Lam’alanganyu, totshike mbasɔndja la wahɔ.+ 11 Lam’alanganyu, nyaakaloya ɛlɔ dikambɔ diawɔ,+ dikambɔ diawɔ dia vinyɔ, dikambɔ diawɔ di’ɔlivɛ ndo mvudu yawɔ kaamɛ ndo etenyi ɔtɔi ka lokama* ka falanga, ntɔngɔ, wanu w’eyoyo ndo esɔ kaalɔmbanyu dia vɔ nyosha oko wahɔ.”

12 Ko vɔ wakate vate: “Tayowakaloya diangɔ sɔ ndo hatotowalɔmba ndooko ɛngɔ. Tayosala paka oko watayɛ.” Ɔnkɔnɛ, dimi lakelɛ ɛlɔmbɛdi ko lakatshibia anto asɔ dia vɔ nkotsha daka sɔ. 13 Ndo nto, dimi lakaninginya difunda* dia lo dihɔndɔ* diami ko lakate nte: “Nzambi ka mɛtɛ aninginya luudu ndo diangɔ dia pami tshɛ kahatokotsha daka nɛ, ndo nde aninginyame ndo atshikale anyanya.” Ko etshumanelo k’otondo wakate vate: “Aamɛɛ!”* Ko vɔ wakatombola Jehowa ndo anto wakasale oko wakawalake.

14 Ndo nto, oma ko lushi lakandambisha ɔkɛndɛ wa monga nguvɛrnɛrɛ+ kawɔ lo ɛtshi ka nkɛtɛ ka Juda, oma l’ɔnɔnyi wa 20+ polo l’ɔnɔnyi wa 32+ w’ɛlɔmbwɛlɔ ka nkumekanga Aratashasha,+ ɛnɔnyi 12, oyadi dimi kana analengo, ndooko onto lakale mbo ya ndɛ yahomba nongola nguvɛrnɛrɛ.+ 15 Koko nguvɛrnɛrɛ y’edjedja yaki la ntondo kami wakɛndjaka wodja wotsho ndo wakɔsaka tɔshɛkɛlɛ* 40 ta mfɛsa oma le wɔ dikambo dia mapa la wanu lushi tshɛ. Ndo nto, ekambi awɔ wakahɛnyahɛnyaka anto. Koko dimi kosala ngasɔ+ l’ɔtɛ wa wɔma wa Nzambi.+

16 Laadiko dia laasɔ, dimi lakadje lonya lo olimu wa wokelo w’ehele ka lokombo, ndo sho kokondja+ ɛtshi ka nkɛtɛ; ekambi ami tshɛ wakasangana lɛkɔ dia nkamba olimu. 17 Ase Juda la topita tolɛ 150 wakalɛka lo mɛsa ami, mbidja ndo wanɛ wakayaka le so oma lo wedja ekina. 18 Lushi tshɛ, wakankatɛka* ngɔmbɛ 1, ɛkɔkɔ 6 w’amɛna ndo tofudu, ndo mbala 1 lo nshi 10, takongaka la weho tshɛ wa wanu lo yɛdikɔ y’efula. Kaanga mbaki akambo asɔ tshɛ, dimi konyanga mbo ya ndɛ yahomba nongola nguvɛrnɛrɛ, nɛ dia olimu waki wotsho le anto. 19 Nzambi kami le, ombohɔ lo yoho y’ɔlɔlɔ* lo kɛnɛ tshɛ kamomosala lo wahɔ w’anto anɛ.+

6 Kam’akoke Sanabalata, Tobiya,+ Ngɛshɛmɛ ose Arabiya+ ndo atunyi aso akina tshɛ dia dimi loka ehele+ ka lokombo nto, ndo ɔnɛ ndooko wosho weke lɔkɔ (kaanga mbele polo l’etena kɛsɔ ko latongɛɛ nkuke lo asoko),+ 2 mbala kakɔ ɔtɔi, Sanabalata nde la Ngɛshɛmɛ wakantomɛ dikɛndji ɔnɛ: “Yaka toyoshikikɛ etena ka sho mpomana lo tongelongelo ta lo Okidi w’Ebamubamu wa Ono.”+ Koko vɔ wakalɔngɔsɔlaka dia salɛmi kɔlɔ. 3 Ko dimi lakaatomɛ akɛndji dia towatɛ ɔnɛ: “Dimi lekɔ lo nkamba olimu w’efula ndo dimi haakoke ndja. Lande na katomemadia olimu lo mbotshika ko ndja le nyu?” 4 Vɔ wakantomɛ dikɛndji diakɔ diamɛ mbala 4 ndo dimi lakawashaka okadimwelo akɔ waamɛ mbala tshɛ.

5 Oma laasɔ, Sanabalata akatome okambi ande le mi la dikɛndji diakɔ diamɛ mbala ka 5, la mukanda wa hwe lo lonya lande. 6 Wakafunde lo mukanda akɔ ɔnɛ: “Dikambo diambokɛma lo wedja, ndo Ngɛshɛmɛ+ ekɔ lo mbuta dikambo diakɔ ɔnɛ wɛ l’ase Juda nyekɔ lo ndjalɔngɔsɔla dia ntɔmbɔkɔ.+ Diakɔ diakanyu ehele ka lokombo; ndo lo ndjela alapɔlɔ ɔsɔ, wɛ kahomba monga nkumekanga. 7 Ndo nto, wɛ akasɔnɛ amvutshi dia vɔ mbewoya lo dikambo diayɛ lo Jɛrusalɛma y’otondo ɔnɛ: ‘Nkumekanga kɛmɔtshi ekɔ la Juda!’ Wonya ɔnɛ, akambo asɔ wayokoma le nkumekanga. Ɔnkɔnɛ, yaka kele toyosawole kaamɛ.”

8 Koko dimi lakootomɛ okadimwelo ɔnɛ nte: “Lo awui asɔ tshɛ watayɛ, ndooko dui diambosalema; wɛmɛ kambaakolonganya lo ndjela ekanelo kayɛ hita.”* 9 Nɛ dia vɔ tshɛ wakasalaka la wolo dia tokiya wɔma, wata vate: “Anya awɔ wayɔtɛwɔ lo olimu, ko olimu hawotokambema nto.”+ Wonya ɔnɛ, lambokɔlɔmba dia wɛ nkeketsha anya ami.+

10 Oma laasɔ, dimi lakatshu lo luudu la Shemaya ɔna Delaya ɔna Mɛhɛtabɛlɛ etena kakandadihama lɛkɔ. Nde akate ate: “Nyoye tookane etena ka sho nsangana lo luudu la Nzambi ka mɛtɛ, lo tɛmpɛlɔ kele katodihe nkuke ya tɛmpɛlɔ, nɛ dia vɔ wekɔ lo ndjaye dia ndjokodiaka. Vɔ wekɔ lo ndjaye dia ndjokodiaka l’otsho.” 11 Koko dimi lakate nte: “Onde onto oko dimi ko tolawɔ? Onde onto oko dimi koka mbɔtɔ lo tɛmpɛlɔ ko ntshikala la lɔsɛnɔ?+ Dimi hantɔtɔ!” 12 Ko dimi lakashihodia dia Nzambi kombotoma, koko Tobiya nde la Sanabalata+ mbakoofute falanga dia nde ndjota prɔfɛsiya kɛsɔ lo dikambo diami. 13 Wakoofute falanga dia nde mbotshami wɔma ndo dia nde konyami dia nsala pɛkato la oyango wa vɔ monga la ɛkɔkɔ w’eshika wa ndanya lokumu lami dia mbishami nsɔnyi.

14 Nzambi kami le, ohɔ Tobiya+ nde la Sanabalata la etsha awɔ ɛsɔ, mbidja ndo Noadiya omvutshi wa womoto kaamɛ la amvutshi akina tshɛ wakatetemalaka nyanga dia mbotshami wɔma.

15 Ko ehele ka lokombo kakashile lo ngɔndɔ ka Elulu* nshi 25, l’edja ka nshi 52.

16 Kam’akoke atunyi aso tshɛ dui sɔ ndo lam’akɛnyi wedja tshɛ wakasukana la so dui sɔ, vɔ wakayala la nsɔnyi k’efula*+ ndo wakashihodia dia, la ekimanyielo ka Nzambi kaso mbakakambema olimu akɔ. 17 Lo nshi shɔ, ɛlɔhɛ+ wa la Juda wakatomɛka Tobiya mikanda efula, ko Tobiya akaakadimolaka. 18 Ase Juda efula wakatshibe dia monga la kɔlamelo le nde, nɛ dia nde aki omi aki ɔna Shekaniya ɔna Ara,+ ndo ɔnande Jɛhɔhanana akatshuke ɔna aki Meshulama+ ɔna Bɛrɛkiya. 19 Ndo nto tena tshɛ, vɔ wakambutɛka akambo w’ɛlɔlɔ wendana la nde, ko wakawotɛka kɛnɛ kakamataka. Ko Tobiya akatomaka mikanda dia mbotshami wɔma.+

7 Kam’akahikama ehele nto,+ dimi lakongɛɛ nkuke;+ oma laasɔ, alami w’asoko,+ amembi+ ndo ase Lɛwi+ wakasɔnama. 2 Ko dimi lakasɔnɛ ɔnalengo Hanani+ oko ɔnɔmbɔdi wa Jɛrusalɛma kaamɛ la Hananiya owandji wa Longele,+ nɛ dia nde akaleke monga onto lakokawɔ mbɛkɛ otema ndo lakokaka Nzambi ka mɛtɛ+ wɔma oleki anto akina efula. 3 Ko lakawatɛ nte: “Asoko wa Jɛrusalɛma hawohombe ntshikala hwe polo la yanyi ya tɛɛ, ndo etena kayowemalaka dia nama, vɔ pombaka ndjiha nkuke ndo mbidja kɔkɔmɔ. Nyosha ase Jɛrusalɛma ɔkɛndɛ wa monga alami, onto l’onto lo dihole diayondolongola ɔkɛndɛ wa namaka ndo onto l’onto mbɛlanɛ la luudu lande hita.” 4 Osomba waki enanɔnanɔ ndo woke, koko anto waki l’etei+ waki yema tshitshɛ ndo l’etena kɛsɔ ko mvudu yatakama nto.

