DELO DIA JƐRƐMIYA
א [Alef]*
1 Ande woho wambowotshikala vɔamɛ, osomba waki tɔɔ l’anto lee!+
Ande woho wayawɔ oko wadi aki odo, vɔ wɔnɛ waki tɔɔ l’anto l’atei wa wedja lee!+
Ande woho wambowookandja elimu la wolo, vɔ wɔnɛ waki nkumekanga ka womoto l’atei wa prɔvɛnsɛ lee!+
ב [Bet]
2 Nde ndelaka efula l’otsho+ ndo asɔyi ande wambofɛ atama ande.
Ndooko olangemi ande wele laawɔ dia mbosamba.+
Asekande tshɛ wakookese;+ vɔ waya atunyi ande.
ג [Gimel]
3 Juda akatshu mfumbe+ l’atei wa sui ndo lo lɔhɔmbɔ la wolo.+
Nde pombaka mbidjasɛ l’atei wa wedja;+ nde hatanyi dihole dia momuya.
Wanɛ tshɛ wɔhɛnyahɛnya wakawonde lo shɔkɔ yande.
ד [Dalet]
4 Mboka y’otsha la Siɔna yekɔ lo ndela, nɛ dia ndooko onto laya lo fɛtɛ.+
Asoko ande tshɛ wekɔ tɔngɔ to;+ ɛlɔmbɛdi ande wekɔ lo nsekuma.
Esekaseka ande wa dimuma* wekɔ lo lɔkɔnyɔ ndo nde ekɔ la lonyangu l’efula.
ה [He]
5 Kakianɛ andɔshi ande waya owandji ande;* atunyi ande hawoyakiyanya.+
Nɛ dia Jehowa akawela lɔkɔnyɔ l’ɔtɛ wa efula ka munga yande.+
Anande wakatshu lo lɔhɔmbɔ la ntondo ka ɔndɔshi.+
ו [Waw]
6 Lotombo tshɛ lakamɔ oma le ɔna womoto la Siɔna.+
Ewandji ande wekɔ oko mpele yahatanyi dihole dia ndɛ adiyo,
Ndo yɔ yekɔ lo takɛndakɛnda yambɔlɛmba la ntondo k’onto latayiyele.
ז [Zayin]
7 Lo nshi y’asui ande ndo yayande bu la luudu, Jɛrusalɛma ambohɔ
Diangɔ dia nɛmɔ tshɛ diaki la nde lo nshi yakete.+
Etena kakakɔ anto ande l’anya w’ɔndɔshi, nde komonga la okimanyedi,+
Andɔshi wakawɛnyi ndo wakɔlɛ* l’ɔtɛ wa ɔkwɛlɔ ande.+
ח [Het]
8 Jɛrusalɛma akasale pɛkato ka woke.+
Diakɔ diele nde akonge ɛngɔ ka wɔnɔnyi.
Anto tshɛ wakɔɔlɛmiyaka wowosalɛ akambo kakianɛ oko ɛngɔ k’anyanya, nɛ dia vɔ wambɛna otakataka ande.+
Nde ekɔ lo nkuma akumu+ ndo ekɔ lo mboka nsɔnyi.
ט [Tet]
9 Mindo kande kekɔ lo ehembo w’ahɔndɔ ande.
Nde hadje ndooko yimba lo nshi yande yayaye.+
Ɔkwɛlɔ ande aki dui dia diambo; nde komonga ndooko l’onto lawosamba.
Jehowa le, enda sui diami, nɛ dia otunyi amboyatombola ndamɛ.+
י [Yod]
10 Ɔndɔshi akadje anya ande lo diangɔ diande dia nɛmɔ tshɛ.+
Nɛ dia nde akɛnyi wedja wɔtɔ lo tɛmpɛlɔ kande k’ekila,+
Wanɛ wakayashimbe hawohombe mbɔtɔ lo etshumanelo kayɛ.
כ [Kaf]
11 Anto ande tshɛ wekɔ lo nsekuma; vɔ wekɔ lo nyanga mbo ya ndɛ.+
Vɔ wakengola diangɔ diawɔ dia nɛmɔ la ɛngɔ ka ndɛ, paka dia ntshikala la lɔsɛnɔ.*
Jehowa le, enda kele ɛna dia dimi laya oko womoto l’anyanya.*
ל [Lamed]
12 Onde ekɔ dui di’anyanya le nyu nyu tshɛ wanɛ weta lo mboka?
Nyende ndo nyɛnyi!
