ƆKƆNDƆ 3

Pami ka ntondo la omoto la ntondo

KAKƆNA kambotshikitana l’osato ɔnɛ na? Ele anto wambotanema lɔkɔ. Pami ka ntondo la omoto la ntondo mbewɔ. Akâtonge na? Nzambi mbakâtonge. Onde wɛ mbeyaka lokombo lande? Jehowa mbele lokombo lande. Ndo pami la omoto wakayelamɛka ɔnɛ: Adama la Eva.

Nganɛ mbakatonge Jehowa Adama. Nde akɔshi ditshu dia kɛtɛ ko akadikenge demba diaha l’ɛkɔmɔ, demba dia pami. Ko l’ɔkɔngɔ, nde akafufe lumu l’ɛhɛmbɛ wa pami, ko Adama akayala la lɔsɛnɔ.

Jehowa Nzambi aki l’olimu wa mbisha Adama. Nde akawosha ɔkɛndɛ wa mbɔlɛ oseka nyama tshɛ lokombo. Adama akahombe ndjishishima ntondo ka nde tana nkombo yosunganyi layɔ ɔlɔlɔ. Lam’akandɔlɛka nyama nkombo, nde akɛnyi dikambo dimɔtshi. Onde na, wɛ mbodieyaka?

Nde akɛnyi dia nyama tshɛ yakikɔ wadi l’omi. Ɔnkɔnɛ, papa ndjɔvu akikɔ kâmɛ la mama ndjɔvu ndo papa kimbwe kâmɛ la mama kimbwe. Koko Adama kondjala l’onto lakakoke monga wadiɛnde. Diɔ diakɔ diakalasha Jehowa Adama djɔ ya wolo ko nde mbɔsa weka oma lo lohandju lakinde. La weka akɔ mbakandatongɛ Adama omoto, ko nde akayokoma wadiɛnde.

Nde ɔngɛnɔngɛnɔ waki la Adama etena kɛsɔ lee! Ndo ohokanyiya ɔngɛnɔngɛnɔ waki la Eva dia nde monga la lɔsɛnɔ l’ekambɔ ka dimɛna ka ngasɔ! Kakianɛ, vɔ kokaka mbota ana ndo mbidjasɛ l’ɔngɛnɔngɛnɔ kâmɛ.

Lolango laki Jehowa aki dia Adama la Eva wayale la lɔsɛnɔ pondjo pondjo. Nde akalange dia vɔ konya kɛtɛ k’otondo dimɛna di’efula oko ekambɔ k’Ɛdɛna. Ande ɔngɛnɔngɛnɔ wakahombe ndjâla la Adama nde la Eva lam’akaweye dikambo sɔ lee! Onde wɛ otɔngɛnangɛna dia mbisha lonya lo kamba olimu akɔ wa mbetɛ kɛtɛ k’otondo ekambɔ ka dimɛna oka? Koko ɔngɛnɔngɛnɔ waki Adama la Eva aki tshenyitenyi. Tɔsɛdingole lande na.

Osambu 83:18; Etatelu 1:​26-31; 2:​7-25.