5 Koko Nzambi kami akadje kanyi l’otema ami dia ntshumanya ɛlɔhɛ la topita tolɛ ndo anto dia vɔ fundjama nkombo lo ndjela ɛlɔndji awɔ. Oma laasɔ, dimi lakashola dibuku dia ofundjelo wa nkombo lo ndjela ɛlɔndji+ wa wanɛ wakaye ntondo, ndo lakɛnyi dia akafundama lɔkɔ ɔnɛ:

6 Vɔ waki anto wa lo prɔvɛnsɛ wakaye oma lo lɔhɔmbɔ, wanɛ wele Nɛbukadinɛza+ nkumekanga ka Babilɔna akaatɔlɛ lo lɔhɔmbɔ+ ko vɔ ndjokalola l’ɔkɔngɔ la Jɛrusalɛma ndo la Juda, onto l’onto lo osomba awɔ hita,+ 7 wanɛ wakaye kaamɛ la Zerubabɛlɛ,+ Jeshua,+ Nɛhɛmiya, Azariya, Raamiya, Nahamani, Mɔrɔdɛkai, Bilisha, Misipɛrɛtɛ, Bingivai, Nɛhumɛ ndo Baanahɛ.

Lofulo l’apami w’ase Isariyɛlɛ lakendanaka ndo la:+ 8 Ana w’apami wa Parɔshɛ nunu pende la lokama l’akumi esambele l’ahende (2 172); 9 ana w’apami wa Shefatiya 372; 10 ana w’apami wa Ara+ 652; 11 ana w’apami wa Pahata-Mɔaba,+ oma le ana w’apami wa Jeshua nde la Jɔaba+ nunu pende la nkama enanɛi la dikumi l’enanɛi (2 818); 12 ana w’apami wa Elama+ kinunu la nkama hiende l’akumi atanu l’anɛi (1 254); 13 ana w’apami wa Zatu 845; 14 ana w’apami wa Zakai 760; 15 ana w’apami wa Binui 648; 16 ana w’apami wa Bebai 628; 17 ana w’apami wa Azingadɛ nunu pende la nkama shato l’akumi ahende l’ahende (2 322); 18 ana w’apami wa Adɔnikamɛ 667; 19 ana w’apami wa Bingivai nunu pende l’akumi asamalo l’esambele (2 067); 20 ana w’apami wa Adinɛ 655; 21 ana w’apami wa Atɛra, oma le Hɛzɛkiya 98; 22 ana w’apami wa Hashuma 328; 23 ana w’apami wa Bezai 324; 24 ana w’apami wa Harifu 112; 25 ana w’apami wa Ngibiyɔna+ 95; 26 apami w’ase Bɛtɛlɛhɛma ndo Netɔfa 188; 27 apami w’ase Anatɔta+ 128; 28 apami w’ase Bɛtɛ-Azɛmavɛta 42; 29 apami w’ase Kiriatɛ-Jarima,+ Kɛfira ndo Berɔtɛ+ 743; 30 apami w’ase Rama ndo Ngɛba+ 621; 31 apami w’ase Mikimasi+ 122; 32 apami w’ase Bɛtɛlɛ+ ndo Ai+ 123; 33 apami w’ase Nɛbɔ kekina 52; 34 ana w’apami wa Elama okina kinunu la nkama hiende l’akumi atanu l’anɛi (1 254); 35 ana w’apami wa Harimɛ 320; 36 ana w’apami wa Jeriko 345; 37 ana w’apami wa Loda, Hadida ndo Ono+ 721; 38 ana w’apami wa Sena nunu sato la nkama divwa l’akumi asato (3 930).

39 Ɛlɔmbɛdi:+ Ana w’apami wa Jedaya wa lo luudu la Jeshua 973; 40 ana w’apami wa Imɛrɛ kinunu l’akumi atanu l’ahende (1 052); 41 ana w’apami wa Pashura+ kinunu la nkama hiende l’akumi anɛi l’esambele (1 247); 42 ana w’apami wa Harimɛ+ kinunu la dikumi l’esambele (1 017).

43 Ase Lɛwi:+ Ana w’apami wa Jeshua, oma le Kadimiyɛlɛ,+ ana w’apami wa Hɔdɛva 74. 44 Amembi:+ Ana w’apami wa Asafu+ 148. 45 Alami w’asoko:+ Ana w’apami wa Shaluma, ana w’apami wa Atɛra, ana w’apami wa Talamɔna, ana w’apami wa Akuba,+ ana w’apami wa Hatita, ana w’apami wa Shobai 138.

46 Ekambi wa lo tɛmpɛlɔ:*+ Ana w’apami wa Ziha, ana w’apami wa Hasufa, ana w’apami wa Tabaota, 47 ana w’apami wa Kerosɛ, ana w’apami wa Sia, ana w’apami wa Padɔna, 48 ana w’apami wa Lebana, ana w’apami wa Hangaba, ana w’apami wa Salamai, 49 ana w’apami wa Hanana, ana w’apami wa Ngidɛlɛ, ana w’apami wa Ngahara, 50 ana w’apami wa Reaya, ana w’apami wa Rɛzina, ana w’apami wa Nɛkoda, 51 ana w’apami wa Ngazama, ana w’apami wa Uza, ana w’apami wa Pasea, 52 ana w’apami wa Besai, ana w’apami wa Meunima, ana w’apami wa Nɛfushɛsimɛ, 53 ana w’apami wa Bakɛbukɛ, ana w’apami wa Hakufa, ana w’apami wa Harura, 54 ana w’apami wa Bazilitɛ, ana w’apami wa Mehida, ana w’apami wa Harasha, 55 ana w’apami wa Barakɔsɛ, ana w’apami wa Sisɛra, ana w’apami wa Tɛma, 56 ana w’apami wa Neziya, ana w’apami wa Hatifa.

57 Ana w’apami w’ekambi wa Sɔlɔmɔna:+ Ana w’apami wa Sotai, ana w’apami wa Sɔfɛrɛtɛ, ana w’apami wa Perida, 58 ana w’apami wa Jala, ana w’apami wa Darakɔna, ana w’apami wa Ngidɛlɛ, 59 ana w’apami wa Shefatiya, ana w’apami wa Hatilɛ, ana w’apami wa Pɔkɛrɛtɛ-Hazɛbaima, ndo ana w’apami wa Amɔna. 60 Ekambi wa lo tɛmpɛlɔ*+ ndo ana w’apami w’ekambi wa Sɔlɔmɔna waki tshɛ tshɛ 392.

61 Anto anɛ mbakonɛɛ oma la Tɛlɛ-Mela, Tɛlɛ-Harasha, Kerubɛ, Adɔna ndo Imɛrɛ, koko vɔ komonga la akoka wa ntshimola ɔkɔndɔ wa luudu la washɛwɔ ndo ɔlɔndji awɔ dia mbeya kana waki ase Isariyɛlɛ:+ 62 Ana w’apami wa Delaya, ana w’apami wa Tobiya, ana w’apami wa Nɛkoda 642. 63 Oma l’atei w’ɛlɔmbɛdi: Ana w’apami wa Habaya, ana w’apami wa Hakɔzɛ,+ ana w’apami wa Barazilai ɔnɛ lakatshuke wadi oma l’atei w’ana wa wamato wa Barazilai+ ose Ngiliyadɛ, ko nde ndjɔsa lokombo lawɔ. 64 Vɔ wakayange lo ɛkɔndɔ awɔ dia nshikikɛ ɔlɔndji awɔ, koko vɔ kɔmɛna; ɔnkɔnɛ vɔ kokotsha nto kɛnɛ kalɔmbama dia nkamba olimu w’ɔlɔmbɛdi.*+ 65 Nguvɛrnɛrɛ*+ akawatɛ dia takawakoke ndɛ diangɔ dioleki ekila+ polo lam’akahombe tanema ɔlɔmbɛdi wakakoke nsala diendja la Urimɛ ndo Tumimɛ.+

66 Lofulo l’ase etshumanelo k’otondo laki tshɛ tshɛ nunu akumi anɛi la pende la nkama shato l’akumi asamalo (42 360),+ 67 aha la mbidja mfumbe yawɔ y’apami ndo ya wamato+ yaki nunu esambele la nkama shato l’akumi asato l’esambele (7 337); vɔ waki ndo la amembi+ w’apami ndo wa wamato 245. 68 Mfalasa yawɔ yaki 736, mfalo yaki 245, 69 kamɛlɔ yawɔ yaki 435, mponda yawɔ yaki nunu samalo la nkama esambele l’akumi ahende (6 720).