Onde kandji kele oko kandji kaki la mi kekɔ,
Kɛnɛ kakasale Jehowa dia dimi nsowa la tɔ lushi la nkɛlɛ kande kalombalomba?+
מ [Mem]
13 Nde akatome dja oma la diko oya lo weka ami,+ ndo akaalɛndja ɔtɔi lo ɔtɔi.
Nde akoke ɔtɛyi lo ekolo ami, nde akantshutshuya dia dimi nkadimɔ.
Nde akambetɛ womoto l’okalema.
Lushi l’otondo dimi mongaka la hemɔ.
נ [Nun]
14 Kɔlɔ yami yambokelekama oko osembe, yambosanganyema kaamɛ la anya ande.
Yɔ yakakitshama lo nkingo kami, ndo wolo ami wakashile.
Jehowa akankimɔ lo anya w’anto wahamakoke nshika ntanga.+
ס [Samek]
15 Jehowa akanya apami wa wolo tshɛ oma l’atei ami.+
Nde akelɛ olui w’anto lo dikambo diami dia minola ɛlɔngɔ ami w’apami.+
Jehowa akaminola osekaseka w’emuma wa Juda lo diamula dia wanu.+
ע [Ayin]
16 Dimi lekɔ lo ndela l’ɔtɛ w’akambo asɔ;+ asɔyi wekɔ lo kɛlanɛ lo washo ami.
Nɛ dia onto tshɛ lakoka sambami kana keketshami* mangana etale la mi.
Anami w’apami wambɔlɛndjama, nɛ dia otunyi akaleke wolo.
פ [Pe]
17 Siɔna akasembola anya ande;+ nde bu ndooko l’onto la mbosamba.
Jehowa akasha didjango lo dikambo dia Jakɔbɔ le andɔshi ande tshɛ wosukanyi la nde.+
Jɛrusalɛma aya le wɔ ɛngɔ ka kɔlɔ efula.+
צ [Tsade]
18 Jehowa ekɔ losembwe,+ nɛ dia dimi lakatɔmbɔkwɛ wadjango* ande.+
Nyu anto tshɛ, nyohokame ndo nyende paa kami.
Esekaseka* ami wa dimuma ndo ɛlɔngɔ ami w’apami wakatshu lo lɔhɔmbɔ.+
ק [Kof]
19 Dimi lakelɛ wanɛ wamboka ngandji, koko vɔ wakankese.+
Ɛlɔmbɛdi ami ndo dikumanyi diami dia l’osomba wakadiakema,
Etena kakawayangaka mbo ya ndɛ dia ntshikala la lɔsɛnɔ.*+
ר [Resh]
20 Jehowa le, enda, nɛ dia dimi lekɔ la shɔkɔ y’efula.
Asolo* ami wekɔ lo ntshumba.
Otema ami wekɔ lo nkundɔkundɔ, nɛ dia dimi lakatɔmbɔkɔ tshɛ lo tshɛ.+
Lo andja, lokuwa la ta lekɔ lo mpombia;+ l’etei ka luudu ekɔ oko nyɔi.
ש [Shin]
21 Anto wakoke osekumelo ami; ndooko onto lansamba.
Atunyi ami tshɛ wakoke dikambo dia mpokoso kami.
Vɔ wekɔ l’ɔngɛnɔngɛnɔ nɛ dia wɛ kakasale dui sɔ.+
Koko wɛ ayela lushi lakayewoya,+ etena kayowonga oko dimi.+
ת [Taw]
22 Kɔlɔ yawɔ tshɛ yaye la ntondo kayɛ ndo salɛwɔ akambo la esehe,+
Paka oko wakayansalɛ akambo la esehe l’ɔtɛ wa munga yami tshɛ.
Nɛ dia akumu ami wekɔ efula ndo otema ami wekɔ la hemɔ.
א [Alef]
2 Ande woho wakafɛ Jehowa ɔna womoto la Siɔna la wange wa nkɛlɛ kande lee!
Nde akakɔsha olangala w’Isariyɛlɛ oma l’olongo oya la nkɛtɛ.+
Nde kombohɔ kihona k’ekolo+ ande lushi la nkɛlɛ kande.
ב [Bet]
2 Jehowa akamɛnɛ didjaselo tshɛ dia Jakɔbɔ aha la kɛtshi.
Lo odudu ande, nde akanyukola ahole w’ɔna womoto la Juda+ wodingami la mpele.
