ƆKƆNDƆ 1

Nzambi Ambotatɛ La Ntonga Diangɔ

DIANGƆ di’amɛna tshɛ diele laso ndja oma le Nzambi. Nde akatonge wonya dia tosha osase la yanyi, ndo ngɔndɔ la tɔ̂tɔ dia sho kondja wɛnɛkɛdi l’otsho. Ndo Nzambi akatonge kɛtɛ dia sho mbidjasɛ lɔkɔ.

Koko wonya, ngɔndɔ la tɔ̂tɔ ndo kɛtɛ komonga diangɔ dia ntondo diakatonge Nzambi. Onde wɛ mbeyaka ditongami dia ntondo? Nzambi akatonge ntondo anto wɔfɔnyi lande. Sho hatokoke mɛna anto akɔ, oko weso hatokoke mɛna Nzambi. Lo Bible, anto akɔ asɔ mbelamɛka ɔnɛ andjelo. Nzambi akatonge andjelo dia vɔ mbidjasɛ lande l’olongo.

Ondjelo wa ntondo wakatonge Nzambi akatshikitana l’akina tshɛ. Nde aki Ɔna Nzambi l’enondo, ndo nde akakambe la She olimu. Nde akakimanyiya Nzambi dia ntonga diangɔ dikina tshɛ. Nde akakimanyiya Nzambi dia tonga wonya, ngɔndɔ, tɔ̂tɔ ndo kɛtɛ yaso nyɛ.

Ngande waki kɛtɛ nshi shɔ na? L’etatelo ndoko onto lakakoke mbidjasɛ la kɛtɛ. Ndoko ɛngɔ kakikɔ onyake paka ashi a wake ato mbaki lâdiko dia kɛtɛ. Koko Nzambi akalange di’anto mbidjasɛ la kɛtɛ. Omalɔkɔ, nde akayotatɛka la tɔlɔngɔsɔlɛ dihole. Akandasale na?

Eelo, ntondotondo, kɛtɛ kaki l’ohomba w’osase. Omalɔkɔ, Nzambi akatonge osase waya oma lo wonya dia ngamula kɛtɛ. Nde akasale woho w’osase tshikitanyaka otsho la yanyi. L’ɔkɔngɔ diko, Nzambi akayotondjaka kɛtɛ oma l’ashi a wake.

Ntondo, ndoko ɛngɔ kaki la kɛtɛ. Tɔ kaki oko osato wɛnayɛ lanɛ ɔnɛ. Alɛmbɔlɛmbɔ, etamba kana wa nyama kondjala. Ndoko lose lakikɔ l’ashi a wake. Nzambi aki l’olimu efula wa sala woho wa kɛtɛ monga edjaselo ka dimɛna le wa nyama ndo le anto.

Jeremiya 10:12; Kolosai 1:​15-17; Etatelu 1:​1-10.