ƆKƆNDƆ 11
Ngolo ka ntondo
ONDE wɛ mbeyaka ɛngɔ ka ntondo kakasale Nɔa lam’akandatombe la nkumbo kande oma lo wâto a luudu? Nde akalambola Nzambi olambo kana oshasha. Wɛ kokaka mbowênda alambola olambo akɔ l’osato l’ɛse lanɛ. Nɔa akakimɔ oshasha ɔnɛ wa nyama dia mbisha Nzambi losaka lo woho wotshishande nkumbo kande oma lo shaka ya Mvula k’Elola.
Onde wɛ fɔnyaka dia Jehowa akangɛnangɛna olambo akɔ oka? Eelo, nde akangɛnangɛna. Ndo omalɔkɔ, nde akalake Nɔa dia nde halanyaki andja la Mvula k’Elola nto pondjo.
Kakianɛ kɛtɛ kamboshila la moma, ndo Nɔa la nkumbo kande wambotatɛ lɔsɛnɔ l’oyoyo l’andja wa wâto a luudu. Nzambi akâtshɔkɔla ndo akawatɛ ate: ‘Nyôtane, nyofulanele, nyolodia kɛtɛ.’
Koko l’ɔkɔngɔ diko, etena kayoyoka anto dikambo dia Mvula k’Elola, wayoyondama la wɔma dia woho wa mvula ka ngasɔ mbakomela nto. Diɔ diakɔ diakakimɔ Nzambi ɛngɔ kɛmɔtshi dia mboholaka anto daka diande dia nde halɔshaki Mvula k’Elola lo kɛtɛ k’otondo nto pondjo. Onde wɛ mbeyaka kɛnɛ kakandakimɔ dia mbaoholaka? Toko ngolo.
Ngolo mɛnamaka tena efula l’olongo etena katotombaka wonya naka mvula mala ndɔ. Ngolo kekɔ l’alangi w’amɛna efula. Onde wɛ ambɛnaka kɛmɔtshi? Wɛ ambɛna kɛnɛ kele l’osato ɔnɛ?
Nzambi akate ate: ‘Dimi lambolaka dia pondjo handjakaki anto ndo nyama la Mvula k’Elola nto. Dimi lambodja ngolo kami lo wange. Ko lam’ayotombaka ngolo, dimi layokiendaka ko layohɔ daka diami.’
Kakianɛ, etena kayoyɛna ngolo, ayoyohomba mbohɔ na? Mɛtɛ, wɛ ayohɔ daka diaki Nzambi dia nde halanyaki andja la Mvula k’Elola nto pondjo.