Nde akawakɔsha lo nkɛtɛ ndo akatɛngamisha diolelo+ ndo ewandji ande.+
ג [Gimel]
3 Lo nkɛlɛ kande ka wolo, nde akahembola wolo* tshɛ w’Isariyɛlɛ.
Nde akanya lonya lande l’omi etena kakasukana otunyi,+
Ndo le Jakɔbɔ, nde akatetemala nombalomba oko dja yambotshumba ɛngɔ tshɛ koyidingi.+
ד [Dalet]
4 Nde akanɛ* ota ande oko otunyi; lonya lande l’omi kitshama oko ɔndɔshi;+
Nde akatetemala ndjaka wanɛ tshɛ wele amɛna lo washo.+
Ndo nde akahongola odudu ande oko dja+ lo luudu la dipɛma la ɔna womoto la Siɔna.+
ה [He]
5 Jehowa aya oko otunyi;+
Nde akamɛnɛ Isariyɛlɛ.
Nde akamɛnɛ tosombasomba tande tshɛ;
Nde akalanya ahole ande tshɛ wodingami la mpele.
Ndo nde akafudia delo ndo laawi le ɔna womoto la Juda.
ו [Waw]
6 Nde akasalɛ tshombotombo yande akambo la ngala,+ oko hiombo ya lo ekambɔ.
Jehowa akasale di’anto mbohɛ fɛtɛ ndo sabato la Siɔna,
Ndo lo nkɛlɛ kande k’efula, nde halɛmiya nkumekanga ndo ɔlɔmbɛdi.+
ז [Zayin]
7 Jehowa akasɛkɛ elambwelo kande;
Nde akatone tɛmpɛlɔ kande k’ekila.+
Nde akakimɔ mpele dia totshoto tande todingami la mpele lo anya w’otunyi.+
Vɔ wakadiya awui awɔ lo luudu la Jehowa oko lushi la fɛtɛ.+
ח [Het]
8 Jehowa akɔshi yɛdikɔ ya ndanya ehele ka ɔna womoto la Siɔna.+
Nde akakeketsha ɔkɔdi wa yɛdikɔ.+
Nde kominya lonya lande dia mbela elanyelo.*
Ndo nde akasale dia lokombo ndo ehele ndela.
Vɔ waketɛma wɔdu kaamɛ.
ט [Tet]
9 Nkuke yande yakɔtɔ lo nkɛtɛ.+
Nde akalanya ndo akɔkɔla esembe ande.
Nkumekanga kande ndo ewandji ande wekɔ l’atei wa wedja.+
Ndooko ɔlɛmbɛ;* kaanga amvutshi ande hawɛnyi ɛnɛlɔ oma le Jehowa.+
י [Yod]
10 Dikumanyi dia ɔna womoto la Siɔna mbidjasɛ ki la nkɛtɛ.+
Vɔ wekɔ lo ndjatɛ ditshu lo ɛtɛ awɔ ndo ndɔta akoto.+
Esekaseka wa dimuma wa Jɛrusalɛma wakakɔlɛ ɛtɛ awɔ polo la nkɛtɛ.
כ [Kaf]
11 Washo ami wambɔlɛmba la nkɛdia asɔyi.+
Asolo* ami wekɔ lo ntshumba.
Ovɔ ami wakahongɔ lo nkɛtɛ, l’ɔtɛ wa ɔkwɛlɔ wa ɔna womoto la* wodja ami,+
L’ɔtɛ wa ana ndo ana w’ashashi wakɔ hohakayi lo ahole wa lo sɛkɛ wa lo shombasomba.+
ל [Lamed]
12 Vɔ wekɔ lo ntetemala mimbola anyangɛwɔ ɔnɛ: “Lende ele mbo ya ndɛ ndo wanu?”+
Etena kakɔwɔ hohakayi oko onto lambohomɔ lo ahole wa lo sɛkɛ wa lo osomba,
Etena kashishɔ nsɛnɔ* yawɔ lo anya w’anyangɛwɔ.
מ [Mem]
13 Kakɔna kakoka nkamba la mi oko ɔmɛnyi,
Kana la ɛngɔ kakɔna kakokami kɔfɔnya, wɛ ɔna womoto la Jɛrusalɛma?
La ɛngɔ kakɔna kakokami kɛdika, dia kosamba wɛ osekaseka w’emuma wa Siɔna?
Nɛ dia ɔkwɛlɔ ayɛ wekɔ woke oko ndjale.+ Akoka kɔkɔnɔla?+
נ [Nun]
14 Waɛnɛlɔ wakɛnyi amvutshi ayɛ lo dikambo diayɛ waki kashi ndo anyanya,+
Ndo vɔ kotondja munga kayɛ sɛkɛ diaha wɛ tɔlama lo lɔhɔmbɔ,+
Koko vɔ wakatetemala mɛna lo dikambo diayɛ waɛnɛlɔ wa kashi ndo wanganyiya.+
ס [Samek]
15 Onto tshɛ leta lo mboka suke la yɛ mbidaka lokambo la diambo la diɔnyɔ tshɛ.+
Vɔ mbidaka okoko la diambo ndo nyinginyaka+ ɛtɛ awɔ lo dikambo dia ɔna womoto la Jɛrusalɛma wata ɔnɛ:
“Onde ɔnɛ mbele osomba wakawataka lo dikambo diawɔ ɔnɛ: ‘Vɔ wekɔ olangala wahadjama anya, ɔngɛnɔngɛnɔ wa nkɛtɛ k’otondo’?”+
פ [Pe]