70 Ɛtɛ ɛmɔtshi wa nkumbo ya washɛwɔ wakasha lonya lo olimu.+ Nguvɛrnɛrɛ* akakimɔ drakimɛ* kinunu (1 000) dia paonyi, alɔnga w’afuku 50 ndo ekutu w’ɛlɔmbɛdi+ 530 dikambo dia eombelo. 71 Ndo ɛtɛ ɛmɔtshi wa nkumbo ya washɛwɔ wakakimɔ diangɔ nɛ dikambo dia eombelo kendana la olimu: Drakimɛ nunu akumi ahende (20 000) dia paonyi ndo mina* nunu pende la nkama hiende (2 200) ya mfɛsa. 72 Anto akina tshɛ wakakimɔ drakimɛ nunu akumi ahende (20 000) dia paonyi, mina nunu pende (2 000) ya mfɛsa ndo ekutu w’ɛlɔmbɛdi 67.

73 Ɛlɔmbɛdi, ase Lɛwi, alami w’asoko, amembi,+ anto amɔtshi, ekambi wa lo tɛmpɛlɔ* ndo ase Isariyɛlɛ akina tshɛ* wakadjasɛ lo esomba awɔ.+ Lam’akakoke+ ngɔndɔ ka 7, ase Isariyɛlɛ wakadjasɛ lo esomba awɔ.+

8 Oma laasɔ, anto tshɛ wakasangana kaamɛ lo sɛkɛ diɛlane la Soko di’Ashi+ ndo wakatɛ osangodi* Ɛzɛra+ dia nde mbela dibuku dia Ɛlɛmbɛ wa Mɔsɛ+ wakadjangɛ Jehowa Isariyɛlɛ.+ 2 Ko ɔlɔmbɛdi Ɛzɛra akela Ɛlɛmbɛ akɔ la ntondo ka etshumanelo+ k’apami, wamato ndo wanɛ tshɛ wakakokaka mpokamɛ ko nshihodia, lo ngɔndɔ ka 7 lushi 1.+ 3 Nde akadia awui wa lɔkɔ la dui dia wolo+ lo sɛkɛ diɛlane la Soko di’Ashi, la ntondo k’apami, wamato ndo wanɛ tshɛ wakakokaka nshihodia, oma ko pindju ka pɛɛ polo la midi; ndo anto wakahokamɛka la yambalo tshɛ+ kɛnɛ kaki lo dibuku di’Ɛlɛmbɛ. 4 Osangodi Ɛzɛra akemala lo lɔyɛnga l’esongo lakawasale lo diaaso sɔ; ko anto anɛ wakemala suke la nde lo lonya l’omi: Matitiya, Shɛma, Anaya, Uriya, Hilikiya ndo Maseya; ndo anto anɛ waki lo lonya lande la lɔmɔsɔ: Pedaya, Mishaɛlɛ, Malakidja,+ Hashuma, Hasha-Badana, Zɛkariya ndo Meshulama.

5 Ɛzɛra akafola dibuku lo washo w’anto tshɛ, nɛ dia nde aki la diko dia anto tshɛ. Kam’akandadifola, anto tshɛ wakemala. 6 Oma laasɔ, Ɛzɛra akatombola Jehowa Nzambi ka mɛtɛ, ka Woke, ko anto tshɛ wakakadimola vate: “Aamɛɛ!* Aamɛɛ!”+ ndo wakedia anya awɔ. L’ɔkɔngɔ wa laasɔ, vɔ wakakɔlama ndo wakakusamɛ Jehowa dungi polo la nkɛtɛ. 7 Jeshua, Bani, Sherebiya,+ Jamina, Akuba, Shabɛtai, Hɔdiya, Maseya, Kɛlita, Azariya, Jɔzabada,+ Hanana ndo Pelaya wanɛ waki ase Lɛwi wakalembetshiyaka anto+ Ɛlɛmbɛ etena kakatshikala anto wemema. 8 Vɔ wakatetemala mbadia la dui dia wolo awui wa lo dibuku diakɔ, Ɛlɛmbɛ wa Nzambi ka mɛtɛ, waalembetshiya hwe ndo washa kitshimudi yawɔ; ɔnkɔnɛ, vɔ wakakimanyiya anto dia nshihodia kɛnɛ kakadiemaka.*+

9 Nɛhɛmiya laki nguvɛrnɛrɛ* l’etena kɛsɔ, ɔlɔmbɛdi Ɛzɛra+ laki osangodi* ndo ase Lɛwi waketshaka anto wakatɛ anto tshɛ vate: “Lushi l’ɛlɔ lekɔ ekila le Jehowa Nzambi kanyu.+ Tanyokiyanake ndo tanyolelake.” Nɛ dia anto tshɛ wakalelaka lam’akawoke awui wa lo Ɛlɛmbɛ. 10 Nde akawatɛ ate: “Nyotshu nyotole diangɔ dia amɛna,* nyotɔnɔ diangɔ dia mpɛ, ndo nyotome wanɛ wahalɔngɔsɔdi ndooko ɛngɔ yema ya mbo ya ndɛ;+ nɛ dia lushi l’ɛlɔ lekɔ ekila le Nkumɛso ndo tanyongake la ɔkɛyi, dikambo ɔngɛnɔngɛnɔ wa Jehowa mbele longele* lanyu.” 11 Ase Lɛwi wakalɛmbɔhayaka anto tshɛ, wata vate: “Nyɔlame! nɛ dia lushi l’ɛlɔ lekɔ ekila, ndo tanyongake la ɔkɛyi.” 12 Ko anto tshɛ wakatshu dia tɔlɛ ndo dia tɔnɔ, dia totomɛ anto akina mbo ya ndɛ mɔtshi ndo dia tɔngɛnangɛna efula,+ nɛ dia vɔ wakashihodia awui wakawawaewoya.+

13 Lushi la 2, ɛtɛ wa nkumbo ya washe anto tshɛ, ɛlɔmbɛdi ndo ase Lɛwi wakasangana lale osangodi* Ɛzɛra dia vɔ nyomoleka nshihodia awui wa lo Ɛlɛmbɛ. 14 Ko vɔ wakɛnyi dia akafundama lo Ɛlɛmbɛ wakadjanga Jehowa lo tshimbo ya Mɔsɛ dia ase Isariyɛlɛ pombaka mbidjasɛ lo totombotombo* lo fɛtɛ kasalema ngɔndɔ ka 7,+ 15 ndo dia vɔ pombaka mbewoya+ ndo mbisha diewoyelo lo esomba awɔ tshɛ ndo lo Jɛrusalɛma y’otondo ɔnɛ: “Nyotshu lo lɛkɛ l’akona kele nyotoye la avundja w’esongo w’ɔlivɛ, w’esongo wa pinɛ, wa mirtɛ ndo la waanga w’atoko la avundja w’esongo ekina dia nsala totombotombo, lo ndjela kɛnɛ kofundami.”

16 Ko anto wakatshu ndo wakatoya la wɔ dia ndjoyasalɛ totombotombo, onto l’onto lo nsambe kande ndo lo asɛkɛ awɔ, lo asɛkɛ wa luudu la Nzambi+ ka mɛtɛ, lo sɛkɛ dia Soko di’Ashi+ ndo lo sɛkɛ dia Soko di’Efrayimɛ.+ 17 Ɔnkɔnɛ, ase etshumanelo tshɛ wakakalola oma lo lɔhɔmbɔ wakasale totombotombo ndo wakadjasɛ lo totombotombo takɔ, nɛ dia ase Isariyɛlɛ kosala ngasɔ oma ko nshi ya Jashua+ ɔna Nuna polo ndo lushi lɔsɔ, ko ɔngɛnɔngɛnɔ w’efula+ wakayala. 18 Lushi la lushi, wakadiaka awui w’oma lo dibuku dia Ɛlɛmbɛ wa Nzambi+ ka mɛtɛ, oma ko lushi la ntondo polo lushi l’ekomelo. Vɔ wakasale fɛtɛ l’edja ka nshi 7 ndo losanganya la laande lakayala lushi la 8, oko wakadialɔmbamaka.+

9 Lo lushi la 24 la ngɔndɔ kakɔ, ase Isariyɛlɛ wakasangana; vɔ wakakile mbo ya ndɛ, wakalɔtɛ akoto ndo wakayatɛ ditshu.+ 2 Ase Isariyɛlɛ wakaholɔ l’etena kɛsɔ wakayakakitola la angɛndangɛnda+ tshɛ, ndo vɔ wakemala ko wakashola pɛkato yawɔ ndo munga ya washɛwɔ.+ 3 Oma laasɔ, vɔ wakemala lo dihole diawɔ ko wakadia la dui dia wolo awui w’oma lo dibuku dia Ɛlɛmbɛ+ wa Jehowa Nzambi kawɔ l’edja ka k’anɛi ɔtɔi ka lushi;* ndo l’edja ka k’anɛi ɔtɔi kekina, vɔ wakasholaka pɛkato ndo wakakusamɛka Jehowa Nzambi kawɔ.

4 Jeshua, Bani, Kadimiyɛlɛ, Shɛbaniya,+ Buni, Sherebiya, Bani ndo Kɛnani wakemala lo lɔyɛnga la la diko+ laki ase Lɛwi ndo vɔ wakadɛ Jehowa Nzambi kawɔ ekoko la dui dia wolo. 5 Ase Lɛwi anɛ: Jeshua, Kadimiyɛlɛ, Bani, Hashabineya, Sherebiya, Hɔdiya, Shɛbaniya ndo Petahiya wakate vate: “Nyemale ndo nyotombolake Jehowa Nzambi kanyu pondjo pondjo.+ Ndo vɔ watombolake lokombo layɛ la lotombo lambodiyama laadiko dia ɔtshɔkɔ tshɛ ndo lotombo tshɛ.

