ƆKƆNDƆ 8
Ahangamende la kɛtɛ
NAKA wɛ ambohomana la dikongote dimɔtshi di’onto diele ɔtɛ ande kokaka munda lokala la luudu lakiyɛ, lokanyi lakɔna layonga layɛ na? Onto ɔsɔ ayohomba monga dihangamende! Nshi mɔtshi, ahangamende wakikɔ la kɛtɛ. Bible mɛnyaka dia, andjelo w’oma l’olongo mbaki washɛwɔ. Ko woho akɔna wakakoke dui sɔ salema na?
Ohɔ dia olimu waki Satana, ondjelo wa kɔlɔ, aki dia fukutanya tsho. Nde akahembe kotola kânga andjelo waki Nzambi dia vɔ koma atshi wa kɔlɔ. L’edjedja ka wonya, amɔtshi a l’atei wa andjelo akɔ wakatatɛ mbetawɔ Satana. Vɔ wakatakɔ olimu wakawasha Nzambi dia vɔ ntsha l’olongo. Wakayasalɛ vɔamɛ alemba w’anto ko wakaye la kɛtɛ. Onde wɛ mbeyaka lande na?
Bible mbutaka ɔnɛ dikambo dia an’a Nzambi akɔ asɔ wakɛnyi amato w’elangala efula la kɛtɛ ko wakalange ndjodjasɛ la wɔ. Omalɔkɔ, vɔ wakaye la kɛtɛ ko wakayotshuka amato akɔ. Bible mbutaka di’ɔsɔ aki dikambo dia kɔlɔ nɛ dia Nzambi akatonge andjelo dia vɔ mbidjasɛka l’olongo.
Lam’akote andjelo akɔ la wadiɛwɔ ana, an’akɔ wakatshikitana l’akina. Ntondo, kɔmɛnamaka ɔnɛ otshikitanelo wekɔ. Koko, lam’akawatolaka, wakatanunaka paka nuna tsho, ndo weolo awɔ akatahamaka paka pama tsho polo ndo vɔ ndjokoma ahangamende.
Ahangamende akɔ waki anto wa kɔlɔ. Ndo lam’ele vɔ waki akongote ndo akanga a weolo, wakalangaka paka salɛ anto awui wa kɔlɔ. Wakatshaka la wolo awɔ dia sokoya anto tshɛ dia vɔ ndjâla atshi wa kɔlɔ oko vɔ.
Ɛnɔka akavu, koko pami kɛmɔtshi k’ɔlɔlɔ akikɔ nto la kɛtɛ. Pami kakɔ lokombo lande Nɔa. Nshi tshɛ, nde akatshaka paka kɛnɛ kakalangaka Nzambi dia nde ntsha.
Lushi lɔmɔtshi Nzambi akatɛ Nɔa dia etena kambokoka le Nde ka nde ndjaka anto wa kɔlɔ tshɛ. Koko Nzambi aki la dia shimbela Nɔa, nkumbo kande ndo nyama mɔtshi efula. Tênde kakianɛ woho wakasale Nzambi dikambo sɔ.