16 Atunyi tshɛ wakadihola enyɔ awɔ lo dikambo diayɛ.
Vɔ wakade ekoko ndo wakakakatanya wanyu ndo wakate ɔnɛ: “Sho takawɔmɛnɛ.+
Ɔnɛ ekɔ lushi lakatakongɛɛka!+ Lɔ lamboya ndo sho tamboliɛna!”+
ע [Ayin]
17 Jehowa akasale kɛnɛ kakandasangoya;+ nde akakotsha ɔtɛkɛta ande,+
Kɛnɛ kakandadjanga edja la ntondo.+
Nde akalanya aha la kɛtshi.+
Nde akatshike dia otunyi ngɛnangɛna lo dikambo diayɛ; nde akadiya wolo* w’andɔshi ayɛ.
צ [Tsade]
18 Etema awɔ wekɔ lo ndelɛ Jehowa, wɛ ehele ka ɔna womoto la Siɔna.
Asɔyi wakɛlɛ oko ɔkɛdi otsho la yanyi.
Toyashake momuya, toshake sso diayɛ* momuya.
ק [Kof]
19 Emala, lela l’otsho, lo etatelo ka etena ka nsungukala.
Hongola otema ayɛ oko ashi la ntondo k’elungi ka Jehowa.
Onyiya anya ayɛ otsha le nde dikambo dia nsɛnɔ* y’anayɛ,
Wanɛ wakɔ hohakayi lo asanga* tshɛ wa toshinga l’ɔtɛ wa ndjala ka kasha.+
ר [Resh]
20 Jehowa le, enda ɔnɛ lakayasalɛ akambo la esehe tshɛ.
Onde wamato pombaka ntetemala ndɛ anawɔ* hita, anawɔ hita+ wakotɔ la alemba w’amɛna,
Kana onde ɛlɔmbɛdi ndo amvutshi pombaka ndjakema lo tɛmpɛlɔ k’ekila ka Jehowa?+
ש [Shin]
21 Odo wa dikɛnda dia pami ndo w’osombe wambokalema la nkɛtɛ lo toshinga.+
Esekaseka ami wa dimuma* ndo ɛlɔngɔ ami w’apami wakakɔ la lokuwa la ta.+
Wɛ akadiake lo lushi la nkɛlɛ kayɛ; wɛ akadiake aha la mboka kɛtshi.+
ת [Taw]
22 Oko lushi la fɛtɛ,+ wɛ akelɛ wɔma oma lo bɛkɛ tshɛ.
Ndooko lakahandɔ kana shimbamɛ+ lo lushi la odudu wa Jehowa;
Wanɛ wakamote* ndo wakamodia, atunyi wakaashile oshiki.+
א [Alef]
3 Dimi lekɔ pami kakadiɛnɛ la sui l’ɔtɛ w’okalemba wa odudu ande.
2 Nde akambitshanya ndo akankonya dia nkɛndakɛnda lo wodjima, koko aha lo osase.+
3 Lo mɛtɛ, nde akela lonya lande mbala la mbala dia ndɔshami lushi l’otondo.+
ב [Bet]
4 Nde akɔndja emunyi ndo lokoho lami;
Nde akɔɔkɔla weka ami.
5 Nde akanyinge; nde akamɔmbɛ la lɔlɛngɔ l’ololo+ ndo paa.
6 Nde akantshutshuya la wolo dia mbidjasɛ lo ahole wa wodjima, oko anto wambovɔka edja.
ג [Gimel]
7 Nde akanyinge la ehele diaha dimi panda;
Nde akankeleka mɔlɔla wa nkonga wa wotsho.+
8 Ndo etena kalelami olelalela dia nkondja ekimanyielo, nde tonaka* dɔmbɛlɔ diami.+
9 Nde akadihe mboka yami la ave wa lɔkɔlɔnga;
Nde aketɛ mboka yami akɔtɛ akɔtɛ.+
ד [Dalet]
