“Takanandema dia mɛna woho wa ngandji ka ngasɔ”

LUSHI la samalo, Ngɔndɔ ka nɛi 25, 2015, didimu dia nkɛtɛ diaki la wolo wa magnitude 7,8 diakasalema la Népal, wodja wele l’akona efula lo nɔrdɛ ka Inde. Didimu dia nkɛtɛ sɔ diakalanya kilɔmɛtrɛ oko 80 lo nɔrdɛ owɛstɛ ka Kathmandu, kapitalɛ ka wodja. Lonyangu ko, ndekana anto 8 500 wakavu ndo dui sɔ diakasale dia didimu sɔ monga didimu diakaleke ndjaka anto efula la Népal. Ndekana mvudu nunu nkama tshanu yakalanyema. La Népal ekɔ Ɛmɛnyi wa Jehowa 2 200, ndo efula ka l’atei awɔ wakadjasɛka lo ɛtshi ka nkɛtɛ kɛsɔ kakasalema didimu. Lonyangu ko, Ɔmɛnyi wa Jehowa ɔtɔi l’anande ahende akavu.

Michelle lele Ɔmɛnyi wa Jehowa akate ate: “Lo ɛtshi ka nkɛtɛ kakaleke ndanyema la didimu, tshumanelo diaki lo nsanganya y’Akristo wonya akɔ. Otondongaka didimu dia nkɛtɛ sɔ diakasalema etena kaki anto efula la ngelo, tshike aha la taamu anto wotoleka mvɔ.” Ko lande na kele wanɛ waki lo nsanganya wakakokamɛ? Woho wakakama Mbalasa ka Diolelo mbakaakimanyiya lo yɛdikɔ y’efula.

“KAKIANƐ TAMBƐNA WAHƆ WELE LA DUI SƆ”

Mbalasa ya Diolelo ya nshi nyɛ ya la Népal yokama woho wahayakoke nyukɔ l’adidimu wa nkɛtɛ. Man Bahadur lakamba lo wokelo wa Mbalasa ya Diolelo mbutaka ate: “Mbala efula, anto wakatombolaka dia mbeya lande na kadjaso fɔndasiɔ ya wolo kaanga lo mvudu ya totshitshɛ. Kakianɛ, tambɛna wahɔ wele la dui sɔ.” L’ɔkɔngɔ wa didimu dia nkɛtɛ, lotshungɔ lakashama di’anto tokodjasɛ lo Mbalasa ya Diolelo. Oyadi l’ɔkɔngɔ wa mpokoso kɛsɔ, Ɛmɛnyi wa Jehowa ndo asukanyi awɔ wakayaoke l’ekokelo lo ahole asɔ.

Aha la ntshimbatshimba, dikumanyi wakatatɛ nyanga ase etshumanelo waki watɛnama. Babita lele Ɔmɛnyi wa Jehowa akate ate: “Dikumanyi waketsha wahɔ w’ase etshumanelo la ntondo ka wahɔ awɔ hita. Takanandema dia mɛna woho wa ngandji ka ngasɔ.” La wedi a pindju l’ɔkɔngɔ wa didimu dia nkɛtɛ, ase kɔmite asato wenda olimu w’Ɛmɛnyi wa Jehowa la Népal kaamɛ la emendji w’eteta kana emendji w’etshimbedi wakatatɛ membola tshumanelo dia nkotsha ehomba awɔ ndo nsukɛ dikumanyi dia lɛkɔ.

Nshi shamalo l’ɔkɔngɔ wa didimu dia nkɛtɛ, Gary Breaux akaye nde la wadɛnde Ruby oma l’États-Unis lɛnɛ ele Mbalasa kalɔmbɔla olimu w’Ɛmɛnyi wa Jehowa wa l’andja w’otondo oya la Népal. Reuben lakamba lo kɔmite kɔtɛkɛtshiso la diko akate ate: “L’ɔtɛ wa mpokoso kɛsɔ ndo wa lofunge lakikɔ la Kathmandu, sho komonga l’eshikikelo dia ɔnangɛso Breaux ayoya. Koko nde akayashikikɛ dia ndja ndo nde akaye. Ɛmɛnyi wa Jehowa wa lɛkɔ wakangɛnangɛna wembwelo ande efula.”

‘TAKAYAOKE SUKE SUKE OLEKI LA NTONDO’

Silas lakamba lo biro k’Ɛmɛnyi wa Jehowa ka la Népal akate ate: “Kam’akalɔngɔsɔma telefɔnɛ kaso k’olimu, wakatatɛ telɛ otsho oko otsho yanyi oko yanyi. Asekaso Ɛmɛnyi wa Jehowa wa l’andja w’otondo wakayakiyanyaka dikambo diaso. Kaanga mbele amɔtshi wakatɛkɛtaka ɛtɛkɛta wakiso kombokaka, takɛnyi ngandji ndo nsaki kawɔ ka tokimanyiya.”

Nshi efula l’ɔkɔngɔ wa didimu sɔ, Ɛmɛnyi wa Jehowa wa lɛkɔ wakatɔlɛ mbo ya ndɛ lo Mbalasa ya Diolelo dia tosha wanɛ waki lo dihombo. Laadiko dia laasɔ, Kɔmite kendana la woshelo w’ekimanyelo kakakengama ndo kombeta edja, ekimanyielo kakatatɛ ndja oma l’ahole akina, djekoleko oma la Bangladesh, Inde ndo Japon. L’ɔkɔngɔ wa nshi mɔtshi, ekipɛ k’aseka enganga k’Ɛmɛnyi wa Jehowa kakaye oma l’Erɔpɛ ndo wakadjasɛ lo Mbalasa ka Diolelo kɛmɔtshi. Aha la ntshimbatshimba, wakatatɛ nkamba olimu aha tsho dia sakɛ wanɛ waki la paa l’alemba l’ɔtɛ wa didimu dia nkɛtɛ, koko ndo dia mbakimanyiya dia ndɔshana l’awui wakaatshindjaka wɛɔngɔ.

Womoto ɔmɔtshi lelɛwɔ Uttara akate woho wakayaokaka anto efula ɔnɛ: “Didimu dia nkɛtɛ diaki wolo efula ndo diakasha wɔma. Koko l’ɔkɔngɔ, takayaoke suke suke la nkumbo kaso ka lo nyuma ndeka woho wakiso ntondo.” Eelo, didimu dia nkɛtɛ kokitshakitsha ngandji kele l’ekambi waki Jehowa otsha le nde ndo lam’asawɔ. Koko diɔ diakakeketsha ngandji kɛsɔ.