6 “Wɛmɛ kele Jehowa;+ wɛ kakasale olongo, ɛɛ, olongo wa la diko di’elongo ndo alembe tshɛ wa lɔkɔ, nkɛtɛ la kɛnɛ tshɛ kele lɔkɔ, ndjale la kɛnɛ tshɛ kele lɔkɔ. Wɛ katshika diangɔ sɔ tshɛ la lɔsɛnɔ ndo alembe wa l’olongo wekɔ lo kokusamɛ. 7 Wɛ kele Jehowa Nzambi ka mɛtɛ, lakasɔnɛ Abrama+ ko mbotondja oma la Ura+ k’ase Kaladiya ndo mbɔɔlɛ Abrahama.+ 8 Wɛ akɛnyi dia otema ande waki la kɔlamelo la ntondo kayɛ,+ ko wɛ akadje sheke kaamɛ la nde dia mbosha nkɛtɛ y’ase Kanana, ase Hiti, ase Amɔra, ase Perizi, ase Jɛbusɛ ndo ase Ngiringashɛ, dia wɛ ndjisha tokanula*+ tande; ndo wɛ akakotsha alaka ayɛ, nɛ dia wɛ ekɔ kanga losembwe.

9 “Ɔnkɔnɛ, wɛ akɛnyi sui diakasowaka watshɛso lo Edjibito+ ndo wɛ akoke delo diawɔ lo Ndjale ka Beela. 10 Ko wɛ akasale tolembetelo la ahindo dia ndɔsha Farawɔ la ekambi ande tshɛ ndo anto tshɛ wa lo wodja ande,+ nɛ dia wɛ akeyaka dia vɔ wakaasalɛka akambo la otako tshɛ.+ Wɛ akayasalɛ lokombo latshikala polo ndo ɛlɔ.+ 11 Wɛ akaatanya ndjale la ntondo kawɔ dia vɔ ntehɔ ndjale lo nkɛtɛ y’ofumbo,+ ndo wɛ akadindja wanɛ wakayawayelaka lo dingunda wate kana oko dive diambowotambiya lo ashi wambɔmbɔ.+ 12 Wɛ akayawalɔmbɔlaka la yanyi lo ekundji ka dinge ndo l’otsho lo ekundji ka dja dia mbasha osase lo mboka kakawahombe ntshɔ.+ 13 Wɛ akaholɔ lo Dikona dia Sinayi,+ akatɛkɛta la wɔ oma l’olongo+ ndo akawasha dombwelo diosembwe, ɛlɛmbɛ+ wa mɛtɛ,* tɛdikɔ t’ɛlɔlɔ ndo wadjango. 14 Wɛ akawaewoya Sabato+ kayɛ k’ekila, ndo wɛ akawasha wadjango, tɛdikɔ ndo ɛlɛmbɛ lo tshimbo y’okambi ayɛ Mɔsɛ. 15 Wɛ akawasha mapa w’oma l’olongo lam’akiwɔ la ndjala+ ndo wɛ akatondja ashi oma lo dive lam’akiwɔ la mposa k’ashi,+ ndo wɛ akawatɛ dia vɔ mbɔtɔ ko mbɔsa wodja wakayatshibe* dia mbasha.

16 “Koko vɔ, watshɛso, wakasale akambo la otako tshɛ+ ndo wakayala ɛtɛ wolo,*+ ko vɔ kompokamɛ ɛlɛmbɛ ayɛ. 17 Vɔ wakatone mpokamɛ+ ndo vɔ kombohɔ etsha ayɛ wa diambo wakayasale l’atei awɔ, ko vɔ wakayala ɛtɛ wolo* ndo wakayasɔnɛ ɔtɛ dia nkalola lo lɔhɔmbɔ l’Edjibito.+ Koko wɛ ekɔ Nzambi kele suke dia dimanyiya,* kokana kandji* ndo kokana kɛtshi, kahoke nkɛlɛ esadi ndo koludi tɔɔ la ngandji ka kɔlamelo,+ ko wɛ kombakalɛ.+ 18 Kaanga etena kakawayasalɛ lohingu la yana ya ngɔmbɛ ya la mbolo ya lɔlɛlɔla ndo kakawataka vate: ‘Ɔnɛ kele Nzambi kanyu kakanyotondja oma l’Edjibito,’+ ndo kakawasale akambo wa weke wa diɔnyɔ, 19 kaanga l’etena kɛsɔ, lo kɛtshi kayɛ k’efula, wɛ kombakalɛ l’oswe wa shɛnga.+ Ekundji ka dinge komimɔ oma la diko diawɔ la yanyi dia mbalɔmbɔla lo mboka, ndo ekundji ka dja komimɔ l’otsho dia mbahɛtshɛ osase lo mboka kakawahombe ntshɔ.+ 20 Wɛ akawasha nyuma kayɛ k’ɔlɔlɔ dia mbasha shɛnɔdi,+ wɛ kombahɔtɔla mana oma lo enyɔ awɔ,+ ndo wɛ akawasha ashi lam’akiwɔ la mposa k’ashi.+ 21 L’edja k’ɛnɔnyi 40, wɛ akawashaka mbo ya ndɛ l’oswe wa shɛnga.+ Vɔ kompomba ndooko ɛngɔ. Ahɔndɔ awɔ kombatɛ+ ndo ekolo awɔ kombida.

22 “Wɛ akawasha waolelo la wedja, akaakahanya bɛtshi bɛtshi,+ dia vɔ mbɔsa ɛtshi ka nkɛtɛ ka Sihɔna,+ mbuta ate ɛtshi ka nkɛtɛ ka nkumekanga Hɛshibɔna,+ mbidja ndo ɛtshi ka nkɛtɛ ka Onga+ nkumekanga ka Bashana. 23 Wɛ aketɛ anawɔ efula oko tɔɔtɔ ta l’olongo.+ Ko wɛ akaatɔlɛ otsha lo wodja wakayalake watshɛwɔ dia vɔ wayohomba mbɔtɔ lɔkɔ ndo mbowɔsa.+ 24 Ɔnkɔnɛ, anawɔ wakɔtɔ lɔkɔ ndo wakɔshi wodja+ akɔ, ko wɛ akalɛndja ase Kanana+ wakadjasɛka lo wodja akɔ la ntondo kawɔ ndo wɛ akaakimɔ lo anya awɔ, oyadi nkumi ya dikanga yawɔ kana anto wa lo wodja, dia vɔ mbasalɛ kɛnɛ kalangawɔ. 25 Vɔ wakaamamala la esomba wakadingama la mpele+ ndo nkɛtɛ y’ɛtɛtɔ,*+ ndo vɔ wakɔshi mvudu yakalole tɔɔ la weho tshɛ wa diangɔ dia amɛna, afuku w’ashi wakawashile ntshima, dikambɔ dia vinyɔ, elowa w’ɔlivɛ+ ndo esongo watɔ elowa lo yɛdikɔ y’efula. Ko vɔ wakale, wakalote ko wakanune, ndo wakangɛnangɛna l’ɔtɛ w’ɔlɔlɔ ayɛ w’efula.

26 “Koko vɔ komonga la okitanyiya, wakakɔtɔmbɔkwɛ+ ndo wakoke Ɛlɛmbɛ ayɛ ɔkɔngɔ.* Vɔ wakadiake amvutshi ayɛ wakaahɛmɔlaka la oyango wa mbakaloya le yɛ, ndo vɔ wakasale akambo wa diɔnyɔ efula.+ 27 Diakɔ diakayaakimɔ lo anya w’andɔshi+ awɔ wakatetemalaka mbaɛnya paa.+ Koko vɔ wakakolelɛka lam’akiwɔ l’etena ka paa, ko wɛ akokaka oma l’olongo; ndo l’ɔtɛ wa kɛtshi kayɛ k’efula, wɛ akawashaka eshimbedi dia mbatshungola oma l’anya w’andɔshi awɔ.+

28 “Koko kam’akawakondjaka ekimanyielo, vɔ wakasalaka nto kɛnɛ kaki kɔlɔ la ntondo kayɛ,+ ko wɛ akaakimɔka lo anya w’atunyi awɔ wakawawahemɛka.*+ Oma laasɔ, vɔ wakakalolaka ndo wakakɔlɔmbaka ekimanyielo,+ ko wɛ akokaka oma l’olongo ndo akaatshungolaka tena la tena l’ɔtɛ wa kɛtshi+ kayɛ k’efula. 29 Kaanga mbakayaahɛmɔlaka dia mbakaloya lo Ɛlɛmbɛ ayɛ, vɔ wakasalaka akambo la otako tshɛ ndo wakatonaka mpokamɛ wadjango+ ayɛ; vɔ wakasale pɛkato lo ntona dia ndjela tɛdikɔ tayɛ tele naka onto tiyela, nde ayɔsɛna.+ Koko la ɛtɛ wolo tshɛ, vɔ wakatioke ɔkɔngɔ, wakakeketsha nkingo yawɔ ndo wakatone mpokamɛ. 30 Wɛ akafudia solo dia lotutsha otsha le wɔ+ l’edja k’ɛnɔnyi efula ndo akatetemala mbahɛmɔla lo nkamba la nyuma kayɛ lo tshimbo y’amvutshi, koko vɔ konanga mpokamɛ. L’edjedja ka wonya, wɛ akayaakimɔ lo anya w’ase wedja.+ 31 Oma lo kɛtshi kayɛ k’efula, wɛ kombashila oshiki+ kana mbasɛka, nɛ dia wɛ ekɔ Nzambi+ kokana kandji* ndo kokana kɛtshi.