10 Nde akankonge dia polamɛmi oko laondo, oko ntambwɛ lo eshamelo.+
11 Nde akantshutshuya dia ntakɔ mboka ndo akambatshatsha tɛtshi tɛtshi;
Nde akambetɛ tɔngɔ to.+
12 Nde akanɛ* ota ande ndo nde akankitsha oko ɛngɔ ka ntshieta mpito.
ה [He]
13 Nde akatshieta awondo ami la mpito* y’oma lo mpata kande.
14 Dimi lakayala ɛngɔ ka tɔɔla le anto tshɛ, osambo awɔ wa lushi l’otondo.
15 Nde akandotsha la diangɔ di’ololo ndo akandodia la osongo w’ololo.+
ו [Waw]
16 Nde akahembola wanyu ami la mbɔkɔ;
Nde akankotɛ lo otoko.+
17 Wɛ akanya wɔladi oma le mi;* dimi lakohɛ kɛnɛ kele ɔlɔlɔ.
18 Ko dimi lakate nte: “Lotombo lami lambolana, kaamɛ ndo elongamelo kami le Jehowa.”
ז [Zayin]
19 Ohɔ sui diami ndo woho wemi bu la luudu,+ osongo w’ololo ndo lɔlɛngɔ l’ololo.+
20 Wɛ* mɛtɛ ayohɔ ndo ayonkusamɛ.+
21 Dimi mbohɔka dui sɔ lo otema ami; diakɔ diele layɛnyaka dia lekɔ lo kongɛɛ.+
ח [Het]
23 Tɔ kekɔ oyoyo oto pindju tshɛ;+ kɔlamelo yayɛ yekɔ efula.+
24 Dimi lakate* nte: “Jehowa ekɔ etenyi kami k’okitɔ,+ diakɔ diele dimi layɛnyaka dia lekɔ lo kongɛɛ le nde.”+
ט [Tet]
25 Jehowa ekɔ ɔlɔlɔ le ɔnɛ lalongamɛ le nde,+ le onto* latetemala mboyanga.+
26 Ekɔ ɔlɔlɔ kongɛɛ panda+ ka Jehowa lo wɔlamu.*+
27 Ekɔ ɔlɔlɔ dia onto mɛmba osembe lo nshi yande y’ɔlɔngɔlɔngɔ.+
י [Yod]
28 Nde adjasɛ ndamɛ ndo ɔlame ki etena kela Nzambi dui diakɔ le nde.+
29 Nde adje onyɔ ande lo ditshu;+ elongamelo koka monga.+
30 Nde akimɔ tama diande le ɔnɛ lɔɔkɔmɔla; nde atɛngame efula.
כ [Kaf]
31 Nɛ dia Jehowa hotɔsɛka lo pondjo.+
32 Kaanga mbakandasale dia lɔkɔnyɔ monga, nde ayɛnya kɛtshi nto l’ɔtɛ wa ngandji kande ka kɔlamelo k’efula.+
33 Nɛ dia otema ande hawɔngɛnangɛna dia nsoya kana nyangiya ana w’anto.+
ל [Lamed]
34 Dia mpɔtshahɔtsha la ekolo ase lokanu tshɛ wa la nkɛtɛ,+
35 Dia nyima onto losembwe la ntondo ka Ɔnɛ-Laheme-Tshɛ,+
36 Dia nkesa onto lo kilombo kande,
Jehowa hadihe washo lo awui asɔ.
מ [Mem]
37 Ko akɔna akoka mbuta dui ko nsala dia diɔ kotshama naka Jehowa hadidjangi?
38 Oma lo onyɔ wa Ɔnɛ-Laheme-Tshɛ,
Akambo wa kɔlɔ hawotombe kaamɛ la akambo w’ɛlɔlɔ.
39 Lande na kahomba onto lasɛna ndjakiyanya lo dikambo dia etombelo wa pɛkato kande?+
נ [Nun]
40 Nyɛsɔ tende ndo tɔsɛdingole dimɛna mboka yaso+ ndo tokalole le Jehowa.+
41 Nyɛsɔ tonyiya etema aso kaamɛ la anya aso otsha le Nzambi l’olongo ɔnɛ:+
42 “Sho takasale kɔlɔ ndo takatɔmbɔkɔ,+ koko wɛ kodimanyiya.+
ס [Samek]
