ƆKƆNDƆ 2
Ekambɔ ka dimɛna efula
OHENDA woho waya kɛtɛ! Ande dimɛna diayatɔ lɛɛ! Ohenda adiyo, alɛmbɔlɛmbɔ, etamba ndo wa nyama. Lende atanema ndjɔvu la dimbwe?
Woho akɔna wakasalema ekambɔ ka dimɛna kɛnɛ? Tênde woho wakatɔlɔngɔsɔlɛ Nzambi kɛtɛ.
Ntondo, Nzambi akakilɔtsha adiyo w’ɛlɛsɛlɛsɛ. Ndo nde akatonge totambatamba tshɛ ta totshitshɛ, tohoka ndo etamba. Weoho wa tombatomba sɔ tshɛ kimanyiyaka dia kietɛ dimɛna. Koko, tombatomba diakɔ salaka akambo akina oleki lâsɔ. Efula l’atei adiɔ toshaka mbo ya ndɛ ya waɛndjɛ w’amɛna.
L’ɔkɔngɔ, Nzambi akayotongaka nse dia yɔ sɛnaka l’ashi ndo tofudu dia tɔ fumboka l’olongo. Nde akatonge mfɔ, tonyawu ndo mfalo; nyama ya weke ndo ya totshitshɛ. Nyama yakɔna yatongaka lo ngelo na? Onde sho hatɔngɛnangɛna nɛ dia Nzambi akatotongɛ diangɔ sɔ tshɛ?
L’ɔkɔngɔ diko, Nzambi akayɔlɔngɔsɔlaka lɛkɛ lɔmɔtshi la kɛtɛ lo yoho ya lânde. Lɛkɛ lakɔ, nde akalielɛka ɔnɛ ekambɔ k’Ɛdɛna. Tɔ kaki kokele l’akambo tshɛ. Oseka ɛngɔ tshɛ kaki lɔkɔ kaki dimɛna efula. Ndo lolango la Nzambi aki dia kɛtɛ k’otondo kayale oko ekambɔ kɛsɔ.
Toshishime nto osato w’ekambɔ kɛnɛ. Onde wɛ mbeyaka ɛngɔ kakɛnyi Nzambi ɔnɛ tɔ kema lɔkɔ? Ɛsɔ tokiende.