32 “Wonya ɔnɛ, wɛ Nzambi kaso le, Nzambi ka woke, ka wolo ndo ka diambo efula kakalame sheke yayɛ ndo kɛnya ngandji ka kɔlamelo,+ tɔsake paa tshɛ yɛnaso, sho, nkumi ya dikanga yaso, ewandji aso,+ ɛlɔmbɛdi aso,+ amvutshi aso,+ watshɛso ndo anto ayɛ tshɛ oma ko nshi ya nkumi ya dikanga y’Asuriya+ polo ndo lushi l’ɛlɔ oko dikambo di’anyanya. 33 Wɛ ookongaka la losembwe lo kɛnɛ tshɛ katotokomɛka, nɛ dia wɛ salaka akambo la kɔlamelo; koko sho mbasala akambo lo yoho ya kɔlɔ.+ 34 Lo kɛnɛ kendana la nkumi ya dikanga yaso, ewandji aso, ɛlɔmbɛdi aso ndo watshɛso, vɔ kokitanyiya Ɛlɛmbɛ ayɛ ndo kombidja yimba lo wadjango ayɛ kana waohwelo* ayɛ wakayaahɛmɔlaka. 35 Kaanga etena kakiwɔ lo diolelo diawɔ, kakawangɛnangɛnaka la lokema la ɛlɔlɔ wakayaasalɛka ndo kakiwɔ lo wodja wa woke ndo wa ɛtɛtɔ* wakayawasha, vɔ kokokambɛ+ ndo vɔ kotshika ditshelo diawɔ dia kɔlɔ. 36 Ɔnkɔnɛ, sho anɛ tele lanɛ ɛlɔ mfumbe,+ ɛɛ, mfumbe lo wodja wakayasha watshɛso dia ndɛka elowa wa lɔkɔ ndo diangɔ dia amɛna dia lɔkɔ. 37 Lokema la diangɔ dia lɔkɔ diekɔ diaki nkumi ya dikanga yakayetɛ ewandji aso l’ɔtɛ wa pɛkato+ yaso. Vɔ wekɔ lo mbolɛ alemba aso ndo dongalonga diaso oko walangawɔ, ndo sho tekɔ lo shɔkɔ ya mamba.

38 “Ɔnkɔnɛ, lo menda akambo asɔ tshɛ kambotosala diokanelo+ dia wolo dia lofunda ndo diɔ diamboshikikɛma la ohomɔ wa ewandji aso, ase Lɛwi aso ndo ɛlɔmbɛdi aso.”+

10 Wanɛ wakashikikɛ dui sɔ lo mbidja ohomɔ+ awɔ vɔ anɛ:

Nguvɛrnɛrɛ* Nɛhɛmiya ɔna Hakaliya,

Ndo Zɛdɛkiya, 2 Seraya, Azariya, Jɛrɛmiya, 3 Pashura, Amariya, Malakidja, 4 Hatushɛ, Shɛbaniya, Maluka, 5 Harimɛ,+ Mɛrɛmɔtɛ, Obadiya, 6 Danyɛlɛ,+ Nginɛtɔna, Baruka, 7 Meshulama, Abidja, Midjamina, 8 Maziya, Bilingai ndo Shemaya; wasɔ mbele ɛlɔmbɛdi.

9 Ndo ase Lɛwi anɛ: Jeshua ɔna Azaniya, Binui l’atei w’ana w’apami wa Henadada, Kadimiyɛlɛ,+ 10 ndo anangɛwɔ anɛ: Shɛbaniya, Hɔdiya, Kɛlita, Pelaya, Hanana, 11 Mika, Rɛhɔba, Hashabiya, 12 Zakura, Sherebiya,+ Shɛbaniya, 13 Hɔdiya, Bani ndo Beninu.

14 Ewandji w’anto vɔ ɛnɛ: Parɔshɛ, Pahata-Mɔaba,+ Elama, Zatu, Bani, 15 Buni, Azingadɛ, Bebai, 16 Adɔnidja, Bingivai, Adinɛ, 17 Atɛra, Hɛzɛkiya, Azura, 18 Hɔdiya, Hashuma, Bezai, 19 Harifu, Anatɔta, Nebai, 20 Mangipiyashi, Meshulama, Heziri, 21 Meshɛzabɛlɛ, Zadɔka, Jadua, 22 Pelatiya, Hanana, Anaya, 23 Hɔshɛya, Hananiya, Hashubɛ, 24 Halɔhɛshɛ, Piliha, Shobɛka, 25 Rɛhumɛ, Hashabina, Maseya, 26 Ahidja, Hanana, Anana, 27 Maluka, Harimɛ ndo Baanahɛ.

28 Anto akina tshɛ, mbuta ate ɛlɔmbɛdi, ase Lɛwi, alami w’asoko, amembi, ekambi wa lo tɛmpɛlɔ,* ndo onto tshɛ lakayakakitola la ase wedja dia ndjela Ɛlɛmbɛ wa Nzambi ka mɛtɛ,+ kaamɛ la wadiɛwɔ, anawɔ w’apami ndo anawɔ wa wamato, wanɛ tshɛ waki la ewo ndo wakakokaka nshihodia* 29 wakɔtɔ l’ɔnɔngɔ w’anangɛwɔ, anto awɔ wa lokumu, ko wakayadje mananu la etshibelo dia vɔ kɛndakɛndaka lo Ɛlɛmbɛ wa Nzambi ka mɛtɛ wakakimɔma lo tshimbo ya Mɔsɛ okambi wa Nzambi ka mɛtɛ, ndo dia ndjela dimɛna dimɛna wadjango tshɛ wa Jehowa Nkumɛso, dombwelo diande ndo tɛdikɔ tande. 30 Sho hatototshukanya anaso wa wamato le ase wedja ndo hatototshukɛ anaso w’apami+ anawɔ wa wamato.

31 Naka ase wedja wambela diangɔ dia nsondja ndo weho tshɛ wa ntɔngɔ dia ndjosondja lushi la Sabato, sho hatotosomba ndooko ɛngɔ oma le wɔ lushi la Sabato+ kana lushi l’ekila.+ Lo ɔnɔnyi wa 7,+ sho hatotona diangɔ di’oma lo dikambɔ ndo tayokimwɛ onto tshɛ lele la dibasa.+

32 Ndo nto, sho takayadjangɛ dia onto l’onto kimɔka k’asato ɔtɔi ka shɛkɛlɛ* ɔnɔnyi l’ɔnɔnyi dikambo dia olimu wa lo luudu* la Nzambi kaso,+ 33 dikambo dia mapa wa lahatanya,*+ olambo wa ntɔngɔ wa mbala la mbala,+ olambo wa lotshumba wa mbala la mbala wa lo Sabato+ la towalelo ta ngɔndɔ,+ ndo dikambo dia fɛtɛ yakashikikɛma,+ dikambo dia diangɔ di’ekila, dikambo dia elambo wa pɛkato+ dia nkomba pɛkato y’Isariyɛlɛ, ndo dikambo dia elimu tshɛ wa lo luudu la Nzambi kaso.

34 Ndo nto, takoke owale lo kɛnɛ kendana la okimwelo wa nkunyi yakahombaka ɛlɔmbɛdi, ase Lɛwi ndo anto akina mbelaka lo luudu la Nzambi kaso lo ndjela mvudu ya washɛso, lo tena diakashikikɛma, ɔnɔnyi l’ɔnɔnyi, dia tshumbaka diangɔ lo elambwelo ka Jehowa Nzambi kaso, lo ndjela kɛnɛ kofundami lo Ɛlɛmbɛ.+ 35 Tayelaka ndo ɛlɔnga w’oma lo dikambɔ diaso la ɛlɔnga w’oma lo weho tshɛ w’esongo w’elowa ɔnɔnyi l’ɔnɔnyi lo luudu la Jehowa,+ 36 mbidja ndo anaso w’apami wa nondo ndo wa dongalonga+ diaso, lo ndjela kɛnɛ kofundami lo Ɛlɛmbɛ, ndo ana wa nondo wa ngɔmbɛ yaso la ɛkɔkɔ aso. Tayelaka diangɔ sɔ lo luudu la Nzambi kaso, le ɛlɔmbɛdi wakamba lo luudu la Nzambi kaso.+ 37 Ndo nto, tayelaka ɛlɔnga wa shima yaso,+ weshasha aso, elowa w’oma lo weho tshɛ w’esongo,+ wanu w’eyoyo ndo esɔ+ le ɛlɔmbɛdi lo mvudu ya waombelo* ya lo luudu la Nzambi kaso,+ kaamɛ la tenyi dia dikumi di’oma lo dikambɔ diaso le ase Lɛwi,+ nɛ dia ase Lɛwi mbakɔngɔla tenyi dia dikumi oma lo esomba aso tshɛ wakambema dikambɔ.