44 Wɛ akadihe mboka k’otsha le yɛ la dinge, diaha alɔmbɛlɔ aso mbeta.+
45 Wɛ akatetɛ mindo ko wedja wa l’atei aso wakatotone.”
פ [Pe]
46 Atunyi aso tshɛ wakadihola enyɔ awɔ lo dikambo diaso.+
47 Wɔma, djonga, shɛnga+ ndo elanyelo wekɔ le so.+
48 Ɛkɛdi w’ashi wekɔ lo nkɛla oma lo washo ami l’ɔtɛ wa elanyelo ka ɔna womoto la wodja ami.+
ע [Ayin]
49 Washo ami wekɔ lo ndela aha la mpekɔ, aha la momuya,+
50 Polo ndo Jehowa ambenda oma l’olongo ndo ambɛna.+
51 Washo ami wakambela* lɔkɔnyɔ l’ɔtɛ wa ana wa wamato tshɛ wa osomba ami.+
צ [Tsade]
52 Atunyi ami wakambitshe oko fudu aha la ɔkɔkɔ.
53 Vɔ wakɔlanya lɔsɛnɔ lami lo difuku; vɔ tetemalaka mbokami ave.
54 Ashi wakakɛlɛ lo ɔtɛ ami, ko lakate nte: “Diami diamboshila!”
ק [Kof]
55 Jehowa le, dimi lakelɛ lokombo layɛ oma lo ɛhɔngɔ wa difuku.+
56 Hokamɛ dui diami; todihake atoyi ayɛ lo delo diayangami ekimanyielo.
57 Wɛ akasukana la mi lushi lakamakelɛ. Wɛ akate wate: “Tokake wɔma.”
ר [Resh]
58 Jehowa le, wɛ akantɛkɛtɛ lo kilombo kami,* wɛ akatshungola lɔsɛnɔ lami.+
59 Jehowa le, wɛ akɛnyi kɔlɔ kakawansalɛ; lam’alangayɛ, onsambolee la losembwe.+
60 Wɛ akɛnyi ɛsɔmbwɛlɔ kawɔ tshɛ, kɛnɛ tshɛ kakawakongɛ lo dikambo diami.
ש [Sin] kana [Shin]
61 Jehowa le, wɛ akoke ntɛngɔ yawɔ, kɛnɛ tshɛ kakawakongɛ lo dikambo diami,+
62 Ɛlɔmɔ w’andɔshi ami ndo engunungunu awɔ lo dikambo diami lushi l’otondo.
63 Ohowaenda; etena kodjashiwɔ kana kemadiwɔ, vɔ sɔkakami lo nkembo yawɔ!
ת [Taw]
64 Jehowa le, wɛ ayowafuta lo ndjela etsha awɔ.
65 Wɛ ayowaetɛ etema wolo l’ɔtɛ wa mananu kayɛ le wɔ.
66 Wɛ ayowayela la nkɛlɛ kayɛ ndo ayowashila oshiki oma l’ɛse olongo wa Jehowa.
א [Alef]
4 Ande woho wamboshila paonyi ngaingai, paonyi ka dimɛna lee!+
Ande woho wambodiangana ave w’ekila+ lo asanga wa toshinga tshɛ lee!*+
ב [Bet]
2 Lo dikambo di’ana w’apami wa nɛmɔ wa Siɔna wakɛdikama la paonyi kambɛdiama,*
Ande woho wakawɔsama oko mbaka ka diwomba,
Olimu w’anya w’okengi wa mpoke lee!
ג [Gimel]
3 Kaanga mbolo nɔnyaka anayɔ diwɛlɛ,
Koko ɔna womoto la wodja ami aya ngala+ oko ateke l’oswe.+
ד [Dalet]
4 Lolemi la ɔna ashashi lalɔma lambomamema lo onyɔ l’ɔtɛ wa mposa.
Ana wekɔ lo nsɛngasɛnga dia nkondja mbo ya ndɛ,+ koko ndooko lawasha ɛngɔ.+
ה [He]
5 Wanɛ wakalɛka diangɔ di’amɛna, wolala la ndjala* lo toshinga.+
Wanɛ wakoole walɔta ahɔndɔ wa beela,+ weetama lo otoko.
ו [Waw]
6 Dilanya* dia ɔna womoto la wodja ami diekɔ woke ndeka dilanya dia pɛkato ka Sɔdɔma,+
Ɔnɛ lakalanyema lo etena kɛmɔtshi aha la lonya lookimanyiya.+
ז [Zayin]
7 Akidiami ande+ waki pudipudi ndeka loonge, wɛma ndeka abɛlɛ.
Vɔ waki beela k’efula ndeka kɔrai; vɔ waki oko safirɛ y’amɛna.
ח [Het]
8 Ɛnamelo kawɔ kaya odima ndeka akalanga;*
Vɔ hawoyeyama lo toshinga.
Nkoho yawɔ yambomamema la weka awɔ;+ yɔ yaya oko osongo wamboma.
ט [Tet]
9 Wanɛ wavɔ la lokuwa la ta ndeka wanɛ wavɔ la ndjala ɔlɔlɔ,+
Wanɛ wɔnda, watondɔma l’ɔtɛ wa ndjala ka kasha ka mbo ya ndɛ y’oma lo ekambɔ.
