ƆKƆNDƆ 12
Anto wamboka luudu l’etangelo
ƐNƆNYI efula wambeta. Ana wa Nɔa wamboyota ana efula. Ndo anawɔ wambola ndo wamboyonga l’ana efula nto. Kakianɛ anto waya efula la kɛtɛ.
Ɔtɔi a l’atei w’anto asɔ aki kanula yaki Nɔa yakawelɛka Nimirɔdɛ. Nde aki mengênga ka kɔlɔ kakadiakaka ndo anto. Nimirɔdɛ akayakonya nto ndamɛ nkumekanga kolɛ anto akina. Nzambi konangaka Nimirɔdɛ.
Anto tshɛ lo nshi shɔ wakatɛkɛtaka ɔtɛkɛta ɔtɔi. Nimirɔdɛ akalange dia vɔ ndjâla olui ɔtɔi kele nde awaole. Omalɔkɔ, wɛ mbeyaka kɛnɛ kakandasale? Nde akatɛ anto dia vɔ mbika osomba ndo shaka ya luudu y’otale. Hɛnyi vɔ l’osato wasala atafadi.
Jehowa Nzambi kɔngɛnangɛna dia wokelo ɔsɔ. Nzambi akalange dia anto pandjɔnɛ ndo mbidjasɛ l’ahole tshɛ wa la kɛtɛ. Koko anto wakate vɔate: ‘Nyoye lanɛ! Toke osomba ndo luudu la woke kele tshoto yalɔ yakome polo l’olongo. Lâsɔ sho tayeyama efula!’ Anto wakayange lokumu lawɔ vɔamɛ, koko aha la Nzambi.
Omalɔkɔ, Nzambi akemadia olimu w’anto w’endana la wokelo wa luudu. Onde wɛ mbeyaka woho wakandasale? Lo shashimuya, nde akatɛkɛtsha anto ɛtɛkɛta wotshikitanyi, lo dihole dia ɔtɔi. Kem’edja wanɛ wakakaka hawoyokana. Diɔ diakɔ diakawelɛka osomba akɔ Babɛlɛ kana Babilɔna, kitshimudi ate: “Ofukutanu”.
Kakianɛ anto wakatatɛ monɔ oma lo Babɛlɛ. Olui w’anto watɛkɛta ɔtɛkɛta ɔtɔi wakahombe mbidjasɛ kâmɛ lo lɛkɛ lokina la kɛtɛ.