38 Ɔlɔmbɛdi, ɔna Arɔna pombaka monga kaamɛ l’ase Lɛwi etena kakɔngɔla ase Lɛwi tenyi dia dikumi; ndo ase Lɛwi pombaka nkimɔ etenyi ka dikumi k’oma lo tenyi dia dikumi lo luudu la Nzambi+ kaso, lo mvudu* ya lo luudu la eombelo. 39 Nɛ dia lo mvudu ya waombelo* mbahomba ase Isariyɛlɛ la ana w’apami w’ase Lɛwi mbela woshasha+ wa ntɔngɔ, wanu w’eyoyo la esɔ,+ ndo lɔkɔ kele diangɔ diendana la dihole di’ekila, kaamɛ ndo ɛlɔmbɛdi wakamba, alami w’asoko ndo amembi. Sho hatotonya luudu la Nzambi kaso+ yimba.

11 L’etena kɛsɔ, ewandji w’anto wakadjasɛka la Jɛrusalɛma;+ koko anto akina tshɛ wakoke owale+ dia ntondja onto 1 l’atei w’anto 10 dia mbidjasɛ la Jɛrusalɛma, osomba w’ekila, ko akina 9 mbidjasɛ lo esomba ekina. 2 Ndo nto, anto wakatshɔkɔla apami tshɛ wakayakimɔ la lolango dia mbidjasɛ la Jɛrusalɛma.

3 Wanɛ mbele ɛtɛ wa lo prɔvɛnsɛ wakadjasɛka la Jɛrusalɛma. (Ase Isariyɛlɛ akina, ɛlɔmbɛdi, ase Lɛwi, ekambi wa lo tɛmpɛlɔ*+ ndo ana w’apami w’ekambi wa Sɔlɔmɔna+ wakadjasɛka lo esomba ekina wa la Juda, onto l’onto lo ɛtshi kande ka nkɛtɛ lo osomba awɔ.+

4 Ndo nto, ase Juda amɔtshi ndo aseka Bɛnjamina amɔtshi wakadjasɛka la Jɛrusalɛma.) L’atei w’ase Juda mbaki Ataya ɔna Uziya ɔna Zɛkariya ɔna Amariya ɔna Shefatiya ɔna Mahalalɛlɛ l’atei w’ana w’apami wa Perɛzɛ,+ 5 ndo Maseya ɔna Baruka ɔna Kɔlɔhɔzɛ ɔna Hazaya ɔna Adaya ɔna Joyariba ɔna Zɛkariya ɔna ose Shɛla. 6 Ana w’apami tshɛ wa Perɛzɛ wakadjasɛka la Jɛrusalɛma waki apami 468 wele la akoka.

7 Aseka Bɛnjamina vɔ anɛ: Salu+ ɔna Meshulama ɔna Jɔɛdɛ ɔna Pedaya ɔna Kɔlaya ɔna Maseya ɔna Itiyɛlɛ ɔna Jɛshaya, 8 ndo l’ɔkɔngɔ ande, Ngabai nde la Salai, 928; 9 Jɔɛlɛ ɔna Zikiri kaki omendji awɔ, ndo Juda ɔna Hasɛnua aki onto la 2 la lo osomba.

10 Oma le ɛlɔmbɛdi: Jedaya ɔna Joyariba, Jakina,+ 11 Seraya ɔna Hilikiya ɔna Meshulama ɔna Zadɔka ɔna Merayota ɔna Ahitubɛ,+ ɔnɔmbɔdi wa lo luudu* la Nzambi ka mɛtɛ, 12 ndo anangɛwɔ wakakambaka olimu wa luudu waki 822; mbidja ndo Adaya ɔna Jɛrɔhama ɔna Pelaliya ɔna Amizi ɔna Zɛkariya ɔna Pashura+ ɔna Malakidja, 13 kaamɛ la anango, ɛtɛ wa nkumbo ya washɛwɔ, 242; ndo Amashisai ɔna Azarɛlɛ ɔna Azai ɔna Meshilɛmɔtɛ ɔna Imɛrɛ, 14 kaamɛ la anango waki apami 128 wa wolo ndo waki la dihonga; Zabidiyɛlɛ, ose nkumbo ka lokumu kaki omendji awɔ.

15 Oma le ase Lɛwi: Shemaya+ ɔna Hashubɛ ɔna Azirikama ɔna Hashabiya ɔna Buni, 16 ndo Shabɛtai+ nde la Jɔzabada+ ɛtɛ w’ase Lɛwi wanɛ waki emendji w’olimu wa l’andja wa luudu la Nzambi ka mɛtɛ; 17 Mataniya+ ɔna Mika ɔna Zabidi ɔna Asafu+ ɔnɔmbɔdi wa wembelo kakalɔmbɔlaka lotombo wonya wa dɔmbɛlɔ,+ ndo Bakɛbukiya, ɔnango la 2, kaamɛ ndo Abida ɔna Shamua ɔna Ngalala ɔna Jedutuna.+ 18 Ase Lɛwi tshɛ wa l’osomba w’ekila waki 284.

19 Alami w’asoko vɔ anɛ: Akuba, Talamɔna,+ ndo anangɛwɔ wakalamaka asoko waki 172.

20 Ase Isariyɛlɛ akina tshɛ, ɛlɔmbɛdi ndo ase Lɛwi waki lo esomba ekina tshɛ wa Juda, onto l’onto lo ɛtshi kande ka nkɛtɛ kakandalongola oko etenyi k’okitɔ.* 21 Ekambi wa lo tɛmpɛlɔ*+ wakadjasɛka la Ɔfɛlɛ,+ ndo Ziha nde la Ngishipa wakalɔmbɔlaka ekambi wa lo tɛmpɛlɔ.*

22 Uzi ɔna Bani ɔna Hashabiya ɔna Mataniya+ ɔna Mika l’atei w’ana w’apami w’Asafu wanɛ waki amembi, kaki omendji w’ase Lɛwi la Jɛrusalɛma; nde aki ɔnɔmbɔdi w’olimu wa lo luudu la Nzambi ka mɛtɛ. 23 Nɛ dia nkumekanga akadjanga didjango dimɔtshi lo wahɔ awɔ,+ ko wakashikikɛ yɛdikɔ ya mbo ya ndɛ y’amembi ya lushi la lushi. 24 Petahiya ɔna Meshɛzabɛlɛ l’atei w’ana w’apami wa Zera ɔna Juda kaki ondaki wa nkumekanga* lo dikambo tshɛ diendana l’anto.

25 Lo kɛnɛ kendana la ngelo ndo la dikambɔ diayɔ, ase Juda amɔtshi wakadjasɛka la Kiriatɛ-Arba+ la tosombasomba tendɛ le tɔ,* la Dibɔna la tosombasomba tendɛ le diɔ, la Jekabizɛlɛ+ la ngelo yendɛ le yɔ, 26 la Jeshua, la Mɔlada,+ la Bɛtɛ-Pɛlɛtɛ,+ 27 la Hazara-Shuala,+ la Bɛrɛ-Shɛba la tosombasomba tendɛ le tɔ,* 28 la Zikilangɛ,+ la Mɛkɔna la tosombasomba tendɛ le tɔ,* 29 la Ɛnɛ-Rimɔna,+ la Zɔra,+ la Jaramuta, 30 la Zanoa,+ la Adulama la ngelo yendɛ le wɔ, la Lakishi+ la dikambɔ dialɔ, ndo la Azeka+ la tosombasomba tendɛ le wɔ.* Vɔ wakadjasɛ* oma la Bɛrɛ-Shɛba polo l’Okidi wa Hinɔmɛ.+

31 Aseka Bɛnjamina waki la Ngɛba,+ la Mikimashɛ, la Aidja, la Bɛtɛlɛ+ la tosombasomba tendɛ le tɔ,* 32 l’Anatɔta,+ la Nɔbɔ,+ l’Ananiya, 33 la Hazɔra, la Rama,+ la Ngitayima, 34 la Hadida, la Zɛbɔima, la Nebalata, 35 la Loda ndo la Ono,+ okidi w’etshudi. 36 Elui ɛmɔtshi w’ase Lɛwi w’oma la Juda wakasanganyema la aseka Bɛnjamina.

12 Ɛlɔmbɛdi l’ase Lɛwi wakatshu kaamɛ la Zerubabɛlɛ+ ɔna Shɛalatiyɛlɛ+ ndo Jeshua+ vɔ anɛ: Seraya, Jɛrɛmiya, Ɛzɛra, 2 Amariya, Maluka, Hatushɛ, 3 Shekaniya, Rɛhumɛ, Mɛrɛmɔtɛ, 4 Ido, Nginɛtɔi, Abidja, 5 Midjamina, Madiya, Bilinga, 6 Shemaya, Joyariba, Jedaya, 7 Salu, Amɔka, Hilikiya ndo Jedaya. Wasɔ mbaki ɛtɛ w’ɛlɔmbɛdi la anangɛwɔ lo nshi ya Jeshua.

8 Ase Lɛwi vɔ anɛ: Jeshua, Binui, Kadimiyɛlɛ,+ Sherebiya, Juda ndo Mataniya+ lakalɔmbɔlaka esambo wa eokelo ka losaka kaamɛ la anango. 9 Anangɛwɔ, Bakɛbukiya nde la Uni wakemala mbɛlanɛ la wɔ lo ɛkɛndɛ awɔ w’alami.* 10 Jeshua akote Joyakima, Joyakima akote Eliyashibɛ+ ndo Eliyashibɛ akote Joyada.+ 11 Joyada akote Jɔnatana ndo Jɔnatana akote Jadua.