י [Yod]
10 Anya wa wamato wokana kɛtshi wakakatɛ anawɔ hita.+
Vɔ waya mbo yawɔ ya ndɛ ya lo otanda lo etena k’elanyelo ka ɔna womoto la wodja ami.+
כ [Kaf]
11 Jehowa akɛnya odudu ande;
Nde akahongola nkɛlɛ kande kalombalomba.+
Ndo akahɛtsha dja lo Siɔna yakatshumbe atshina ayɔ.+
ל [Lamed]
12 Nkumi ya dikanga ya la nkɛtɛ ndo anto tshɛ wadjasɛ lo nkɛtɛ y’ɛtɛtɔ kombetawɔ
Ɔnɛ ɔndɔshi ndo otunyi wakakoke mbɔtɔ lo asoko wa Jɛrusalɛma.+
מ [Mem]
13 L’ɔtɛ wa pɛkato y’amvutshi ande, munga ya ɛlɔmbɛdi ande,+
Wanɛ wakakɛdia dikila di’anto w’ɛlɔlɔ wa l’atei ande.+
נ [Nun]
14 Vɔ wakanganɛ lo toshinga oko totshungu.+
Vɔ wakɔtɔ mindo la dikila,+
Woho wele ndooko onto lakoka minanda ahɔndɔ awɔ.
ס [Samek]
15 Vɔ wakawatɛ ɔnɛ: “Nyotshu, akanga wa mindo! Nyotshu, nyotshu! Tanyotonandake!”
Nɛ dia vɔ wakayala anto wele bu la luudu ndo wakatekekɔka.
Anto wakate l’atei wa wedja ɔnɛ: “Vɔ hawokoke ntshikala lanɛ kaamɛ la so.*+
פ [Pe]
16 Elungi ka Jehowa kakaahandjola;+
Nde hatowaenda nto lo yoho ya dimɛna.
Anto hawotɔlɛmiya ɛlɔmbɛdi+ kana mboka dikumanyi kɛtshi.”+
ע [Ayin]
17 Oyadi kakianɛ, washo aso wambɔlɛmba la mendɛ ekimanyielo wendenda.+
Takendɛ ndo takayange ekimanyielo oma le wodja waki kokoka toshimbɛ.+
צ [Tsade]
18 Vɔ wakayangana la so lo wanya,+ diakɔ diele sho kokoka nkɛndakɛnda lo ahole aso wa lo sɛkɛ.
Ekomelo kaso kaya suke; nshi yaso yamboshila, nɛ dia ekomelo kaso kamboya.
ק [Kof]
19 Wanɛ wakatatotshanyaka wakalawɔka ndeka mpongo ya lo olongo.+
Vɔ wakatotshanya lo akona; vɔ wakatoholamɛ lo oswe.
ר [Resh]
20 Vɔ wakande lomu la ɛhɛmbɛ aso, okitami w’esɔ wa Jehowa+ lo difuku diawɔ dia woke,+
Ɔnɛ lakatataka ɔnɛ: “Lo dɛdi diande mbayotodjasɛ l’atei wa wedja.”
ש [Sin]
21 Wɛ ɔna womoto la Ɛdɔmɛ,+ oka ɔlɔ ndo ngɛnangɛna, wɛ ladjasɛ lo wodja wa Uzɛ.
Koko dikɔhɔ diayeta ndo le yɛ,+ wɛ ayodjɔ ndo wɛ ayotshika otakataka ayɛ lo sɛkɛ.+
ת [Taw]
22 Ɔna womoto la Siɔna le, dilanya dia munga kayɛ diambokoma lo ekomelo kadiɔ.
Nde hokɔtɔla nto lo lɔhɔmbɔ.+
Koko ɔna womoto la Ɛdɔmɛ le, nde ayodja munga kayɛ yimba.