12 Lo nshi ya Joyakima, anto anɛ mbaki ɛlɔmbɛdi, ɛtɛ wa nkumbo ya washɛwɔ: Oma le Seraya,+ Meraya; oma le Jɛrɛmiya, Hananiya; 13 oma le Ɛzɛra,+ Meshulama; oma le Amariya, Jɛhɔhanana; 14 oma le Maluki, Jɔnatana; oma le Shɛbaniya, Yɔsɛfu; 15 oma le Harimɛ,+ Adiana; oma le Merayota, Helɛkai; 16 oma le Ido, Zɛkariya; oma le Nginɛtɔna, Meshulama; 17 oma le Abidja,+ Zikiri; oma le Miniyamina, . . . ;* oma le Mɔadiya, Pilitai; 18 oma le Bilinga,+ Shamua; oma le Shemaya, Jɛhɔnatana; 19 oma le Joyariba, Matɛnai; oma le Jedaya,+ Uzi; 20 oma le Salai, Kalai; oma le Amɔka, Ebɛrɛ; 21 oma le Hilikiya, Hashabiya; oma le Jedaya, Netanɛlɛ.

22 Ɛtɛ wa nkumbo y’ase Lɛwi lo nshi ya Eliyashibɛ, Joyada, Johanana ndo Jadua+ wakafundjama nkombo oko wakafundjama ɛlɔmbɛdi polo lo lowandji la Dariyo ose Pɛrɛsiya.

23 Ase Lɛwi waki ɛtɛ wa nkumbo ya washɛwɔ wakafundjama nkombo lo dibuku di’ɔkɔndɔ wa tena, polo lo nshi ya Johanana ɔna Eliyashibɛ. 24 Wanɛ waki ɛtɛ w’ase Lɛwi vɔ anɛ: Hashabiya, Sherebiya ndo Jeshua+ ɔna Kadimiyɛlɛ;+ anangɛwɔ wakemalaka mbɛlanɛ la wɔ dia ntombola ndo mbisha losaka lo ndjela wadjango wa Davidɛ+ okambi wa Nzambi ka mɛtɛ, olui w’alami wɔtɔnɛ la olui w’alami. 25 Mataniya,+ Bakɛbukiya, Obadiya, Meshulama, Talamɔna ndo Akuba+ wakemalaka dia nama oko alami w’asoko,+ walama lo asoko wa mvudu ya waombelo. 26 Wasɔ mbakakambaka lo nshi ya Joyakima ɔna Jeshua+ ɔna Jɔzadaka ndo lo nshi ya nguvɛrnɛrɛ Nɛhɛmiya nde la Ɛzɛra+ laki ɔlɔmbɛdi ndo osangodi.*

27 Lo osapwelo wa mpele dia lokombo la Jɛrusalɛma, vɔ wakayange ase Lɛwi, ko wakatoya la wɔ oma lo ahole tshɛ wakawadjasɛka oya la Jɛrusalɛma dia ndjosala osapwelo la ɔngɛnɔngɛnɔ, la esambo wa eokelo ka losaka+ ndo la nsɛmbalɛ, dihomahoma di’eshinga ndo nsɛsɛ. 28 Ana w’amembi* wakasangana oma lo distrikɛ,* oma lo ahole tshɛ wodingi Jɛrusalɛma, oma lo ahole wadjasɛ ase Netɔfa,+ 29 oma la Bɛtɛ-Ngilingalɛ+ ndo oma lo bɛtshi dia nkɛtɛ dia Ngɛba+ ndo Azɛmavɛta,+ nɛ dia amembi wakayakɛ ngelo lo otshimbedi w’otondo wa Jɛrusalɛma. 30 Ɛlɔmbɛdi l’ase Lɛwi wakayaɛdia ko wakɛdia anto,+ asoko+ ndo ehele+ ka lokombo.

31 Oma laasɔ, dimi lakatɔlɛ ewandji wa Juda la shɔdi y’ehele ka lokombo. Ndo nto, dimi lakasɔnɛ elui 2 wa weke w’amembi wa eokelo ka losaka ndo elui wa wanɛ wakatawayelaka, olui ɔmɔtshi wakatakɛndakɛndaka lo lonya l’omi lo ehele kakɔ otsha lo Soko dia Tota di’Otoko.+ 32 Hɔshaya nde la k’ahende ɔtɔi k’ewandji wa Juda wakatakɛndakɛndaka l’ɔkɔngɔ awɔ, 33 kaamɛ ndo Azariya, Ɛzɛra, Meshulama, 34 Juda, Bɛnjamina, Shemaya ndo Jɛrɛmiya. 35 Ana amɔtshi w’ɛlɔmbɛdi waki la amama+ waki kaamɛ la wɔ: Zɛkariya ɔna Jɔnatana ɔna Shemaya ɔna Mataniya ɔna Mikaya ɔna Zakura ɔna Asafu,+ 36 ndo anango anɛ: Shemaya, Azarɛlɛ, Milalai, Ngilalai, Mai, Netanɛlɛ, Juda ndo Hanani waki la dihomɔ dia mishiki dia Davidɛ+ okambi wa Nzambi ka mɛtɛ; Ɛzɛra+ laki osangodi* akete la ntondo kawɔ. 37 Lo Soko di’Ɛtɛkɔ,+ vɔ wakete nsembɔ tɔɔ+ polo lo wodelo wa l’Osomba wa Davidɛ lo wodelo w’ehele ka la diko dia Luudu la Davidɛ+ ndo lo Soko di’Ashi+ lo ɛstɛ.

38 Olui okina w’amembi wa eokelo ka losaka wakatakɛndakɛndaka lo lɛkɛ lokina* ndo dimi lakaayele kaamɛ la k’ahende ɔtɔi kekina k’anto lo ehele ka la diko dia Tshoto ya Nkuka+ ndo lo Ehele ka Woke+ 39 la diko dia Soko di’Efrayimɛ,+ lo Soko di’Osomba w’Edjedja+ ndo lo Soko dia Nse,+ lo Tshoto ya Hananɛlɛ,+ lo Tshoto ya Mea, ndo lo Soko di’Ɛkɔkɔ;+ ko vɔ wakatemala la Soko dia Olamelo.

40 L’ekomelo, elui akɔ 2 w’amembi wa eokelo ka losaka wakemala la ntondo ka luudu la Nzambi ka mɛtɛ; ko dimi la k’ahende ɔtɔi ka topita tolɛ taki kaamɛ la mi takemala, 41 ko ɛlɔmbɛdi ɛnɛ: Eliyakima, Maseya, Miniyamina, Mikaya, Eliyɔɛnai, Zɛkariya ndo Hananiya waki la amama, 42 Maseya, Shemaya, Eleazara, Uzi, Jɛhɔhanana, Malakidja, Elama ndo Ezɛrɛ. Amembi wakembe la dui dia wolo lo ɛlɔmbwɛlɔ ka Izirahiya laki omendji.

43 Lushi lɔsɔ, vɔ wakalambola elambo efula ndo wakangɛnangɛna,+ nɛ dia Nzambi ka mɛtɛ akaangɛnyangɛnya la ɔngɛnɔngɛnɔ w’efula. Wamato la ana vɔ lawɔ wakangɛnangɛna+ lo yɛdikɔ yele ɔngɛnɔngɛnɔ waki la Jɛrusalɛma wakakoke mbokɛma etale efula.+

44 Lushi lɔsɔ, apami wakasɔnama dia namaka mvudu ya waombelo+ wa weshasha,+ ɛlɔnga+ ndo tenyi dia dikumi.+ Lɔkɔ mbakawahombaka momba diangɔ di’oma lo dikambɔ dia lo esomba, diangɔ diakalɔmbamaka lo ndjela Ɛlɛmbɛ+ dikambo dia ɛlɔmbɛdi l’ase Lɛwi,+ nɛ dia ɔngɛnɔngɛnɔ waki la Juda l’ɔtɛ wakakambaka ɛlɔmbɛdi l’ase Lɛwi olimu. 45 Vɔ wakatatɛ nkotsha ɛkɛndɛ wa Nzambi kawɔ ndo didjango dia wɛdiamelo, oko wakasale amembi ndo alami w’asoko, lo ndjela wadjango wa Davidɛ nde la ɔnande Sɔlɔmɔna. 46 Ambeta edja efula lo nshi ya Davidɛ nde la Asafu, ɛnɔmbɔdi* wakikɔ dikambo dia amembi ndo dikambo di’esambo wa lotombo ndo wa eokelo ka losaka le Nzambi.+ 47 Lo nshi ya Zerubabɛlɛ+ ndo lo nshi ya Nɛhɛmiya, ase Isariyɛlɛ tshɛ wakashaka amembi+ la alami w’asoko+ yema yawɔ lo ndjela ehomba wa lushi la lushi. Vɔ wakakitshaka ndo yema yendana l’ase Lɛwi+ laande, ndo ase Lɛwi wakakitshaka yema yendana la tokanula ta Arɔna laande.