Nde ayoshola pɛkato yayɛ.+
5 Jehowa le, ohɔ kɛnɛ kakatokomɛ.
Enda ndo ɛna lɔkɔnyɔ laso.+
2 Etenyi kaso k’okitɔ kakonge ka angɛndangɛnda, mvudu yaso yakonge y’ase wedja.+
3 Sho taya ana wa tshike waha la ambutshi w’apami; anyangɛso waya oko wadi waki edo.+
4 Sho toohomba paka mfuta dia nnɔ ashi aso hita+ ndo toosomba nkunyi yaso hita.
5 Wanɛ wayatoyele waya lo nkingo yaso;
Sho tambɔlɛmba, koko sho hatokondja momuya.+
6 Sho takasembola anya aso otsha le Edjibito+ ndo otsha le Asuriya+ dia nkondja mbo ya ndɛ.
7 Watshɛso wakasale pɛkato waya bu, koko sho pombaka mɛmba munga yawɔ.
8 Kakianɛ, ekambi wotɔlɔmbɔla; ndooko onto latonya oma lo anya awɔ.
9 Sho tekɔ lo mbidja nsɛnɔ*+ yaso lo waale dia ndja la mbo ya ndɛ l’ɔtɛ wa lokuwa la ta lele lo oswe.
10 Nkoho yaso yambɔhɛta oko nkuka, l’ɔtɛ wa ndjala ka kasha.+
11 Wakɔnyɔla* wamato wotshukami la Siɔna, esekaseka wa dimuma wa lo esomba wa Juda.+
12 Ewandji wakahanema la anya awɔ,+ ndo dikumanyi kɔnɛmiyama.+
13 Ɛlɔngɔ w’apami wekɔ lo mɛmba dive di’ɔhɛlɔ dia l’anya ndo ana w’apami wekɔ lo ntakana lo dikanda dia nkunyi.
14 Dikumanyi diambotomba oma lo soko di’osomba;+ ɛlɔngɔ w’apami hawoyohoma mishiki awɔ.+
15 Ɔngɛnɔngɛnɔ waya bu l’etema aso; nɔshi diaso dia lokombe diambokadimɔ delo.+
16 Dɛmbɔ dia nkoso diambɔkɔ oma lo ɔtɛ aso. Mananu le so, nɛ dia takasale pɛkato!
17 L’ɔtɛ wa dikambo sɔ, etema aso wekɔ la hemɔ,+
Ndo l’ɔtɛ w’awui asɔ, washo aso wambolɛ,+
18 Lam’ele Dikona dia Siɔna diaya tɔngɔ to;+ kakianɛ ɛkɛngɛ weteta lɔkɔ.
19 Koko Jehowa le, wɛ mbidjasɛ lo kiti ka lowandji pondjo pondjo.
Kiti kayɛ ka lowandji ndjalaka lo lɔlɔnga la lɔlɔnga.+
20 Lande na kamboyotohɛ pondjo ndo kamboyotokalɛ lo etena k’otale nganɛ?+
21 Jehowa le, otokaloya oya le yɛ, ko sho tayokalola oya le yɛ aha la ntshimbatshimba.+
Etɛ nshi yaso eyoyo oko nshi y’edjedja.+
22 Koko wɛ akatɔsɛkɛ tshɛ lo tshɛ.
Wɛ tetemalaka monga la nkɛlɛ k’efula oya le so.+
Oma lo tshapita 1-4 ekɔ leembo l’otanda lo alfabɛtɛ wa lo Hɛbɛru kana lo ɛtɛkɛta wa lɔlɛnga.
Kana “esekaseka wa wamato.”
Tshɛk., “ɔtɛ.”
Kana “wakangɛnangɛna.”
Kana “dia nkaloya anima.”
Etelo kendana la Jɛrusalɛma.
Kana “anima ami.”
Tshɛk., “onyɔ.”
Kana “esekaseka wa wamato.”
Kana “dia nkaloya anima.”
Tshɛk., “ɛsɔhi.”
Tshɛk., “loseke tshɛ.”
Tshɛk., “nkotɛ.”
Kana “akalanya.”
Tshɛk., “oma lo ɔmɛnamelo.”
Kana “wetshelo.”
Tshɛk., “Ɛsɔhi.”
Ɛtɛkɛta wa lɔlɛnga, wɛnya ondo kɛtshi kana kandji.
Kana “anima.”
Tshɛk., “loseke.”
Tshɛk., “ɔna womoto la sso diayɛ.”
Kana “anima.”
Tshɛk., “lo ɛtɛ wa toshinga.”
Kana “olowa.”
Kana “esekaseka wa wamato.”
Kana “wakamatondja la demba dia dimɛna.”
Kana “sɛkaka; ndjihaka.”
Tshɛk., “akakɔtɛ.”
Tshɛk., “ana w’apami.”
Kana “anima ami.”
Kana “Anima ayɛ.”
Kana “anima ami mbutaka.”
Kana “anima.”
Kana “nkonga la solo dia lotutsha tshɛ.”
Kana “wakela anima ami.”
Kana “kilombo k’anima ami.”
Tshɛk., “lo ɛtɛ wa toshinga tshɛ!”
Kana “kaki la nɛmɔ oko.”
Tshɛk., “shɛnga.”
Tshɛk., “Munga.”
Tshɛk., “odima wa tshududu.”
Kana “mbidjasɛ lanɛ oko angɛndangɛnda.”
Kana “anima.”
Kana “Wakeyana la wɔ la wolo.”