13 Lushi lɔsɔ, dibuku dia Mɔsɛ diakadiema la ntondo k’anto,+ ko wakashola dia fundama lɔkɔ ɔnɛ ose Amɔna kana ose Mɔaba+ hahombe pondjo mbɔtɔ lo etshumanelo ka Nzambi ka mɛtɛ,+ 2 nɛ dia vɔ kombisha ase Isariyɛlɛ mapa la ashi, koko vɔ wakafute Balama falanga dia nde mbadja mananu.+ Koko Nzambi kaso akakadimola mananu ɔtshɔkɔ.+ 3 Kam’akawoke Ɛlɛmbɛ, vɔ wakatatɛ nkakitola wanɛ tshɛ waki tokanula t’angɛndangɛnda*+ l’ase Isariyɛlɛ.

4 La ntondo ka laasɔ, ɔlɔmbɛdi Eliyashibɛ+ laki owotɔ wa Tobiya+ kakalamaka mvudu ya waombelo* ya lo luudu* la Nzambi+ kaso. 5 Nde akayaɔsɛ luudu la woke la eombelo, lɛnɛ akawombaka ntondo olambo wa ntɔngɔ, tshɔ ya wɛma ndo diangɔ la tenyi dia dikumi dia ntɔngɔ, wanu w’eyoyo ndo esɔ,+ diangɔ diele ase Lɛwi,+ amembi ndo alami w’asoko waki la lotshungɔ la diɔsa, kaamɛ ndo woshasha waki dikambo dia ɛlɔmbɛdi.+

6 L’etena kɛsɔ tshɛ, dimi komonga la Jɛrusalɛma, nɛ dia lakatshu le nkumekanga lo ɔnɔnyi wa 32+ w’ɛlɔmbwɛlɔ ka Aratashasha+ nkumekanga ka Babilɔna; ndo l’ɔkɔngɔ w’etena kɛmɔtshi, dimi lakalɔmbɛ nkumekanga dia nde kimɔmi lo tshanda mɔtshi. 7 Ko dimi lakaye la Jɛrusalɛma ko lakayɛna akambo wa kɔlɔ efula wakasale Eliyashibɛ+ lo wahɔ wa Tobiya,+ lo woho wakandakitsha luudu lɔmɔtshi la eombelo dikambo diande lo sɛkɛ dia luudu la Nzambi ka mɛtɛ. 8 Dui sɔ diakanyangiya efula, ko lakatondja diangɔ tshɛ dia ase luudu la Tobiya oma lo luudu la eombelo.* 9 L’ɔkɔngɔ wa laasɔ, lakadjanga ko wakasole mvudu ya waombelo,* ndo lakakaloya diangɔ dia lo luudu la Nzambi ka mɛtɛ+ lɔkɔ, kaamɛ la olambo wa ntɔngɔ ndo wa tshɔ ya wɛma.+

10 Dimi lakɛnyi nto dia vɔ kombishaka ase Lɛwi+ yema ya diangɔ diawɔ,+ ko ase Lɛwi la amembi wakakambaka olimu wakatshike olimu awɔ, onto l’onto akatshu lo ekambɔ kande hita.+ 11 Ko dimi lakahangwɛ topita tolɛ+ ndo lakate nte: “Lande na kambonyɛma luudu la Nzambi ka mɛtɛ yimba?”+ Oma laasɔ, dimi lakaasanganya ndo lakaakaloya lo elimu awɔ. 12 Ko ase Juda tshɛ wakela etenyi ka dikumi+ ka ntɔngɔ, wanu w’eyoyo ndo esɔ lo mvudu ya waombelo.+ 13 Oma laasɔ, dimi lakasha ɔlɔmbɛdi Shelemiya, Zadɔka laki osangodi* ndo Pedaya laki ose Lɛwi ɔkɛndɛ wa namaka mvudu ya waombelo, ndo Hanana ɔna Zakura ɔna Mataniya aki okimanyedi awɔ, nɛ dia anto asɔ wakɔsamaka oko anto wakokawɔ mbɛkɛ otema. Vɔ mbaki la ɔkɛndɛ wa nkahanya diangɔ le anangɛwɔ.

14 Nzambi kami le, ombohɔ+ lo dikambo sɔ ndo tohɛke* etsha ami wa ngandji ka kɔlamelo wakamasale dikambo dia luudu la Nzambi kami la elimu alɔ.*+

15 Lo nshi shɔ, dimi lakɛnyi ase Juda wamula la diamula dia vinyɔ lushi la Sabato,+ wela atota wa ntɔngɔ, wawahɛ laadiko dia mponda ndo wela wanu, elowa, fingo kaamɛ la woho tshɛ wa wotsho la Jɛrusalɛma lushi la Sabato.+ Ko dimi lakaahɛmɔla diaha vɔ nsondja diangɔ lushi lakɔ.* 16 Ase Tura wakadjasɛka l’osomba akɔ wakelaka nse la weho tshɛ wa diangɔ dia nsondja, ko wakadisondjaka ase Juda la Jɛrusalɛma lushi la Sabato.+ 17 Ko dimi lakahangwɛ ɛlɔhɛ wa la Juda ndo lakawatɛ nte: “Woho akɔna wa dikambo dia kɔlɔ diasalanyu nɛ? Nyambɔnyɔla ndo lushi la Sabato? 18 Shi kɛsɔ mbakasale watshɛnyu, ko Nzambi kaso ndjotela sho la osomba ɔnɛ mpokoso nyɛ tshɛ? Wonya ɔnɛ, lo mɔnyɔla Sabato,+ nyu nyekɔ lo mfudia nkɛlɛ kande kadɔdɔ otsha le Isariyɛlɛ.”

19 Ɔnkɔnɛ, kam’akatatɛ wodjima monga lo asoko wa Jɛrusalɛma la ntondo ka Sabato, dimi lakadjanga dia nkuke ndihama. Dimi lakate nto dia vɔ hawohombe ndjidihola polo l’ɔkɔngɔ wa Sabato, ndo dimi lakakitsha ekambi ami ɛmɔtshi lo asoko akɔ diaha vɔ mbɔtshiya ndooko oshikɔ lushi la Sabato. 20 Ko amundji w’okanda la asondjishi wa weho tshɛ wa diangɔ dia nsondja wakalale l’andja wa Jɛrusalɛma mbala 1 kana mbala 2. 21 Oma laasɔ, dimi lakaahɛmɔla ndo lakawatɛ nte: “Lande na kalalanyu la ntondo k’ehele ka lokombo? Naka nyu ndala nto, dimi layonyotshanya la wolo.” Oma ko etena kɛsɔ, vɔ kondja lo Sabato nto.

22 Dimi lakatɛ ase Lɛwi dia vɔ pombaka ndjaɛdiaka mbala la mbala ndo ndjaaka dia ndjolama asoko dia nama lushi la Sabato ekila.+ Nzambi kami le, ndo lo dikambo sɔ nto, ohɔ ɔlɔlɔ ami ndo omboke kɛtshi lo ndjela efula ka ngandji kayɛ ka kɔlamelo.+

23 Lo nshi shɔ, dimi lakɛnyi nto dia ase Juda wakatshuke* wamato+ w’ase Ashidɔdɛ,+ w’ase Amɔna ndo w’ase Mɔaba.+ 24 K’ahende ɔtɔi ka anawɔ wakatɛkɛtaka ɔtɛkɛta w’ase Ashidɔdɛ ndo kʼahende ɔtɔi ɔtɛkɛta w’ase wedja wotshikitanyi, koko ndooko onto l’atei awɔ lakeyaka ntɛkɛta ɔtɛkɛta w’ase Juda. 25 Ko dimi lakaahangwɛ, lakawadje mananu, lakakɔmɔla apami amɔtshi+ ndo lakakola avo awɔ, ko lakaatshibia lo lokombo la Nzambi nte: “Hanyohombe ntshukanya ananyu wa wamato le anawɔ w’apami ndo hanyohombe mbɔsa anawɔ wa wamato dikambo dia ananyu w’apami kana dikambo dianyu nyuamɛ.+ 26 Shi l’ɔtɛ wa dikambo sɔ kakasale Sɔlɔmɔna nkumekanga k’Isariyɛlɛ pɛkato? L’atei wa wedja efula, ndooko nkumekanga kaki oko nde;+ ndo Nzambi+ kande akawokaka ngandji, ko Nzambi kakɔ akawetɛ nkumekanga k’Isariyɛlɛ w’otondo. Koko wadiɛnde w’ase wedja ekina wakookonya dia nde nsala pɛkato.+ 27 Onde nyu nyatokaka dikambo sɔ mbatonyosala kɔlɔ kɛnɛ ka woke lo nshisha kɔlamelo le Nzambi kaso lo ntshuka wamato w’ase wedja ekina?”+

28 Ɔna pami ɔmɔtshi laki Joyada+ ɔna Eliyashibɛ+ ɔlɔmbɛdi a laadiko akatshuke ɔna Sanabalata+ ose Hɔrɔna. Ko dimi lakawotshanya oma lalemi.

29 Nzambi kami le, owaohɔ nɛ dia vɔ wakadje dioho di’ɛlɔmbɛdi ndo sheke ya dioho di’ɛlɔmbɛdi+ l’ase Lɛwi+ mindo.

30 Ko dimi lakawaɛdia oma lo mindo tshɛ y’ase wedja ekina ndo lakasha ɛlɔmbɛdi l’ase Lɛwi ɛkɛndɛ, onto l’onto l’olimu ande,+ 31 ko lakɔshi tɛdikɔ dia anto mbelaka nkunyi+ lo tena diakashikikɛma ndo dia anto mbelaka ɛlɔnga.

Nzambi+ kami le, ombohɔ lo yoho y’ɔlɔlɔ.*